Umbhalo oyinhloko okhonjwe njengosekela lemfundiso uDaniyeli 8:14. Ufundeka kanje: “Wathi kimi: Koze kube-yizikhathi zokuhlwa nezokusa eziyizinkulungwane ezimbili namakhulu amathathu; beseyihlanjululwa indlu engcwele.” (IBhayibheli LesiZulu Elivamile) Ngenxa yamazwi athi “beseyihlanjululwa indlu engcwele,” amaSabatha amaningi ahlobanisa leli vesi noLevitikusi isahluko 16. Lowo mBhalo uchaza ukuhlanjululwa kwendlu engcwele okwenziwa umpristi omkhulu ongumJuda ngoSuku Lokubuyisana. Futhi ehlobanisa amazwi kaDaniyeli namaHeberu isahluko 9, amaSabatha achaza uJesu njengomPristi Omkhulu Kakhulu ezulwini. Esinye isazi se-SDA sithi lokhu kucabanga kusekelwe endleleni “yokuqhathanisa imibhalo.” Umuntu uthola “amazwi athile afanayo njengokuthi indlu engcwele kuDan. 8:14, nakuLev. 16, nakumaHeb. 7, 8, 9” bese ephetha “ngokuthi yonke [lemiBhalo] ikhuluma ngento eyodwa.”

AmaSabatha acabanga ngalendlela: Abapristi baka-Israyeli wasendulo babenza inkonzo yansuku zonke egunjini lethempeli okuthiwa iNgcwele, kuphumele ekuthethelelweni kwezono. NgoSuku Lokubuyisana, umpristi omkhulu wayenza inkonzo yaminyaka yonke eNgcwelengcwele (egunjini elingaphakathi kwethempeli) kuphumele ekusulweni kwezono. Aphetha ngokuthi inkonzo kaKristu yobupristi ezulwini inezingxenye ezimbili. Eyokuqala yaqala ngokunyuka kwakhe ekhulwini lokuqala, yaphela ngo-1844, futhi yaphumela ekuthethelelweni kwezono. Eyesibili noma “ingxenye yokwahlulela,” eyaqala ngo-October 22, 1844, isaqhubeka, futhi iyophumela ekusulweni kwezono. Kufezwa kanjani lokhu?

Kusukela ngo-1844, uJesu kuthiwa uhlola umlando wokuphila wabo bonke abathi bangamakholwa (eqala ngowabafileyo, abese eza kowabaphilayo) ukuze anqume ukuthi bayakufanelekela yini ukuphila okungunaphakade. Lokhu kuhlola kuthiwa “ukwahlulela okusekelwe ophenyweni.” Ngemva kokuba abantu bahlulelwe ngaleyo ndlela, izono zalabo abaphumelelayo kulokhu kuhlolwa ziyasulwa embhalweni ogciniwe. Kodwa, u-Ellen White wachaza ukuthi labo abangaphumeleli ‘amagama abo ayosulwa encwadini yokuphila.’ Ngakho, “bonke bayobe sebenqunyelwe ukuphila noma ukufa.” Kulelo qophelo, indlu engcwele yasezulwini iyobe isihlanziwe futhi kwagcwaliseka uDaniyeli 8:14. Yilokho amaSabatha akufundisayo. Kodwa incwadi ye-SDA i-Adventist Review iyavuma: “Amazwi athi ukwahlulela okusekelwe ophenyweni awatholakali eBhayibhelini.”

Ukungavumelani Kolimi

Lemfundiso iye yawakhathaza amanye amaSabatha. Enye ingqapheli ithi: “Umlando ubonisa ukuthi abaholi abathembekile abangamalungu ethu baye bakhathazeka kakhulu lapho becabangisisa ngemfundiso yethu evamile yokwahlulela okusekelwe ophenyweni.” Inezela ngokuthi eminyakeni yamuva ukukhathazeka kwaphenduka ukungabaza njengoba izazi zaziqala “ukungabaza izinsika eziningi zencazelo yethu evamile yendlu engcwele.” Manje ake sihlole ezimbili zazo.

