Ingabe AmaKristu Kufanele Asebenzise Iziqu Ezingokwenkolo?

KUNINGI okushiwoyo ngokuntuleka kwabefundisi kweLobukholwa namuhla, kodwa iziqu ezingokwenkolo phakathi kwabo azentuleki neze. Ezinye iziqu zinemicikilisho; ezinye azinayo. Nazi izibonelo ezimbalwa:

• Umfundisi: “Ohloniphekile.”

• Umbhishobhi waseSheshi: “Ohloniphekile Ofanelekayo UMbhishobhi OyiNkosi.”

• Umbhishobhi wamaRoma Katolika (eItaly): “Omuhle Kakhulu, Okhazimula Kakhulu nokuthi Nkosi Yami [Monsignor] Ehlonipheke Kakhulu.”

• UKhadinali: “Ophakeme.”

• Upapa: “Baba Ongcwele Kakhulu.”

Isiqu esithi “ohloniphekile” nesithi “umbhishobhi” sekuyisikhathi eside zisetshenziswa kangangokuba amalungu amaningi esonto azizwa zifaneleka. Kodwa ingabe iziqu ezinjalo zigunyazwa iBhayibheli?

KuyiKing James Version, igama elithi “ohloniphekayo” livela kanye, embhalweni weHubo 111:9, elithi: “Lingcwele futhi liyahlonipheka igama lakhe.” Igama likabani? Ivesi elilandelayo lithi: “Ukwesaba INKOSI kungukuqala kokuhlakanipha.” (IHubo 111:10) Kwenye inguqulo yamaKatolika, lezindinyana ezimbili zifundeka kanje: “Lingcwele futhi liyasabeka igama lakhe. Isiqalo sokuhlakanipha siwukwesaba uYahweh [uJehova].” (The New Jerusalem Bible) Ngakho, ngokweZwi likaNkulunkulu, ukwesaba uNkulunkulu, noma inhlonipho, kungokukaJehova yedwa, uMninimandla onke. Khona-ke ingabe kulungile ukukunikeza abantu?

UPawulu wabhalela uThimothewu: “Uma umuntu efisela isikhundla sobubhishobhi, ufisela umsebenzi omuhle.” (1 Thimothewu 3:1, KJ) Nokho, ngokweNew Jerusalem Bible, lelivesi lifundeka kanje: “Ukufuna ukuba umdala owengamele kuwukufisa umsebenzi omuhle.” AmaKristu akuqala ayenemisebenzi ehilela imithwalo yemfanelo ayebizwa ngokuthi “abadala” nangokuthi “ababonisi.” Ingabe lawomagama ayesetshenziswa njengeziqu? Cha. Amadoda anjalo ayengabizwa neze ngokuthi “uMbhishobhi uPetru” noma “uMdala uJakobe.” Yingakho amadoda avuthiwe angamaKristu phakathi koFakazi BakaJehova akhonza njengabadala emabandleni engalokothi asebenzise igama elithi “umdala” njengesiqu. Igama elithi “umdala” nelithi “umbonisi” (umbhishobhi) asebenza kuphela kulabo abasezikhundleni zokuba negunya nomthwalo wemfanelo. Lamagama futhi achaza izimfanelo zamadoda amisiwe kanye nomsebenzi abawenzayo.

Kuthiwani ngesiqu esithi “ukhadinali”? Ingabe siyatholakala eBhayibhelini? Cha. Asitholakali kunoma iyiphi inguqulo. Eqinisweni, iSonto lamaRoma Katolika liyavuma ukuthi lesisiqu asikho eBhayibhelini. INew Catholic Encyclopedia iyachaza: “Leligama lithathwe egameni lesiLatini elithi cardo elisho ‘ihinji,’ nasemazwini kaPapa uEugene IV, ‘njengoba umnyango ubanjwa amahinji lapho uvuleka, ngakho isiGungu sabaBhishobhi abangabaPhostoli, umnyango walo lonke iSonto, simiswe futhi sithola ukusekelwa esigungwini sawokhadinali’” Lencwadi okubhekiselwa kuyo isazisa nokuthi “okhadinali bajabulela ilungelo lokubizwa ngokuqondile ngokuthi ‘Ophakeme.’” Isikhundla sabo sibagunyaza nokuba bagqoke izingubo ezinde ezibomvu nezigqoko ezingenamphetho ezibomvu. Ingabe abaphostoli babenawo ‘lawomalungelo’? IBhayibheli liphendula ngokuthi cha.

