“Nibe-Ngamadoda”

“Lindani nigxile ekukholweni, nibe-ngamadoda, nibe-namandla.”—1 Korinte 16:13.

 1. Ngamazwi athi “Bhekani! Lendoda!” uPilatu wayebhekisela kuJesu njengoyini?

“BHEKANI! LENDODA!” Ngalawomazwi angokomlando umbusi wamaRoma uPontiyu Pilatu wethula esixukwini samaJuda anonya ayebuthene phambi kwendlu yakhe yobukhosi eJerusalema indoda edume kakhulu kuwo wonke umlando wabantu. KwakungumJuda ogama lakhe nguJesu Kristu, ngalesosikhathi owayegqoke ingubo ebubende yobukhosi nomqhele wameva ekhanda lakhe, konke lokhu kuwukumbhuqa ngokusho kwakhe ukuthi uyiNkosi yobuMesiya ethenjisiwe. (Johane 19:5-15) Nokho, ngalamazwi “Bhekani! Lendoda!” uPilatu wayebhekisela kuJesu njengomuntu owayengovelele phakathi kwaso sonke isintu, umuntu owayengafanele ukwenqatshwa.

 2. Kungayiphi indoda isintu esifile esiyovuswa ngayo kwabafileyo, futhi ngokwesisekelo samuphi umnikelo?

² Umphostoli wabhekisela kulendoda, eyayilingana nendoda ephelele uAdamu ngosuku lokudalwa kwakhe, lapho ebhala kwaboku-1 Korinte 15:21 lamazwi: “Ngokuba lokhu ukufa kweza [ngendoda [anʹthro·pos uAdamu], ukuvuka kwabafileyo nakho kweza [ngendoda [anʹthro·pos uJesu Kristu].” Umphostoli uPawulu wayecabanga ngendoda efanayo lapho ekhuluma emalungwini asenkantolo yaseAthene eAreyophagu, noma eMars Hill, futhi wathi: “Ngokuba izikhathi zokungazi wazithalalisa uNkulunkulu, kodwa kalokhu usememezele kubantu [ngokuqondile, emadodeni] ukuba bonke ezindaweni zonke baphenduke, njengokuba umisile usuku azakwahlulela ngalo izwe ngokulunga ngomuntu [ngendoda] ammisele lokho, enika bonke ithemba ngokumvusa kwabafileyo.” (IzEnzo 17:30, 31) Ngokunikela ngokuphila kwakhe okuphelele kobuntu ngenxa yaso sonke isintu, loJesu ovusiwe wayenganikela umhlatshelo ngenxa yaso sonke isintu ukuze ngisho nabantu abafile babe novuko lwabafileyo futhi babe nethuba lokuzuza ukuphila okuphakade emhlabeni oyipharadesi ngaphansi kombuso wakhe weminyaka eyinkulungwane.

 3. Umnikelo kabani wesihlengo okumelwe kufakazwe ngawo ngesikhathi esikhethiwe, futhi kungani manje kuyisikhathi esifaneleke kakhulu ngalobufakazi?

³ Ngokuvumelana naleloqiniso elijabulisayo, umphostoli uPawulu wabhalela isisebenzi esikanye naye uThimothewu wathi: “Ngokuba munye uNkulunkulu, munye nomlamuleli phakathi kukaNkulunkulu nabantu, umuntu [indoda] uKristu Jesu, owazinikela abe-yinhlawulo yabo bonke, kube-ngubufakazi besikhathi esiyiso.” (1 Thimothewu 2:5, 6) Futhi manje, namuhla, phakathi nokuba khona kwakhe njengeNkosi ebusayo esihlalweni sobukhosi sasezulwini ngasesandleni sokunene sikaNkulunkulu, kuyisikhathi esifaneleke kakhulu ngobufakazi obunjalo ukuba bunikezwe kuso sonke isintu.

 4. Lapho uPilatu ethula uJesu esixukwini, kwakwehluke kanjani ukubonakala kwakhe kulokho kwangosuku lokungena kwakhe eJerusalema ngembongolo, futhi kungani uPilatu kumelwe ukuba wayekhangekile?

