Sabela Ngokushesha ‘Esibonakalisweni’!
“Hlalani niphapheme, ngoba anilwazi usuku nehora.”—MATHEWU 25:13, Byington.
1. Kungani kungaba ubuthutha ukuba njengezintombi eziyisihlanu eziyiziwula zomfanekiso kaJesu?
NGOKUBHEKA isikhathi senjabulo esizofikela isintu esihlengiwe, yeka ubuwula okuyibo ukufana nezintomhi eziyisihlanu eziyiziwula zomfanekiso kaJesu! Zasabela sekuphuze kakhulu zangangena ‘embusweni wezulu.’ Lezo ezaziyiziwula azizange zibe izinkanyiso ngesikhathi esifanelekile. (Mathewu 25:1-12) Lapho “lelivangeli lombuso” selishunyayeliwe ‘ezweni lonke, kwaba-ngubufakazi ezizweni zonke’ futhi “ukuphela” sekufikile, ziyobe sezililahlile ithuba lazo lokuhlanganyela kulelolungelo lenkonzo elingasoze laphindwa.—Mathewu 24:14.
2, 3. (a) UJesu wawuphetha ngasiphi iseluleko umfanekiso wezintombi eziyishumi? (b) Kungani lesoseluleko sisafanelana nesikhathi, futhi-ke yini isigaba ‘sentombi ehlakaniphile’ okudingeka sihlale sinayo?
2 Kungakho uJesu Kristu aphetha umfanekiso wakhe ngalesiseluleko: “Ngakho lindani, ngokuba anilwazi usuku nehora.”—Mathewu 25:1-13.
3 Lawomazwi oMyeni uJesu Kristu afanelana nesikhathi, ikakhulukazi manje, lapho sekuyiminyaka engama-71 ‘sisesiphelweni salesimiso sezinto.’ Ngisho namanje insali yesigaba ‘sezintombi ezihlakaniphile’ ayilwazi usuku nehora lokuvalwa ‘komnyango’ wethuba lokuvunyelwa embusweni wasezulwini ukuba ibe noMyeni emganile. Kuwusizo njalo ngalabo abafuna ukuzibonakalisa njengezintombi “ezihlakaniphile” ukuba bahlale benamafutha angokomoya. Ngokwenza kanjalo bavumela ukukhanya kukhanye ngokusakaza ‘ivangeli lombuso’ ukuze kube ubufakazi ezweni lonke, nasezizweni zonke kuze kufike “ukuphela.”—Mathewu 24:14; Marku 13:10; IsAmbulo 14:6, 7.
“Izimvu Nezimbuzi” Ziyahlukaniswa Manje
4. Ngokomlando kaMathewu, yimuphi umfanekiso wokugcina kaJesu okumelwe ugcwaliseke njengengxenye ‘yesibonakaliso’ ‘sokuba khona’ kwaKhe?
4 Ngaphambi kokuba ‘isiphelo sesimiso sezinto’ sifike ekupheleni kwaso, omunye umsebenzi wokwehlukanisa abantu kufanele wenziwe futhi usebenze ‘njengesibonakaliso’ esibonisa ukuthi ‘sisesikhathini sokuphela.’ (Daniyeli 12:4) Lokhu kuwukugcwaliseka komfanekiso kaJesu wezimvu nezimbuzi, lowo uMathewu aphetha ngawo indaba yakhe yesiprofetho esikhulu sikaJesu mayelana ‘nesibonakaliso sokuba khona’ kwaKhe okungabonakali ‘nesesiphelo sesimiso sezinto.’
