“UJesu Kristu UyiNkosi”—Kanjani Futhi Nini?
“INKOSI yathi eNkosini yami, Hlala ngakwesokunene sami, ngize ngenze izitha zakho isenabelo sezinyawo zakho.” Lokhu ukuhunyushwa kweHubo 110:1 ngokwe-King James Version. Ingubani ‘leNKOSI’ lapha, futhi ikhuluma nobani?
Inguqulo enembe kakhudlwana yombhalo wesiHeberu iwuphendula ngokushesha umbuzo wokuqala. “UJehova wathi eNkosini yami: . . . ” Ngakho elithi “NKOSI” elibhalwe ngonobumbakazi libhekisela kuNkulunkulu umninimandla onke, uJehova uqobo. Nakuba i-King James Version yamukela igama laphezulu ngokusebenzisa elithi “NKOSI” hhayi “Nkosi,” ayizange ibe ngeyokuqala ukuba nalokhu kudidaniswa kweziqu, ngoba i-Septuagint yesiGreki yasendulo, eyahunyushwa isuselwa olimini lwesiHeberu, yasebenzisa elithi “Nkosi” esikhundleni selithi Jehova kumakhophi ayo akamuva. Ngani? Ngoba yafaka isiqu esithi “Nkosi” esikhundleni segama laphezulu, i-Tetragrammaton (יהוה). Isazi u-A. E. Garvie sithi: “Ukusetshenziswa kwesiqu esithi Nkosi [kyʹri·os] cishe kuchazwa kalula kakhulu njengokusekelwe ekusetshenzisweni kwalesisiqu esinagogeni lamaJuda esikhundleni segama lesivumelwano elithi Yahveh [Jehova], lapho kufundwa imiBhalo.”
IBhayibheli libiza uJehova ngokuthi ‘iNkosi enguMbusi.’ (Genesise 15:2, 8, NW; IzEnzo 4:24, NW; IsAmbulo 6:10, NW) Ubizwa nangokuthi ‘iNkosi [yeqiniso, NW]’ nokuthi “iNkosi yomhlaba wonke.” (Eksodusi 23:17; Joshuwa 3:13; IsAmbulo 11:4) Ingubani-ke lena enye ‘iNkosi’ yeHubo 110:1, futhi kwenzeka kanjani ukuba uJehova ayiqaphele ‘njengeNkosi’?
UJesu Kristu ‘NjengeNkosi’
UJesu ubizwa ngokuthi “iNkosi” emaVangelini amane, izikhathi eziningi kuLuka nakuJohane. Ekhulwini lokuqala C.E., lesiqu sasibonisa inhlonipho, sifana nesithi “Mnumzane.” (Johane 12:21; 20:15, Kingdom Interlinear) EVangelini likaMarku igama elithi “Mfundisi,” noma Rab·boʹni, lisetshenziswa izikhathi eziningi lapho kubizwa uJesu. (Qhathanisa uMarku 10:51 noLuka 18:41.) Ngisho nombuzo kaSawulu emgwaqweni oya eDamaseku, othi “Ungubani, Nkosi?” wawunalomqondo ofanayo wokubuza ngenhlonipho. (IzEnzo 9:5) Kodwa njengoba abalandeli bakaJesu babeya beyazi kangcono iNkosi yabo, kusobala ukuthi ukusebenzisa kwabo isiqu esithi “Nkosi” kwabonakalisa okungaphezu kwenhlonipho evamile.
Ngemva kokufa nokuvuswa kwakhe kodwa ngaphambi kokwenyukela kwakhe ezulwini, uJesu wabonakala kubafundi bakhe futhi wenza lesisaziso esimangalisayo: “Ngiphiwe amandla onke ezulwini nasemhlabeni.” (Mathewu 28:18) Khona-ke, ngosuku lwePentekoste, ngaphansi kwethonya lomoya ongcwele owawuthululiwe, uPetru wabhekisela kumaHubo 110:1 futhi wathi: “Ngakho indlu yonke yakwaIsrayeli mayazi impela ukuthi uNkulunkulu umenzile iNkosi noKristu uJesu lo enambethela nina.” (IzEnzo 2:34-36) Ngenxa yokwethembeka kwakhe kuze kube sekufeni okuyihlazo esigxotsheni sokuhlushwa, uJesu wavuswa futhi wanikwa umvuzo omkhulu kunayo yonke. Khona-ke wangena ebukhosini bakhe emazulwini.
Umphostoli uPawulu waqinisekisa amazwi kaPetru lapho ebhala ukuthi uNkulunkulu “wamhlalisa [uKristu] ngakwesokunene sakhe ezulwini, ngaphezu kwakho konke ukubusa, negunya, namandla, nobukhosi, namagama onke aphathwayo, kungekulelizwe lodwa kepha nakulo elizayo.” (Efesu 1:20, 21) Ubukhosi bukaJesu Kristu bungaphezu kwabo bonke obunye ubukhosi, futhi buyoqhubeka kuze kube sezweni elisha. (1 Thimothewu 6:15) ‘Waphakanyiswa kakhulu’ futhi wanikwa “igama eliphezu kwamagama onke” ukuze bonke bavume ‘ukuthi uJesu Kristu uyiNkosi, kube-yinkazimulo kuNkulunkulu uYise.’ (Filipi 2:9-11) Ngakho ingxenye yokuqala yeHubo 110:1 yagcwaliseka, futhi “izingelosi, negunya, namandla” kwaba ngaphansi kobukhosi bukaJesu.—1 Petru 3:22; Heberu 8:1.
