Imibuzo Evela Kubafundi

◼ Ingabe ukuhunyushwa kukaJohane 21:15 kuyiNew World Translation kuqondile njengoba kwehlukile kwezinye izinguqulo?

INew World Translation ithi: “Ingabe ungithanda ngaphezu kwalezi?” kuyilapho ezinye izinguqulo njengeBhayibheli lesiZulu, zithi: “Uyangithanda kunalaba na?” Yikuphi ukuhumusha okuqondile? UJesu ovusiwe wayesoLwandle LwaseGalile lapho ebuza lombuzo. Impendulo kaPetru kuye yaba ukuthi. “Yebo, Nkosi, uyazi wena ukuthi ngiyakuthanda.” UJesu wathi kuye: “Yipha amawundlu ami.”—Johane 21:15.

Isabizwana sesiGreki utouʹton, ebuningini singahunyushwa ngokuthi “lezi” noma ngokuthi “laba.” Ngenxa yalokho, izazi ziye zasikisela izincazelo ezintathu zombuzo kaJesu okungenzeka ukuthi ziyiqiniso:

1. Ingabe ungithanda ngaphezu kokuba uthanda laba abanye abafundi?

2. Ingabe ungithanda ngaphezu kokuba laba abanye abafundi bengithanda?

3. Ingabe ungithanda ngaphezu kwalezizinto, njengezinhlanzi?

Ake sibonisane ngalokhu okuthathu ukuze sibone ukuthi yikuphi okungenzeka kube yiqiniso.

Okokuqala. Kalula nje, ambalwa amaKristu angacabangela uKristu ebuza ukuthi, ‘Ingabe ungithanda ngaphezu kokuba uthanda abafundi?’ Kakade kufanele kube njalo! Kwakungabonakala kuyinqaba ngokukhethekile ukubuza uPetru umbuzo onjalo. Wayekade nje esesikebheni kanye nabanye abafundi abayisithupha, kodwa lapho ebona uJesu ogwini, uPetru wabashiya abafundi futhi wabhukudela ogwini. Ebonisa ukusondela okufanayo, lapho uKristu ayebuze ukuthi abaphostoli babefuna ukuhamba kanye nalabo ababekhubekile yini, uPetru wathi wayezimisele ukuhlala ngakuJesu.—Johane 6:66-69; 21:7, 8.

Okwesibili. Kuthiwani ngokuthi uJesu kungenzeka ukuthi wayesho ukuthi, ‘Petru, ingabe unothando olukhulu ngami ngaphezu kwalolo abanye abafundi abanalo?’ Abakhulumeli abaningi baye basekela lombono, njengoba uPetru ngaphambili wayethe ukholeke kakhulu kuJesu kunabanye. (Mathewu 26:33-35) Kodwa, ukuqonda uJohane 21:15 ngalendlela kudinga ukuba kusikiselwe isenzo esingashiwongo, njengokuthi “Ingabe ungithanda ngaphezu kokuba laba [bengithanda]?” Kodwa isenzo esinjalo esengeziwe asikho embuzweni kaJesu, futhi sibanga izinkinga zohlelo lolimi. Ngaphezu kwalokho kungabonakala kungokungafanelekile ngoJesu ukucela uPetru ukuba aqhathanise isilinganiso sothando lwakhe nesilinganiso sothando abanye abangase babe nalo. UJesu akazange yini alungise abaphostoli lapho bewela ekubangeni?—Marku 9:33-37; 10:35-44; Luka 22:24-27.

Khona-ke, kungenzeka yini ukuthi Okwesithathu yikho uJesu ayekubuza, ‘Ingabe ungithanda ngaphezu kwalezizinto, njengezinhlanzi?’ Yilena indlela okuhunyushwe ngayo, ngokwesibonelo, eTestamenteni Elisha ngesiTsonga. Umbuzo onjalo ungaba ofanelekile uma kucatshangelwa isikhathi sikaPetru esidlule. Wayengomunye wabafundi bokuqala abalandela uJesu. (Johane 1:35-42) Nokho, kubonakala sengathi uPetru akazange amlandele ngalesosikhathi uJesu isikhathi esigcwele. Kunalokho, wabuyela ekudobeni kwakhe. Ngakho, ezinyangeni ezithile kamuva uJesu wabiza uPetru kulowomsebenzi oyisisekelo ukuba abe ‘umdobi wabantu.’ (Mathewu 4:18-20; Luka 5:1-11) Noma kunjalo, ngemva kokufa kukaJesu, uPetru wakhuthaza ukubuyela kulomsebenzi, etshela abanye babafundi: “Ngiyakodoba.”—Johane 21:2, 3.

Ngakho kungenzeka ngempela ukuthi uJesu wayegcizelela kuPetru Isidingo sokwenza ukukhetha okungunqamula-juqu. Yini ayezoyibeka phambili ekuphileni—ukuba umlandeli kaJesu noma ukuphishekela umsebenzi wokuziphilisa, njengoba usikiselwa yinqwaba yezinhlanzi eyayiphambi kwabo? Zazithatha indawo ebaluleke kangakanani enhliziyweni kaPetru izinhlanzi, amanetha, imikhumbi, nobungane nabanye abadobi? Ingabe uPetru wayezozishiya ngempela lezizinto ezijabulisayo ukuze abeke phambili uthando lwakhe ngoKristu nokondla “izimvu” zikaJesu okwakuzolandela?—Johane 21:17.

Singazibuza umbuzo ofanayo ohilela ‘lezizinto’ ezingase zisikhange, njengomsebenzi wethu othakazelisayo noma ibhizinisi, ukujabulela kwethu imfundo, imizi yethu, noma uhlobo lokuzijabulisa esiluthandayo. Singazibuza ngokungagunci: ‘Ingabe uJesu ngimthanda ngaphezu kwanoma iyiphi yalezizinto noma ngaphezu kwazo zonke lezizinto?’ UJesu wabonisa ukuthi uma impendulo yethu Inguyebo, siyokubonisa ngokondla “izimvu.”

Kungabonakala ukuthi ukuhumusha kweNew World Translation ngaleyondlela kuyavumelana nomongo nanazo zonke izimfundiso zikaJesu.

[Umthombo Wesithombe ekhasini 31]

Pictorial Archive (Near Eastern History) Est.