Uvuko

Incazelo: Elithi A·naʹsta·sis, igama lesiGreki elihunyushwe ngokuthi “uvuko,” ngokwezwi nezwi lisho “ukusukuma futhi” futhi libhekisela ekuvukeni ekufeni. Inkulumo egcwele ethi “ukuvuka kwabafileyo” isetshenziswa ngokuphindaphindiwe emiBhalweni. (Math. 22:31; IzE. 4:2; 1 Kor. 15:12) ElesiHeberu ngelithi techi·yathʹ ham·me·thimʹ, elisho “ukuvuselelwa kofileyo.” (Math. 22:23, umbhalo waphansi, kuyi-NW yeZikhombo) Uvuko luhilela ukubuyiselwa kwesimo somuntu sokuphila, okuyisimo sokuphila uNkulunkulu aye wasigcina enkumbulweni yakhe. Ngokwentando kaNkulunkulu ngalowomuntu, umuntu ubuyiselwa emzimbeni wobuntu noma womoya kodwa elokhu enezimpawu zobuntu bakhe ezimbonakalisayo, enobuntu obufanayo nezinkumbulo njengalapho efa. Ilungiselelo lokuvuswa kwabafileyo liwukubonakaliswa okumangalisayo komusa kaJehova ongasifanele; libonisa ukuhlakanipha kwakhe namandla futhi liyindlela injongo yakhe yokuqala ngokuqondene nomhlaba eyofezwa ngayo.

Ingabe uvuko luwukuhlanganiswa komphefumulo ongeyona inyama nomzimba wenyama?

Ukuze lokhu kwenzeke, abantu bekungadingeka babe nomphefumulo ongeyona inyama obungahlukana nomzimba wenyama. IBhayibheli aliyifundisi into enjalo. Lowomqondo wabolekwa ekuhlakanipheni kwamaGreki. Imfundiso yeBhayibheli ngokuqondene nomphefumulo ihlelwe emakhasini 377-381. Mayelana nobufakazi bemvelaphi yenkolelo yeLobukholwa ngomphefumulo ongeyona inyama, ongafi, bheka amakhasi 381, 382.

Ingabe uJesu wavuswa ngomzimba wenyama, futhi ingabe unomzimba onjalo ezulwini manje?

1 Pet. 3:18: “UKristu wahlupheka kwaba-kanye ngezono, olungileyo ngenxa yabangalungile, ukuba asiyise kuNkulunkulu, ebulawa enyameni kepha ephiliswa emoyeni [“ngoMoya,” KJ; “emoyeni,” RS, NE, Dy, JB].” (Ekuvusweni kwakhe kwabafileyo, uJesu wavuswa enomzimba womoya. Embhalweni wesiGreki amagama elithi “inyama” nelithi “umoya” abekwa njengaphikisanayo, futhi womabili asesimweni sikamenziwa ongaqondile; ngakho-ke, uma umhumushi esebenzisa ukuhumusha kokuthi “ngomoya” kumelwe futhi ngokuvumelanayo athi “ngenyama,” noma uma esebenzisa ukuthi “enyameni” kumelwe futhi athi “emoyeni.”)

IzE. 10:40, 41: “Lowo [uJesu Kristu] uNkulunkulu wamvusa ngosuku lwesithathu, wamnika ukuba abonakale, kungekubantu bonke kodwa kithina esingofakazi ababekhethwé nguNkulunkulu ngaphambili.” (Kungani abanye nabo bengambonanga? Ngoba wayeyisidalwa somoya futhi lapho, njengoba izingelosi zazenzile ngaphambili, eba semzimbeni wenyama ukuze abonakale, wakwenza kuphela kubafundi bakhe.)

1 Kor. 15:45: “Kanjalo futhi kulotshiwe ukuthi umuntu wokuqala uAdamu waba-ngumphefumulo ophilayo; uAdamu wokugcina [uJesu Kristu, owayephelele njengoAdamu lapho edalwa] waba-ngumoya ophilisayo.”

ULuka 24:36-39 usho ukuthini ngokuqondene nomzimba uJesu avuselwa kuwo?