EmiBhalweni yesiHeberu, inkulumo ethi ‘iNkosi yamakhosi’ isebenza kuJehova kuphela. (Duteronomi 10:17; IHubo 136:2, 3) Kodwa ephefumlelwe, uPetru wathi ngoKristu Jesu: “Yena uyiNkosi yabo bonke [noma, “iNkosi yethu sonke,” Goodspeed].” (IzEnzo 10:36) Ngempela ‘uyiNkosi yabafileyo neyabaphilayo.’ (Roma 14:8, 9) AmaKristu akwamukela kalula ukuthi uJesu Kristu uyiNkosi nomPhathi wawo futhi ngokuzithandela ayamhlonipha njengezikhonzi zakhe, ezithengwe ngegazi lakhe eliyigugu kakhulu. Futhi uJesu Kristu uye wabusa njengeNkosi yamakhosi noMbusi wababusi phezu kwebandla lakhe kusukela ngePentekoste lika-33 C.E. Kodwa manje, kusukela ngo-1914, unikezwe igunya lobukhosi ukuze abuse kulesosikhundla izitha zakhe zenziwe ‘isenabelo sezinyawo zakhe.’ Manje sase sifikile isikhathi sokuba ‘abuse phakathi kwazo,’ ukuze kugcwaliseke iHubo 110:1, 2.—Heberu 2:5-8; IsAmbulo 17:14; 19:16.
Khona-ke, kumelwe aqondwe kanjani amazwi kaJesu athi, “konke ngikunikelwe nguBaba,” akhulunywa ngaphambi kokufa nokuvuswa kwakhe? (Mathewu 11:25-27; Luka 10:21, 22) Lena akuyona inkulumo eningiliziwe njengalezo osekuxoxwe ngazo kakade. KuMathewu noLuka, umongo wembula ukuthi uJesu wayekhuluma ngolwazi olufihlelwe izihlakaniphi zezwe kodwa olwembulwe ngaye ngoba ‘umazi kahle’ uYise. Lapho ebhapathizwa emanzini futhi ezalwa njengeNdodana kaNkulunkulu engokomoya, uJesu wakwazi ukukhumbula ukuba khona kwakhe kwangaphambi kobuntu ezulwini nalo lonke ulwazi oluhambisana nakho, kodwa lokhu kwakungokuthile okuhlukile ebukhosini bakhe bakamuva.—Johane 3:34, 35.
Ukuhlukanisa UJesu Kristu NjengeNkosi
Ezinye izinguqulo zemiBhalo YamaKristu YesiGreki zibangela inkinga lapho zihumusha izingcaphuno ezivela emiBhalweni YesiHeberu ekhuluma ngokucacile ‘ngeNKOSI’ enguJehova uNkulunkulu. Ngokwesibonelo, qhathanisa uLuka 4:19 no-Isaya 61:2 kuyi-King James Version noma i-New Jerusalem Bible. Abanye abantu bathi uJesu wathatha lesiqu esithi “Nkosi” kuJehova nokuthi uJesu enyameni wayenguJehova ngempela, kodwa leliphuzu okuphikiswana ngalo alisekelwe ngokomBhalo. UJehova uNkulunkulu neNdodana yakhe, uJesu Kristu, ngaso sonke isikhathi bahlukaniswa ngokucophelela emiBhalweni. UJesu wenza igama likaYise laziwa futhi wammelela.—Johane 5:36, 37.
Ezibonelweni ezilandelayo, phawula izingcaphuno ezivela emiBhalweni YesiHeberu njengoba ibonakala emiBhalweni YesiGreki. UJehova uNkulunkulu kanye noGcotshiweyo wakhe, noma uMesiya, kukhulunywe ngabo bobabili kuzEnzo 4:24-27, ezicaphuna kumaHubo 2:1, 2. Umongo wabaseRoma 11:33, 34 ukhuluma ngokucacile ngoNkulunkulu, uMthombo wakho konke ukuhlakanipha nolwazi, kanye nengcaphuno ka-Isaya 40:13, 14. Ebhalela ibandla laseKorinte, uPawulu uphinda lengcaphuno, “Ngubani owake wazi umqondo [kaJehova, NW]?” abese enezela: “Kepha thina sinomqondo kaKristu.” INkosi uJesu yembulela abalandeli bayo umqondo kaJehova ngezindaba eziningi ezibalulekile.—1 Korinte 2:16.