5. Kwakuyokwenzeka nini ukwehlukaniswa kwabantu njengezimvu nezimbuzi?
5 Phawula manje lokho uJesu akubikezela ngalokhu, njengoba kulotshwe kuMathewu 25:31-46. Waqala umfanekiso ngokuthi: “Kepha nxa iNdodana yomuntu iza ngenkazimulo yayo nezingelosi zonke ezingcwele kanye nayo, khona izakuhlala esihlalweni sayo senkazimulo; kuzakubuthelwa phambi kwayo izizwe zonke, ibahlukanise abanye kwabanye, njengomalusi ahlukanisa izimvu nezimbuzi, imise izimvu ngakwesokunene sayo kepha izimbuzi nakwesokhohlo.” Kulandeleni? UJesu uyaqhubeka:
6. Ithini iNkosi enguMalusi kwabangakwesokunene sayo?
6 “Khona inkosi izakuthi kwabangakwesokunene sayo: Zanini nina enibusisiwe nguBaba, nidle ifa lombuso eniwulungiselweyo selokhu kwasekelwa umhlaba. Ngokuba ngangilambile, nangipha ukudla; ngangomile, nangiphuzisa; ngangingumfokazi, nangingenisa; ngihamba-ze nangembathisa; ngangigula, nangihamba; ngangisetilongweni, neza kimi.”
7. Yini abantu abanjengezimvu, abalungileyo abayoyibuza, futhi iNkosi iyophendula ithini?
7 “Khona bayakuyiphendula abalungileyo ngokuthi: Nkosi, sakubona nini ulambile sakupha ukudla, noma womile sakuphuzisa, na? Sakubona nini ungumfokozi sakungenisa, noma uhamba-ze sakwembathisa, na? Sakubona nini ugula, noma usetilongweni seza kuwe, na? Isiyakuphendula iNkosi ithi kubo: Ngiqinisile ngithi kini, njengokuba nikwenzile komunye walabafowethu abancane, nikwenzile kimi.”
8. (a) Abantu abanjengezimbuzi abazange basabele ngokushesha ekwenzeni ini? (b) Ngakho-ke iNkosi iyobayisaphi ngokuphambene nalabo abanjengezimvu?
8 “Izimbuzi” azisabeli ngokushesha ‘esibonakalisweni.’ Azenzi izinto ezenziwa isigaba ‘sezimvu.’ Ngakho siyafunda: “Khona iyakuthi kwabangakwesokhohlo: Dedani kimi nina-baqalekisiweyo, niye emlilweni ophakade olungiselwe uSathane nezingelosi zakhe. Ngokuba ngangilambile, aningiphanga ukudla; ngangomile, aningiphuzisanga; ngangingumfokazi, aningingenisanga; ngihamba-ze aningembathisanga; ngigula, ngisetilongweni, aningihambanga. Khona bayakuphendula nabo, bathi: Nkosi, sakubona nini ulambile, noma womile, noma ungumfokazi, noma uhamba-ze, noma ugula, noma usetilongweni, singakukhonzanga, na? Khona iyakubaphendula ithi: Ngiqinisile ngithi kini: Lokho eningakwenzanga komunye walaba abancinyane anikwenzanga nakimi. Laba bayakumuka, baye ekujezisweni okuphakade, kodwa, abalungileyo baye ekuphileni okuphakade.”
9. Ungajabula uma wenzeni phakathi nokugcwaliseka kwanamuhla komfanekiso kaJesu wezimvu nezimbuzi?
9 Kungenzeka uyahlanganyela ekugcwalisekeni kwalomfanekiso ongokwesiprofetho. Ingabe uziphawulile izinto ezinhle uJesu azisho? Uye wazenza izinto ezinjalo ‘kubafowabo’? Yeka injabulo ongaba nayo uma uye wenza ‘njengemvu’ kubo!
10. UJesu wawenza kanjani umehluko phakathi ‘kwabafowabo’ nalabo abafanekiselwa izimvu nezimbuzi, futhi iBhayibheli likusekela kanjani lokhu?
