16, 17. (a) UPawulu wasithola kanjani isibindi senkonzo? (b) Yiziphi izinyathelo okufanele sizithathe uma sizithola sesaba isici esithile senkonzo yethu?

¹⁶ UPawulu wabhalela amaKristu aseThesalonika: ‘Ngemva kokuba sesihluphekile kuqala futhi seyiswa (njengoba nje nazi) eFilipi, saqunga isibindi ngoNkulunkulu wethu ukuba sikhulume kini izindaba ezinhle zikaNkulunkulu ngokushikashikeka okukhulu.’ (1 Thesalonika 2:2) UPawulu nabangane bakhe ‘babeyiswé’ kanjani eFilipi? Ngokwezinye izazi, igama lesiGreki elasetshenziswa uPawulu lisho impatho eyisethuko, eyihlazo noma enesihluku. Iziphathimandla zaseFilipi zazibashaye ngemishiza, zabaphonsa ejele, futhi zabavalela ezingongolweni. (IzEnzo 16:16-24) Zamthinta kanjani uPawulu lezo zenzakalo ezibuhlungu? Ingabe ababesemzini olandelayo ohambweni lukaPawulu lwezithunywa zevangeli, iThesalonika, bamthola esehlehlela emuva ngokwesaba? Cha, ‘waqunga isibindi.’ Wanqoba ukwesaba futhi waqhubeka eshumayela ngesibindi.

¹⁷ Sasivelaphi isibindi sikaPawulu? Ngaphakathi kuye? Cha, wathi waqunga isibindi “ngoNkulunkulu wethu.” Enye incwadi yabahumushi beBhayibheli ithi la mazwi asengahunyushwa ngokuthi “uNkulunkulu wakhipha ukwesaba ezinhliziyweni zethu.” Ngakho uma ungazizwa unesibindi ngokuphathelene nenkonzo yakho, noma uma wesaba isici esithile sayo, kungani ungaceli uJehova ukuba akwenzele okufanayo? Mcele ukuba akhiphe ukwesaba enhliziyweni yakho. Mcele ukuba akusize uqunge isibindi salo msebenzi. Ngaphezu kwalokho, thatha izinyathelo ezithile ezingokoqobo. Ngokwesibonelo, hlela ukusebenza nothile onekhono kulolo hlobo lokufakaza olukukhathazayo. Kungenzeka luhilela insimu yamabhizinisi, ukufakaza emgwaqweni, ukushumayela ngokwethukela, noma ukushumayela ngocingo. Mhlawumbe umuntu ohamba naye angathanda ukuba ahole ekuqaleni. Uma kunjalo, bhekisisa futhi ufunde. Kodwa yibe usuqunga isibindi sokukuzama.

18. Yiziphi izibusiso esingase sizithole uma siqunga isibindi enkonzweni yethu?

¹⁸ Uma usiqunga isibindi, cabanga ngalokho okungase kube umphumela. Lapho uphikelela futhi ungavumi ukudangala, cishe uyothola okuhlangenwe nakho okumnandi ekuhlanganyeleni iqiniso, okuhlangenwe nakho obungase uphuthelwe yiko. (Bheka ikhasi 25.) Uyoba nokwaneliseka kokwazi ukuthi uye wamjabulisa uJehova ngokwenza okuthile okunzima kuwe. Uyobona isibusiso nosizo lwakhe ekunqobeni ukwesaba kwakho. Ukholo lwakho luyoqina ngokwengeziwe. Ngempela, awunakusebenzela ukwakha ukholo kwabanye ngaphandle kokwakha nolwakho ukholo ngesikhathi esifanayo.—Jude 20, 21.

Baqunga Isibindi

AKULULA ngaso sonke isikhathi ukuqunga isibindi ukuze ushumayele. Eqinisweni, umphostoli uPawulu wathi ngesinye isikhathi wenza kanjalo “ngokushikashikeka okukhulu.” (1 Thesalonika 2:2) Ingabe kuwufanele umzamo ‘ukushikashikeka’ ukuze ushumayele? Asinakuqinisekiswa ukuthi siyoba nokuhlangenwe nakho okuyisimangaliso, kodwa abantu bakaNkulunkulu ngokuvamile bayajabula ngokuthi baye baqunga isibindi. Cabanga ngezinye zezibonelo.