Ngezinye izikhathi umbhalo othile emiBhalweni YesiHeberu ubhekisela kuJehova, kodwa ngenxa yokuthi umnikezé amandla negunya, ugcwaliseka kuJesu Kristu. Ngokwesibonelo, iHubo 34:8 lisimema ukuba ‘sizwe sibone ukuthi uJehova muhle.’ Kodwa uPetru lokhu ukusebenzisa eNkosini uJesu Kristu lapho ethi: “Uma seninambithile nezwa ukuthi iNkosi imnene.” (1 Petru 2:3) UPetru usebenzisa isimiso abese ebonisa indlela esisebenza ngayo nakuJesu Kristu. Ngokungenisa ulwazi ngabo bobabili uJehova uNkulunkulu noJesu Kristu nokwenza ngokuvumelana nalo, amaKristu angajabulela izibusiso ezicebile ezivela kubo bobabili uYise neNdodana. (Johane 17:3) Ukusebenzisa kukaPetru lombhalo ngalendlela akwenzi iNkosi enguMbusi uJehova ibe umuntu oyedwa neNkosi uJesu Kristu.—Bheka umbhalo waphansi we-NW kweyoku-1 Petru 2:3.
Izikhundla ezihlobene zikaJehova uNkulunkulu neNdodana yakhe, uJesu Kristu, zicaciswa kahle kakhulu umphostoli uPawulu lapho ethi: “Nokho kithina kukhona uNkulunkulu munye, uYise, okuvela kuye konke, nathi sikhonela yena, nenkosi inye, uJesu Kristu, okungaye konke, nathi sikhona ngaye.” (1 Korinte 8:6; 12:5, 6) Ebhalela ibandla lamaKristu e-Efesu, uPawulu wachaza ‘iNkosi inye,’ uJesu Kristu, njengehluke ngokuphelele ‘kuNkulunkulu munye, uYise wabo bonke.’—Efesu 4:5, 6.
UJehova Uphakeme Ngaphezu Kwabo Bonke
Kusukela ngonyaka ka-1914, amazwi esAmbulo 11:15 aye aba iqiniso: “Umbuso wezwe usungoweNkosi [uJehova uNkulunkulu] yethu nokaKristu wayo; iyakubusa kuze kube-phakade naphakade.” I-New International Dictionary of New Testament Theology (Umqulu 2, ikhasi 514) ithi: “Lapho uKristu esenqobe yonke imibuso (1 Kor. 15:25), uyozithoba kuNkulunkulu uYise. Ngakho ubukhosi bukaJesu buyobe bufeze umgomo wabo futhi uNkulunkulu uyoba yikho konke kukho konke (1 Kor. 15:28).” Ekupheleni kokuBusa kwakhe kweMinyaka Eyinkulungwane, uKristu Jesu uphindisela kuYise, uNkulunkulu uMninimandla onke, amandla negunya ayekunikezwe ngaphambili. Ngakho, yonke inkazimulo nokukhulekela kuyiswa ngokufanelekile kuJehova, “uNkulunkulu weNkosi yethu uJesu Kristu.”—Efesu 1:17.
Nakuba manje uJesu eyiNkosi yamakhosi, akalokothi abizwe ngokuthi uNkulunkulu wonkulunkulu. UJehova uhlala ephakeme ngaphezu kwabo bonke. Ngalendlela, uJehova uyoba “yikho konke kukho konke.” (1 Korinte 15:28) Ubukhosi bukaJesu bumnikeza indawo yakhe efanelekile njengeNhloko yebandla lobuKristu. Nakuba singabona “amakhosi” amaningi anamandla ezindaweni eziphakeme kulelizwe, sihlale sithembele kulowo oyiNkosi yamakhosi. Nakuba uJesu Kristu esesikhundleni sakhe esiphakeme, usalokhu ezithoba kuYise, “ukuze uNkulunkulu abuse phezu kwakho konke.” (1 Korinte 15:28, The Translator’s New Testament) Yeka isibonelo esihle kakhulu sokuthobeka uJesu asibekela abafundi bakhe ukuba basilandele, njengoba nje bemamukela njengeNkosi yabo!
[Ibhokisi ekhasini 30]
“Lapho abalobi beTestamente Elisha bekhuluma ngoNkulunkulu basho uNkulunkulu uYise weNkosi yethu uJesu Kristu. Lapho bekhuluma ngoJesu Kristu, abasho noma abacabangi ukuthi unguNkulunkulu. UnguKristu kaNkulunkulu, iNdodana kaNkulunkulu, ukuHlakanipha kukaNkulunkulu, uLizwi kaNkulunkulu. Ngisho neseThulo sikaSt. John, esifana neMfundiso YaseNicaea, kumelwe sifundwe kucatshangelwa imfundiso ecacile ekulo lonke iVangeli yokuthi uKristu ungaphansi kukaYise; futhi iseThulo esiGrekini asicacile njengoba elithi [the·osʹ] lisetshenziswe ngaphandle komunci ngokungafani nasesiNgisini.”—“The Divinity of Jesus Christ,” nguJohn Martin Creed.