Isahluko Samashumi Amabili Nantathu
Hlala Ulindele UJehova
1, 2. (a) Siquketheni isahluko 30 sika-Isaya? (b) Yimiphi imibuzo esizoyicabangela manje?
KU-ISAYA isahluko 30, sifunda ezinye izimemezelo zaphezulu ngababi. Noma kunjalo, le ngxenye yesiprofetho sika-Isaya iqokomisa ezinye zezimfanelo zikaJehova ezijabulisayo. Eqinisweni, izimfanelo zikaJehova zichazwe ngamagama acace kangangokuba kuba sengathi siyambona esiduduza, kuba sengathi sizwa izwi lakhe lisiqondisa, futhi simuzwe esithinta ngendlela eqabulayo.—Isaya 30:20, 21, 26.
2 Naphezu kwalokho, abantu bakubo ka-Isaya, izakhamuzi zakwaJuda eziyizihlubuki, ziyenqaba ukubuyela kuJehova. Kunalokho zithembela kumuntu. UJehova uzizwa kanjani ngalokhu? Futhi le ngxenye yesiprofetho sika-Isaya iwasiza kanjani amaKristu namuhla ukuba ahlale elindele uJehova? (Isaya 30:18) Ake sizwe.
Ubuwula Nenhlekelele
3. Iliphi icebo uJehova alidalulayo?
3 Sekuyisikhathi abaholi bakwaJuda beceba ngasese ukuthola indlela yokugwema ijoka le-Asiriya. Nokho, uJehova ubebuka. Manje udalula icebo labo: “‘Maye kuwo amadodana anenkani,’ kusho uJehova, ‘lawo athambekele ekufezeni icebo, kodwa kungelona elivela kimi; nasekuthululeni umnikelo wokuphuzwayo, kodwa engakwenzi ngomoya wami, ukuze anezele isono kwesinye isono; lawo aqala ukwehlela eGibithe.’”—Isaya 30:1, 2a.
4. Abantu bakaNkulunkulu abahlubukayo balibeke kanjani iGibithe esikhundleni sikaNkulunkulu?
4 Yeka indlela okubashaqisa ngayo labo baholi abaceba icebo ukuzwa icebo labo lidalulwa! Ukuya eGibithe bayobumba umfelandawonye nalo kungaphezu kokuba yisenzo esibi ngokumelene ne-Asiriya kuphela; kuwukuhlubuka kuJehova uNkulunkulu. Ngesikhathi seNkosi uDavide, isizwe sasibheka kuJehova njengenqaba yaso futhi siphephela ‘emthunzini wamaphiko akhe.’ (IHubo 27:1; 36:7) Manje ‘sesikhosela esiphephelweni sikaFaro futhi siphephela emthunzini weGibithe.’ (Isaya 30:2b) Sibeke iGibithe esikhundleni sikaNkulunkulu! Yeka ubumbuka!—Funda u-Isaya 30:3-5.
5, 6. (a) Kungani ukwakha umfelandawonye neGibithe kuyiphutha eliholela ekufeni? (b) Yiluphi uhambo lokuqala olwathathwa abantu bakaNkulunkulu oluqokomisa ubuwula balolu hambo lokuya eGibithe?
5 Njengokungathi ususa noma imuphi umbono wokuthi lolu hambo lwaseGibithe lumane nje lungolokuvakasha okungatheni, u-Isaya unikeza imininingwane eyengeziwe. “Isimemezelo ngezilwane zaseningizimu: Zithwala umnotho wazo emahlombe ezimbongolo ezikhule ngokugcwele, nempahla yazo ezifumbini zamakamela zidabule ezweni lokucindezeleka nelezimo ezinzima, lengonyama nengwe egwavumayo, lenyoka enesihlungu nenyoka yomlilo endizayo.” (Isaya 30:6a) Ngokusobala, lolu hambo luhlelwe kahle. Izithunywa zihlela uhide lwamakamela nezimbongolo, ezizithwalise izimpahla ezibizayo bese zilibangisa phansi eGibithe zinqamule ihlane elomile eligcwele izingonyama ezigwavumayo nezinyoka ezinesihlungu. Ekugcineni, izithunywa ziyafika lapho ziya khona bese zinikeza abaseGibithe amagugu azo. Zithenge isivikelo—noma zicabanga kanjalo. Kodwa uJehova uthi: “Ngeke kusizuzise ngalutho lesi sizwe. AbaseGibithe bamane nje bayize, usizo lwabo luyoba yize. Ngakho-ke ngibizé lo ngokuthi: ‘URahabi—okwabo ukumane bahlale bathule.’” (Isaya 30:6b, 7) “URahabi,” “isilo sasolwandle,” ufanekisela iGibithe. (Isaya 51:9, 10) Uthembisa zonke izinto kodwa akenzi lutho. Ukubumba kukaJuda umfelandawonye naye kuyiphutha eliholela ekufeni.
