Yibani Munye Ngolimi Oluhlanzekile

“Lapho ngiyakunika abantu [“ukushintshela olimini oluhlanzekile,” “NW”], ukuze bonke babize igama likaJehova, bamkhonze nganhliziyonye.”—ZEFANIYA 3:9.

 1. Ingabe abantu bake bamuzwa uJehova uNkulunkulu ekhuluma?

ULIMI lukaJehova uNkulunkulu luhlanzekile. Kodwa ingabe abantu bake bamuzwa ekhuluma? Phela yebo! Lokho kwenzeka lapho iNdodana yakhe, uJesu Kristu, isemhlabeni emakhulwini angu-19 eminyaka adlule. Ngokwesibonelo, lapho uJesu ebhapathizwa, uNkulunkulu wazwakala ethi: “Lo uyiNdodana yami ethandekayo engithokozile ngayo.” (Mathewu 3:13-17) Lawo kwakungamazwi eqiniso elihlanzekile, azwiwa uJesu noJohane uMbhapathizi ngolimi lwabantu.

 2. Yini eboniswa ukubhekisela komphostoli uPawulu ‘ezilimini . . . zezingelosi’?

² Eminyakeni ethile kamuva umphostoli uPawulu ongumKristu wakhuluma “ngezilimi zabantu nezezingelosi.” (1 Korinte 13:1) Lokhu kubonisani? Phela, kubonisa ukuthi akubona abantu kuphela kodwa ngisho nabantu bomoya banalo ulimi nenkulumo! Yebo, uNkulunkulu nezingelosi abasebenzisi amazwi nolimi oluzwakalayo noluqondakalayo kithi lapho bekhuluma omunye nomunye. Ngani? Ngenxa yokuthi kudingeka umoya onjengalowo ozungeze umhlaba ukuze uthwale amaza omsindo wezwi angazwiwa futhi aqondwe ngabantu.

 3. Ulimi lwabantu lwasunguleka kanjani?

³ Ulimi lwabantu lwasunguleka kanjani? Abanye bathi okhokho bethu bashikashikeka bezama ukukhulumisana ngokuphendukela ekubhodleni nasekugwavumeni. Incwadi ethi Evolution (UMtapo Wezincwadi Zokuphila Kwemvelo) ithi: “Umuntu-nkawu cishe weminyaka eyisigidi edlule . . . ngokunokwenzeka wayechwephesha emisindweni ethile yokukhuluma.” Kodwa umhlaziyi wamagama odumile uLudwig Koehler wathi: “Inkulumo yabantu iyimfihlakalo; iyisipho saphezulu, isimangaliso.” Yebo, inkulumo yabantu iyisipho saphezulu, ngoba uNkulunkulu wanika umuntu wokuqala, uAdamu, ulimi. Ngokusobala kwakuyilolo ekugcineni olwabizwa ngokuthi isiHeberu. Lololimi lwalukhulunywa inzalo yamaIsrayeli ‘ka-Abrama umHeberu,’ inzalamizi ethembekile ekhokho wayo uShemi wayeyindodana yomakhi womkhumbi uNowa. (Genesise 11:10-26; 14:13; 17:3-6) Uma kubhekwa isibusiso sikaNkulunkulu esingokwesiprofetho kuShemi, kunengqondo ukuphetha ngokuthi ulimi lwakhe aluzange luthintwe ngokuthile uJehova uNkulunkulu akwenza ngokuyisimangaliso emakhulwini angu-43 eminyaka adlule.—Genesise 9:26.

 4. Wayengubani uNimrode, futhi wasetshenziswa kanjani uSathane uDeveli?

⁴ Ngalesosikhathi “umhlaba wonke wawunolimi lunye nokukhuluma kunye.” (Genesise 11:1) Ngalesosikhathi kwakunendoda okuthiwa uNimrode, “iphisi elinamandla ebusweni bukaJehova.” (Genesise 10:8, 9) Isitha esikhulu esingabonakali sesintu, uSathane, sasebenzisa uNimrode ngokukhethekile ukuba amise ingxenye yasemhlabeni yenhlangano kaDeveli. UNimrode wayefuna ukuzenzela igama, futhi lesosimo sengqondo sokuqhosha sangena nakubalandeli bakhe, abaqalisa umsebenzi okhethekile wokwakha ezweni laseShineyari. NgokukaGenesise isahluko 11, ivesi 4, bathi: “Wozani, asakhe umuzi nombhoshongo osiqongo sawo sisezulwini, sizenzele igama, funa sihlakazeke ebusweni bomhlaba wonke.” Lowomsebenzi omelene nomyalo kaNkulunkulu ‘wokugcwalisa umhlaba’ waphela lapho uJehova esanganisa ulimi lwalezozihlubuki. “Kanjalo,” kusho ukulandisa kweBhayibheli, “uJehova wabahlakazela emhlabeni wonke, bephuma lapho; bayeka ukwakha umuzi.” (Genesise 9:1; 11:2-9) Lowomuzi wabizwa ngokuthi iBabele, noma iBabiloni (okusho, “Ukusangana”), “ngoba lapho uJehova wasanganisa inkulumo yomhlaba wonke.”—Byington.

 5. (a) Yini eyanqandeka lapho uNkulunkulu esanganisa ulimi lwesintu? (b) Yini esingaphetha ngayo ngokuphathelene nolimi lukaNowa noShemi?

⁵ Lesosimangaliso—ukusanganiswa kolimi lwesintu olulodwa—saholela ekugcwaliseni umhlaba njengoba uNkulunkulu ayeyale uNowa, futhi savimbela noma yiliphi icebo uSathane okungenzeka wayenalo lokumisa ukukhulekelwa kwakhe okuhlangene nokungcolile okwakuyokwenziwa abantu ababehlubuke eNkosini enguMbusi wezulu nomhlaba. Yiqiniso, ngokuqhuba inkolo yamanga nganoma yiluphi uhlobo, abantu baba yizisulu zikaDeveli, futhi babekhonza amademoni lapho benza onkulunkulu nonkulunkulukazi, bebanikeza amagama ngezilimi zabo ezihlukahlukene, futhi bebakhulekela. (1 Korinte 10:20) Kodwa isinyathelo esathathwa owukuphela kukaNkulunkulu weqiniso eBabele savimbela ukwakheka kwenkolo eyodwa yamanga ehlangene enikeza uDeveli ukukhulekela lokho ngokusobala ayekunxanela. Yebo, uNowa olungileyo nendodana yakhe uShemi babengazange basanganiswe kuleyonhlekelele yasezweni laseShineyari. Ngakho kungaphethwa ngokunengqondo ngokuthi ulimi lwabo lwahlala luyilolo olwalukhulunywa uAbrama (noma uAbrahama) othembekile—ulimi uNkulunkulu akhuluma ngalo kumuntu onguAdamu ensimini yase-Edene.

