• “Ungcwele, Ungcwele, Ungcwele UJehova”
    Sondela KuJehova

    • 17, 18. (a) Umbono ka-Isaya waqale wamthinta kanjani? (b) UJehova walisebenzisa kanjani iserafi ukuba liduduze u-Isaya, futhi sasibaluleke ngani isenzo seserafi?

      17 Nokho, ingabe ubungcwele bukaNkulunkulu kufanele busenze sizizwe siphansi? Yebo kunjalo. Vele singaphansi kukaJehova​—futhi siswele amagama okuchaza indlela esiphansi ngayo. Ingabe ukwazi lokho kufanele kusenze siqhele kuye? Cabanga indlela u-Isaya asabela ngayo lapho ezwa amaserafi ememezela ubungcwele bukaJehova. “Ngathi: ‘Maye kimi! Kuphelile ngami, ngoba ngingumuntu onezindebe ezingcolile, ngihlala phakathi kwesizwe esinezindebe ezingcolile; ngoba amehlo ami abone iNkosi, uJehova wamabutho uqobo!’” (Isaya 6:5) Yebo, ubungcwele bukaJehova obungapheli bakhumbuza u-Isaya indlela ayenesono ngayo nayengaphelele ngayo. Ekuqaleni, le ndoda ethembekile yakhungatheka. Kodwa uJehova akayishiyanga ikuleso simo.

      18 Ngokushesha iserafi lamduduza lo mprofethi. Kanjani? Ingelosi enamandla yandizela e-altare, yathatha ilahle, yathinta izindebe zika-Isaya ngalo. Kungazwakala kubuhlungu lokho kunokuba kududuze. Kodwa khumbula, kwakuwumbono lona, unencazelo eningi engokomfanekiso. U-Isaya, umJuda othembekile, wayazi kahle ukuthi imihlatshelo yayenziwa mihla yonke e-altare lethempeli ngenjongo yokuhlawulela izono. Ngothando iserafi lakhumbuza lo mprofethi ukuthi yize ayengaphelele, ‘enezindebe ezingcolile,’ wayesengaba nokuma okuhlanzekile phambi kukaNkulunkulu.a UJehova wayezimisele ukubheka umuntu onamaphutha nonesono njengongcwele​—okungenani ngomqondo olinganiselwe.​—Isaya 6:6, 7.