10 UJesu wenza umehluko phakathi ‘kwabafowabo’ abangokomoya nalabo abazibonakalisa befana nezimvu noma izimbuzi. Ngesikhathi sokugcwaliseka kwalomfanekiso, ‘abafowabo’ yilabo abaye bamlingisa ngokuzinikela ngokuphelele kuNkulunkulu. NjengoJesu, baye banikeza ubufakazi basobala balokhu ngokubhapathizwa emanzini. Ngaphezu kwalokho, uJehova, uYise weNkosi uJesu Kristu, uye waba uYise wasezulwini ngokubazala ngomoya waKhe ongcwele futhi kanjalo ebenza babe ‘abafowabo’ abangokomoya beNdodana yakhe. Lokhu kubabeka esimweni sokuba bathole indawo eMbusweni wasezulwini noMfowabo Omdala, uJesu Kristu, “Inkosi Yamakhosi Nombusi Wababusi.” (IsAmbulo 19:16) Ngokuqondene nalokhu nakhu okwabhalwa ngaye: “Ngokuba ongcwelisayo nabangcweliswayo bonke baphuma kumunye; ngakho-ke akananhloni ukubabiza ngokuthi: Ngabafowethu, ethi: Ngizakushumayeza abafowethu igama lakho, ngihlabelele ngawe phakathi kwebandla.” (Heberu 2:11, 12) Lapha iHubo 22:22 libhekiselwe eNdodaneni kaNkulunkulu ekhazinyulisiwe, uJesu Kristu.
11. Ingabe baningi yini ‘abafowabo’ bakaJesu abangokomoya abasemhlabeni manje, futhi isiphi isigaba, noma “ibandla,” abalenzayo?
11 Kusekhona emhlabeni insali yalabo ‘bafowabo’ abangokomoya beNkosi ebusayo uJesu Kristu. Njengesigaba, noma “ibandla,” benza “inceku ethembekileyo neqondayo” leyo uJesu ayibikezela esiprofethweni sakhe esimayelana ‘nesiphelo sesimiso sezinto.’ Wathi: “Pho, ngubani oyinceku ethembekileyo neqondayo, inkosi yayo eyimisile phezu kwabendlu yayo ukuba ibanike ukudla ngesikhathi sakho na? Ibusisiwe leyonceku, okuyakuthi kufika inkosi yayo, iyifumane yenze njalo. Ngiqinisile ngithi kini: Iyakuyimisa phezu kwakho konke enakho.”—Mathewu 24:45-47.
12. (a) Kusukela ngo-1919 isigaba ‘senceku’ besivelele ekwenzeni ini? (b) ‘Inceku’ iye yamiswa phezu kwakuphi iNkosi yayo “enakho”? (c) ‘Inceku’ esebenzayo manje iyingxenye yani?
12 Amaqiniso omlando ayawuphendula umbuzo kaJesu wokuthi ingubani ‘lenceku.’ “Ibandla” elisebenza ‘njengenceku’ lenziwe ‘abafowabo’ abanikezwa uNkulunkulu abasesemhlabeni. Liyafana nesigaba ‘sentombi ehlakaniphile.’ Kusukela ngo-1919 ‘lenceku’ beyivelele ngokunikeza ‘abendlu’ yeNkosi yayo ukudla okusha okungokomoya okuvela eBhayibhelini, ikwenza lokho “ngesikhathi” sakho. Ngakho-ke, iNkosi engabonakali iye yamisa isigaba ‘salenceku’ ethembekile “phezu kwakho konke enakho” okungokomoya. Lokhu kunjalo ikakhulukazi ngokuphathelene nokushunyayelwa ‘kwalelivangeli lombuso’ kuwo wonke umhlaba ewubusayo. Kuze kube manje lobufakazi boMbuso buye banda! “Inceku ethembekileyo neqondayo” esebenzayo iyingxenye evelele ‘yesibonakaliso’ esisibonisa ukuthi isikhathi sini.
13. ‘Izizwe zonke’ ziye zabuthelwa phambi kweNkosi kusukela nini, futhi ‘inceku’ yaqala nini ukubuthela “izimvu” esandleni sayo sokunene?
