Ingxoxo Nomakhelwane—Ingabe Bonke Abantu Abalungile Baya Ezulwini?

OFAKAZI BAKAJEHOVA bayakujabulela ukuxoxa ngeBhayibheli nomakhelwane babo. Ingabe ukhona umbuzo weBhayibheli onawo obulokhu uzibuza wona? Kukhona yini ofisa ukukwazi ngezinkolelo zoFakazi BakaJehova noma izinto abazenzayo eziphathelene nenkolo yabo? Uma kunjalo, unganqikazi ukubabuza lapho uphinde uhlangana nabo. Bayokujabulela ukuxoxa nawe ngezindaba ezinjalo.

Le ngxoxo elandelayo ingxoxo ejwayelekile omunye woFakazi BakaJehova angaba nayo nomakhelwane. Ake sithi uFakazi ogama lakhe uMlungisi ufika emzini wendoda egama layo uZweli.

Bayokwenzani Ezulwini Labo Abaya Khona?

UMlungisi: Lapho ucabanga ngekusasa, ingabe ucabanga ukuthi izimo ziyoke zibe ngcono, noma zizoba zimbi kakhulu noma zizolokhu zinje?

UZweli:Mina ngibona sengathi izimo zizoba ngcono. Ngikubheke ngabomvu ukuya ezulwini ngiyoba neNkosi.

UMlungisi: Ithemba elihle lelo. IBhayibheli likhuluma kakhulu ngokuthi izulu linjani nangelungelo lokuya khona. Uke wacabanga ngokuthi labo abaya ezulwini bayokwenzani?

UZweli: Siyoba noNkulunkulu, simdumise phakade.

UMlungisi: Kuzwakala kuyinto enhle leyo. Uyazi, iBhayibheli alikhulumi nje kuphela ngamalungelo ayotholwa abaya ezulwini kodwa likhuluma nangomsebenzi obalulekile abayowenza.

UZweli: Msebenzi muni lowo?

UMlungisi: Ngisho umsebenzi okukhulunywa ngawo lapha kusAmbulo 5:10. Leli vesi lithi: “[UJesu] wabenza babe ngumbuso nabapristi kuNkulunkulu wethu, futhi bayobusa njengamakhosi phezu komhlaba.” Uqaphelile yini Zweli ukuthi imuphi umsebenzi abazowenza labo abaya ezulwini?

UZweli: Leli vesi lithi bayobusa njengamakhosi phezu komhlaba.

UMlungisi: Uyihlabe esikhonkosini.

Bazobusa Obani?

UMlungisi: Akulona yini iqiniso ukuthi uma labo abaya ezulwini beyobusa njengamakhosi, kumelwe kube khona abantu abazobabusa? Uma bengekho, sikuphi isidingo sombuso ongenabantu obabusayo?

UZweli: Ngiyakuzwa ukuthi uqondeni.

UMlungisi: Ngakho umbuzo uwukuthi, Bayobusa obani?

UZweli: Ngicabanga ukuthi siyobusa phezu kwabantu abasemhlabeni abayobe bengakafi futhi bengakezi ezulwini.

UMlungisi: Kubonakala kungenzeka—uma kuwukuthi bonke abantu abalungile baya ezulwini. Kodwa nakhu okunye esingakucabangela. Kungenzeka yini ukuthi abanye abantu—abanye abalungile—ngeke baye ezulwini?

UZweli: Angikaze ngizwe ngamaKristu akholelwa kulokho.

UMlungisi: Ngibuza lo mbuzo ngenxa yalokho esikufunda kumaHubo 37:29. Ngicela ulifunde leli vesi.

UZweli: Kulungile. Lithi: “Abalungile bayokudla ifa lomhlaba, futhi bayohlala kuwo kuze kube phakade.”

UMlungisi: Ngiyabonga. Uqaphelile yini ukuthi abantu abaningi abalungile bayohlalaphi?

UZweli: Ivesi lithi bayohlala emhlabeni.

UMlungisi: Impela—futhi hhayi nje isikhashana. Phawula ukuthi lithi: “Bayohlala kuwo kuze kube phakade.”

UZweli: Mhlawumbe lokho kumane nje kusho ukuthi bayohlale bekhona abantu abalungile emhlabeni. Lapho thina sifa siya ezulwini, kuzalwa abanye abantu abalungile, bathathe indawo yethu.

UMlungisi: Abaningi bangalichaza ngaleyo ndlela leli vesi. Kodwa kungenzeka yini ukuthi lichaza okunye okuhluke ngokuphelele? Kungenzeka yini ukuthi lithi abantu abalungile bazophila phakade emhlabeni?

UZweli: Angisakuzwa-ke manje.

IPharadesi Lasemhlabeni Elizayo

UMlungisi: Awucabange ngalokho okushiwo elinye ivesi leBhayibheli ngokuphila emhlabeni esikhathini esizayo. Asifunde isAmbulo 21:4. Mayelana nabantu abayobe bephila ngaleso sikhathi, leli vesi lithi: “[UNkulunkulu] uyosula zonke izinyembezi emehlweni abo, ukufa ngeke kusaba khona, noma ukulila noma ukukhala noma ubuhlungu ngeke kusaba khona. Izinto zangaphambili zidlulile.” Akulona yini ithemba elihle leli?

UZweli: Lihle. Kodwa ngicabanga ukuthi lichaza ukuthi ukuphila kuyobe kunjani ezulwini.

UMlungisi: Kuyiqiniso ukuthi labo abaya ezulwini bayothola izibusiso ezifanayo. Kodwa ake uphinde ulibheke leli vesi. Lithi kuyokwenzekani ngokufa?

UZweli: Lithi “ukufa ngeke kusaba khona.”

