Ngemva kwesikhathi esithile, cishe sebengabantu abadala impela, uKayini no-Abela benza iminikelo kuJehova. Njengoba u-Abela ayengumalusi, akumangalisi ukuthi wanikela ‘ngamazibulo ezimvu zakhe ezinonileyo.’ Ngokuhlukile, uKayini wanikela ‘ngezithelo zomhlabathi.’ UJehova wawamukela umhlatshelo ka-Abela, kodwa “uKayini nomnikelo wakhe akawunakanga.” (Genesise 4:3-5) Ngani?

Abanye bathi kungenxa yokuthi umhlatshelo ka-Abela wawenziwe ‘ngamazibulo ezimvu zakhe,’ kanti okaKayini wawumane ‘uyizithelo zomhlabathi.’ Kodwa inkinga yayingelona izinga lesivuno uKayini anikela ngaso, ngoba ukulandisa kuthi uJehova wenamela “u-Abela nomnikelo wakhe,” kodwa akamenamelanga “uKayini nomnikelo wakhe.” Ngakho uJehova wabheka ngokuyinhloko isimo senhliziyo somkhulekeli. Yini ayibona lapho enza kanjalo? AmaHeberu 11:4 athi u-Abela wanikela umhlatshelo wakhe “ngokholo.” Ngakho kusobala ukuthi uKayini wayentula ukholo olwenza ukuba umhlatshelo ka-Abela wamukeleke.

Kulokhu, kumelwe kuphawulwe ukuthi umnikelo ka-Abela wawuhilela ukuchitha igazi. Kungenzeka wafinyelela isiphetho esiyiso sokuthi isithembiso sikaNkulunkulu mayelana nembewu eyayiyolinyazwa esithendeni sasiyohilela ukunikela ngokuphila. Kanjalo umnikelo ka-Abela wawuyobe uwukunxusa ukuhlawulelwa, futhi wawubonisa ukholo lokuthi uNkulunkulu wayeyolungiselela umhlatshelo ohlawulela izono ngesikhathi esifanele.

IBhayibheli alisho ukuthi uJehova wakubonisa kanjani ukuthi uyawamukela umhlatshelo ka-Abela. Abanye basikisela ukuthi washiswa umlilo ovela ezulwini. Kungakhathaliseki ukuthi kwenzekani, lapho eqaphela ukuthi umnikelo wakhe wawungamukelekanga, ‘wathukuthela kakhulu uKayini, ubuso bakhe banyukumala.’ (Genesise 4:5) UKayini wayephokophele enhlekeleleni.