nophilayo.’” (IsAmbulo 1:17b, 18a)

 3. (a) Kungayiphi indlela uJesu aba ngayo “ngowokuQala nowokuGcina”? (b) Kushiwoni ngokuba kukaJesu “nezihluthulelo zokufa nezeHayidesi”?

³ Ngempela uJesu wayengumuntu ‘wokuqala’ ukuba avuselwe ekuphileni komoya okungenakufa. (Kolose 1:18) Ngaphezu kwalokho, ‘ungowokugcina’ ukuba avuswe kanjalo nguJehova ngokwakhe. Kanjalo, uba ‘ophilayo kuze kube phakade naphakade.’ Ujabulela ukungafi. Kulokhu, ufana noYise ongafi, obizwa ngokuthi ‘uNkulunkulu ophilayo.’ (IsAmbulo 7:2; IHubo 42:2) Kubo bonke abanye besintu, uJesu ngokwakhe ‘ungukuvuka nokuphila.’ (Johane 11:25) Ngokuvumelana nalokhu, uthi kuJohane; “Ngaba ngofileyo, kodwa, bheka! ngiyaphila kuze kube phakade naphakade, futhi nginezihluthulelo zokufa nezeHayidesi.” (IsAmbulo 1:18b) UJehova uye wamnikeza igunya lokuvusa abafileyo. Kungakho uJesu engase athi unezihluthulelo zokuvulela labo ababoshwe ukufa neHayidesi (ithuna) amasango.—Qhathanisa noMathewu 16:18.