13 Kusemalungwini esigaba ‘senceku’ lapho “izimvu” ezilungileyo ziye zenza izinto ezinhle. Izimvu nezimbuzi ezingokomfanekiso zingabantu bazo zonke izizwe labo abanikezwa ubufakazi boMbuso manje. Khona-ke, njengoba zazimelelwe izimvu nezimbuzi ezinjalo, ‘zonke izizwe’ ziye zabuthelwa phambi kweNkosi ehleli esihlalweni sayo sobukhosi sasezulwini kusukela ekupheleni kweziKhathi zabeZizwe ngo-1914. Ngokuvumelana nalokho kubuthwa okwabikezelwa, unyaka ka-1935 ungophawulekayo. IWatch Tower Bible and Tract Society, esetshenziswa isigaba ‘senceku,’ ngalesosikhathi yayinamahhovisi egatsha angama-49 emhlabeni wonke. Ngalowonyaka ofanayo ukunakekela ‘kwenceku’ kwaqondiswa ngokukhethekile kwabanjengezimvu basemhlabeni, ngombono wokubabuthela esandleni sokunene seNkosi ebusayo uJesu Kristu. Kanjalo, laba abavela kuzo zonke izizwe baba nobuhlobo obuseduze nesigaba ‘senceku.’
14. NgokukaJohane 10:16, yimuphi umbono omusha owathathwa ngabanjengezimvu abalungileyo, futhi mangaki amahhovisi egatsha eWatch Tower Society abakhonzayo manje?
14 Labo abanjengezimvu, abalungileyo babengeke besabizwa ngomqondo obanzi ngokuthi ‘abantu abathokozelwayo.’ (Luka 2:14) Babengeke besabhekwa njengesingaqondakali, esingahlelekile isigaba sabantu abesaba uNkulunkulu bazo zonke izizwe—njengokungathi, izimvu ezilahlekile. UJesu wathi wayezobutha “nezinye izimvu” futhi azenze zibe “mhlambi munye” nensali yesigaba ‘senceku.’ (Johane 10:16) Ukuqoqwa kwalezi ‘ezinye izimvu’ kusukela ngalesosikhathi kuye phambili kuyingxenye evelele ‘yesibonakaliso’ esiphawula ‘isiphelo sesimiso sezinto.’ Futhi ukuze zikhonzwe iWatch Tower Society manje inamahhovisi egatsha angama-95.
Ukusabela Ngesikhathi ‘Esibonakalisweni’ Kunomvuzo
15. Ukuze ‘zidle ifa lombuso,’ yiziphi izimfanelo “izimvu” okumelwe zihlangabezane nazo?
15 Ngokomfanekiso kaJesu, “izimvu” ezilungileyo kumelwe zihlangabezane nezimfanelo ezithile phakathi ‘nesiphelo sesimiso sezinto.’ Kumelwe zibaqaphele futhi zamukele ‘abafowabo’ bakaKristu abangokomoya abenza isigaba ‘senceku ethembekileyo neqondayo.’ “Izimvu” nazo kumelwe zisenzele okuhle isigaba ‘senceku,’ ngisho nokubavakashela lapho begqunywe ejele ngokungafanele. Lokhu “izimvu” kumelwe zikwenze ukuze zijabulele izibusiso zikaBaba wasezulwini futhi zimenywe iNkosi uJesu Kristu ukuba ‘zidle ifa lombuso ezililungiselelweyo selokhu kwasekelwa umhlaba.’—Mathewu 25:34.
16. Ngamazwi athi “nidle ifa lombuso,” iNkosi imema “izimvu” ukuba zingenephi, zisinde kuyiphi “impi”?
16 Njengoba ‘lezizimvu’ zingebona ‘abafowabo’ beNkosi abangokomoya, ayizimemi ukuba zihlale ezihlalweni zobukhosi ezulwini futhi zibuse nayo iminyaka eyinkulungwane ekhethekile yokubusa kwayo. Ngamazwi ayo athi “nidle ifa lombuso,” izimemela ukuba zingene esikhathini soMbuso emva kokuba esebhubhise yonke imibuso yalelizwe engamesabi uNkulunkulu phakathi ‘nokulwa kosuku olukhulu lukaNkulunkulu uMninimandla onke’ eHarmagedoni. (IsAmbulo 16:13-16) Abaningi abanjengezimvu abaphilayo manje bayosinda empini enkulu futhi bangenele ukuBusa KukaKristu Kweminyaka Eyinkulungwane ngaphandle kokufa.