6 Njengoba u-Isaya echaza uhambo lwezithunywa, kungenzeka izilaleli zakhe zikhumbule uhambo lwangezinsuku zikaMose. Okhokho bazo badabula lona leli ‘hlane elesabekayo.’ (Duteronomi 8:14-16) Nokho, osukwini lukaMose, ama-Israyeli ayelishiya iGibithe futhi ephuma ebugqilini. Manje lezi zithunywa ziya eGibithe futhi empeleni ziya ebugqilini. Yeka ubuwula! Kwangathi singelokothe senze isinqumo esibi kanjalo, sithathe ubugqila silahle inkululeko yethu engokomoya!—Qhathanisa neyabaseGalathiya 5:1.
Ukuphikiswa Kwesigijimi Somprofethi
7. Kungani uJehova ethi u-Isaya akalobe isixwayiso saKhe kuJuda?
7 UJehova utshela u-Isaya ukuba alobe isigijimi asanda kusisho ukuze “sisebenze osukwini oluzayo, ukuba sibe ufakazi isikhathi esingenasiphelo.” (Isaya 30:8) Ukungakwamukeli kukaJehova ukuqhakambisa imifelandawonye eyenziwe nabantu ngaphezu kokwethembela kuYe kumelwe kulotshwe ukuze kuzuze izizukulwane ezizayo—kuhlanganise nesethu namuhla. (2 Petru 3:1-4) Kodwa kunesidingo esiphuthuma kakhulu sombhalo olotshiwe. “Yisizwe esidlubulundayo, amadodana angenalo iqiniso, amadodana abelokhu engathandi ukuzwa umthetho kaJehova.” (Isaya 30:9) Abantu basenqabile iseluleko sikaNkulunkulu. Ngakho kufanele silotshwe ukuze kamuva bangaphiki ukuthi banikezwa isixwayiso esifanele.—IzAga 28:9; Isaya 8:1, 2.
8, 9. (a) Abaholi bakwaJuda bazama ngayiphi indlela ukonakalisa abaprofethi bakaJehova? (b) U-Isaya ubonisa kanjani ukuthi ngeke esatshiswe?
8 Manje u-Isaya unikeza isibonelo sesimo sengqondo sokuhlubuka kwabantu. “Bathé kulabo ababonayo, ‘Akumelwe nibone,’ nakulabo ababona imibono, ‘Akumelwe nisibonele imibono yezinto eziqondile. Khulumani kithi izinto ezibushelelezi; bonani imibono yezinto eziyinkohliso.’” (Isaya 30:10) Ngokutshela abaprofethi abathembekile ukuba bayeke ukukhuluma ‘okuqondile,’ noma okuyiqiniso, kunalokho bakhulume ‘izinto ezibushelelezi neziyinkohliso,’ noma amanga, abaholi bakwaJuda babonisa ukuthi bafuna ukukitazwa izindlebe. Bafuna ukudunyiswa hhayi ukulahlwa. Ngokombono wabo, noma imuphi umprofethi ongazimisele ukuprofetha ngendlela efunwa yibo kufanele ‘achezuke endleleni, aphambuke emendweni.’ (Isaya 30:11a) Kufanele akhulume izinto ezizwakala kamnandi endlebeni noma ayeke ukuprofetha!
9 Abaphikisi baka-Isaya bayaphikelela: ‘Yenza oNgcwele ka-Israyeli ukuba aphele ngenxa nje yethu.’ (Isaya 30:11b) U-Isaya makayeke ukukhuluma egameni likaJehova, “oNgcwele ka-Israyeli”! Kwasona lesi siqu siyabacasula ngoba izindinganiso zikaJehova eziphakeme zembula isimo sabo esingathandeki. Usabela kanjani u-Isaya? Uthi: “Yilokhu oNgcwele ka-Israyeli akushilo.” (Isaya 30:12a) Ngokunganqikazi, u-Isaya usho wona la mazwi abaphikisi bakhe abangafuni ukuwezwa. Akanakwesatshiswa. Yeka isibonelo esihle kithi! Uma kuziwa ekumemezeleni isigijimi sikaNkulunkulu, amaKristu akumelwe neze ayekethise. (IzEnzo 5:27-29) Njengo-Isaya, ayaqhubeka ememezela: ‘Yilokhu uJehova akushilo’!