Insika yokuqala: UDaniyeli isahluko 8 uhlotshaniswa noLevitikusi isahluko 16. Lensika intengantengiswa izinkinga ezimbili eziyinhloko—ulimi nomongo. Okokuqala, cabangela ulimi. AmaSabatha akholelwa ukuthi ‘indlu engcwele ehlanjululwayo’ kuDaniyeli isahluko 8 ifanekiselwa ‘indlu engcwele ehlanjululwayo’ kuLevitikusi isahluko 16. Lokhu kuhlotshaniswa kwakubonakala kwamukeleka kwaze kwaba yilapho abahumushi bethola ukuthi ‘ukuhlanjululwa’ okukuyi-King James Version kuwukuhunyushwa okunganembile kwesenzo sesiHeberu esithi tsa·dhaqʹ (esisho “ukuba olungile”) esisetshenziswe kuDaniyeli 8:14. Uprofesa wemfundiso yenkolo u-Anthony A. Hoekema uyaphawula: “Kwaba yishwa ukuthi leli gama lihunyushwe ngokuthi hlanjululwa, njengoba isenzo sesiHeberu ngokuvamile esihunyushwa ngokuthi hlanjululwa [ta·herʹ] singasetshenziswa nhlobo lapha.”a Sisetshenziswa kuLevitikusi isahluko 16 lapho i-King James Version ihumusha izindlela ze-ta·herʹ ngokuthi ‘hlambulula’ nokuthi “hlambuluka.” (Levitikusi 16:19, 30) Ngenxa yalokho, uDkt. Hoekema waphetha ngokufanele ngokuthi: “Uma uDaniyeli ayehlose ukuba abhekisele ohlotsheni lokuhlambulula olwalwenziwa ngoSuku Lokubuyisana, wayeyosebenzisa elithi taheer [ta·herʹ] kunelithi tsadaq [tsa·dhaqʹ].” Nokho, elithi tsa·dhaqʹ alitholakali kuLevitikusi, futhi elithi ta·herʹ alitholakali kuDaniyeli. Akukho ukuvumelana kolimi.

Wembulani Umongo?

Manje cabangela umongo. AmaSabatha akholelwa ukuthi uDaniyeli 8:14 “uzimele,” akahlobene neze namavesi andulelayo. Kodwa ingabe uba nalowo muzwa lapho ufunda uDaniyeli 8:9-14 ebhokisini elikulesi sihloko elithi “Umongo KaDaniyeli 8:14”? Ivesi 9 liveza umhlaseli, uphondo oluncane. Amavesi 10-12 embula ukuthi lomhlaseli uyohlasela indlu engcwele. Ivesi 13 liyabuza, ‘Kuyoqhubeka kuze kube-nini lokhu kuhlasela?’ Futhi ivesi 14 liyaphendula: “Koze kube-yizikhathi zokuhlwa nezokusa eziyizinkulungwane ezimbili namakhulu amathathu; beseyihlanjululwa indlu engcwele.” Ngokusobala, ivesi 13 liphakamisa umbuzo ophendulwa evesini 14. Isazi semfundiso yenkolo uDesmond Ford sithi: “Ukuhlukanisa uDan. 8:14 kulokhu kunxusa [“Koze kube-nini?” okusevesini 13] kuyomenza abe incazelo ezintazelayo nje engenasisekelo.”b

Kungani amaSabatha ehlukanisa ivesi 14 emongweni? Ukuze agweme isiphetho esingathandeki. Umongo ubonisa ukuthi ukungcoliswa kwendlu engcwele, okukhulunywa ngakho evesini 14, kubangelwa imisebenzi yophondo oluncane. Nokho, imfundiso ‘yokwahlulela okusekelwe ophenyweni’ ithi ukungcoliswa kwendlu engcwele kubangelwa imisebenzi kaKristu. Kuthiwa udlulisele izono zabakholwayo endlini engcwele yasezulwini. Ngakho, yini eyenzekayo uma amaSabatha amukela kokubili imfundiso nomongo? UDkt. Raymond F. Cottrell, ongumSabatha nowayengomunye wabahleli be-SDA Bible Commentary, uyabhala: “Ukushaya sengathi incazelo ye-SDA ihlaziya uDaniyeli 8:14 ngokomongo kwakuyobe sekuba ukuveza uphondo oluncane njengolumelela uKristu.” UDkt. Cottrell uvuma ngobuqotho: “Asikwazi ukuba nakho kokubili, umongo nencazelo yamaSabatha.” Ngakho-ke, ukuze libambelele ‘ekwahluleleni okusekelwe ophenyweni,’ iSonto LamaSabatha kwadingeka likhethe—lamukele imfundiso noma umongo kaDaniyeli 8:14. Ngeshwa, lamukela okokuqala lalahla lokhu kokugcina. UDkt. Cottrell uthi akumangalisi ukuthi abafundi beBhayibheli abanolwazi basola amaSabatha ‘ngokunika umBhalo incazelo engenakutholakala emBhalweni’!

Ngo-1967, uDkt. Cottrell walungiselela isifundo sesikole sangesabatha esiphathelene noDaniyeli, esathunyelwa emasontweni e-SDA emhlabeni wonke. Sasifundisa ukuthi uDaniyeli 8:14 uhlobene ngempela nomongo wakhe futhi ‘ukuhlanjululwa’ akubhekiseli emakholweni. Ngokuphawulekayo, lesi sifundo sikugwema ngokuphelele ukukhuluma ‘ngokwahlulela okusekelwe ophenyweni.’