Intombazane eneminyaka engu-8 okuthiwa uTara yayilalelisisile lapho uthisha wayo etshela ikilasi ukuthi phakathi neMpi Yezwe II, iziboshwa ezingamaJuda emakamu okuhlushwa zazigqokiswa i-Star of David esiphuzi ukuze zibonakale. UTara wazibuza ukuthi kufanele yini akhulume. “Ngathandaza ngibhekile,” ekhumbula. Wabe esephakamisa isandla wathi noFakazi BakaJehova babekulawo makamu, futhi bona babegqokiswa unxantathu onsomi. Uthisha waba nesithakazelo futhi wambonga. Ukukhuluma kukaTara kwavula indlela yokuba kube nezingxoxo ezengeziwe nalo thisha, okwathi kamuva wabonisa ikilasi lonke i-video ethi Jehovah’s Witnesses Stand Firm Against Nazi Assault.

EGuinea, eNtshonalanga Afrika, ummemezeli osemncane ongabhapathiziwe okuthiwa u-Irène wayefuna ukuthuthuka enkonzweni yakhe. Isithunywa sevangeli esasifunda naye iBhayibheli samkhuthaza ukuba azame ukuhambisela afunda nabo esikoleni umagazini INqabayokulinda ne-Phaphama! U-Irène wayemanqikanqika ngoba abafundi basekilasini lakhe babengalaleli. Nokho, eshukunyiswe yisikhuthazo salesi sithunywa sevangeli, u-Irène wanquma ukuba aqale ngokuhambisela umfundi owayebonakalé ephikisa kunabo bonke. Wamangala u-Irène lapho le ntombazane isabela futhi ibamukela ngesasasa omagazini. Nabanye abafundi benza okufanayo. Ngaleyo nyanga u-Irène wahambisa omagazini abaningi kunayebahambise phakathi nezinyanga ezinhlanu ezazandulele zihlangene.

ETrinidad umdala wayezizwa emanqikanqika impela ngokuya kuthishanhloko wesikole ayombonisa usizo lukamagazini i-Phaphama! kwezemfundo. Nokho, waqunga isibindi. Uthi: “Ngathandaza lapho ngingena emagcekeni. Angikholwanga lapho uthishanhloko eba nomusa ngendlela engavamile.” Wamukela umagazini i-Phaphama! othi “Liyini Ithemba Ngentsha Yanamuhla?” wavuma ngisho nokuwusebenzisa ekufundiseni izingane. Kusukela ngaleso sikhathi, uye wamukela omagazini abangu-40 abakhuluma ngezinto ezihlukahlukene.

Njengomuntu osemncane, uVaughn wayekuthola kunzima ukushumayela. “Ngangishaywa uvalo, ngijuluke izandla, ngikhulume ngisheshise—ngangingakwazi ukunciphisa ijubane.” Nokho, waba yisikhonzi sesikhathi esigcwele. Noma kunjalo, kwakungelula ngaso sonke isikhathi kuye ukukhuluma avele obala. Ngolunye usuku, ngemva kosuku oludumazayo efuna umsebenzi, wafuna ukufakaza kothile esitimeleni esihamba ngaphansi komhlaba, “ukuze okungenani kube khona okuthile okuhle kulolo suku olubi.” Kodwa wazizwa esaba osomabhizinisi ababebonakala beyiziqumama esitimeleni. Ekugcineni, waqunga isibindi wakhuluma nendoda esikhulile eyayiseduze kwakhe. Baba nengxoxo ende. Lo somabhizinisi wathi, “Unemibuzo emihle kakhulu, ebengingeke ngiyilindele kumuntu osemncane,” wayesebuza, “Uyisazi senkolo yini?” UVaughn waphendula, “Cha, ngingomunye woFakazi BakaJehova.” “Hho,” kumamatheka le ndoda. “Sengiyabona-ke manje.”

Bonke lab’ oFakazi—nenqwaba yabanye—bayajabula ngokuthi baqunga isibindi bashumayela. Ingabe uyokwenza okufanayo?