Imibuzo Evela Kubafundi

AmaVangeli amathathu alandisa ngokukhononda ngokugcotshwa kukaJesu ngamafutha abizayo. Ingabe kwakhononda abaphostoli abaningi, noma kwakhononda uJuda ngokuyinhloko?

Lesi senzakalo silandiswa uMathewu, uMarku noJohane emaVangelini. Kubonakala sengathi uJuda wahola ekukhonondeni, futhi abanye babaphostoli babe sebevumelana naye. Lesi senzakalo sibonisa ukuthi kungani singabonga ngokuba nakho kokune ukulandisa kwamaVangeli. Okwabhalwa umlobi ngamunye kunembile, kodwa akukhona konke okunikeza imininingwane efanayo. Ngokuqhathanisa ukulandisa okufanayo, sithola umbono ogcwele noningilizwe ngokwengeziwe wezenzakalo eziningi.

Ukulandisa okukuMathewu 26:6-13 kunikeza indawo—indlu kaSimoni onochoko, eBethaniya—kodwa akusiniki igama lowesifazane owathela amafutha anamakha ekhanda likaJesu. UMathewu uyaphawula: “Lapho bebona lokhu abafundi bathukuthela” futhi bakhononda ngokuthi lawo mafutha ngabe athengisiwe, imali yawo yanikwa abampofu.

Ukulandisa kukaMarku kuhlanganisa eminingi yaleyo mininingwane. Kodwa unezela nokuthi lona wesifazane wavula umfuma ngokuwuphula. Wawunamafutha anamakha ‘ayeyinadi loqobo,’ afana nalawo okungenzeka ayethengwa eNdiya. Ngokuphathelene nokukhononda, uMarku ubika ukuthi “kwakukhona abanye ababonisa intukuthelo,” futhi “babezwa ukucasuka okukhulu ngaye.” (Marku 14:3-9) Ngakho lokhu kulandisa okubili kubonisa ukuthi akukhonondanga umphostoli oyedwa. Nokho, kwaqala kanjani?

UJohane, owazibonela ngawakhe, wanezela imininingwane ephathelene nalokhu. Usho igama lalowo wesifazane—uMariya, udadewabo kaMarta noLazaru. UJohane wanikeza nalokhu kwaziswa, esingakubheka njengokuphelelisayo kunokuba okuphikisayo: “Wagcoba izinyawo zikaJesu futhi wazesula zoma ngezinwele zakhe.” Ngokuhlanganisa lokhu kulandisa, singabona ukuthi kumelwe ukuba uMariya wamthela ekhanda nasezinyaweni uJesu ngamafutha, lawo uJohane aqinisekisa ngokuthi “inadi loqobo.” UJohane wayesondelene kakhulu noJesu futhi wayethambekele ekuthukuthelisweni izinto ezincane ezenziwa kuYe. Siyafunda: “UJuda Iskariyothe, omunye wabafundi bakhe, owayesezomkhaphela, wathi: ‘Kungani lamafutha anamakha engathengiswanga ngodenariyu abangamakhulu amathathu futhi baphiwa abantu abampofu?’”—Johane 12:2-8.

Yiqiniso, uJuda ‘wayengomunye wabafundi bakhe,’ kodwa ungayizwa intukuthelo kaJohane ngenxa yokuthi umuntu okulesi sikhundla wayehlela ukukhaphela uJesu. Ngokuphathelene noJohane 12:4, umhumushi uDkt. C. Howard Matheny wathi: “Isiqondiswano samanje esithi ‘ematasa’ [noma, “wayesezo”] nesiqondiswano esingayindawo esithi ‘ekhaphela’ [noma, “wayesezokhaphela”] kokubili kuveza isenzo esilungelelanayo noma esiqhubekayo. Lokhu kubonisa ukuthi ukukhashelwa kukaJesu nguJuda kwakungesona isenzo sangaleso sikhathi ngoba sasicatshangelwe futhi sahlelwa phakathi nezinsuku eziningi.” UJohane wanezela umqondo wokuthi uJuda wakhononda “hhayi ngoba ekhathalela abampofu, kodwa ngenxa yokuthi wayeyisela futhi laliphathwa nguye ibhokisi lemali futhi evame ukuthatha imali efakwe kulo.”

Ngakho kubonakala kunengqondo ukuthi isela elinguJuda laqalisa ukukhononda ngoba lalizokweba okuningi ukube amafutha abizayo ayethengisiwe futhi imali yakhona yafakwa ebhokisini lemali elaliliphatha. Lapho uJuda eseveze lokho kukhononda, kungenzeka ukuthi abanye abaphostoli bahhomuzela bevumelana nalokho okwakubonakala kuyiphuzu elizwakalayo. Nokho, uJuda wayengumshoshozeli oyinhloko wokukhononda.

Ukulandisa okukuMathewu 26:6-13 kunikeza indawo—indlu kaSimoni onochoko, eBethaniya—kodwa akusiniki igama lowesifazane owathela amafutha anamakha ekhanda likaJesu. UMathewu uyaphawula: “Lapho bebona lokhu abafundi bathukuthela” futhi bakhononda ngokuthi lawo mafutha ngabe athengisiwe, imali yawo yanikwa abampofu.