UMlungisi: Uqinisile. Ngicabanga ukuthi uzovuma ukuthi ukuze into ethile ingabe isaba khona, kufanele iqale ibe khona.

UZweli: Impela.

UMlungisi: Kodwa akukaze kube khona ukufa ezulwini, akunjalo? Kulapha emhlabeni lapho kufa khona abantu.

UZweli: Hmm. Kuzodingeka ngicabange ngalokho.

UMlungisi: Uyabona Zweli, iBhayibheli lifundisa ukuthi bakhona abalungile abazoya ezulwini kodwa abanye abaningi bazophila phakade emhlabeni. Empeleni, ngiyaqiniseka ukuthi uke wawezwa la mazwi adumile: “Babusisiwe abamnene, ngokuba bayakudla ifa lomhlaba.”—Mathewu 5:5, IBhayibheli lesiZulu elivamile.

UZweli: Yebo, ngiye ngalizwa kaningi lelo vesi lifundwa esontweni.

UMlungisi: Uma abamnene beyokudla ifa lomhlaba, lokho akusho yini ukuthi abantu bayobe bephila emhlabeni? Labo abayobe behlala emhlabeni bayothola izinzuzo ezibikezelwe encwadini yesAmbulo. Bayobona umhlaba ushintsha ngokuphelele ngoba uNkulunkulu uyoqeda bonke ububi—ngisho nokufa.

UZweli: Ngiyakuzwa, kodwa angiqiniseki ukuthi ivesi elilodwa nje noma amabili anele ukuba afakazele iphuzu lakho.

UMlungisi: Uqinisile. Empeleni, kunemiBhalo eminingana ekhuluma ngokuthi ukuphila kuyobe kunjani esikhathini esizayo. Uma unaso isikhashana, ngingakubonisa amavesi engiwathanda kakhulu.

UZweli: Cha, kona angijahile kangako.

“Omubi Abe Engasekho”

UMlungisi: Siye safunda iHubo 37 ivesi 29 . Asibuyele kulelo hubo. Manje sizofunda amavesi 10 no-11. Ngicela uwafunde.

UZweli: Kulungile. “Sekuyisikhashana nje, omubi abe engasekho; ngokuqinisekile uyoyibheka indawo yakhe, futhi uyobe engekho. Kodwa abamnene bayodla ifa lomhlaba, futhi ngempela bayothola injabulo enkulu ngokuchichima kokuthula.”

UMlungisi: Ngiyabonga. Uma ubheka ivesi 11, lithi “abamnene,” noma abalungile, bayohlala kuphi?

UZweli: Lithi “bayodla ifa lomhlaba.” Kodwa ngizwa sengathi leli vesi lisebenza manje; angithi abantu abalungile bakhona emhlabeni manje.

UMlungisi: Kuyiqiniso lokho. Noma kunjalo, phawula ukuthi leli vesi lithi futhi abantu abalungile bayojabulela ‘ukuchichima kokuthula.’ Kukhona yini ukuthula emhlabeni njengamanje?

UZweli: Cha akukho.

UMlungisi: Pho, siyogcwaliseka kanjani lesi sithembiso? Mhlawumbe ngingasebenzisa lokhu kuqhathanisa: Ake sithi unesakhiwo esinezindlu eziqashisayo. Abanye babantu obaqashisile balungile—baziphatha kahle izindlu zabo futhi bazama ukuba omakhelwane abahle. Kuyakujabulisa ukubaqashisela indawo yokuhlala. Kodwa abanye babantu obaqashisile babi; balimaza impahla futhi bahlupha omakhelwane babo. Uma lezo ziqashi ezimbi zenqaba ukushintsha, ubungenzenjani?

UZweli: Bengingazixosha.

UMlungisi: Yilokho kanye uNkulunkulu azokwenza kubantu ababi abasizungezile. Awuphinde ubheke ivesi 10. Lithi: “Omubi abe engasekho.” Ngamanye amazwi, kufana nokuthi uNkulunkulu uzobaxosha abantu abahlupha abanye. Abantu abalungile bayobe sebephila ngokuthula emhlabeni. Ngiyaqonda ukuthi kungenzeka ukuthi umbono wokuthi abantu abalungile bayophila phakade emhlabeni uhlukile kulokho owafundiswa kona.

UZweli: Yebo, angikaze ngikuzwe lokhu esontweni lami.

UMlungisi: Futhi njengoba ushilo, akwanele ukufunda ivesi elilodwa noma amabili mayelana nale ndaba. Kudingeka sihlole lokho iBhayibheli lilonke elikushoyo ngekusasa labantu abalungile. Kodwa ngokwemiBhalo esiyifunde namhlanje, ucabanga ukuthi kungenzeka abantu abathile baye ezulwini, abanye abaningi abalungile baphile phakade lapha emhlabeni?

UZweli: Angiqiniseki. Kodwa mangisho ukuthi kubonakala kunjalo kule miBhalo oyifundile. Kuzodingeka ngibuye ngicabange ngayo.

UMlungisi: Lapho ucabanga ngale ndaba, ungase ufikelwe eminye imibuzo. Ngokwesibonelo, kuthiwani ngabantu abalungile ababephila ngaphambi kwethu? Ingabe bonke baya ezulwini? Uma kungenjalo, bakuphi manje?

UZweli: Ungasasho, yimibuzo emihle leyo.

UMlungisi: Ngicela ukukwenzela izinto ezimbili. Okokuqala, awuthi ngikubhalele phansi imiBhalo embalwa ephathelene nale ndaba.a Okwesibili, ngingathanda ukubuya ngizoxoxa ngale miBhalo uma usulitholile ithuba lokuyifunda futhi wacabanga ngayo. Kungalunga lokho?

UZweli: Yebo kulungile. Ngiyabonga.

[Umbhalo waphansi]