 6. Ngosuku lwePentekoste lika-33 C.E., uJehova wakubonisa kanjani ukuthi angadlulisela ikhono lokukhuluma ngezilimi?

⁶ UJehova, owasanganisa ulimi lwesintu lokuqala, anganikeza futhi ikhono lokukhuluma ngezilimi. Phela, wenza lokho kanye ngosuku lwePentekoste ngonyaka ka-33 weSikhathi sethu Esivamile! NgokwezEnzo 2:1-11, ngalesosikhathi abalandeli bakaJesu abangaba ngu-120 babehlangene ekamelweni eliphezulu eJerusalema. (IzEnzo 1:13, 15) Ngokungazelelwe, kwaba nenhlokomo evela ezulwini “kwangathi eyokuvunguza komoya onamandla.” “Kwabonakala izilimi ezahlukeneyo kungathi ezomlilo” futhi zasakazeka phakathi kwabo. Ngaso lesosikhathi abafundi “base begcwala bonke uMoya oNgcwele, baqala ukukhuluma ngezinye izilimi, njengalokho uMoya wabapha ukuphumisela.” Ngalezozilimi ezanikezwa ngokwaphezulu, bakhuluma “ngemisebenzi emikhulu kaNkulunkulu.” Futhi yeka ukuthi kwaba isimangaliso esingakanani njengoba amaJuda namaproselithe ezilimi ezihlukahlukene, avela ezindaweni eziqhele kakhulu njengaseMesopotamiya, eGibithe, eLibiya, naseRoma, eqonda isigijimi esinikeza ukuphila!

Ulimi UNkulunkulu Alunikezayo Namuhla!

 7. Yimaphi amathemba ayeyoba khona ukuba kwakunolimi olulodwa kuphela olwalukhulunywa futhi luqondakala emhlabeni wonke?

⁷ Njengoba uNkulunkulu ekwazi ukudlulisela izilimi ezihlukahlukene ngokuyisimangaliso, bekungeke yini kube okuhle kakhulu uma ubengenza kube nokwenzeka ukuba kukhulunywe futhi kuqondakale ulimi olulodwa kuphela emhlabeni wonke? Lokho bekungathuthukisa ukuqondana okwengeziwe phakathi komkhaya wesintu. Njengoba iWorld Book Encyclopedia ikubeka: “Ukuba bonke abantu babekhuluma ulimi olufanayo, izibopho ezingokwempucuko nezingokomnotho beziyoba ngezisondelene kakhudlwana, futhi ukuthula bekuyokwanda phakathi kwamazwe.” Nokho, cishe kuye kwasungulwa izilimi okungenani ezingu-600 emhlabeni wonke phakathi neminyaka edlule. Phakathi kwalezi, ulimi lwesiEsperanto luye lwaba olunamandla kunazo zonke ngoba luye lwafundwa abantu abacishe babe ngu-10 000 000 kusukela ekusungulweni kwalo ngonyaka ka-1887. Nakuba kunjalo, imizamo yabantu yokuhlanganisa isintu ngokusebenzisa ulimi olukhulunywa endaweni yonke ayikaze iphumelele. Eqinisweni, izinkinga eziningi ngokwengeziwe zibangela ukwahlukana kulelizwe njengoba ‘abantu ababi beqhubekela phambili ebubini.’—2 Thimothewu 3:13.

 8. Ngisho noma bekungase kusetshenziswe ulimi lwendawo yonke ezweni lanamuhla, yini ebiyolokhu ikhona, futhi ngani?

⁸ Ngokwenkolo, kunokusangana okukhulu. Kodwa akufanele yini sikulindele lokhu, njengoba incwadi yeBhayibheli yesAmbulo ibiza umbuso wezwe wenkolo yamanga ngokuthi “iBabiloni elikhulu”? (IsAmbulo 18:2) Yebo, ngoba elithi “Babiloni” lisho “Ukusangana.” Ngisho noma ulimi olusungulwe abantu noma ulimi lwemvelo njengesiNgisi, isiFulentshi, isiJalimane, noma isiRashiya belungamukelwa njengolimi lwendawo yonke ezweni lanamuhla, ukwehlukana bekuyolokhu kukhona ngokwenkolo nangezinye izindlela. Ngani? Ngoba “izwe lonke lisemandleni omubi,” uSathane uDeveli. (1 Johane 5:19, NW) Uyibo kanye ubugovu, futhi uhahela ngobugovu ukukhulekelwa yiso sonke isintu, njengoba enza ezinsukwini zikaNimrode noMbhoshongo waseBabele. Phela, ulimi lwendawo yonke olukhulunywa abantu abanesono lungase lunikeze ngisho noSathane ithuba lokumisa ukukhulekelwa kukaDeveli okuhlangene! Kodwa uJehova akasoze akuvumela lokho; empeleni, ngokushesha uzoqeda yonke inkolo yamanga, ephefumlelwe uDeveli.