Luka 24:36-39: “Besakhuluma lokho [abafundi], yena uqobo wema phakathi kwabo, wathi kubo: Ukuthula makube-kinina. Kepha bashaywa luvalo, besaba bethi babona ithongo. Wayesethi kubo: Nikhathazekeleni na? Kuvelelani izizindlo ezinhliziyweni zenu na? Bhekani izandla zami nezinyawo zami ukuthi yimina uqobo; ngiphatheni, nibone, ngokuba ithongo alinanyama namathambo, njengokuba ningibona nginakho.”

Abantu abanakuyibona imimoya, ngakho abafundi ngokusobala babecabanga ukuthi babebona isipoki noma umbono. (Qhathanisa noMarku 6:49, 50.) UJesu wabaqinisekisa ukuthi wayengesona isipoki; babewubona umzimba wakhe wenyama futhi bengamthinta, bezwe namathambo; futhi wadla phambi kwabo. Ngokufanayo, esikhathini esidlule, izingelosi zembatha imizimba yenyama ukuze zibonakale kubantu; zadla, futhi ezinye zashada nokushada zaba ngoyise babantwana. (Gen. 6:4; 19:1-3) Ngemva kokuvuka kwakhe, uJesu akazange avele njalo ngomzimba wenyama ofanayo (mhlawumbe ukuze agcizelele ezingqondweni zabo ukuthi wayesengumoya), ngakho-ke akazange asheshe abonakale ngisho nakubangane bakhe abaseduze. (Joh. 20:14, 15; 21:4-7) Nokho, ngokuvela kaningi kubona ngemizimba yenyama abese esho futhi enza izinto ababezifanisa nezikaJesu ababemazi, waqinisa ukholo lwabo eqinisweni lokuthi ngempela wayevusiwe kwabafileyo.

Ukuba abafundi babembone ngempela uJesu emzimbeni anawo manje ezulwini, uPawulu wayengeke kamuva abhekisele kuKristu okhazinyulisiwe ngokuthi “ingukubengezela kwenkazimulo yakhe [uNkulunkulu],” ngoba uNkulunkulu unguMoya futhi akakaze abe senyameni.—Heb. 1:3; qhathanisa neyoku-1 Thimothewu 6:16.

Lapho sifunda ngemibiko yokubonakala kukaJesu ngemva kokuvuswa kwakhe, sisizakala ukuba sikuqonde ngokufanele uma sikhumbula eyoku-1 Petru 3:18 neyoku-1 Korinte 15:45, ezicashunwe ekhasini 409.

Bheka futhi amakhasi 256-258, ngaphansi kwesithi “UJesu Kristu.”

Obani abayovuselwa ukuhlanganyela ukuphila kwasezulwini noKristu, futhi bayokwenzani lapho?

Luka 12:32: “Ungesabi, mhlambi omncane; ngokuba kwathandeka kuYihlo ukuninika umbuso.” (Laba abahlanganisi bonke abaye baba nokholo; inani lilinganiselwe. Ukuba sezulwini kwabo kungokwenjongo.)

IsAm. 20:4, 6: “Ngase ngibona izihlalo zobukhosi; bahlala kuzo, banikwa ukwahlulela. . . . Ubusisiwe, ungcwele onesabelo ekuvukeni kokuqala; kulabo ukufa kwesibili akunamandla, kepha bayakuba-ngabapristi bakaNkulunkulu nabakaKristu, babuse kanye naye iminyaka eyinkulungwane.”

Bheka futhi amakhasi 196-202, ngaphansi kwesihloko esithi “Izulu.”

Ingabe labo abavuselwa ekuphileni kwasezulwini ekugcineni bayoba nemizimba yenyama ekhazinyulisiwe khona?

Fil. 3:20, 21: “INkosi uJesu Kristu, oyakuguqula isimo somzimba wethu wokuthotshiswa, ufane nomzimba wakhe wenkazimulo, ngamandla angazihlelela ngawo konke phansi kwakhe.” (Ingabe lokhu kusho ukuthi umzimba wabo wenyama oyogcina ngokukhazinyuliswa ezulwini? Noma ingabe kusho ukuthi esikhundleni sokuba nomzimba ophansi wenyama, bayombathiswa ngomzimba womoya okhazimulayo uma bevuselwa ekuphileni kwasezulwini? Umbhalo olandelayo mawuphendule.)