Imiphumela Yokuhlubuka
10, 11. Iyoba yini imiphumela yokuhlubuka kukaJuda?
10 UJuda ulilahlile izwi likaNkulunkulu, wathembela emangeni, wencika “kokukhohlisayo.” (Isaya 30:12b) Iyoba yini imiphumela? Esikhundleni sokuba uJehova asiyeke isizwe njengoba sifisa, uzosiqeda! Lokhu kuzokwenzeka ngokuzumayo nangokuphelele, njengoba u-Isaya egcizelela ngomfanekiso. Ukuhlubuka kwesizwe ‘kunjengengxenye ehlephukile esizowela phansi, ukuvokomala odongeni oluphakeme kakhulu, ukubhidlika kwalo okungenzeka ngokuzumayo, ngomzuzwana.’ (Isaya 30:13) Njengoba nje ukuvokomala okuqhubekayo odongeni oluphakeme kugcina kulubhidlizile, nokuhlubuka okuqhubekayo kwabantu besikhathi sika-Isaya kuzosiwisa isizwe.
11 Esebenzisa omunye umfanekiso, u-Isaya ubonisa ukuphelela kwembubhiso ezayo: “Umuntu uyoyiphula njengalapho kuphulwa imbiza enkulu yababumbi, ichotshozwa iba yizicucu umuntu angayongi, kangangokuba kungabe kusatholakala phakathi kwezicucu zayo ezichotshoziwe udengezi okungawolwa ngalo umlilo eziko noma okungakhiwa ngalo amanzi exhaphozini.” (Isaya 30:14) Ukubhujiswa kukaJuda kuyoba okuphelele kangangokuba ngeke kusale lutho oluwusizo—ngeke kube khona ngisho nodengezi olukhulu lokukha umlotha oshisayo eziko noma lokukha amanzi exhaphozini. Yeka isiphetho esiyihlazo! Imbubhiso ezayo kulabo abahlubuka ekukhulekeleni kweqiniso namuhla iyoba ezumayo nephelele ngendlela efanayo.—Heberu 6:4-8; 2 Petru 2:1.
Isicelo SikaJehova Siyenqatshwa
12. Abantu bakwaJuda bangakugwema kanjani ukubhujiswa?
12 Izilaleli zika-Isaya zingayigwema imbubhiso. Ikhona indlela yokuphunyula. Umprofethi uyachaza: “Yilokhu iNkosi EnguMbusi uJehova, oNgcwele ka-Israyeli, ekushilo: ‘Niyosindiswa ngokuba nibuye futhi niphumule. Amandla enu ayoba kuphela sekuhlaleni ningaphazamisekile ninokwethembela.’” (Isaya 30:15a) UJehova ukulungele ukusindisa abantu bakhe—uma bebonisa ukholo ngokuba ‘baphumule,’ noma bayeke ukuzama ukuthola insindiso ngokwakha imifelandawonye nabantu, ‘nangokuhlala bengaphazamisekile,’ noma ngokubonisa ukwethembela emandleni kaNkulunkulu avikelayo ngokungazivumeli banqotshwe ukwesaba. “Kodwa,” u-Isaya utshela abantu, “anithandanga.”—Isaya 30:15b.