 9. Abantu bazo zonke izizwe nezinhlanga benziwa kanjani babe munye manje?

⁹ Nokho, iqiniso elimangalisayo liwukuthi abantu abalungileyo bazo zonke izizwe nezinhlanga bayahlanganiswa ngisho namanje. Lokhu kwenzeka ngokokuhlela kukaNkulunkulu, nangenxa yokukhulekelwa kwakhe. Namuhla, uNkulunkulu ukwenza kube nokwenzeka ngabantu ukuba bafunde futhi bakhulume okuwukuphela kolimi oluhlanzekileyo emhlabeni. Futhi luwulimi olukhulunywa endaweni yonke ngempela. Ngempela, uJehova uNkulunkulu ufundisa abantu abaningi bazo zonke izizwe zomhlaba lolulimi oluhlanzekile namuhla. Lokhu kuwukugcwaliseka kwesithembiso sikaNkulunkulu esingokwesiprofetho ngomprofethi wakhe nofakazi uZefaniya: “Ngokuba ngalesosikhathi ngiyakunikeza abantu ukushintshela olimini oluhlanzekile [ngokwezwi nezwi, “udebe oluhlanzekile”], ukuze bakwazi ukubiza egameni likaJehova, ukuze bamkhonze nganhliziyonye.” (Zefaniya 3:9, NW) Luyini lolulimi oluhlanzekile?

Ukuchazwa Kolimi Oluhlanzekile

10. Luyini ulimi oluhlanzekile?

¹⁰ Ulimi oluhlanzekile luyiqiniso likaNkulunkulu elitholakala eZwini lakhe siqu, imiBhalo Engcwele. Ikakhulukazi luyiqiniso eliphathelene noMbuso kaNkulunkulu, oyoletha ukuthula nezinye izibusiso esintwini. Lolulimi oluhlanzekile luqeda amaphutha angokwenkolo nokukhulekela kwamanga. Luhlanganisa bonke abalukhulumayo ekukhulekeleni okuhlanzekile, okucocekile, nokuhle kukaNkulunkulu ophilayo noweqiniso, uJehova. Namuhla, izilimi ezingaba ngu-3 000 zinjengomgoqo ekuqondeni, futhi amakhulu ezinkolo zamanga asanganisa isintu. Ngakho yeka ukuthi sijabula kanjani ngokuthi uNkulunkulu unikeza abantu ukushintshela kulolulimi oluhlanzekile, olumangalisayo!

11. Ulimi oluhlanzekile luye lwabenzelani abantu bazo zonke izizwe nezinhlanga?

¹¹ Yebo, lolulimi oluhlanzekile lwaziwa abantu abavela kuzo zonke izizwe nezinhlanga. Njengoba luwukuphela kolimi oluhlanzekile lweqiniso emhlabeni, lusebenza njengamandla amakhulu ahlanganisayo. Lwenza bonke labo abalukhulumayo ukuba “babize egameni likaJehova, ukuze bamkhonze nganhliziyonye,” noma ngokwezwi nezwi, “ngahlombe linye.” Ngaleyondlela bakhonza uNkulunkulu “ngokuvumelana kunye,” “ngokuvumelana ngazwi linye nangehlombe elilodwa elinobunye.” (The New English Bible; The Amplified Bible) Inguqulo kaSteven T. Byington ifundeka kanje: “Khona-ke [kusho uJehova uNkulunkulu] ngiyoguqula izindebe zabo bonke abantu zibe ezicocekile, ukuze bonke babize egameni likaJehova futhi babambisane enkonzweni yakhe.” Ukubambisana okunjalo enkonzweni kaNkulunkulu kwabakhuluma izilimi ezihlukahlukene emhlabeni wonke, kutholakala phakathi koFakazi BakaJehova kuphela. Emazweni angu-212 namuhla, abangaphezu kwezigidi ezine balabamemezeli boMbuso bashumayela izindaba ezinhle ngezilimi eziningi zabantu. Nokho, oFakazi ‘bakhuluma-zwilinye futhi baphelelisiwe emqondweni munye nasekuboneni kunye.’ (1 Korinte 1:10) Lokhu kunjalo ngoba, kungakhathaliseki ukuthi bakuphi emhlabeni, bonke oFakazi BakaJehova bakhuluma ulimi olulodwa oluhlanzekile, kube udumo nenkazimulo kuYise osezulwini.

Funda Ulimi Oluhlanzekile Manje!

12, 13. (a) Kungani kufanele ukukhathalele ukukhuluma ulimi oluhlanzekile? (b) Kungani amazwi akuZefaniya 3:8, 9 ebaluleke kangaka namuhla?

¹² Kungani kufanele ukhathazeke ngokukhuluma ulimi oluhlanzekile? Phakathi kokunye, kungenxa yokuthi ukuphila kwakho kuxhomeke ekulufundeni nasekulukhulumeni. Ngaphambi nje kokuba uNkulunkulu athembise ‘ukunikeza abantu ukushintshela olimini oluhlanzekile,’ waxwayisa: “Ngilindeleni, usho uJehova, kuze kube-lusuku engivuka ngalo ukuba ngiphange, ngokuba kuyisinqumo sami ukubutha izizwe ukuba ngiqoqe imibuso, ukuze ngithulule phezu kwabo intukuthelo yami, lonke ulaka lwami oluvuthayo, ngokuba wonke umhlaba uyakudliwa ngumlilo womhawu wami.”—Zefaniya 3:8.

¹³ Lawomazwi eNkosi enguMbusi uJehova akhulunywa okokuqala emakhulwini angu-26 eminyaka adlule kwaJuda, inhloko-dolobha yakhona okwakuyiJerusalema. Kodwa leyonkulumo ngokukhethekile yayibhekisele osukwini lwethu ngenxa yokuthi iJerusalema laliwumfuziselo weLobukholwa. Futhi isikhathi sethu, kusukela uMbuso kaNkulunkulu wamiswa ngo-1914, siwusuku lukaJehova lokubutha izizwe nokuhlanganisa imibuso. Uye waziletha ndawonye zonke ngaphansi kokunakekela kwakhe ngomsebenzi omkhulu wokufakaza. Nazo, lokhu kuye kwazishukumisela ekumelaneni nenjongo yakhe. Nokho, uJehova uNkulunkulu ngomusa wenza ukuba abantu abavela kuzo zonke lezizwe babe munye ekukhulumeni lolulimi oluhlanzekile. Ngalo, bonke abafuna ukuphila ezweni lakhe elisha elithenjisiwe bangase bamkhonze ngobunye ngaphambi kokuba zonke izizwe zibhujiswe ekubonakalisweni kolaka lwaphezulu okunjengomlilo “ekulweni kosuku olukhulu lukaNkulunkulu uMninimandla onke,” ngokuvamile okubizwa ngokuthi iArmagedoni. (IsAmbulo 16:14, 16; 2 Petru 3:13) Ngokujabulisayo, labo abakhuluma lolulimi oluhlanzekile futhi ababiza egameni likaJehova ngokholo njengabakhulekeli beqiniso abamunye bayojabulela isivikelo saphezulu phakathi nokudlondlobala kwaleyonhlekelele yezwe. UNkulunkulu uyobangenisa ezweni elisha bephephile, lapho ekugcineni kuyoba ulimi oluhlanzekile kuphela olusezindebeni zaso sonke isintu.