1 Kor. 15:40, 42-44, 47-50: “Ikhona nemizimba yasezulwini nemizimba yasemhlabeni; kepha inkazimulo yeyasezulwini iyodwa, neyasemhlabeni iyodwa. Kunjalo nokuvuka kwabafileyo. . . . Kuhlwanyelwa kungumzimba wemvelo, kuvuswa kungumzimba womoya. . . . Umuntu wokuqala [uAdamu] wavela emhlabeni, engowenhlabathi; umuntu wesibili [uJesu Kristu] uvela ezulwini. Njengokuba enjalo owayengowenhlabathi, banjalo nalabo abangabenhlabathi; nanjengokuba enjalo ongowasezulwini, banjalo nabo abangabasezulwini. Futhi njengokuba benesimo songowenhlabathi, siyakuba-nesimo songowasezulwini futhi. Kepha ngisho lokhu, bazalwane, ukuthi inyama nagazi akunakulidla ifa elingumbuso kaNkulunkulu.” (Akukho lungiselelo lapha lokuhlanganiswa kwezinhlobo ezimbili zemizimba noma ukuyiswa kwemizimba yenyama ezulwini.)

UJesu wabonisa kanjani ukuthi uvuko luyosho ukuthini ngesintu sisonke?

Joh. 11:11, 14-44: “[UJesu wathi kubafundi bakhe:] ULazaru umhlobo wethu ulele, kepha ngiyahamba ukuba ngimvuse ebuthongweni. . . . UJesu wathi kubo ngokuchachileyo: ULazaru ufile . . . Kwathi-ke esefika uJesu, wamfumana [uLazaru] esenezinsuku ezine ethuneni. . . . UJesu wathi kuye [uMarta, udadewabo kaLazaru]: Mina ngingukuvuka nokuphila; okholwa yimi, noma efa, wophila. . . . Wamemeza ngezwi elikhulu, wathi: Lazaru, phuma. Waphuma ofileyo eboshwé izinyawo nezandla ngezindwangu, ubuso bakhe bumboziwe ngeduku. UJesu wathi kubo: Mthukululeni, nimyeke ahambe.” (Ukuba uJesu wayebize uLazaru wambuyisa esimweni senjabulo kokunye ukuphila, lokho kwakungeke neze kube umusa. Kodwa ukuvusa kukaJesu uLazaru esimweni sokungaphili kwakungumusa kokubili kuyena nakodadewabo. ULazaru waphinda futhi waba umuntu ophilayo.)

Marku 5:35-42: “Kwafika abomphathi wesinagoge, bathi: Indodakazi yakho isifile; usamkhathazelani uMfundisi na? Kwathi ukuba uJesu ezwile izwi elishiwoyo, wathi kumphathi wesinagoge: Ungesabi, kholwa kuphela. . . . Wathatha uyise womntwana nonina kanye nababenaye, wangena lapho kulele khona umntwana. Wabamba umntwana ngesandla, wathi kuye: Thalitha, kumi, okungukuthi ngokuhunyushwa: Ntombazana, ngithi kuwe, vuka! Yayisivuka masinyane intombazana, yahamba; ngokuba yayineminyaka eyishumi nambili. Khona bamangala ngokumangala okukhulu.” (Lapho uvuko olukhulu lwenzeka emhlabeni phakathi nokuBusa KukaKristu Kweminyaka Eyinkulungwane, ngokungangabazeki izigidi eziningi zabazali nenzalo yabo bayojabula kakhulu lapho behlangana futhi.)

Imaphi amathemba ayolindela labo abavuselwa ekuphileni emhlabeni?

Luka 23:43, NW: “Ngiqinisile ngithi kuwe namuhla, Uyokuba nami ePharadesi.” (Umhlaba wonke uyoguqulwa ube yipharadesi ngaphansi kokubusa kukaKristu njengeNkosi.)

IsAm. 20:12, 13: “Ngabona abafileyo, abakhulu nabancane, bemi phambi kwesihlalo sobukhosi; izincwadi zavulwa; nenye incwadi yavulwa, ngeyokuphila; nabafileyo bahlulelwa ngalokho okulotshiwe ezincwadini njengokwemisebenzi yabo. . . . Bahlulelwa yilowo nalowo njengokwemisebenzi yakhe.” (Ukuvulwa kwezincwadi ngokusobala kukhomba esikhathini sokufundiswa ngentando yaphezulu, ngokuvumelana noIsaya 26:9. Iqiniso lokuthi kuvulwa ‘incwadi yokuphila’ libonisa ukuthi kunethuba lokuba labo abahambisana naleyomfundo amagama abo abhalwe encwadini. Phambi kwabo kuyoba nethemba lokuphila okuphakade ekupheleleni kobuntu.)