17. INkosi ikhuluma kanjani ‘nezimvu,’ futhi yakuzuza kanjani okuthile eyayingazinika khona?
17 Khona-ke iNkosi uJesu Kristu ikhuluma ‘kulezimvu’ njengabantwana bayo asebefikelwe isikhathi sokuba bangene efeni elivela kuyo. Ngokufa kwayo njengomuntu ophelele ukuze yenze umhlatshelo wesihlengo waso sonke isintu, yadela wonke amathemba okujabulela kwayo siqu iPharadesi emhlabeni. (Luka 23:39-43) Ngokuqondene nalokhu, uJesu “uAdamu wokugcina,” akafani ‘nomuntu wokuqala uAdamu’ owona walahlekisela yonke inzalo yakhe iPharadesi lasemhlabeni. Kanjalo uJesu Kristu ovusiwe, oba “uYise ongunaphakade” waso sonke isintu esihlengiwe, waba nokuthile angakunikeza laba abanjengezimvu abasemhlabeni. (1 Korinte 15:45; Isaya 9:6, 7) Umkhaya wesintu wasungulwa ‘kumuntu wokuqala uAdamu,’ enawo wonke amathemba namathuba ePharadesi. Kodwa leloPharadesi elilahlekile lizobuyiselwa ngoMbuso kaNkulunkulu ngesandla ‘sika-Adamu wokugcina,’ uJesu Kristu.
18. Kungayiphi ingqondo indawo yoMbuso wasemhlabeni ‘eyalungiselelwa ngayo izimvu selokhu kwasekelwa umhlaba’?
18 Kwakungemva kokuba bexoshelwe ngaphandle kwePharadesi lokuqala lapho uAdamu noEva baqala khona ukuba nabantwana. Indodana yabo yesibili, uAbela olungileyo, yabulawa indodana yabo yokuqala, uKayini. Ngakho indodana yabo uSeti yabhekwa njengethatha indawo ka-Abela. Ngokuzalwa kwenzalo enjalo, kwasungulwa isintu. Kodwa ngaphambi kwalokhu, lapho abazali besintu bexoshwa ePharadesi, uJehova uNkulunkulu wenza isithembiso sakhe somusa esimayelana ‘nenzalo’ eyayiyolimaza, noma ichoboze ikhanda leNyoka engokomfanekiso, uSathane uDeveli. ‘Leyonzalo’ kwakuzoba iNzalo yobukhosi, futhi lokhu kwahilela uMbuso, ngokwenjongo nangokombono kaNkulunkulu. (Genesise 3:15) Khona-ke lapho uSathane iNyoka nenzalo yakhe bevinjelwa ukuba bangasebenzi, abahlengiwe besintu bayongena eMbusweni wasemhlabeni, ngaphansi kukahulumeni wasezulwini weNzalo enqobayo echoboza iNyoka nenzalo yayo. Ngalendlela “umbuso” lowo abanjengezimvu ‘abawudlayo’ kuYise wabo waPhakade, uJesu Kristu, uyindawo yoMbuso ‘eyayilungiselelwe [bona] selokhu kwasekelwa umhlaba.’
19. Hlobo luni lwesiqalo isimiso sezinto sangemva kweArmagedoni esiyoba naso emhlabeni?
19 Njengoba izimbuzi ezingokomfanekiso ziyobhujiswa eArmagedoni, “izimvu” ezisindayo ziyokuba isiqalo esihle esimisweni sezinto sangemva kweArmagedoni emhlabeni oyiPharadesi. Ngokuqondene nalokhu, uJesu wathi: “Laba [abanjengezimbuzi] bayakumuka baye ekujezisweni okuphakade, kodwa abalungileyo baye ekuphileni okuphakade.”—Mathewu 25:46.