Izimpendulo Eziphawulekayo

AmaSabatha akuqaphela kangakanani ukuthi lensika intengantenga kakhulu ukuba ingasekela imfundiso ‘yokwahlulela okusekelwe ophenyweni’? UDkt. Cottrell wabuza izazi ezingu-27 ezingabaholi zemfundiso yenkolo yamaSabatha umbuzo othi, ‘Yiziphi izizathu eningazinikeza ezingokolimi noma ezingokomongo zokuhlobanisa uDaniyeli isahluko 8 noLevitikusi isahluko 16?’ Zaphendula zathini?

“Zonke ezingamashumi amabili nesikhombisa zafakazela ukungabibikho kwezizathu ezingokolimi noma ezingokomongo zokusebenzisa uDan. 8:14 njengofanekisela usuku lokubuyisana nokwahlulela okusekelwe ophenyweni.” Wazibuza, ‘Ingabe ninazo ezinye izizathu zokwenza lokhu kuhlobanisa?’ Iningi lalezi zazi zamaSabatha lathi lalingenazo ezinye izizathu, ezinhlanu zaphendula ngokuthi zénza lokhu kuhlobanisa ngoba u-Ellen White akwenza, futhi ezimbili zathi zisekela lemfundiso “ephutheni eliyinhlanhla” lokuhumusha. Isazi semfundiso yenkolo uFord siyaphawula: “Iziphetho ezinjalo ezanikezwa izazi zethu eziphambili ziqinisekisa ukuthi ngempela imfundiso yethu evamile ngoDan. 8:14 ayinakuvikelwa.”

Ingabe Lukhona Usizo KumaHeberu?

Insika yesibili: UDaniyeli 8:14 uhlotshaniswa namaHeberu isahluko 9. “Zonke izincwadi zethu zakuqala zazisebenzisa amaHeb. 9 lapho zichaza uDan. 8:14,” kusho isazi semfundiso yenkolo uFord. Lokhu kuhlobana kwavela ngemva ‘Kokudumazeka Okukhulu’ ngo-1844. Efuna isiqondiso, uMlandeli KaMiller uHiram Edson waphonsa iBhayibheli lakhe etafuleni ukuze lizivulekele. Waba yini umphumela? Kwavuleka amaHeberu isahluko 8 no-9. UFord uthi: “Yini enye eyayingaba efanelekayo neyayingaba uphawu olungcono lokuchaza ukuzisholo kwamaSabatha ukuthi lezi zahluko ziyisihluthulelo sencazelo ka-1844 noDan. 8:14!”

“Lokho kuzisholo kubalulekile kumaSabatha,” kunezela uDkt. Ford encwadini yakhe ethi Daniel 8:14, the Day of Atonement, and the Investigative Judgment. “KukumaHeb. 9 kuphela . . . lapho kungatholakala khona incazelo eningiliziwe yokubaluleka . . . kwemfundiso yendlu engcwele esemqoka kangaka kithi.” Yebo, amaHeberu isahluko 9 ukuphela kwesahluko ‘eTestamenteni Elisha’ esinikeza incazelo engokwesiprofetho kaLevitikusi isahluko 16. Kodwa amaSabatha athi futhi uDaniyeli 8:14 uwukuphela kwevesi ‘eTestamenteni Elidala’ elenza kanjalo. Uma zombili lezi zinkulumo ziyiqiniso, kumelwe kube nokuhlobana phakathi kwamaHeberu isahluko 9 noDaniyeli isahluko 8.

UDesmond Ford uyaphawula: “Kunezinto ezithile eziba sobala ngokushesha lapho umuntu efunda amaHeb. 9. Awekho amazwi asobala abhekisela encwadini kaDaniyeli, futhi ngokuqinisekile awekho abhekisela kuDan. 8:14. . . . Sonke isahluko sikhuluma ngalokho okufanekiselwa uLev. 16.” Uthi: “Imfundiso yethu yendlu engcwele ayinakutholakala encwadini okuwukuphela kwayo eTestamenteni Elisha ekhuluma ngokubaluleka kwezinkonzo zendlu engcwele. Lokhu kuye kwavunywa ababhali abaziwayo bamaSabatha emhlabeni wonke.” Khona-ke, insika yesibili nayo intengantenga kakhulu ukuba ingasekela lemfundiso eyindida.