14. NgoZefaniya, uNkulunkulu wabonisa kanjani ukuthi ukusinda esiphelweni salesimiso sezinto kudinga ukuthatha isinyathelo esisheshayo?

¹⁴ Ngomprofethi wakhe uZefaniya, uJehova ukwenza kucace ukuthi labo abanethemba lokusinda ekupheleni kwalesimiso sezinto esibi samanje kumelwe bathathe isinyathelo esisheshayo. NgokukaZefaniya 2:1-3, uNkulunkulu uthi: “Buthanani, yebo, buthana, sizwe esingenamahloni, isimiso singakazali—lolusuku [‘lungakadluli,’ NW] njengamakhoba—lungakanehleli ulaka oluvuthayo lukaJehova, lungakafiki phezu kwenu usuku lolaka lukaJehova. Funani uJehova nina nonke-bathobekileyo bomhlaba enisebenzile ukwahlulela kwakhe; funani ukulunga; funani ukuthobeka; mhlawumbe niyakusitshekelwa ngosuku lolaka lukaJehova.”

15. (a) Kwakuyini ukugcwaliseka kokuqala kukaZefaniya 2:1-3? (b) Ubani owasinda ekukhipheni kukaNkulunkulu isahlulelo phezu kukaJuda, futhi yini eyofana nalokhu kusinda osukwini lwethu?

¹⁵ Lawomazwi agcwaliseka okokuqala kuJuda wasendulo neJerusalema. Abantu bakwaJuda abonayo abazange basabele kahle ekunxuseni kukaNkulunkulu, njengoba kwaboniswa ukukhipha kwakhe isahlulelo phezu kwabo ezandleni zabaseBabiloni ngonyaka ka-607 B.C.E. Njengoba uJuda ‘ayeyisizwe esingenamahloni’ phambi kukaNkulunkulu, kanjalo eLobukholwa liye laba “isizwe” esingenamahloni phambi kukaJehova. Nokho, ngenxa yokulalela izwi likaNkulunkulu, abaseJudiya abathile nabanye basinda, phakathi kwabo kwakunomprofethi othembekile kaJehova uJeremiya. Abanye abasinda kwakungumTopiya ogama lakhe linguEbedi-Meleki nenzalo kaJonadaba. (Jeremiya 35:18, 19; 39:11, 12, 16-18) Ngokufanayo namuhla, “isixuku esikhulu” ‘sezinye izimvu’ zikaJesu esiqoqwa siphuma kuzo zonke izizwe siyosinda eArmagedoni singene ezweni elisha likaNkulunkulu. (IsAmbulo 7:9; Johane 10:14-16) Kuphela yilabo abafunda futhi bakhulume ulimi oluhlanzekile abayoba abasindile abajabulayo.

16. Yini okumelwe umuntu ayenze ukuze asitshekelwe “ngosuku lolaka lukaJehova”?

¹⁶ Njengoba kwakuyisimiso sikaJehova ukuba uJuda neJerusalema kuqothulwe, kanjalo eLobukholwa kumelwe libhujiswe. Empeleni, ukubhujiswa kwayo yonke inkolo yamanga kuseduze, futhi labo abafisa ukusinda kumelwe bathathe isinyathelo ngokushesha. Kumelwe benze kanjalo “lolosuku [“lungakadluli,” NW] njengamakhoba,” apheshulwa umoya ngokushesha, njengalapho izinhlamvu ezibhuliwe zeliwa esibuyeni sokubhula. Ukuze sikhululwe olakeni lukaNkulunkulu, kumelwe sikhulume lolulimi oluhlanzekile futhi sisabele esixwayisweni saKhe lungakafiki phezu kwethu ulaka lukaJehova oluvuthayo. Osukwini lukaZefaniya nanamuhla, abathobekileyo bafuna uJehova uNkulunkulu, kanye nokulunga nokuthobeka. Ukufuna kwethu uJehova kusho ukumthanda ngayo yonke inhliziyo yethu, umphefumulo, ingqondo, namandla. (Marku 12:29, 30) “Mhlawumbe [labo abenze njalo ba]yakusitshekelwa ngosuku lolaka lukaJehova.” Kodwa kungani lesiprofetho sithi “mhlawumbe”? Kungenxa yokuthi insindiso ixhomeke ekuthembekeni nasekukhuthazeleni. (Mathewu 24:13) Labo abazivumelanisa nezindinganiso zikaNkulunkulu zokulunga futhi abaqhubeka bekhuluma ulimi oluhlanzekile bayositshekelwa ngosuku lolaka lukaJehova.

17. Imiphi imibuzo okusamelwe siyicabangele?

¹⁷ Njengoba usuku lolaka lukaJehova luseduze futhi insindiso ixhomeke ekufundeni nasekusebenziseni lolulimi oluhlanzekile, manje yisikhathi sokuhileleka ngokujulile ekulutadisheni nasekulukhulumeni. Kodwa umuntu angalufunda kanjani lolulimi oluhlanzekile? Futhi ungazuza kanjani ngokulukhuluma?

Khuluma Ulimi Oluhlanzekile Futhi Uphile Phakade!

“Funani uJehova...funani ukulunga; funani ukuthobeka; mhlawumbe niyakusitshekelwa ngosuku lolaka lukaJehova.”—ZEFANIYA 2:3.

 1. (a) Yiziphi izindlela ezisetshenziswa abafundi ukuze bafunde ulimi okungelona olwabo? (b) Kungani kufanele ukhulume ulimi oluhlanzekile?