13. Abaholi bakwaJuda bathembelephi, futhi ingabe lokho kuyafaneleka?
13 U-Isaya ube esenaba: “Nabe senithi: ‘Cha, siyobaleka ngamahhashi!’ Yingakho niyobaleka. ‘Siyogibela amahhashi anejubane!’ Yingakho labo abanisukelayo beyozibonakalisa benejubane.” (Isaya 30:16) AbaseJudiya bacabanga ukuthi bayosindiswa amahhashi anejubane, hhayi uJehova. (Duteronomi 17:16; IzAga 21:31) Nokho, umprofethi uyaphika, ukwethembela kwabo kuwo kuyoba yize ngoba izitha zabo ziyobafica. Ngisho nobuningi ngeke bubasize. “Inkulungwane iyothuthumeliswa ukukhuza koyedwa; ngokukhuza kwabahlanu niyobaleka.” (Isaya 30:17a) Amabutho akwaJuda ayongenwa ukwesaba futhi abaleke lapho kumemeza abambalwa nje besitha.a Ekugcineni, kuyosala insali nje, isale yodwa, “njengensika esiqongweni sentaba nanjengesibonakaliso egqumeni.” (Isaya 30:17b) Njengokusho kwalesi siprofetho, lapho iJerusalema libhujiswa ngo-607 B.C.E., kusinda insali kuphela.—Jeremiya 25:8-11.
Induduzo Phakathi Nokulahlwa
14, 15. Amazwi ka-Isaya 30:18 azinikeza yiphi induduzo izakhamuzi zakwaJuda endulo namaKristu eqiniso namuhla?
14 Lapho la mazwi esankeneneza ezindlebeni zezilaleli zika-Isaya, isigijimi sakhe siyashintsha. Esikhundleni sosongo lwenhlekelele kukhulunywa ngesithembiso sezibusiso. “Ngakho-ke uJehova uyohlala elindele ukunibonisa umusa, ngakho-ke uyovuka ukuze anibonise isihe. Ngoba uJehova unguNkulunkulu wokwahlulela. Bayajabula bonke abahlala bemlindele.” (Isaya 30:18) Yeka amazwi ajabulisayo! UJehova unguBaba onesihawu olangazelela ukusiza izingane zakhe. Uyakuthokozela ukubonisa isihe.—IHubo 103:13; Isaya 55:7.
15 La mazwi aqinisekisayo asebenza ensalini yamaJuda, ngesihe evunyelwa ukuba isinde ekubhujisweni kweJerusalema ngo-607 B.C.E., nakwabambalwa ababuyela eZweni Lesithembiso ngo-537 B.C.E. Kodwa amazwi omprofethi ayawaduduza namaKristu namuhla. Asikhumbuza ukuthi uJehova “uyovuka” ngenxa yethu, aliqede leli zwe elibi. Abakhulekeli abathembekile bangaqiniseka ukuthi uJehova—“uNkulunkulu wokwahlulela”—ngeke alivumele izwe likaSathane liqhubeke isikhathi eside ngokungadingekile. Ngakho-ke, labo “abahlala bemlindele” banesizathu esikhulu sokujabula.
UJehova Ududuza Abantu Bakhe Ngokuphendula Imithandazo
16. UJehova ubaduduza kanjani abadikibele?
16 Nokho, abanye bangase bazizwe bedikibala ngoba bengakhululwanga ngokushesha njengoba babethemba. (IzAga 13:12; 2 Petru 3:9) Kwangathi bangathola induduzo emazwini alandelayo ka-Isaya, aqokomisa isici esikhethekile sobuntu bukaJehova. “Lapho abantu abaseZiyoni beyobe behlala eJerusalema, ngeke neze ukhale. Nakanjani uyokubonisa umusa lapho nje kuzwakala ukukhala kwakho; ngokushesha nje lapho ekuzwa impela uyokuphendula.” (Isaya 30:19) U-Isaya udlulisela ububele ngala mazwi ngokuthi angabe esasebenzisa isivumelwano sobuningi u-“ni” asisebenzisé evesini 18, kodwa asebenzise esobunye u-“u” evesini 19. Lapho uJehova eduduza abacindezelekile, usebenzelana nomuntu ngamunye njengohlukile kwabanye. NjengoBaba, akayibuzi indodana edikibele ukuthi, ‘Kungani ungaqini njengomfowenu?’ (Galathiya 6:4) Kunalokho, ulalela umuntu ngamunye ngesineke. Eqinisweni, “ngokushesha nje lapho ekuzwa impela uyokuphendula.” Yeka amazwi aqinisa idolo! Abadikibele bangaqina kakhulu uma bethandaza kuJehova.—IHubo 65:2.
Yizwa Izwi LikaNkulunkulu Eliholayo Ngokufunda IZwi Lakhe
17, 18. Ngisho nasezikhathini ezinzima, uJehova usinikeza kanjani isiqondiso?
