• UJehova Uthobisa Umuzi Ozikhukhumezayo
    Isiprofetho Sika-Isaya—Ukukhanya Kuso Sonke Isintu I

    • Ithuluzi likaNkulunkulu Lokubhubhisa

      10. Ubani uJehova ayomsebenzisela ukunqoba iBabiloni?

      10 Imuphi umbuso uJehova ayowusebenzisela ukuwisa iBabiloni? Kusasele iminyaka engaba ngu-200, uJehova uyayiveza impendulo: “Bheka ngibavusela amaMede, lawo abheka isiliva njengelingelutho, futhi angajatshuliswa yigolide. Imicibisholo yawo iyophahlaza ngisho nezinsizwa zibe izicucu. Ngeke asihawukele isithelo sesisu; iso lawo ngeke liwahawukele amadodana. IBabiloni, umhlobiso wemibuso, ubuhle bokuziqhenya kwamaKaledi, kumelwe libe njengalapho uNkulunkulu egumbuqela iSodoma neGomora.” (Isaya 13:17-19) IBabiloni eliwubukhazikhazi liyokuwa, futhi ithuluzi likaJehova lokufeza lokhu kuyoba amabutho ezwe laseMediya elikude nelisezintabeni.a Ekugcineni, iBabiloni liyoba yincithakalo njengemizi yaseSodoma naseGomora engcolile ngokuziphatha.—Genesise 13:13; 19:13, 24.

  • UJehova Uthobisa Umuzi Ozikhukhumezayo
    Isiprofetho Sika-Isaya—Ukukhanya Kuso Sonke Isintu I

    • 11, 12. (a) Kwenzeka kanjani ukuba iMediya ibe umbuso wezwe? (b) Yisiphi isici esingavamile esishiwo isiprofetho ngamabutho aseMediya?

      11 Osukwini luka-Isaya, iMediya neBabiloni ingaphansi kwejoka lom-Asiriya. Cishe ngemva kwekhulu leminyaka, ngo-632 B.C.E., iMediya neBabiloni bayalekelelana ekugumbuqeleni iNineve, inhloko-dolobha yase-Asiriya. Lokhu kwenza ukuba iBabiloni libe umbuso wezwe oqavile. Alazi ukuthi ngemva kweminyaka cishe eyikhulu, iMediya iyolibhubhisa! Ukhona yini ongenza isibikezelo esidinga isibindi kanjalo, ngaphandle kukaJehova uNkulunkulu?

      12 Lapho eveza ithuluzi alikhethile lokubhubhisa, uJehova uthi amabutho aseMediya ‘abheka isiliva njengelingelutho, futhi, awajatshuliswa yigolide.’ Yeka isici esingavamile ngamasosha aselukhuni ngenxa yempi! Isazi seBhayibheli u-Albert Barnes sithi: “Ambalwa ngempela amabutho ahlaselayo ayesuke engathonywanga ukuthi azothola impango.” Ingabe amabutho aseMediya abonakalisa uJehova eqinisile kulokhu? Yebo. Cabanga ngala mazwi atholakala ku-Bible-Work, eyabhalwa uJ. Glentworth Butler: “Ngokungafani nezizwe eziningi ezake zalwa, amaMede, ikakhulukazi amaPheresiya, ayebheka ukunqoba nodumo njengokubalulekile kunegolide.”b Ngenxa yalokhu, akumangalisi ukuthi lapho ekhulula ama-Israyeli ekuthunjweni eBabiloni, umbusi wasePheresiya uKoresi uphindisela izinkulungwane zezitsha zegolide nesiliva uNebukadinesari ayeziphange ethempelini laseJerusalema.—Ezra 1:7-11.

      13, 14. (a) Nakuba engenandaba nempango, yini ethandwa amaqhawe amaMede namaPheresiya? (b) UKoresi wasinqoba kanjani isivikelo iBabiloni elalizigqaja ngaso?

      13 Nakuba amaqhawe aseMediya nasePheresiya engenandaba kangako nempango, ayakuthanda ukuvelela kodwa. Awazimisele ukukhonza noma yisiphi isizwe emhlabeni. Ngaphezu kwalokho, uJehova ufaka ‘ukuphanga’ ezinhliziyweni zawo. (Isaya 13:6) Ngakho, ngemicibisholo yawo yensimbi—engasetshenziselwa nje kuphela ukuciba kodwa nokugalela nokuchoboza amasosha ezitha, inzalo yomama baseBabiloni—azimisele ukunqoba iBabiloni.

      14 UKoresi, umholi wamabutho amaMede namaPheresiya, akavinjwa izivikelo zaseBabiloni. Ngobusuku buka-October 5/6, 539 B.C.E., ukhipha umyalo wokuba amanzi oMfula i-Ewufrathe aphanjukiswe. Njengoba amanzi ebohla, abahlaseli bangena kulo muzi ngokunyenya, behamba emfuleni onamanzi afika emathangeni. Izakhamuzi zaseBabiloni ziyazunywa, iBabiloni libe seliwa ngobusuku obubodwa. (Daniyeli 5:30) UJehova uNkulunkulu uphefumulela u-Isaya ukuba aprofethe ngalezi zenzakalo, enza kungabi nakungabaza ukuthi uYena oqondisa izinto.