5. Yini edingekayo ukuze sithole iqiniso likaNkulunkulu?

⁵ Iqiniso likaNkulunkulu liyigugu elikhulu. Ukulithola kudinga ukumba, nokufuna imiBhalo ngokuphikelela. Sizuza ukuhlakanipha futhi siqonde ukwesaba uJehova okunenhlonipho lapho singabafundi abanjengabantwana boMfundisi Omkhulu. (IzAga 1:7; Isaya 30:20, 21, qhathanisa ne-NW.) Yiqiniso, kufanele siziqinisekise ngezinto ngokomBhalo. (1 Petru 2:1, 2) AmaJuda aseBereya ‘ayenengqondo enhle kunawaseThesalonika, ngoba amukela izwi ngokulangazela okukhulu kakhulu kwengqondo, ehlola imiBhalo ngokucophelela nsuku zonke ukuthi zinjalo yini lezizinto [ezazishiwo uPawulu].’ AbaseBereya batuswa ngokwenza lokhu kunokuba bakhuzwe.—IzEnzo 17:10, 11.

 7. Yini edingekayo ukuze sikhule ekuqondeni iBhayibheli, futhi ngani?

⁷ Ukuze sikhule ekuqondeni kwethu iBhayibheli, sidinga isiqondiso somoya kaNkulunkulu, noma amandla asebenzayo. “Umoya uhlola ezintweni zonke, ngisho nasezintweni ezijulile zikaNkulunkulu” ukuze ucacise lokho ezikushoyo. (1 Korinte 2:10) AmaKristu aseThesalonika kwakumelwe ‘aqiniseke ngazo zonke izinto’ kunoma yiziphi iziprofetho ayezizwa. (1 Thesalonika 5:20, 21) Lapho uPawulu ebhalela abaseThesalonika (cishe ngo-50 C.E.), okuwukuphela kwengxenye yemiBhalo YesiGreki eyayisibhaliwe kwakuyiVangeli likaMathewu. Ngakho abaseThesalonika nabaseBereya babengaqiniseka ngazo zonke izinto, cishe ngokubheka inguqulo yesiGreki yemiBhalo YesiHeberu i-Septuagint. Kwakudingeka bafunde futhi batadishe imiBhalo, nathi senza okufanayo.