17 Njengoba u-Isaya eqhubeka ekhuluma, ukhumbuza izilaleli zakhe ukuthi usizi luyeza. Abantu bayothola “usizi njengesinkwa nokucindezeleka njengamanzi.” (Isaya 30:20a) Usizi nokucindezeleka abayokuthola lapho bevinjezelwe kuyoba yinto evame njengesinkwa namanzi. Noma kunjalo, uJehova ukulungele ukophula abaqotho. “UMfundisi wakho Omkhulu ngeke esazifihla, futhi amehlo akho kumelwe abe ngamehlo abona uMfundisi wakho Omkhulu. Futhi izindlebe zakho ziyokuzwa izwi emva kwakho lithi: ‘Nansi indlela. Hambani ngayo,’ uma kwenzeka niya ngakwesokunene noma uma kwenzeka niya ngakwesobunxele.”—Isaya 30:20b, 21.b
18 UJehova ‘unguMfundisi Omkhulu.’ Ungumfundisi ongenakulinganiswa namuntu. Nokho, abantu ‘bangambona futhi bamuzwe’ kanjani? UJehova uzembula ngabaprofethi bakhe, abamazwi abo alotshwe eBhayibhelini. (Amose 3:6, 7) Namuhla, lapho abakhulekeli abathembekile befunda iBhayibheli, kuba sengathi izwi likaNkulunkulu elinjengelikababa libatshela indlela okumelwe bahambe ngayo futhi libanxuse ukuba balungise inkambo yabo yokuziphatha ukuze bahambe kuyo. UmKristu ngamunye kufanele alalelisise lapho uJehova ekhuluma ngeBhayibheli nangezincwadi ezisekelwe eBhayibhelini ezilungiselelwa ‘isigqila esikholekile nesiqondayo.’ (Mathewu 24:45-47) Ngamunye makazikhandle ekufundeni iBhayibheli ngoba ‘kusho ukuphila kwakhe.’—Duteronomi 32:46, 47; Isaya 48:17.
Cabanga Ngezibusiso Ezizayo
19, 20. Yiziphi izibusiso ezilindele labo abamukela izwi loMfundisi Omkhulu?
19 Labo abamukela izwi loMfundisi Omkhulu bayolahla imifanekiso yabo ebaziweyo, bayibheke njengenengekayo. (Funda u-Isaya 30:22.) Khona-ke bayothola izibusiso ezimangalisayo. U-Isaya uyazichaza, njengoba zilotshwe ku-Isaya 30:23-26, isiprofetho esijabulisayo sokubuyisela esigcwaliseka okokuqala ngesikhathi insali yamaJuda ibuya ekuthunjweni ngo-537 B.C.E. Namuhla, lesi siprofetho sisisiza ukuba sibone izibusiso ezinhle kakhulu ezilethwa uMesiya manje epharadesi elingokomoya nasePharadesi elingokoqobo elizayo.
20 “Ngokuqinisekile uyonika imvula ngenxa yembewu yenu enihlwanyela ngayo, futhi aninike isinkwa njengomkhiqizo womhlabathi, okumelwe sibe ngesinothile nesinamafutha. Imfuyo yenu iyoklaba edlelweni elivulekile ngalolo suku. Izinkomo nezimbongolo ezikhule ngokugcwele ezilima umhlabathi ziyodla ifolishi eliyoliswe ngesimuncwane, elelwa ngehalavu nangemfologo.” (Isaya 30:23, 24) Isinkwa “esinothile nesinamafutha”—ukudla okunomsoco—kuyokuba ukudla komuntu kwansuku zonke. Imikhiqizo iyovuma ezweni kangangokuba nezilwane ziyozuza. Imfuyo iyokudla “ifolishi eliyoliswe ngesimuncwane”—ifolishi elehla esiphundu eliye libekelwe izikhathi ezikhethekile. Loku kudla kuze ‘kweliwa’ nokweliwa—okuyinto ngokuvamile eyenziwa kokusanhlamvu okuzodliwa abantu. Yeka imininingwane emihle u-Isaya ayinikezayo lapha ukuze abonise ukuceba kwezibusiso zikaJehova eziyotholwa isintu esilalelayo!
