Ukuphila NeNkonzo KaJesu

Ithemba Phakathi Nezinsuku Zokugcina

NJENGOBA uLwesibili, uNisan 11, lusondela ekupheleni, uJesu unabaphostoli bakhe eNtabeni yeMinqumo. Basanda kusuka endaweni yethempeli, abangayibona ngezansi, futhi uJesu ubexoxa nabo ngesibonakaliso sokuba khona kwakhe emandleni oMbuso nesokuphela kwesimiso sezinto.

Eqhubeka namazwi akhe, uJesu ubaxwayisa ngokulandela oKristu bamanga. Uthi kuyokwenziwa imizamo “ukuze kudukiswe nabakhethiweyo, uma kungenzeka.” Kodwa, njengezinkozi ezibona kude, laba abakhethiweyo bayobuthanela lapho kutholakala khona ukudla okungokomoya kweqiniso, okungukuthi, noKristu weqiniso ebukhoneni bakhe obungabonakali. Ngeke badukiswe futhi babuthanele kuKristu wamanga.

OKristu bamanga bangaba nesimo esibonakalayo kuphela. Ngokuphambene, ukuba khona kukaJesu kuyoba okungabonakali. Kuyokwenzeka phakathi nesikhathi esisabisayo emlandweni wesintu, njengoba uJesu esho: “Ilanga liyakufiphazwa, nenyanga ayiyikukhanya.” Yebo, lena kuyoba inkathi emnyama kunazo zonke kusukela isintu saba khona. Kuyoba njengokungathi ilanga liye lafiphazwa phakathi nesikhathi sasemini, nanjengokungathi inyanga ayizange ikhanye ebusuku.

“Amandla ezulu ayakuzanyazanyiswa,” kuqhubeka uJesu Ngaleyondlela ubonisa ukuthi amazulu angokoqobo ayobonakala njengebika lokuzayo. Amazulu ngeke nje esaba indawo yezinyoni, kodwa ayogcwala izindiza zempi, amarokhethi, nezinto ezitshuza emkhathini. Ukwesaba nobudlova kuyokwedlula noma yini eye yabonwa emlandweni wesintu wesikhathi esidlule.

Ngenxa yalokhu, uJesu uthi, kuyoba khona ‘usizi lwezizwe, zixakeke ngokuduma kolwandle namaza, abantu baphele amandla ngokwesaba nangokubheka okuvelela umhlaba.’ Ngempela, lenkathi emnyama kunazo zonke kusukela isintu saba khona iyoholela esikhathini lapho, njengoba uJesu esho, “kuyakubonakala ezulwini isibonakaliso seNdodana yomuntu, besezikhala izizwe zonke zomhlaba.”

Kodwa akubona bonke abayobe bekhala lapho ‘iNdodana yomuntu iza namandla’ izobhubhisa lesimiso esibi sezinto. “Abakhethiweyo,” abangu-144 000 abayobusa noKristu eMbusweni wakhe wasezulwini, nabangane babo, labo uJesu ngaphambili ababiza ngokuthi “ezinye izimvu” zakhe, ngeke bakhale. Naphezu kokuphila phakathi nenkathi emnyama kunazo zonke emlandweni wesintu, laba bayasabela esikhuthazweni sikaJesu: “Nxa kuqala ukuvela lokho, lulamani, niphakamise amakhanda enu, ngokuba kusondele ukukhululwa kwenu.”

Ukuze abafundi bakhe ababeyobe bephila phakathi nezinsuku zokugcina bakwazi ukuthola ukuthi isiphelo siseduze kangakanani, uJesu unikeza lomfanekiso: “Bhekani umkhiwane nemithi yonke. Nxa isihluma, niyabona, nazi ngokwenu ukuthi ihlobo seliseduze. Kanjalo nani, nxa nibona lezozinto zenzeka, yazini ukuthi umbuso kaNkulunkulu useduze. Ngiqinisile ngithi kini: Lesisizukulwane asiyikudlula, kungakenzeki konke.”

Ngakho-ke, lapho abafundi bakhe bebona izici eziningi ezihlukahlukene zesibonakaliso zigcwaliseka, kufanele baqaphele ukuthi ukuphela kwesimiso sezinto kuseduze nokuthi uMbuso kaNkulunkulu ngokushesha uzosusa bonke ububi. Eqinisweni, isiphelo siyofika phakathi nesikhathi sokuphila sabantu ababona ukugcwaliseka kwazo zonke izinto uJesu azibikezelayo! Ekhuthaza labo bafundi ababeyobe bephila phakathi nezinsuku zokugcina ezibalulekile, uJesu uthi:

“Xwayani ukuba izinhliziyo zenu zingasindwa ngukuminza nokudakwa nokunaka okwalokhukuphila, lunizume lolosuku ningazelele, ngokuba luyakufika njengogibe phezu kwabo bonke abahlezi emhlabeni wonke. Ngakho lindani ngesikhathi sonke, nikhuleke ukuba nibe-namandla okuphepha kukho konke lokhu okuyakwenzeka nawokuma phambi kweNdodana yomuntu.” Mathewu 24:23-51; Marku 13:21-37; Luka 21:25-36; IsAmbulo 14:1, 3; Johane 10:16.

◆ Yiziphi izimo zezwe eziphawula ukuba khona kukaKristu?

◆ ‘Izizwe zonke zomhlaba ziyokhala’ nini, kodwa abalandeli bakaKristu bayobe benzani?

◆ UJesu unikeza muphi umfanekiso ukuze asize abafundi bakhe besikhathi esizayo baqonde lapho isiphelo sesiseduze?

◆ Yisiphi isikhuthazo uJesu asinikeza abafundi bakhe abayobe bephila phakathi nezinsuku zokugcina?