ABAFUNDI bangase bafunde ulimi olusha ngokusebenzisa indlela yokuhlelwa kolimi noma indlela yolimi olukhulunywayo. Ngendlela yokuhlelwa kolimi, ngokuvamile basebenzisa izincwadi futhi bafunde imithetho yokuhlelwa kwalololimi. Ngendlela yolimi olukhulunywayo, balingisa imisindo namazwi akhulunywa umfundisi wabo. Zombili lezindlela ziyasetshenziswa ekufundeni “ulimi oluhlanzekile.” Futhi kubalulekile ukuba lolulimi silukhulume uma sinethemba ‘lokusitshekelwa ngosuku lolaka lukaJehova.’—Zefaniya 2:1-3; 3:8, 9.

 2. Singakufunda kanjani lokho okungase kubizwe ngokuthi imithetho yokuhlelwa kolimi yolimi oluhlanzekile?

² Incwadi eyinhloko esetshenziswayo ekufundeni ulimi oluhlanzekile yiBhayibheli. Ukulifunda ngenkuthalo kanye nezincwadi ezisekelwe eBhayibhelini kukufundisa lokho okungase kubizwe ngokuthi imithetho yokuhlelwa kolimi yolimi oluhlanzekile. Isifundo seBhayibheli sasekhaya esiqhutshwa omunye woFakazi BakaJehova siyisiqalo esihle. Kulabo asebezinikezele kuNkulunkulu kakade, sidingekile isifundo sasikhathi sonke nesenkuthalo semiBhalo. Kodwa ingabe zikhona izindlela eziphumelela ngokukhethekile zokufunda ulimi oluhlanzekile? Futhi zinzuzo zini ezitholakala ngokulukhuluma?

Indlela Yokufunda Ulimi Oluhlanzekile

 3. Iyiphi indlela eyodwa yokufunda ulimi oluhlanzekile?

³ Enye indlela yokufunda ulimi oluhlanzekile iwukuhlobanisa amaqiniso owafundayo namaphuzu osuwazi kakade, njengoba nomfundi wolimi engase ahlobanise imithetho yokuhlelwa kolimi ehlukahlukene ngokuthuthukayo. Ngokwesibonelo, ngesinye isikhathi kungenzeka ukuba wawazi ukuthi uJesu Kristu uyiNdodana kaNkulunkulu, kodwa wawazi okuncane ngemisebenzi yakhe. Kusukela ngalesosikhathi, ukutadisha iBhayibheli kungenzeka ukuba kwakufundisa ukuthi uKristu manje useyabusa njengeNkosi yasezulwini nokuthi phakathi nokuBusa kwakhe Kweminyaka Eyinkulungwane, isintu esilalelayo siyolethwa ekupheleleni. (IsAmbulo 20:5, 6) Yebo, ukuhlobanisa imiqondo emisha naleyo osuyazi kakade kuthuthukisa ukuqonda kwakho ulimi oluhlanzekile.

 4. (a) Iyiphi enye indlela yokufunda ‘imithetho yokuhlelwa kolimi’ yolimi oluhlanzekile, futhi yikuphi ukulandisa kweBhayibheli okusetshenzisiwe ukuze kuboniswe lokhu? (b) Yini eyenzeka lapho uGideyoni namadoda akhe angamakhulu amathathu bethatha isinyathelo? (c) Ukulandisa okuphathelene noGideyoni kufundisa siphi isifundo?

⁴ Enye indlela yokufunda ‘imithetho yokuhlelwa kolimi’ yolimi oluhlanzekile iwukuzibona ngeso lengqondo izenzakalo ezingokweBhayibheli. Ngokwesibonelo: Zama ‘ukubona nokuzwa’ ukulandisa okulotshwe kubAhluleli 7:15-23. Bheka! Umahluleli ongumIsrayeli uGideyoni uhlukanise amabutho akhe aba amaviyo amathathu yilelo nalelo linamadoda ayikhulu. Ebumnyameni, ehla buthule eNtabeni iGilibowa futhi ahaqa ikamu labakwaMidiyani abalele. Ingabe laba abangamakhulu amathathu bahlome baphelela? Hhayi ngokwezempi. Phela, omakad’ ebona kwezempi abaqhoshayo bangabahleka usulu uma bengababona! Indoda ngayinye iphethe kuphela uphondo, imbiza enkulu yamanzi, nobhaqa olufakwe kuleyombiza. Kodwa lalela! Lapho enikezwa uphawu, amadoda ayikhulu anoGideyoni akhalisa izimpondo zawo bese ephihliza izimbiza zawo zamanzi. Amanye amaIsrayeli angamakhulu amabili nawo enza okufanayo. Njengoba wonke ephakamisela phezulu izimbaqa zawo ezilanguka amalangabi, uyawezwa ememeza: “Inkemba kaJehova nekaGideyoni.” Yeka ukuthi lokhu kubathusa kanjani abakwaMidiyani! Bayadiyazela bephuma ematendeni abo, amehlo agcwele ubuthongo agqolozela ngokwesaba amalangabi alangukayo akhanyise izithunzi futhi abangele ukwesaba okuphathelene nezinkolelo-ze. Njengoba abakwaMidiyani beqala ukubaleka, amadoda kaGideyoni ayaqhubeka nokushaya amacilongo awo, futhi uNkulunkulu wenza ukuba izitha zawo zilwe zodwa. Yeka isifundo esinamandla solimi oluhlanzekile! UNkulunkulu angazikhulula izinceku zakhe ngaphandle kwamandla abantu ezempi. Ngaphezu kwalokho, “uJehova akayikushiya abantu bakhe ngenxa yegama lakhe elikhulu.”—1 Samuweli 12:22.

 5. Imihlangano yobuKristu ingasiza kanjani ekulolongeni inkulumo yethu?

⁵ Lapho abafundi befundiswa ulimi abangalwazi ngendlela yolimi olukhulunywayo, bazama ukuphindaphinda imisindo namazwi omfundisi ngokuyikho. Yeka amathuba amahle akhona okukhuluma ulimi oluhlanzekile emihlanganweni yobuKristu! Lapho, sizwa abanye bekhuluma ngalololimi lwamaqiniso angokomBhalo, futhi nathi singase sibe nelungelo lokuphendula ngokwethu. Ingabe sesaba ukuthi singase sisho okuthile okuyiphutha? Lokhu makungasikhathazi neze, ngoba iphutha elilungiswa ngomusa umdala owengamele umhlangano onjengeSifundo SeNqabayokulinda samasonto onke lingayilolonga inkulumo yethu. Ngakho-ke, yiba khona futhi uhlanganyele njalo emihlanganweni yobuKristu.—Heberu 10:24, 25.