⁴ Nokho, manje, uma sibuyela kuloloSuku lwePhasika olukhumbulekayo lonyaka ka-33 C.E., lapho umbusi waseJudiya ongumRoma, uPontiyu Pilatu, ethula uJesu owayeshaywa futhi egconwa kulesosixuku esinezinhloso ezimbi phambi komuzi wakhe wobukhosi futhi ethi: “Bhekani! Lendoda!” UJesu ngokuqinisekile wayeyinto yokubukwa! Wayesebonakala ehluke kakhulu kulokho ayekubonise ngaphambili kulelosonto elifanayo. Lokhu kwakungesikhathi engena ngokunqobayo eJerusalema njengenkosi ekhethiwe endleleni yakhe yokuyogcotshwa njengenkosi enhlokodolobha. Lokhu kwakuwukugcwaliseka okuncane kwesiprofetho sikaZakariya 9:9, lapho sifunda khona lamazwi: “Thokoza kakhulu, ndodakazi yaseSiyoni; jabula nokujabula, ndodakazi yaseJerusalema; bheka, iNkosi yakho iza kuwe, ilungile, inensindiso, ithobekile, ikhwele imbongolo, ithole, inkonyane yembongolokazi.” (Mathewu 21:1-9; Johane 12:12-16) Kamuva, ngosuku lwePhasika, yeka ukubonakaliswa kobungcweti bezimfanelo zobudoda uJesu okwakufanele akwenze, ukwamukela konke ukuphathwa kabi nokwethukwa ngokungakhonondi, ngokuzithoba okugcwele entandweni kaNkulunkulu oPhezukonke, uYise wasezulwini! UMbusi uPilatu wayengenza kanjani ngenye indlela kunokuba akhangwe ngokujulile ubudoda obuqinile nobugxilile balomJuda lowo amenlo endawo yonke ayephendukele kuye ngalesosikhathi?

5, 6. (a) Kungani abathanda ukuphila epharadesi benoJesu Kristu njengesibonelo esiphelele senkambo yabo yesenzo? (b) Ngokwencazelo kaPawulu, inkambo ka-Adamu nekaJesu Kristu yasithinta kanjani isintu ngezindlela ezingafani?

⁵ Bonke abathanda ukuphila ekupheleleni kobuntu emhlabeni oyipharadesi ngesikhathi esizayo esiseduze, kulobobuntu obunobudoda, banesibonelo esifanele ukulingiswa, okumelwe amehlo abo bawagxilise kuso. Njengomuntu wokuqala, uAdamu, lapho uMdali wakhe embeka ensimini yase-Edeni, uJesu okhule ngokugcwele wayengumuntu ophelele. Kodwa uJesu akazange onakalise umfanekiso kaNkulunkulu ayebekwe ngawo emhlabeni; akalokothanga one ubuhle bomfuziselo kaNkulunkulu kumuntu ngokwalokho ayekhuliswe ngakho njengendoda. (Genesise 1:26, 27) Ngakho-ke, yeka ukungafani inkambo ka-Adamu yokungalaleli nenkambo yokwethembeka nokuzithoba kaJesu Kristu okuye kwathinta ngayo sonke isintu!

⁶ Esho lokhu kafushane, umphostoli uPawulu wabhalela ibandla lobuKristu emzini wezihlakaniphi eKorinte, eGreece, lamazwi alandelayo: “Ngokuba njengalokhu kuAdamu bonke bayafa, ngokunjalo futhi kuKristu bonke bayakuphiliswa. Kepha yilowo nalowo ngesigaba sakhe: uKristu kuqala, besekuba-ngabangabakaKristu ekufikeni kwakhe.” (1 Korinte 15:22, 23) Ngenxa yalesosizathu uNkulunkulu akayishiyanga iNdodana yakhe ethembekile esimweni sokufa. Ngokwesithembiso sakhe siqu esingenakwephulwa, uNkulunkulu wamvusa kwabafileyo ngosuku lwesithathu, engowokuqala owavuswa kwabafileyo ukuba aphile phakade. Ngovuko uNkulunkulu wabuyisela iNdodana yakhe elalelayo endaweni eyayikuyo naye ngaphambili, emazulwini angabonakali. Lokhu kwenza ukuba kube nokwenzeka ukubuyiselwa kwabafileyo ekuphileni emhlabeni, benethuba lokuqhubekiselwa kancane kancane ekuphileni okuphelele kobuntu emhlabeni oyipharadesi, phakathi nokubusa okungabonakali kukaJesu Kristu phezu kwendawo yakhe yasemhlabeni iminyaka eyinkulungwane.

