UKristu wayebhekisela esenzakalweni lapho uDavide namadoda akhe, bebalekela uSawule owayefuna ukubabulala, beya kumpristi omkhulu uAhimeleki eNobi. UDavide wabonisa ukuthi wayesesabelweni esiyimfihlo esivela enkosini futhi wacela isinkwa. “Asikho isinkwa esivamileyo nje phansi kwesandla sami,” uAhimeleki wamtshela, “kepha kukhona isinkwa esingcwele, uma izinsizwa zizigcinile esifazaneni kuphela.” Wayesho isinkwa sokubukwa (noma isinkwa sokunikelwa), esasingamaqebelengwane angenamvubelo ayishumi nambili ayebekwa masonto onke etafuleni eNgcwele yetabernakele. Njengoba izinkwa ezintsha zazilethwa isabatha ngalinye, ezindala zazisuswa futhi zibe ‘ngezika-Aroni namadodana akhe,’ ukuba bazidle endaweni engcwele. UDavide wathi amadoda akhe ayehlanzekile ngokwesiko, futhi wathi ngokwalowomqondo ayengcwele, enza umsebenzi awuthunywe yinkosi kaJehova egcotshiwe. Ngakho-ke uAhimeleki “wayesemnika isinkwa esingcwele, . . . isinkwa sokubukwa kuphela ebesisuswe phambi kukaJehova.”—1 Samuweli 21:1-6; Levitikusi 24:5-9.

Ngokwesibonelo, lokhu kucabanga kwamukela inkulumo yokuthi uDavide nabafundi bakaJesu babesesimweni ‘sokufa nokuphila.’ Kodwa ingabe kunjalo? IBhayibheli alisho ukuthi uDavide namadoda akhe babesonqenqemeni lokubulawa yindlala ngenxa yokuthi kwakungekho okunye ukudla okwakungatholakala. Eqinisweni, ngokomlando ongokwezwe, iNobi yayisenyakatho yeNtaba yemiNqumo, okungamakhilomitha ambalwa ukusuka eJerusalema namadolobha amaningi. Ukufunda lomlando ngokuqondile kuvumela ukuphetha ngokuthi uDavide namadoda akhe ngokuyinhloko babelambile futhi befuna ukudla kothile ababemethemba. Ngokufanayo, iBhayibheli lisitshela ukuthi lapho abafundi bakaJesu ‘belambile’ ngesabatha bakhothoza futhi badla ummbila. Kumelwe ukuthi babedlile ngayizolo, nangosuku olungemva kwesabatha babengakuthenga ukudla emizini ezungezile. (Johane 4:8; Mathewu 14:15) Ngakho-ke, uma umuntu efuna ukusebenzisa lezizenzakalo ukuze abonise lapho umthetho kaNkulunkulu ungaphulwa khona, angase futhi athi noma ngaziphi izikhathi lapho abantu ‘belambile’ kulungile ukwaphula imiyalo kaJehova. Ngokusobala lokho akuqondile.

Futhi, ngokwemininingwane ‘kwakumelene nomthetho ngoDavide’ ukudla isinkwa sokubukwa ngoba uMthetho wawuthi lesi sasingesabapristi. Nokho umpristi omkhulu kaJehova wasinikeza uDavide. Ngasiphi isizathu? Izinkwa ezazisuswe etafuleni lesinkwa sokubukwa zazi“ngcwele,” zingenakuphathwa njengezivamile, njengalezo ezinikezwa isisebenzi esivamile noma zidliwe ohambweni lokuzijabulisa. Kwakumelwe zisetshenziswe njengokudla kwabapristi, amadoda aqhuba inkonzo kaNkulunkulu. Ngakho-ke lapho uDavide eza kulokho okwakubonakala kuwukuthunywa okukhethekile okuvela enkosini egcotshiwe kaNkulunkulu, futhi nompristi omkhulu ebona ukuthi amadoda ayehlanzekile ngokwesiko, kwakungelona iphutha ukudla lezozinkwa zokubukwa. Lokho kwakusekuvumelaneni nokusetshenziswa okungokwesisekelo uNkulunkulu ayezihlosele khona.