Nokho, lesi siphetho asisisha. UDkt. Cottrell uthi sekuyiminyaka eminingi “izazi zeBhayibheli zesonto ziziqaphela izinkinga incazelo yethu evamile kaDaniyeli 8:14 namaHeberu 9 ebhekana nazo.” Eminyakeni engaba ngu-80 edlule, umSabatha onethonya u-E. J. Waggoner wabhala: “Imfundiso yamaSabatha ephathelene nendlu engcwele, ‘noKwahlulela Okusekelwe Ophenyweni’ kwayo . . . , cishe iwukuphika ukubuyisana.” (Confession of Faith) Eminyakeni engaphezu kuka-30 edlule, izinkinga ezinjalo zethulwa eNgqungqutheleni Yabefundisi, abaholi beSonto Le-SDA.

Izinkinga Nesithiyo

INgqungquthela Yabefundisi yamisa “IKomiti Yezinkinga Zencwadi KaDaniyeli.” Kwakumelwe ihlele umbiko ophathelene nendlela yokuxazulula izinkinga ezithinta uDaniyeli 8:14. Amalungu angu-14 ekomiti acwaninga lendaba iminyaka emihlanu kodwa ahluleka ukuvela nekhambi avumelana ngalo. Ngo-1980, ilungu lalekomiti uCottrell lathi iningi lamalungu ekomiti lalinomuzwa wokuthi incazelo yamaSabatha kaDaniyeli 8:14 ‘yayingaqiniswa ngokugculisayo’ ngochungechunge “lwezinto ezicatshangelwayo” nokuthi izinkinga “kufanele sizikhohlwe.” Lanezela: “Khumbula, igama lekomiti kwakuyiKomiti Yezinkinga Zencwadi KaDaniyeli, futhi iningi lalisikisela ukuthi sikhohlwe izinkinga futhi singasho lutho ngazo.” Lokho kwakuyofana “nokuvuma ukuthi sasingenazo izimpendulo.” Ngakho abambalwa benqaba ukusekela umbono weningi, futhi akuzange kube nombiko ogunyaziwe. Izinkinga ezingokwemfundiso zasala zingaxazululiwe.

Ephawula ngalesi sithiyo, uDkt. Cottrell uthi: “Inkinga kaDaniyeli 8:14 isekhona ngoba besilokhu singazimisele, kuze kube manje, ukubhekana neqiniso lokuthi sinenkinga yangempela yokuchaza. Lenkinga iyohlale ikhona uma nje sisaqhubeka sishaya sengathi ayikho, uma nje sisaqhubeka siqinisa amakhanda ethu, ngabanye nanjengeqembu, sibambelela emibonweni yethu yakudala eyiphutha.”—I-Spectrum, iphephabhuku elinyatheliswa i-Association of Adventist Forums.

UDkt. Cottrell unxusa amaSabatha ukuba “aphinde ahlolisise imibono ecatshangelwayo nezimiso eziyisisekelo zencazelo asekela kukho incazelo [yawo] yalendima yomBhalo ebalulekile—kumaSabatha.” Sithanda ukukhuthaza amaSabatha ukuba ahlole ukuthi izinsika zemfundiso “yokwahlulela okusekelwe ophenyweni” zisekelwe ngokuqinile eBhayibhelini noma zisekelwe esihlabathini esingaqinile sesiko.c Umphostoli uPawulu wanxusa ngokuhlakanipha: “Qinisekani ngazo zonke izinto; bambelelani niqinise kokuhle.”—1 Thesalonika 5:21.

Umongo KaDaniyeli 8:14

DANIYELI 8:9 “Kolunye lwazo kwamila uphondo oluncane olwakhula kakhulu ngaseningizimu, nangasempumalanga, nangasezweni elihle. 10 Lwakhula kwaze kwaba-nasebandleni lasezulwini, lwaphonsa phansi okunye kwebandla, okwezinkanyezi, lwakunyathela. 11 Yebo, lwazikhulisa kwaze kwaba-nasesikhulwini sebandla, lwasaphuca umnikelo oshiswa imihla yonke, nendawo yendlu yaso engcwele yaphonswa phansi. 12 Kwabekwa impi yokulwa kanye nomnikelo oshiswa imihla yonke ngesiphambeko: lwaphonsa phansi iqiniso, lwenza njengentando yalo, lwaba-nempumelelo.

“13 Ngase ngizwa ongcwele ekhuluma, nomunye ongcwele wathi kulowo owakhuluma: Uyakuba-khona kuze kube-nini lombono womnikelo oshiswa imihla yonke, nesiphambeko esichithayo sokuba kukhashelwe indlu engcwele nempi, kunyathelwe phansi, na? 14 Wathi kimi: Koze kube-yizikhathi zokuhlwa nezokusa eziyizinkulungwane ezimbili namakhulu amathathu; beseyihlanjululwa indlu engcwele.” (Omalukeke sizenzele.)—IBhayibheli LesiZulu Elivamile.