 7. Kungani uJesu Kristu engaseyena umuntu wenyama ophelele, futhi yini ayokwazi ukuyibuyisela ezizukulwaneni zika-Adamu noEva?

⁷ ‘Ukuba khona kwakhe’ okungabonakali kodwa okuqondakalayo njengeNkosi phezu kwesintu esihlengiwe ngempela kuyozenza kuzwakale. UJesu Kristu useyisidalwa esingokomoya futhi, kodwa manje uvikelekile ekufeni, akanakufa. Umphostoli uPawulu wakhomba kuleliqiniso lapho ethi ebandleni laseKorinte: “Uma kukhona umzimba wemvelo, ukhona nowomoya. Kanjalo futhi kulotshiwe ukuthi umuntu wokuqala uAdamu waba-ngumphefumulo ophilayo; uAdamu wokugcina waba-ngumoya ophilisayo.” (1 Korinte 15:44, 45; Genesise 1:26, 27; 2:7) Akasesona isidalwa esingumuntu senyama negazi, kodwa manje ungumoya onamandla ezulwini, uJesu Kristu okhazinyulisiwe uyokwazi ukubuyisela ukuphila okuphelele kobuntu ezizukulwaneni zika-Adamu noEva, njengoba adela ukuphila kwakhe okuphelele kobuntu njengendoda ngenxa yomkhaya wesintu.

Indoda Okumelwe Senze Njengayo

 8. UJesu Kristu uyisibonelo esifanele ukulingiswa abafuna ini, futhi uPawulu watshela amalungu ebandla eKorinte ukuba abe abalingisi bakhe ngokwesisekelo sani?

⁸ Njengesibonelo esiphelele phakathi nokuhlala kwakhe emhlabeni, uJesu Kristu ukufanele ukulingiswa yibo bonke namuhla abafuna ukuzuza ukuphila okuphakade, kungakhathaliseki noma njengabangane basezulwini kanye naye embusweni noma njengamadodana namadodakazi akhe aphelele angabantu emhlabeni oyipharadesi. Ngakho, ngokufaneleka okuphelele kwezinto, umphostoli uPawulu wabhalela abalandeli bakaKristu eKorinte lasendulo futhi ethi: “Ningakhubekisi nabaJuda, namaGreki, nabandla likaNkulunkulu, njengokuba nami ngithokozisa bonke ngakho konke, ngingafuni okungisiza mina kodwa okusiza abaningi, ukuze basindiswe. Yibani-ngabalingisi bami, njengokuba nami ngilingisa uKristu.”—1 Korinte 10:32–11:1.

 9. Kwaboku-1 Korinte 16:13 isenzo sesiGreki esihunyushwe ngokuthi “nibe-ngamadoda” sithathelwe kuliphi ibizo, futhi imuphi umehluko lelibizo eliwenzayo?

⁹ Lawomazwi asisiza ukuba sisibheke kahle iseluleko esiqhubekayo sikaPawulu esitholakala phakathi kwamazwi akhe okuvala alotshelwe ibandla laseKorinte, eGreece: “Lindani nigxile ekukholweni nibe-ngamadoda, nibe-namandla.” (1 Korinte 16:13) Lapha izwi elilodwa lesiGreki elihunyushwe njengelithi ‘sebenzani njengamadoda’ liyisenzo esithathwe ebizweni elithi an·erʹ elibonisa ubumnini, okungukuthi, an·drosʹ. Lelibizo lesiGreki lisho indoda, owesilisa, njengohlukile kowesifazane. Ngokwesibonelo, uMathewu 14:21 ufundeka kanje: “Kepha abadlayo kwakungathi amadoda ayizinkulungwane eziyisihlanu ngaphandle kwabesifazane nabantwana.” (Bheka futhi uMathewu 15:38; Marku 6:44; Johane 6:10.) Kwenziwa isikhalo ngomphostoli uPetru eJerusalema ngokuthi “ungené kubantu [amadoda] abangasokile, wadla nabo.” (IzEnzo 11:3) Kwaboku-1 Korinte 11:3 siyafunda: “Inhloko yawo onke amadoda inguKristu, nenhloko yowesifazane iyindoda, nenhloko kaKristu inguNkulunkulu.”