20. Singakugwema kanjani ukuchaza kabi izici ‘zesibonakaliso’?
20 Phakathi ‘nalesiphelo sesimiso sezinto’ kusukela ekupheleni kwezikhathi zabeZizwe ngo-1914, “izimvu” ‘nezimbuzi’ zihlukene ngendlela ezichaza ngayo ‘isibonakaliso sokuba khona’ kukaJesu. Njengoba ngokungangabazeki sisesikhathini sokwahlulela, lombuzo ubaluleke kakhulu: Sisho ukuthini ‘isibonakaliso’ kithi? Uma kushiyelwa kithi, singase singazichazi kahle izici ‘zalesosibonakaliso.’ Ngakho-ke senza kahle ngokubuza: Yini uJesu Kristu athi ‘lesibonakaliso’ esihlangene kufanele sisibonise yona? Ngokwakhe, kufanele sisho ukuthi isimiso sezinto samanje sizophela masinyane ‘osizini olukhulu’ olubhubhisa ngaphezu kukaZamcolo wembulunga yonke wosuku lukaNowa.—Mathewu 24:21.
21. (a) Nakuba “usizi olukhulu” lungaphambili, kungani kufanele sithokoze? (b) Iliphi ithuba nethemba elikhona ngesigaba ‘sezimvu’ sanamuhla?
21 Nokho, thokozani, ngoba ‘lesibonakaliso’ futhi sibonisa ukuthi ukuBusa KukaJesu Kristu Kweminyaka Eyinkulungwane kuseduze, kulungele ukuqala ngemva kokubhujiswa kwesimiso sezinto sikaSathane emhlabeni. (Luka 21:28) Ngakho-ke, ngaphansi kokuvikelwa kwaphezulu, ninethuba eliyigugu lokusinda “osizini olukhulu” ningene esimisweni esisha sezinto, lapho ukulunga kuyohlala khona phakade. Ngempela, phambi kwenu kunethemba lokungafi kodwa lokuphila njalonjalo nangokubusisekile emhlabeni eyipharadesi ngaphansi kobukhosi bendawo yonke bukaJehova uNkulunkulu!
22. (a) Uma sisabela ngokushesha nangokuqondile ‘esibonakalisweni,’ yini esiyoyenza? (b) Ngokuqondene ‘nesibonakaliso,’ uJesu Kristu uyofakazelwa kanjani?
22 Kungakhathaliseki ukuthi ‘singabafowabo’ abangokomoya bakaKristu noma “izimvu” ezilungileyo, khona-ke, masisabele ngokushesha futhi ngokuqondileyo ‘esibonakalisweni.’ Masibe nengxenye enkulu ekugcwalisekeni kwesici saso esivelele: “Lelivangeli lombuso liyakushunyayelwa ezweni lonke, kube-ngubufakazi ezizweni zonke.” Khona-ke ngeke sesabel utho lapho “ukuphela” kufika. Kunalokho, injabulo yethu iyochichima! Khona-ke, futhi, uJesu Kristu uyofakazelwa njengombikezeli othembekile ‘wesibonakaliso . . . sokuphela kwesimiso sezinto.’—Mathewu 24:3–25:46.
Ungaphendula?
◻ Kunini lapho abantu babeyohlukaniswa khona njengezimvu nezimbuzi?
◻ Ungajabula ngenxa yokwenzani phakathi nokugcwaliseka komfanekiso kaJesu wezimvu nezimbuzi?
◻ Obani abenza ‘abafowabo’ beNkosi ‘nenceku ethembekileyo neqondayo’?
◻ Ukuze ‘badle ifa lombuso,’ iziphi izimfanelo abanjengezimvu okumelwe bahlangabezane nazo?
◻ Yini esiyoyenza uma sisabela ngokushesha nangokuqondile ‘esibonakalisweni’ ‘sokuba khona’ kukaJesu?
[Amazwi acashunwe esihlokweni ekhasini 23]
Sabela ngokushesha ‘esibonakalisweni’ ‘sokuba khona’ kukaJesu. Ukwenza kanjalo kungasho ukuphila okuphakade ePharadesi
[Isithombe ekhasini 20]
Njengomalusi ehlukanisa izimvu nezimbuzi, kanjalo uJesu Kristu uhlukanisa abantu namuhla. Ingabe ungumuntu onjengemvu?