Bheka futhi amakhasi 357-362, ngaphansi kwesithi “UMbuso.”

Ingabe abanye bayomane bavuselwe ukutshelwa ngesahlulelo bese bethola ukufa kwesibili?

Usho ukuthini uJohane 5:28, 29? Uthi: “Bonke abasemathuneni beyakulizwa izwi layo, abenzé ukulunga baphumele ekuvukeni kokuphila, abenzé okubi ekuvukeni kokulahlwa.” Okwashiwo uJesu lapha kumelwe kuqondwe ngokombono wesAmbulo samuva asinikeza uJohane. (Bheka isAmbulo 20:12, 13, esicashunwe ekhasini 412.) Kokubili labo abenza izinto ezinhle ngaphambili nalabo abenza izinto ezimbi bayokwahlulelwa “yilowo nalowo njengokwemisebenzi yakhe.” Miphi imisebenzi? Uma besingalandela umbono wokuthi abantu babeyolahlwa ngesisekelo sezenzo zokuphila kwabo okudlule, lokho bekungeke kuvumelane nabaseRoma 6:7: “Ngokuba ofileyo ukhululiwe esonweni.” Bekungaba okungenangqondo futhi ukuvusa abantu bavuselwe ukubhujiswa. Ngakho-ke, kuJohane 5:28, 29a, uJesu wayekhomba phambili ovukweni; khona-ke, engxenyeni esele yevesi 29, wayebonisa umphumela ngemva kokuba sebethole ukuphelela kobuntu futhi bahlulelwa.

IsAmbulo 20:4-6 sibonisani ngokuqondene nalabo abayovuswa emhlabeni?

IsAm. 20:4-6: “Ngase ngibona izihlalo zobukhosi; bahlala kuzo, banikwa ukwahlulela; ngabona nemiphefumulo yababenqunywé amakhanda ngenxa yokufakaza ngoJesu nangenxa yezwi likaNkulunkulu . . . baphila, babusa kanye noKristu iminyaka eyinkulungwane. Abafileyo ababesele kabaphila yaze yaphela iminyaka eyinkulungwane. Lokhu kungukuvuka kokuqala. Ubusisiwe, ungcwele onesabelo ekuvukeni kokuqala; kulabo ukufa kwesibili akunamandla, kepha bayakuba-ngabapristi bakaNkulunkulu nabakaKristu, babuse kanye naye iminyaka eyinkulungwane.”

Umusho wokuqala wevesi lesi-5 ubekwe kubakaki kuNW neMo ukuze kusizwe umfundi ahlanganise lokho okukubakaki nalokho okungenhla kwakho. Njengoba kuphawulwe ngokukhanyayo, akubona “abafileyo ababesele” abahlanganyela ovukweni lokuqala. Lolovuko lungolwalabo ababusa noKristu iminyaka eyinkulungwane. Ingabe lokhu kusho ukuthi abekho abanye abantu abayophila phakathi neminyaka eyinkulungwane ngaphandle kwalabo ababusa noKristu ezulwini? Cha; ngoba, ukuba bekunjalo, bekuyosho ukuthi akukho muntu abebeyokhonza njengabapristi ngenxa yakhe, futhi indawo abayibusayo ibiyoba yimbulunga engenalutho.

Obani-ke “abafileyo ababesele”? Yibo bonke abantu abafa ngenxa yesono sika-Adamu nalabo, okuyothi nakuba besindile osizini olukhulu noma labo abangase bazalwe phakathi nokuBusa Kweminyaka Eyinkulungwane, abayodinga ukukhululwa emiphumeleni ebulalayo yesono esinjalo.—Qhathanisa nabase-Efesu 2:1.