10. KuzEnzo 17:31, iliphi ibizo lesiGreki uPawulu alisebenzisa ekubizeni lowo uNkulunkulu ahlose ukuba ahlulele ngaye umhlaba owakhiwe?

¹⁰ Emalungwini eNkantolo yaseAreyophagu eAthene yasendulo, eGreece, umphostoli uPawulu washo amazwi alandelayo ngokuqondene noJesu Kristu: “Njengokuba [uNkulunkulu] umisile usuku azakwahlulela ngalo izwe ngokulunga ngomuntu [ngendoda an·erʹ] ammisele lokho, enika bonke ithemba ngokumvusa kwabafileyo.”—IzEnzo 17:31.

11. KuzEnzo 14:15, umbhalo wesiGreki uwubonisa kanjani umehluko phakathi komuntu wesilisa nomuntu nje?

¹¹ KuzEnzo 14:15 sifunda ngoPawulu noBarnaba njengabakhalayo: “Madoda [ngesiGreki: anʹdres], nikwenzelani lokhu na? Nathi singabantu [ngesiGreki: anʹthro·poi] abanjengani ngemvelo.” Kanjalo singabona indlela umbhalo wesiGreki owenza ngayo umehluko phakathi komuntu wesilisa nomuntu nje.

12. (a) Kungayiphi indlela odade bebandla laseKorinte ababeyoqhubeka ngayo “njengamadoda,” futhi ezinye izinguqulo zesiNgisi zifundeka kanjani lapha? (b) Isenzo sesiGreki esithi an·driʹzo sivela izikhathi ezingaki emiBhalweni yamaKristu yesiGreki, kodwa izikhathi ezingaki kuSeptuagint Version yesiGreki?

¹² Amazwi kaPawulu kwaboku-1 Korinte 16:13, “nibe-ngamadoda” (an·driʹzo), abhalelwa wonke amalungu ebandla, odade nabazalwane. Ngakho-ke ngisho nodade kwakumelwe benze ngendlela yobudoda, okungukuthi, ngesibindi sobuKristu, ngokulingisa uJesu Kristu, iNhloko yebandla lobuKristu. Embhalweni wokuqala wemiBhalo yamaKristu yesiGreki isenzo an·driʹzo sivelakanye kuphela, okungukuthi kwaboku-1 Korinte 16:13, lapho iNew World Translation ihumusha ngokuthi “yenzani njengamadoda.” IKing James Authorized Version ifundeka kanje: “Niziphathe njengamadoda.” IThe Living Bible: “Sebenzani njengamadoda.” INew Testament in Modern English kaPhillips: “Philani njengamadoda.” Nokho, embhalweni wesiGreki weSeptuagint Version isenzo an·driʹzo sivela izikhathi ezingamashumi amabili nanye.

13. Isenzo sesiGreki sihunyushwe kanjani kuDuteronomi 31:6, 7, 23 ngokwenguqulo yeSeptuagint kaCharles Thomson?

¹³ Ngokwesibonelo, kuDuteronomi 31:6, 7, 23 njengoba kwahumusha uCharles Thomson, siyafunda: “Sebenzani ngokobudoda, niqine; . . . khona-ke uMose wabiza uJoshuwa, futhi wathi kuye phambi kwawo wonke uIsrayeli, Yiba nesibindi, futhi uqine; . . . Futhi iNkosi yanikeza uJoshuwa ubuphathi, futhi yathi, Yiba nesibindi, uqine, ngokuba uyohola abantwana bakwaIsrayeli ubayise ezweni iNkosi elithembise bona ngokuhloniphekile, futhi iyakuba nawe.” (Bheka amavesi afanayo kwekaS. Bagster and Sons of London, eNgilandi.)

14. Inguqulo kaCharles Thomson isihumushe kanjani lesisenzo sesiGreki kuNahume 2:1?

¹⁴ Endaweni yokugcina kwezingamashumi amabili nanye lapho kuvela khona lesisenzo sesiGreki kuSeptuagint Version yesiGreki kuNahume 2:1, siyafunda: “Kukhuphukela ochithayo kuwe. Linda indlela; uqinise izinkalo zakho; usebenze ngokobudoda ngawo wonke amandla akho.” (Bheka futhi ekaBagster iSeptuagint.)a

15. Ngakho-ke, ngokuvumelana nosekushiwo, ezinye izinguqulo zesimanje zisihumusha kanjani lesisenzo sesiGreki kwaboku-1 Korinte 16:13 ngendlela leyo ngokusobala engasebenza kwabesifazane nakwabesilisa?