Ukungena Kokungcola

 6. Kungani kunokungafani okungaka phakathi koFakazi BakaJehova nezinhlangano ezingokwenkolo zeLobukholwa?

⁶ Labo abamemezela injongo kaJehova nabazisa ngoMbuso wakhe wasezulwini bakhuluma ulimi oluhlanzekile njengoFakazi bakhe. Benza igama lakhe laziwe futhi bamkhonza “nganhliziyonye,” noma ngokuvumelana kunye. (Zefaniya 3:9) Nakuba izinkolo zeLobukholwa zinalo iBhayibheli, azilukhulumi ulimi oluhlanzekile noma zibize egameni likaJehova ngokholo. (Joweli 2:32) Azinaso isigijimi esinokuvumelana esisekelwe emiBhalweni. Ngani? Ngoba zibeka amasiko angokwenkolo, amafilosofi ezwe, nokuthembeka kwezombangazwe ngaphezu kweZwi likaNkulunkulu. Izinjongo zazo, amathemba, nezindlela zingezalelizwe elonakele.

 7. Yimuphi umehluko oboniswayo kweyoku-1 Johane 4:4-6 ophakathi koFakazi BakaJehova nezinkolo zamanga?

⁷ ELobukholwa—eqinisweni, wonke umbuso wezwe wenkolo yamanga—alilukhulumi ulimi olufanayo njengoba kwenza oFakazi BakaJehova. Ngokuthakazelisayo, kulabo abakhuluma ulimi oluhlanzekile, umphostoli uJohane wabhala: “NingabakaNkulunkulu . . . nibahlulile, ngokuba lowo okini mkhulu kunaye osezweni. Bona bangabezwe; ngalokho bakhuluma okwezwe, nezwe liyabezwa. Thina singabakaNkulunkulu; omaziyo uNkulunkulu uyasizwa, ongesiye okaNkulunkulu akasizwa.” (1 Johane 4:4-6) Izinceku zikaJehova ziye zabanqoba abafundisi bamanga ngenxa yokuthi uNkulunkulu, osebunyeni nabantu bakhe, “mkhulu kunaye [uDeveli] osezweni,” umphakathi wesintu ongalungile. Njengoba izihlubuki ‘zingezezwe’ futhi zinomoya walo omubi, ‘zikhuluma okwezwe, nezwe liyazizwa.’ Kodwa abantu abanjengezimvu balalela labo abangabakaNkulunkulu, beqaphela ukuthi abantu bakaJehova bakhuluma ulimi oluhlanzekile lweqiniso leBhayibheli elinikezwa ngenhlangano yakhe.

 8. Ungubani umuntu ongenamthetho?

⁸ Kwabikezelwa ukuhlubuka okukhulu, futhi ‘imfihlakalo yokungabi namthetho’ yayisisebenza kakade ekhulwini lokuqala leminyaka C.E. Ngokuhamba kwesikhathi, amadoda amukela—noma aqhwaga—izikhundla zokufundisa ebandleni afundisa izimfundiso eziningi zamanga. Ulimi lwawo lwalungahlanzekile neze. Ngakho kwavela isigaba ‘somuntu ongenamthetho,’ abefundisi beLobukholwa, abanamathele emasikweni enkolo yamanga, kumafilosofi ezwe, nasezimfundisweni ezingezona ezingokomBhalo.—2 Thesalonika 2:3, 7.

Ulimi Oluhlanzekile Luzwakala Emhlabeni Wonke

 9. Yiziphi izinguquko ezingokwenkolo ezazikhona phakathi nekhulu le-19 leminyaka?

⁹ Iqembu elincane kuphela labantu abesaba uNkulunkulu ‘elalwa ukulwa okunzima ngenxa yokholo olwanikelwa abangcwele.’ (Juda 3) Angatholakalaphi amakholwa anjalo? Phakathi namakhulu eminyaka, inkolo yamanga iye yagcina abantu abaningi besebumnyameni obungokomoya, kodwa uNkulunkulu wayebazi labo abambalwa ababenokuvunyelwa nguye. (2 Thimothewu 2:19) Khona-ke, phakathi nezinguquko zezentengiselwano, zezimboni, nezenhlalo zekhulu le-19 leminyaka, kwavela amazwi aba ngavelele engxubevangeni evamile yokusangana kwenkolo yamanga. Amaqembu amancane azama ukufunda izibonakaliso zezikhathi nokubikezela ukuza kwesibili kukaJesu, kodwa akuwona wonke ayekhuluma ulimi oluhlanzekile.

10. Yiliphi iqembu “lokuza kwesibili” elakhethwa uNkulunkulu ukuba likhulume ulimi oluhlanzekile, futhi kungani kunobufakazi bokuthi isandla sikaJehova besinalo?

¹⁰ Nokho, ngo-1879, kwacaca ukuthi yiliphi izwi elikhuluma “ngokubuya kwesibili” elalikhethwa uJehova ukuba likhulume ulimi oluhlanzekile njengoFakazi bakhe. Ngalesosikhathi iqembu elincane labatadisha iBhayibheli elaliholwa uCharles Taze Russell lalihlangana ePittsburgh, ePennsylvania, eU.S.A. Laliye laqiniseka ukuthi ukuza kwesibili kukaJesu kwakuyoqalisa ukuba khona kwakhe okungabonakali, ukuthi kwakuyofika isikhathi sosizi lwezwe, nokuthi lesikhathi sasiyolandelwa ukuBusa KukaKristu Kweminyaka Eyinkulungwane okwakuyobuyisela iPharadesi emhlabeni, nokuphila okuphakade kubantu abalalelayo. NgoJuly 1879 labaFundi BeBhayibheli baqala ukunyathelisa umagazini manje owaziwa ngokuthi INqabayokulinda. Kwasakazwa amakhophi angu-6 000 kuphela kamagazini wokuqala. Kodwa “isandla seNkosi” sasinalaboFakazi, ngoba leliphephabhuku manje lisakazwa ngezilimi ezingu-111, ngesilinganiso samakhophi angaphezu kuka-15 000 000 anyatheliswayo kamagazini ngamunye.—Qhathanisa nezEnzo 11:19-21.

