¹¹ “UJehova uNkulunkulu wayesemthatha umuntu, wambeka ensimini yase-Edene ukuba ayilime, ayigcine. UJehova uNkulunkulu wamyala umuntu, wathi: Ungadla kuyo yonke imithi yensimu ngokuthanda kwakho, kepha ungadli kuwo umuthi wokwazi okuhle nokubi, ngokuba mhla udla kuwo uyakufa nokufa.”—Genesise 2:15-17.

13. Iliphi ithemba umuntu wokuqala ayenalo, futhi kungani kunjalo?

¹³ Ngokungenasiphelo? Yeka umqondo ocishe ungakholeki lona okumelwe ukuba kwaba yiwo kumuntu ophelele! Kodwa kungani ungenakukholeka? UMdali wakhe wayengenawo umqondo noma injongo yokuyibhubhisa lensimu yase-Edene eklanywe ngobungcweti. Kungani kwakufanele abhubhise umsebenzi wakhe siqu, kuyilapho wawumuhle kangaka futhi ubonisa ikhono lakhe lobungcweti? Ngokunengqondo, wayengeke ajonge ukwenza kanjalo. (Isaya 45:18) Futhi njengoba lensimu engenakuqhathaniswa yayizohlala ilinywa, yayizodinga umlimi nomnakekeli onjengomuntu ophelele, uAdamu. Futhi ukuba umnakekeli ongumuntu akazange asidle isithelo ‘somuthi wokwazi okuhle nokubi,’ owenqatshelwe wayengeke afe. Umuntu ophelele wayengaphila phakade!

14. UAdamu wayengaba kanjani nokuphila okuphakade ePharadesi?

¹⁴ Phambi kuka-Adamu kwakubekwe ukuphila okuphakade ensimini yase-Edene eyiPharadesi! Lalingajatshulelwa phakade, uma nje wayezohlala emlalela ngokuphelele uMdali wakhe, engalokothi asidle isithelo esenqatshelwe uMdali womuntu. Kwakuyisifiso saKhe ukuba umuntu ophelele ahlale elalela futhi aqhubeke ephila phakade. Ukwenqatshelwa kwesithelo ‘somuthi wokwazi okuhle nokubi’ kwakungesikho neze okubulalayo. Kwakumanje kuwuvivinyo lokulalela komuntu okuphelele kuYise. Kwanikeza ithuba lokuba umuntu abonise uthando lwakhe ngoNkulunkulu, uMdali wakhe.