Kungayiphi-ke ingqondo kuthiwa “kabaphila” kuze kube sekupheleni kweminyaka eyinkulungwane? Lokhu akusho ukuvuka kwabo. Lokhu ‘kuphila’ kuhilela okungaphezu nje kokuphila njengabantu. Kusho ukuzuza ukuphelela kobuntu, bekhululekile kuyo yonke imiphumela yesono sika-Adamu. Phawula ukuthi ukubhekisela kulokhu evesini lesi-5 kwenzeka ngokushesha ngemva kokuba ivesi elandulelayo lithi labo abayoba sezulwini “baphila.” Ngokuqondene nabo kushiwo ukuphila okukhululekile kuyo yonke imiphumela yesono; baze banikezwe ngisho nelungelo elikhethekile lokungafi. (1 Kor. 15:54) Khona-ke, mayelana “nabafileyo ababesele,” kumelwe kusho ukuphelela kokuphila ekupheleleni kobuntu.

Obani abayohlanganiswa ovukweni lwasemhlabeni?

Joh. 5:28, 29: “Ningamangali ngalokho, ngokuba isikhathi siyeza, lapho bonke abasemathuneni beyakulizwa izwi layo [izwi likaJesu], . . . baphume.” (Igama lesiGreki elihunyushwe ngokuthi “emathuneni” alibona ubuningi belithi taʹphos [ithuna, indawo yokungcwaba umuntu ngamunye] noma haiʹdes [elamathuna, ithuna laso sonke isintu esifile] kodwa liwubuningi besenzo esingaqondile selithi mne·meiʹon [inkumbulo, ithuna lokukhunjulwa]. Ligcizelela ekulondolozeni inkumbulo yomuntu ofile. Hhayi labo abankumbulo yabo yasuswa eGehena ngenxa yezono ezingenakuthethelelwa kodwa abantu abakhunjulwa uNkulunkulu bayovuswa benethuba lokuphila phakade.—Math. 10:28; Marku 3:29; Heb. 10:26; Mal. 3:16.)

IzE. 24:15: “Nginethemba kuNkulunkulu . . . lokuthi kuyakuba-khona ukuvuka kwabafileyo, okwabalungile nokwabangalungile.” (Kokubili labo abaphila ngokuvumelana nezindlela zikaNkulunkulu zokulunga nabantu, okwathi ngenxa yokungazi, benza izinto ezingalungile bayovuswa. IBhayibheli aliyiphenduli yonke imibuzo yethu ngokuqondene nokuthi abantu abathile ngokuqondile abaye bafa bayovuswa yini. Kodwa singaqiniseka ukuthi uNkulunkulu, owazi wonke amaqiniso, uyokwenza ngokungakhethi, ngokwahlulela ngokulunga okuhambisana nomusa ongazilahli izindinganiso zakhe zokulunga. Qhathanisa noGenesise 18:25.)

IsAm. 20:13, 14: “Nolwandle lwakhipha abafileyo ababekulo, nokufa neHayidese kwakhipha abafileyo ababekukho, bahlulelwa yilowo nalowo njengokwemisebenzi yakhe. Ukufa neHayidese kwaphonswa echibini lomlilo. Lokhu kungukufa kwesibili, ichibi lomlilo.” (Ngakho-ke, labo abakufa kwabo kwabangelwa isono sika-Adamu bayovuswa, kungakhathaliseki noma bangcwatshwa olwandle noma eHayidese, ithuna lasemhlabeni laso sonke isintu esifile.)

Bheka futhi isihloko esikhulu esithi “Insindiso.”

Uma kuyovuswa izigidi zezigidi zabantu kwabafileyo, bayohlalaphi bonke?

Ukulinganisela ngokweqile inani labantu abake baphila emhlabeni kuthi bayizi-20 000 000 000. Njengoba sesibonile, akubona bonke laba abayovuswa. Kodwa, ngisho noma besingathi bayovuswa bonke, bekuyoba nendawo eyanele. Ingxenye yomhlaba eyizwe okwamanje ingamakhilomitha sikwele angaba izi-147 600 000 (57 000 000 000 sq mi). Uma ingxenye yaleyondawo yayingabekelwa eceleni ezinye izinjongo, bekuyobe kusenendawo ecishe ibe u-0,37 ha (ngaphansana kweyeka) ngomuntu ngamunye, ebingamnikeza ukudla okungaphezu kokwanele. Imbangela eyinhloko yokuntuleka kokudla kwanamuhla ayikhona ukwehluleka komhlaba ukukhiqiza ukudla okwanele, kodwa kunalokho, ukuphikisana kwezombangazwe nobugovu bezentengiselwano.

Bheka futhi ikhasi 368, ngaphansi kwesihloko esithi “Umhlaba.”