11, 12. Yimaphi amanye amaqiniso angokomBhalo aqondwa yilabo abakhuluma ulimi oluhlanzekile?

¹¹ NgeBhayibheli nangezincwadi zoFakazi BakaJehova, futhi ikakhulukazi ngenxa yokumemezela kwalamaKristu ngentshiseko izindaba ezinhle, ulimi oluhlanzekile luye lwaziwa emhlabeni wonke. Futhi yeka ukuthi labo abalukhulumayo bajabulela izinzuzo ezinhle kangakanani! Esikhundleni sokuthi ‘uNkulunkulu unguNkulunkulu, uKristu unguNkulunkulu, noMoya Ongcwele unguNkulunkulu’ ngolimi olungaqondakali noluyimfihlakalo lwabakholelwa kuZiqu-zintathu, bavumelana nokuma kweBhayibheli kokuthi uJehova ungoPhezukonke, uJesu Kristu njengomncane uyiNdodana yaKhe, nokuthi umoya ongcwele ungamandla kaNkulunkulu ayisiphekupheku amangalisayo. (Genesise 1:2; IHubo 83:18; Mathewu 3:16, 17) Abakhuluma lolulimi oluhlanzekile bayazi ukuthi umuntu akazange azivelele esuka esimweni esiphansi sokuphila kodwa wadalwa uNkulunkulu onothando. (Genesise 1:27; 2:7) Bayaqaphela ukuthi umphefumulo uyayeka ukuphila lapho umuntu efa—iqiniso elikuqedayo ukwesaba abafileyo. (UmShumayeli 9:5, 10; Hezekeli 18:4) Isihogo siqondwa ngokuthi siyithuna lesintu elivamile, hhayi indawo yokuhlupha ngomlilo esungulwe unkulunkulu othile ononya. (Jobe 14:13) Bayazi futhi ukuthi uvuko luyithemba elinikezwa uNkulunkulu ngabafileyo.—Johane 5:28, 29; 11:25; IzEnzo 24:15.

¹² Labo abakhuluma ulimi oluhlanzekile babonisa inhlonipho ngegazi nangokuphila. (Genesise 9:3, 4; IzEnzo 15:28, 29) Bayaqaphela ukuthi ukuphila kukaKristu kwasemhlabeni kuyinani lesihlengo elakhokhelwa isintu esilalelayo. (Mathewu 20:28; 1 Johane 2:1, 2) Abalokothi bakhuleke “kosanta,” njengoba bazi ukuthi imikhuleko yabo kumelwe iqondiswe kuJehova uNkulunkulu ngoJesu Kristu. (Johane 14:6, 13, 14) Njengoba iZwi likaNkulunkulu likulahla ukukhulekela izithombe, imifanekiso ayisetshenziswa ekukhulekeleni kwabo. (Eksodusi 20:4-6; 1 Korinte 10:14) Futhi bayazigwema izingozi zokukhulekela amademoni ngoba bayakwenqaba ukukhulekela imimoya, nakho okulahlwayo eBhayibhelini.—Duteronomi 18:10-12; Galathiya 5:19-21.

13. Kungani labo abakhuluma ulimi oluhlanzekile bengakhungathekile?

¹³ Izinceku zikaJehova, ezikhuluma ulimi oluhlanzekile, azikhungathekile ngokuthi zikuphi ekulandelaneni kwezikhathi. UJehova uye wazifundisa ukuthi ‘zisesikhathini sokuphela,’ uJesu ekhona njengomoya okhazimulayo ongabonakali. (Daniyeli 12:4; Mathewu 24:3-14; 2 Thimothewu 3:1-5; 1 Petru 3:18) Elandelwa amabutho asezulwini anamandla, uKristu usezogabavula aye empini ukuze akhiphe isahlulelo sikaNkulunkulu kulesimiso sezinto. (Daniyeli 2:44; IsAmbulo 16:14, 16; 18:1-8; 19:11-21) Yebo, futhi labo abakhuluma lolulimi oluhlanzekile bamatasa bememezela izindaba ezinhle zokuthi uMbuso kaNkulunkulu ngaphansi kukaKristu ngokushesha uzoletha izibusiso ezinhle kuso sonke isintu esilalelayo emhlabeni oyipharadesi. (Isaya 9:6, 7; Daniyeli 7:13, 14; Mathewu 6:9, 10; 24:14; Luka 23:43) Konke lokho, futhi simane nje sengula ngaphezulu! Ngokuqinisekile, ulimi oluhlanzekile luwulimi olucebe kunazo zonke, oluyigugu kunazo zonke emhlabeni!

14. Yiziphi ezinye izinzuzo ezijatshulelwa yilabo abakhuluma ulimi oluhlanzekile?

¹⁴ Izinzuzo ezijatshulelwa yilabo abakhuluma ulimi oluhlanzekile zihlanganisa “ukuthula kukaNkulunkulu” okulondoloza izinhliziyo namandla engqondo. (Filipi 4:6, 7) Balalela imithetho yeBhayibheli, ethuthukisa impilo, injabulo, nokwaneliseka okuza ngokuthokozisa uJehova. (1 Korinte 6:9, 10) Yebo, futhi abakhuluma ulimi oluhlanzekile banethemba lokuphila phakade ezweni elisha likaNkulunkulu elithenjisiwe.—2 Petru 3:13.

Lusebenzise Noma Ulahlekelwe Yilo

15. Uyozuza kanjani ngokuluqonda kahle ulimi oluhlanzekile?

¹⁵ Ukuze ukhulume ulimi oluhlanzekile ezweni elisha, kumelwe ulwazi kahle kangangokuba lube ulimi ocabanga ngalo. Lapho umuntu efunda ulimi, uqale acabange ngolimi lwakhe lomdabu bese ehumushela imiqondo yakhe olimini olusha. Kodwa njengoba eba ngoqephuza kakhudlwana olimini olusha, uqala ukucabanga ngalo ngaphandle kokudinga inqubo yokuhumusha. Ngokufanayo, ngesifundo senkuthalo, ungathola ukuqonda okunjalo okuhle kolimi oluhlanzekile kangangokuba uyokwazi ukuthi ungayisebenzisa kanjani imithetho nezimiso zeBhayibheli ukuze uxazulule izinkinga futhi uhlale ‘usendleleni yokuphila.’—IHubo 16:11.