21. Chaza ukuthi izibusiso ezizayo ziyoba eziphelele kanjani.
21 “Phezu kwazo zonke izintaba eziphakeme naphezu kwawo wonke amagquma aphakeme kumelwe kube khona imifudlana.” (Isaya 30:25a)c U-Isaya unikeza umfanekiso ofanelekayo, ogcizelela ukuphelela kwezibusiso zikaJehova. Amanzi awantuleki—into ewusizo engeke nje igeleze ezindaweni ezingamathafa kuphela kodwa nakuzo zonke izintaba, yebo “phezu kwazo zonke izintaba eziphakeme naphezu kwawo wonke amagquma aphakeme.” Yebo, indlala iyobe ingasekho. (IHubo 72:16) Ngokuqhubekayo, umprofethi uphendukela ezintweni eziphakeme nakakhulu kunezintaba. “Ukukhanya kwenyanga egcwele kumelwe kube njengokukhanya kwelanga elikhazimulayo; nakho kanye ukukhanya kwelanga elikhazimulayo kuyoba okuphindwe kasikhombisa, njengokukhanya kwezinsuku eziyisikhombisa, ngosuku uJehova abopha ngalo ukwaphuka kwabantu bakhe futhi aphulukise ngisho nenxeba elibi elibangelwe umvimbo wakhe.” (Isaya 30:26) Yeka umvuthwandaba ojabulisayo walesi siprofetho esihle! Inkazimulo kaNkulunkulu iyokhanya ngobukhazikhazi bayo obuphelele. Izibusiso ezibekelwe abakhulekeli bakaNkulunkulu abathembekile ziyoyidlula kude—ngokuphindwe kasikhombisa—noma yini abake bayithola ngaphambili.
Isahlulelo Nenjabulo
22. Ngokungefani nezibusiso eziyotholwa abathembekile, uJehova ubagcineleni ababi?
22 Isigijimi sika-Isaya siyashintsha futhi. Uthi: “Bheka!” njengokungathi ufuna izilaleli zakhe zinake. “Igama likaJehova liza livela kude, livutha ngentukuthelo yakhe nangamafu asindwayo. Izindebe zakhe zona, zigcwele ukujivaza, nolimi lwakhe lunjengomlilo oshwabadelayo.” (Isaya 30:27) Kuze kube manje uJehova ubengakangeneli, ubeziyekile izitha zabantu bakhe ukuba zenze ezikuthandayo. Manje uyasondela—njengokuduma okusondela kancane kuhambisana nombani—ezokhipha isahlulelo. “Umoya wakhe unjengesifufula esikhukhulayo esifinyelela entanyeni, ukuze ushwibe izizwe ziye ngapha nangapha ngesisefo sobuze; futhi amatomu abangela umuntu ukuba azulazule ayoba semihlathini yezizwe.” (Isaya 30:28) Izitha zabantu bakaNkulunkulu ziyozungezwa ‘isifufula esikhukhulayo,’ zizanyazanyiswe ngamandla “ziye ngapha nangapha ngesisefo,” futhi zifakwe “amatomu.” Ziyobhujiswa.
23. Yini ebangela ‘ukujabula kwenhliziyo’ kumaKristu namuhla?
23 Indlela ka-Isaya yokukhuluma iphinde ishintshe lapho echaza isimo senjabulo sabakhulekeli abathembekile okuyothi ngelinye ilanga baphindele ezweni labo. “Niyokuba nengoma enjengeyobusuku umuntu azingcwelisela ngabo umkhosi, nokujabula kwenhliziyo okunjengokomuntu ohamba ephethe umtshingo eyongena entabeni kaJehova, eDwaleni lika-Israyeli.” (Isaya 30:29) AmaKristu eqiniso namuhla athola ‘ukujabula kwenhliziyo’ okufanayo lapho ecabanga ngokwahlulelwa kwezwe likaSathane; lapho ecabanga ngesivikelo asinikezwa uJehova, ‘iDwala lensindiso;’ nangezibusiso zoMbuso ezizayo.—IHubo 95:1.
24, 25. Isiprofetho sika-Isaya sikugcizelela kanjani ukuthi isahlulelo se-Asiriya esizayo sizofika nakanjani?