Ingabe amalungu esigaba sabefundisi kufanele abizwe ngokuthi amakhosi? Ababhishobhi baseSheshi babizwa ngokuthi “nkosi.” Abasezikhundleni eziphakeme abangamaKatolika ngokuvamile babizwa ngokuthi “monsignor,” okusho ukuthi “Nkosi yami.” Kwamanye amazwe, abefundisi beSonto laseDashi babizwa ngokuthi dominee, isiqu esithathwe egameni lesiLatini elithi dominus, elisho ukuthi “nkosi.” Kodwa uJesu wayala abafundi bakhe: “Niyazi ukuthi ezweni, ababusi bayabusa phezu kwezikhonzi zabo, . . . kodwa akufanele kube njalo ngani.” (Mathewu 20:25, 26, The New English Bible) Futhi, umphostoli uPetru wabhala: “Ningabusi phezu kweqembu eniliphathisiwe, kodwa yibani izibonelo zomhlambi.” (1 Petru 5:3, NJB) Ngesikhathi uJesu ngokuthobeka egeza izinyawo zabafundi bakhe, wathi kubo: “Ningibiza ngokuthi Mbusi nangokuthi Nkosi, futhi nenza kahle; ngokuba ngiyikho.” (Johane 13:13, NJB) Ingabe kulungile ukuba abantu basebenzise iziqu ezingokwenkolo ezingezikaNkulunkulu neNdodana yakhe?

Ingabe isiqu esingokwenkolo esithi “baba [fata]” silungile? Sisetshenziswa kakhulu amaRoma Katolika nabaseSheshi. Isiqu esithi “Padre” esisho ukuthi “baba,” naso sisetshenziswa kakhulu. Kodwa uJesu wafundisa abafundi bakhe: “Ningabizi muntu emhlabeni ngokuthi baba, njengoba ninoBaba oyedwa kuphela, futhi usezulwini.” (Mathewu 23:9, NJB) INew English Bible ngokufanayo ifundeka kanje: “Ningabizi muntu emhlabeni ngokuthi ‘baba.’” Kungani abefundisi nabalandeli babo bengawulaleli lomyalo ovela eNkosini uJesu Kristu?

Upapa waseRoma ngokuvamile ubizwa ngokuthi “uBaba Ongcwele.” Kodwa izisebenzi akanye nazo eziseItaly ngokuvamile zimbiza ngokuthi Santissimo Padre, okusho ukuthi “Baba Ongcwele Kakhulu.” Isiqu esithi “Baba Ongcwele” sivela kanye eBhayibhelini. (Johane 17:11) Siyisiqu soMuntu Ophakeme Kunabo Bonke kuphela. Ingabe kulungile ngezidalwa ezingezasemhlabeni nezingaphelele, ukuba zibizwe ngalesosiqu?

Siza ufunde futhi uphawule umongo wencwadi kaMathewu 23:1-12. UJesu uqala ukukhuluma ngabaFarisi, ababeyihlelo elivelele lenkolo yobuJuda. Babegxile kakhulu emthethweni, beshisekela ukugcina zonke izici zoMthetho kaMose. Babethanda ukugqoka futhi benze izinto ngendlela eyehlukile ukuze badonsele ukunakekela kubo ngokwabo. Inkolo yabo yayingeyokubukisa—indlela yabo yokugqoka, izindawo zabo ezivelele ekudleni, izihlalo zabo eziphambili emasinagogeni, kanye neziqu zabo zokudunyiswa. Babefuna ngisho nenhlonipho eyedlula leyo eyayinikezwa abazali. Babefuna ukubizwa ngokuthi bangobaba. Nokho, uJesu ubonisa ukuthi abalandeli bakhe bayalingana njengabantwana bakaNkulunkulu. Noma isiphi isiqu esisikisela okuphambene nalokhu siwukugabadela ngokuqhosha okuthile okungokukaNkulunkulu. Ngakho, uJesu uyakwenqabela ukusetshenziswa kwegama elithi “baba” njengesiqu sokubonisa inhlonipho ngomqondo ongokwenkolo. UJesu ugcizelela ukuthi abalandeli bakhe banoBaba oyedwa kuphela okholweni, uJehova.

Ingabe akukhanyi yini ukuthi abefundisi abaningi bami ‘endaweni engcwele’ engekaNkulunkulu neNdodana yakhe kuphela, nokuthi inhlonipho enkulu ayiyiswa kubo kodwa iyiswa kubantu abangaphelele? AmaKristu eqiniso namuhla ayakugwema ukusebenzisa iziqu ezingokwenkolo zokuthopha, futhi ayawugwema nomkhuba wokudumisa abefundisi. Phakathi koFakazi BakaJehova okuwukuphela kwendlela izikhonzi ezibizana ngayo ngethi “mzalwane.” (2 Petru 3:15) Lokho kuvumelana nalokho uJesu akusho: “Nina nonke ningabazalwane.”—Mathewu 23:8, NJB.