ISIFUNDO 18
Ungawabona Kanjani AmaKristu Eqiniso?
Kunezigidi eziningi zabantu ezithi zingamaKristu. Kodwa bonke laba bantu abakholelwa izinto ezifanayo futhi abaphili ngemithetho efanayo. Pho singawabona kanjani amaKristu eqiniso?
1. Angobani amaKristu?
AmaKristu angabafundi noma abalandeli bakaJesu Kristu. (Funda izEnzo 11:26.) Abonakala ngani ukuthi angabafundi bakaJesu? UJesu wathi: “Uma nihlala ezwini lami, ningabafundi bami ngempela.” (Johane 8:31) Lokhu kusho ukuthi amaKristu eqiniso kumelwe alalele izimfundiso zikaJesu. Ngaso sonke isikhathi, uJesu wayefundisa okushiwo iBhayibheli. AmaKristu eqiniso nawo asekela lokho akukholelwayo eBhayibhelini.—Funda uLuka 24:27.
2. AmaKristu eqiniso alubonisa kanjani uthando?
UJesu wathi kubalandeli bakhe: “Nithandane njengoba nje nami nginithandile.” (Johane 15:12) UJesu wabonisa kanjani ukuthi uyabathanda abafundi bakhe? Wachitha isikhathi nabo, wabakhuthaza futhi wabasiza. Waze wanikela ngokuphila kwakhe ngenxa yabo. (1 Johane 3:16) Ngendlela efanayo, amaKristu eqiniso awagcini nje ngokukhuluma ngothando. Abonisa ngamazwi nangezenzo ukuthi ayathandana.
3. AmaKristu eqiniso amatasa ngamuphi umsebenzi?
UJesu wanikeza abafundi bakhe umsebenzi okwakumelwe bawenze. “Wabathuma ukuba bahambe bayoshumayela ngoMbuso kaNkulunkulu.” (Luka 9:2) AmaKristu okuqala awagcinanga ngokushumayela ezindaweni ayekhonzela kuzo, kodwa ayeshumayela nakwezinye izindawo zomphakathi nasemakhaya abantu. (Funda izEnzo 5:42; 17:17.) Nanamuhla, amaKristu eqiniso ashumayela iqiniso eliseBhayibhelini nomaphi lapho abantu betholakala khona. Ayabathanda abantu, ngakho ngokuzithandela asebenzisa isikhathi sawo namandla ukuze abatshele umyalezo oseBhayibhelini wethemba nenduduzo.—Marku 12:31.
FUNDA OKWENGEZIWE
Cabanga ngalokho okwenza amaKristu eqiniso ahluke kubantu abangakulandeli lokho uJesu akufundisa nakwenza.
4. Afuna ukwazi iqiniso eliseBhayibhelini
AmaKristu okuqala ayelithanda iZwi likaNkulunkulu
Akubona bonke abathi bangamaKristu abakubona kubalulekile ukwazi iqiniso eliseBhayibhelini noma ukuphila ngalo. Dlalani IVIDIYO, bese nixoxa ngombuzo olandelayo.
Amasonto athi angawobuKristu ahluleke kanjani ukufundisa lokho uJesu akufundisa?
UJesu wafundisa iqiniso eliseZwini likaNkulunkulu. Fundani uJohane 18:37, bese nixoxa ngalo mbuzo:
UJesu wathi singawabona kanjani amaKristu “asohlangothini lweqiniso?”
5. Ashumayela iqiniso eliseBhayibhelini
AmaKristu okuqala ayeshumayela kwabanye
Ngaphambi kokuba uJesu anyukele ezulwini, wanika abafundi bakhe umsebenzi osaqhubeka nanamuhla. Fundani uMathewu 28:19, 20 nezEnzo 1:8, bese nixoxa ngalo mbuzo:
Umsebenzi wokushumayela wawuzokwenziwa ngezinga elingakanani?
6. Ayakwenza lokho akushumayelayo
Yini eyaqinisekisa indoda okuthiwa uTom ukuthi yayithole amaKristu eqiniso? Dlalani IVIDIYO, bese nixoxa ngemibuzo elandelayo.
Kule vidiyo, yini eyabangela uTom wangabe esafuna ukuzihlanganisa nenkolo?
Yini emenza aqiniseke ngokuthi uselitholile iqiniso?
Izenzo zisho lukhulu kunamazwi. Fundani uMathewu 7:21, bese nixoxa ngalo mbuzo:
Yini ebaluleke kakhulu kuJesu—yilokho esithi siyakukholelwa noma yilokho esikwenzayo?
7. AmaKristu eqiniso ayathandana
AmaKristu okuqala ayethandana
AmaKristu aye akubeka yini ukuphila kwawo engozini ngenxa yamanye amaKristu? Dlalani IVIDIYO, bese nixoxa ngemibuzo elandelayo.
Kule vidiyo, yini eyashukumisela uLloyd ukuba afake ukuphila kwakhe engozini ngenxa kaMfoweth’uJohansson?
Ucabanga ukuthi wenza ngendlela umKristu weqiniso okufanele enze ngayo?
Fundani uJohane 13:34, 35, bese nixoxa ngale mibuzo:
Abafundi bakaJesu (amaKristu eqiniso) kwakufanele babaphathe kanjani abantu bolunye uhlanga noma besinye isizwe?
Babezokwenza kanjani lokho uma kunempi?
ABANYE ABANTU BATHI: “AmaKristu enze izinto ezimbi kakhulu—kungashiwo kanjani-ke ukuthi inkolo yawo eyeqiniso?”
Yimuphi umBhalo ongawufundela umuntu ukuze umbonise ukuthi singawabona kanjani amaKristu eqiniso?
UKUBUYEKEZA
AmaKristu eqiniso alalela lokho okufundiswa iBhayibheli, abonisa uthando oluhilela ukuzidela, ashumayele neqiniso eliseBhayibhelini.
Ufundeni?
AmaKristu eqiniso akusekelaphi lokho akukholelwayo?
Iyiphi imfanelo amaKristu eqiniso abonakala ngayo?
Yimuphi umsebenzi owenziwa amaKristu eqiniso?
HLOLA OKWENGEZIWE
Funda ngeqembu labantu elizama ukulandela isibonelo sikaJesu Kristu nalokho akufundisa.
Funda ukuthi yini eyenza indela yafuna “abantu abakhonza uNkulunkulu.”
“Yonke Imibuzo Yami Bayiphendula NgeBhayibheli” (INqabayokulinda, Ephreli 1, 2014)
Funda ukuthi amaKristu eqiniso alutshengisa kanjani uthando kwabakholwa nawo abadinga usizo.
Ukusiza Abafowethu Lapho Kugadla Inhlekelele—Isiqeshana (3:57)
Hlola lokho amaKristu okuqala akwenza, nalokho okwenziwa amaKristu eqiniso anamuhla, okuhambisana nalokho uJesu athi abafundi bakhe babeyobonakala ngakho.
“Ungawabona Ngani AmaKristu Eqiniso? (INqabayokulinda, Mashi 1, 2012)