24 Ngemva kwale nkulumo yokuthokoza, u-Isaya uphindela endabeni yokwahlulela futhi ukhomba lowo ulaka lukaNkulunkulu oluqondiswe kuye. “Ngokuqinisekile uJehova uyokwenza ukuba isithunzi sezwi lakhe sizwakale futhi uyokwenza ukuba ukwehla kwengalo yakhe kubonakale, ngokufutheka kwentukuthelo nangelangabi lomlilo oshwabadelayo nesiwulukuhlu semvula nesiphepho esinemvula namatshe nesichotho. Ngoba ngenxa yezwi likaJehova i-Asiriya liyofikelwa ukwesaba okukhulu; yebo uyolishaya ngodondolo.” (Isaya 30:30, 31) Ngale ncazelo ecacile, u-Isaya ugcizelela ukuthi uNkulunkulu uyolahlulela nakanjani i-Asiriya. Empeleni, i-Asiriya limi phambi kukaNkulunkulu futhi liyathuthumela lapho libona ‘ingalo’ yakhe ‘eyehlayo’ yokwahlulela.
25 Umprofethi uyaqhubeka: “Ukushwibeka ngakunye kwenduku yakhe yokujezisa uJehova ayobangela ukuba ihlale phezu kwe-Asiriya ngokuqinisekile kuyohambisana namathamborini namahabhu; futhi empeleni uyokulwa nalo impela ngezimpi zokuphakamisa izikhali. Ngoba iThofethi lakhe lihlelwe kusukela ezikhathini zamuva; futhi lilungiselwe inkosi ngokwayo. Wenzé ukuba inqwaba yalo ijule. Umlilo nezinkuni kuningi. Ukuphefumula kukaJehova, njengesifufula sesibabule, kuyalivuthela.” (Isaya 30:32, 33) IThofethi eliseSigodini saseHinomi lisetshenziswa lapha njengendawo engokomfanekiso evutha umlilo. Ngokuthi i-Asiriya liyophelela lapho, u-Isaya ugcizelela ukubhujiswa okungazelelwe nokuphelele okuzofikela leso sizwe.—Qhathanisa neyesi-2 AmaKhosi 23:10.
26. (a) Izimemezelo zikaJehova kwelase-Asiriya zisebenza kanjani osukwini lwanamuhla? (b) AmaKristu namuhla ahlala kanjani elindele uJehova?
26 Nakuba lesi sigijimi sokwahlulela sibhekiswe e-Asiriya, ukubaluleka kwalesi siprofetho sika-Isaya kuthinta nabanye. (Roma 15:4) Ngomqondo ongokomfanekiso, uJehova uyophinde asuke kude azokhukhula, azamazamise futhi afake amatomu kubo bonke abacindezela abantu bakhe. (Hezekeli 38:18-23; 2 Petru 3:7; IsAmbulo 19:11-21) Kwangathi lolo suku lungafika ngokushesha! Okwamanje, amaKristu alulindele ngabomvu usuku lokukhululwa. Athola amandla lapho ecabanga ngamazwi acacile aku-Isaya isahluko 30. La mazwi akhuthaza izinceku zikaNkulunkulu ukuba zilazise ilungelo lokuthandaza, zizikhandle ekutadisheni iBhayibheli futhi zizindle ngezibusiso zoMbuso ezizayo. (IHubo 42:1, 2; IzAga 2:1-6; Roma 12:12) Ngakho amazwi ka-Isaya asisiza sonke ukuba sihlale silindele uJehova.
[Imibhalo yaphansi]
a Phawula ukuthi ukube uJuda wathembeka, kwakungase kwenzeke okuphambene nalokhu.—Levitikusi 26:7, 8.
b Kukule ndawo kuphela eBhayibhelini lapho uJehova ebizwa khona ngokuthi “uMfundisi Omkhulu.”
c U-Isaya 30:25b ufundeka kanje: “Ngosuku lokuhlaba okukhulu lapho imibhoshongo iwa.” Ekugcwalisekeni kokuqala, kungenzeka ukuthi lokhu kubhekisela ekuweni kweBabiloni, okwavulela ama-Israyeli indlela yokujabulela izibusiso ezibikezelwe ku-Isaya 30:18-26. (Bheka isigaba 19.) Kungenzeka kubhekisele nasekubhujisweni e-Armagedoni, okuyokwenza lezi zibusiso zigcwaliseke ngokuphelele ezweni elisha.
[Izithombe ekhasini 305]
Osukwini lukaMose, ama-Israyeli abaleka eGibithe. Osukwini luka-Isaya, uJuda uya eGibithe eyofuna usizo
[Isithombe ekhasini 311]
“Phezu kwawo wonke amagquma aphakeme kumelwe kube khona imifudlana”
[Isithombe ekhasini 312]
UJehova uzofika “ngentukuthelo yakhe nangamafu asindwayo”