• ‘NguNkulunkulu Okhulisayo!
    INqabayokulinda—2008 | Julayi 15

    • Umhlwanyeli Olalayo

      13, 14. (a) Fingqa umfanekiso kaJesu womuntu osakaza imbewu. (b) Obani abamelelwa umhlwanyeli, futhi yini emelelwa imbewu?

      13 KuMarku 4:26-29, kunomunye umfanekiso ophathelene nomhlwanyeli: “Ngale ndlela umbuso kaNkulunkulu ufana nje nalapho umuntu ephonsa imbewu emhlabathini, uyalala ebusuku avuke ekuseni, imbewu iyahluma ikhule ibe yinde, ukuthi kanjani akazi. Umhlabathi uzithelela ngokwawo isithelo kancane kancane, okokuqala udwani, bese kuba isihloko sesiqu, ekugcineni kube izinhlamvu ezigcwele esihlokweni. Kodwa ngokushesha lapho isithelo sivuthwa, ufaka isikela, ngoba isikhathi sokuvuna sesifikile.”

      14 Ubani lo mhlwanyeli? Abanye kweLobukholwa bakholelwa ukuthi lo mhlwanyeli nguJesu ngokwakhe. Kodwa kungashiwo kanjani ukuthi uJesu uyalala futhi akazi ukuthi imbewu ikhula kanjani? Ngokuqinisekile uJesu uyayazi inqubo yokukhula kwezinto! Kunalokho, lo mhlwanyeli, njengalowo okukhulunywe ngaye ekuqaleni, umelela abamemezeli boMbuso ngabanye abahlwanyela imbewu yoMbuso ngomsebenzi wabo wokushumayela ngentshiseko. Imbewu ephonswa emhlabathini iyizwi abalishumayelayo.b

      15, 16. Iliphi iqiniso elavezwa uJesu emfanekisweni wakhe womhlwanyeli ngokukhula okungokoqobo nokungokomoya?

      15 UJesu uthi umhlwanyeli “uyalala ebusuku avuke ekuseni.” Lokhu akusho ukuthi umhlwanyeli uyadebesela. Kumane kubonisa indlela yokuphila evamile yabantu abaningi. Inkulumo esetshenziswe kuleli vesi ibonisa inqubo eqhubeka inkathi ethile yokusebenza emini nokulala ebusuku. UJesu uqokomisa lokho okwenzeka phakathi naleyo nkathi. Uthi: “Imbewu iyahluma ikhule ibe yinde.” Ube esenezela: “Ukuthi kanjani akazi.” Iphuzu aligcizelelayo elokuthi ukukhula kwembewu kwenzeka ‘ngokwako.’c

      16 UJesu wayeveza liphi iphuzu lapha? Phawulu ukuthi iphuzu lisekukhuleni nasendleleni okwenzeka ngayo kancane kancane. “Umhlabathi uzithelela ngokwawo isithelo kancane kancane, okokuqala udwani, bese kuba isihloko sesiqu, ekugcineni kube izinhlamvu ezigcwele esihlokweni.” (Marku 4:28) Lokhu kukhula kwenzeka kancane kancane ngokwezigaba. Akunakuphoqwa noma kusheshiswe. Kungokufanayo nangokukhula okungokomoya. Kwenzeka ngezigaba njengoba uJehova evumela iqiniso ukuba likhule enhliziyweni yomuntu othambekele ngokufanele.—IzE. 13:48; Heb. 6:1.

      17. Obani abajabulayo lapho imbewu yeqiniso ithela?

      17 Umhlwanyeli uhlanganyela kanjani ekuvuneni “ngokushesha lapho isithelo sivuthwa”? Lapho uJehova ekhulisa iqiniso loMbuso ezinhliziyweni zabafundi abasha, bagcina befinyelele iqophelo lapho beshukunyiswa khona uthando lwabo ngoNkulunkulu ukuba banikezele ukuphila kwabo kuye. Babonakalisa ukuzinikezela kwabo ngokubhapathizwa emanzini. Abazalwane abaqhubeka bathuthukele ekuvuthweni banikezwa kancane kancane imithwalo yemfanelo eyengeziwe ebandleni. Isithelo soMbuso sivunwa umhlwanyeli wokuqala nabanye abamemezeli boMbuso okungenzeka ukuthi abazange bahileleke ekuhlwanyeleni imbewu eyaveza lowo mfundi. (Funda uJohane 4:36-38.) Ngempela, ‘umhlwanyeli nomvuni bajabula kanyekanye.’

  • ‘NguNkulunkulu Okhulisayo!
    INqabayokulinda—2008 | Julayi 15

    • b Ngaphambili kulo magazini kwachazwa ukuthi imbewu imelela izimfanelo zobuntu okudingeka ukuba zihlakulelwe zize zifinyelele ekuvuthweni, ukukhula kwazo okuthonywa nayizimo zendawo. Nokho, kufanele kuphawulwe ukuthi emfanekisweni kaJesu imbewu ayishintshi ibe yimbi noma ibe isithelo esibolile. Imane ikhule ivuthwe.—Bheka INqabayokulinda ka-December 15, 1980, amakhasi 18-20.

      c Enye indawo okuwukuphela kwayo okusetshenziswe kuyo le nkulumo isencwadini yezEnzo 12:10, lapho kuthiwa khona isango lensimbi lazivulekela “ngokwalo.”