Ingabe Bewazi?

Ayengobani amadoda abhula ngezinkanyezi avakashela usana olunguJesu?

▪ Ngokokulandisa kokuzalwa kukaJesu okuseVangelini likaMathewu, izivakashi ezaziphuma “ezingxenyeni zasempumalanga” nezabona inkanyezi yenkosi esanda kuzalwa zakhunga usana olunguJesu ngezipho. Igama lesiGreki elikulelo Vangeli libiza lezi zivakashi ngokuthi ama-maʹgoi, okusho ukuthi ababhula ngezinkanyezi. (Mathewu 2:1) Yini esiyaziyo ngala madoda?

Ukwaziswa kukaHerodotus, isazi-mlando esingumGreki, yikhona okudala kakhulu nokuthembekile futhi kusitshela okuthile ngababhula ngezinkanyezi. UHerodotus waphila ngekhulu lesihlanu B.C.E., futhi wabhala ukuthi la madoda abhula ngezinkanyezi ayengawesigaba sabapristi basePheresiya. Ayefunda izinkanyezi, echaza amaphupho futhi ephonsa iziphonso. Ngesikhathi sikaHerodotus, inkolo yasePheresiya yayiwubuZoroastrianism, inkolo eyasungulwa umqambi wezinkondlo, uZoroaster. Ngakho, kungenzeka ukuthi ababhula ngezinkanyezi ayekhuluma ngabo kwakungabapristi benkolo kaZoroaster. I-International Standard Bible Encyclopedia ithi: “Ngokuvamile, amaGreki ayebheka ama-mágos njengabantu abanolwazi nekhono elingavamile futhi ngezinye izikhathi ayenza imilingo.”

Abahlaziyi abaningana “bobuKristu” bokuqala abanjengoJustin Martyr, u-Origen noTertullian, bachaza amadoda avakashela uJesu ngokuthi ababhula ngezinkanyezi. Ngokwesibonelo, encwadini yakhe ethi On Idolatry, uTertullian wathi: “Siyazi ukuthi umlingo nokubhula ngezinkanyezi kuyahlobana. Ngakho, amadoda abhula ngezinkanyezi aba phakathi kwabantu bokuqala . . . abakhunga [uJesu] ‘ngezipho.’” Ngokuvumelana nale ncazelo, izinguqulo zeBhayibheli eziningi zihumusha igama elithi maʹgoi ngokuthi “ababhula ngezinkanyezi.”

Kungani uMathewu athi amazwi asencwadini kaZakariya abhalwa umprofethi uJeremiya?

▪ Amazwi okukhulunywa ngawo lapha akuMathewu 27:9, 10, lapho umlobi weVangeli ekhuluma khona ngemali eyanikwa uJuda Iskariyothe ukuze akhaphele uJesu. La mavesi athi: “Khona-ke lokho okwakhulunywa ngoJeremiya umprofethi kwagcwaliseka, ethi: ‘Futhi bathatha izinhlamvu zesiliva ezingamashumi amathathu, intengo yalowo muntu ontengo yakhe yayinqunyiwe, . . . bathenga ngazo isiganga sombumbi.’” NguZakariya ongumthombo wesiprofetho esikhuluma ngezinhlamvu zesiliva ezingu-30, hhayi uJeremiya.—Zakariya 11:12, 13.

Kubonakala sengathi ngezinye izikhathi incwadi kaJeremiya yayivela kuqala eqoqweni lezincwadi ezazibizwa ngokuthi “abaProfethi,” bese eka-Isaya iza kamuva. (Mathewu 22:40) Ngakho, lapho uMathewu ekhuluma “ngoJeremiya,” wayebhekisela kuyo yonke ingxenye yemiBhalo eyayibizwa ngencwadi yokuqala kulelo qoqo. Le ngxenye yemiBhalo yayinencwadi kaZakariya.

Ngokufanayo, kunezincwadi zeBhayibheli eziningana uJesu azibiza ngokuthi “amaHubo” ezazibizwa nangokuthi imiBhalo. Ngakho, lapho ethi zonke izinto ezabhalwa ngaye “emthethweni kaMose nakubaProfethi nakumaHubo” kwakufanele zigcwaliseke, wayesho iziprofetho ezikuyo yonke imiBhalo YesiHebheru.—Luka 24:44.