16. Yini engenzeka uma ungalusebenzisi njalo ulimi oluhlanzekile?

¹⁶ Kumelwe ulusebenzise njalo ulimi oluhlanzekile, ngaphandle kwalokho uyolahlekelwa ikhono lokulukhuluma kahle. Ngokwesibonelo: Eminyakeni edlule, abanye bethu bafunda ulimi olungelona olwabo. Singase siwakhumbule amanye amagama alololimi kodwa kungenzeka siye salahlekelwa ukulukhuluma kahle ngenxa yokungalusebenzisi njalo. Kungenzeka okufanayo nangolimi oluhlanzekile. Uma singalusebenzisi njalo, singalahlekelwa ukulukhuluma kahle, futhi lokho kube nemiphumela eyinhlekelele ngokomoya. Ngakho masilukhulume njalo emihlanganweni nasenkonzweni yobuKristu. Lemisebenzi, kanye nesifundo somuntu siqu, iyosisiza ukuba sisho izinto ngokuyikho ngolimi oluhlanzekile. Futhi yeka ukuthi lokho kubaluleke kanjani!

17. Yini ebonisa ukuthi inkulumo ingaba esindisa ukuphila noma ibe ebulalayo?

¹⁷ Inkulumo ingaba esindisa ukuphila noma ibe ebulalayo. Lokhu kwabonakala ngesikhathi sengxabano eyayiphakathi kwesizwe sakwaIsrayeli uEfrayimi noMahluleli uJefta waseGileyadi. Ukuze babone abakwaEfrayimi ababezama ukweqa bawele uMfula iJordani, abaseGileyadi babesebenzisa igama lokudlula elithi “Shiboleti,” elalinomsindo osekuqaleni othi “sh.” Abantu bakwaEfrayimi babezithengisa ngokwabo kubalindi bakwaGileyadi emazibukweni aseJordani ngokuthi “Siboleti” esikhundleni sokuthi “Shiboleti,” bephimisela umsindo osekuqaleni kwaleligama ngokungeyikho. Ngenxa yalokho, abakwaEfrayimi abangu-42 000 babulawa! (AbAhluleli 12:5, 6) Ngokufanayo, lokho abefundisi beLobukholwa abakufundisayo kungase kuzwakale kufana nolimi oluhlanzekile kulabo abangajwayelene kahle neqiniso leBhayibheli. Kodwa ukukhuluma ngendlela yenkolo yamanga kuyoba okubulalayo ngosuku lolaka lukaJehova.

Siyohlala Simunye

18, 19. Yini eboniswa uZefaniya 3:1-5?

¹⁸ Ekubhekiseleni eJerusalema elingathembekile lasendulo nasemfuziselweni walo wanamuhla, eLobukholwa, kuZefaniya 3:1-5 kushiwo lokhu: “Wo kohlubukileyo nongcolileyo, muzi ocindezelayo! Awuzwa-zwi, awumukeli ukulaywa, awumethembi uJehova, awusondelanga kuNkulunkulu wawo. Izikhulu zawo phakathi kwawo ziyizingonyama ezibhongayo; abahluleli bawo bayizimpisi zokuhlwa; abashiyeli-lutho ingomuso. Abaprofethi bawo bangamayiyane nabakhohlisi; abapristi bawo bayingcolisile indlu engcwele bawudlovulile umthetho. UJehova ulungile phakathi kwawo, akenzi okubi; ekuseni njalo uveza ukwahlulela kwakhe ekukhanyeni, akuphuthi; kepha abangalungile abazi amahloni.” Abaluleke ngani lawomazwi?

¹⁹ Kokubili iJerusalema lasendulo neLobukholwa losuku lwanamuhla kuhlubukile kuJehova futhi kuzingcolisile ngokukhulekela kwamanga. Ukona kwabaholi bakho kuye kwaphumela ekucindezeleni. Naphezu kwezixwayiso zikaNkulunkulu eziphindaphindiwe, akuzange kulalele futhi kusondele kuye. Izikhulu zakho bezilokhu zinjengamabhubesi asabekayo, zingakunaki ngokuqhosha ukulunga. Njengezimpisi ezihahayo, abahluleli bakho baye badwengula ukwahlulela ngokulunga kwaba izicucu. Abapristi bakho baye ‘bangcolisa okungcwele futhi badlovula umthetho’ kaNkulunkulu. Ngakho-ke uJehova ‘usezobutha izizwe futhi aqoqe imibuso, ukuze athululele phezu kwazo intukuthelo yakhe, lonke ulaka lwakhe oluvuthayo.’—Zefaniya 3:8.

20. (a) Yini okumelwe yenziwe ukuze umuntu asinde ngosuku lolaka lukaJehova? (b) Ungaba kanjani nethemba lokujabulela izibusiso zaphakade ezivela kuNkulunkulu?

²⁰ Usuku lolaka lukaJehova lusondela ngokushesha. Ngakho-ke, ukuze usindele ezweni elisha likaNkulunkulu, funda futhi ukhulume ulimi oluhlanzekile ngaphandle kokulibala. Kungokwenza kanjalo kuphela lapho ungathola khona isivikelo senhlekelele engokomoya manje nasenhlekeleleni esondela ngokushesha yomhlaba wonke. OFakazi BakaJehova bamemezela usuku lwentukuthelo kaNkulunkulu nesigijimi esinika ithemba soMbuso wakhe. Yeka ukuthi bajabula kanjani ngokukhuluma ngenkazimulo yobukhosi bakhe! (IHubo 145:10-13) Yiba munye kanye nabo, futhi ungaba nethemba lokujabulela ukuphila okuphakade nezinye izibusiso ezivela kuMsunguli wolimi oluhlanzekile, iNkosi enguMbusi uJehova.