¹⁵ Ngenxa yokuhumusha kweSeptuagint isenzo sesiGreki an·driʹzo, siyaqondakala isizathu sokuba ezinye izinguqulo zesimanje zeBhayibheli eliNgcwele zihumushe lesosenzo sesiGreki esikwaboku-1 Korinte 16:13 ngendlela okwenza ngayo izinguqulo zeSeptuagint yesiGreki (LXX). Ngokwesibonelo, iThe Revised Standard Version: “Yibani nesibindi.” IToday’s English Version: “Yibani nobuqhawe.” INew International Version: “Yibani amadoda anesibindi.” IThe New English Bible: “Yibani nesibindi.” IThe Jerusalem Bible: “Yibani nobuqhawe.” Ngaleyongqondo isenzo sesiGreki sasebenza kwabesifazane abazinikezele nababhapathiziwe abangamaKristu nasemadodeni azinikezele nabhapathiziwe angamaKristu. Kungakho kufaneleka ukusebenzisa kukaPawulu lesosenzo sesiGreki kwaboku-1 Korinte 16:13. Lokhu kuyiqiniso ngisho nakuba abesifazane ngokwenyama “beyisitsha esibuthakathaka.”—1 Petru 3:7.

16. Ngemva kokutshela amaKristu ukuba asebenze njengamadoda, imaphi amazwi uPawulu awenezelayo, futhi lowomyalo ungenziwa kanjani?

¹⁶ Ngemva kokuba umphostoli uPawulu etshele amaKristu azinikezele nabhapathiziwe ukuba “enze njengamadoda” wanezela lamazwi: “Nibe-namandla.” Ngokuvumelana nalokhu, uPawulu wabhala, kwabase-Efesu 6:10: “Elokugcina, qinani eNkosini, nasemandleni ayo amakhulu.” UJehova uNkulunkulu uMninimandla onke angasiqinisa ukuba sibe“namandla,” yebo, ukuba senze isenzo sobuqhawe enkonzweni yakhe engcwele. (Daniyeli 11:32) Uye wambathisa abantu abazinikezele nababhapathiziwe ngokuhlonipheka kwenkonzo enkulukazi umuntu angaba nayo emhlabeni. Lokhu kumelwe kuyishukumise ngamandla insali egcotshwe ngomoya nabangane bayo abanjengezimvu ukuba benze njengoba uPawulu esiyala, “Nibe-ngamadoda.”

17. Kungayiphi indlela insali egcotshiwe yanamuhla inelungelo elikhulu kunalelo likaJohane uMbhapathizi?

¹⁷ Elethu namuhla liyilungelo elikhulu nelihloniphekile kunalelo likaJohane uMbhapathizi wekhulu lokuqala. Waphakanyiswa ngelungelo lokuba umhambeli phambili kaJesu Kristu, owayezoba yiNkosi, ekugcwalisekeni kwesiprofetho sikaMalaki 3:1 ngendlela efanekiselayo noma ngesilinganiso esincane. (Marku 1:1, 2) Lapho ekhuluma ngale‘sithunywa esithunyelwe ukulungisa indlela phambi kukaJehova,’ uJesu wathi: “Ngiqinisile ngithi kini: Kwabazelwe ngabesifazane akuvelanga omkhulu kunoJohane uMbhapathizi; kepha omncane embusweni wezulu mkhulu kunaye.” (Mathewu 11:7-11) Namuhla, kusukela ekupheleni kweMpi Yezwe I ngonyaka ka-1918, insali yezindlalifa ezigcotshiwe zombuso wasezulwini zisebenza njengamanxusa, hhayi kahulumeni wobukhosi wesikhathi esizayo kodwa ombuso wasezulwini owamiswa ekupheleni kweZikhathi zabeZizwe ngo-1914, ngoJesu Kristu okhazinyulisiwe ebekwa esihlalweni sobukhosi. Ngabo kuyiqiniso, kodwa ngokomqondo omuhle kakhulu, njengoba umphostoli uPawulu abhala: “Ngakho singamanxusa kaKristu ngokungathi uNkulunkulu unxusa ngathi; siyanincenga esikhundleni sikaKristu, sithi: Buyisanani noNkulunkulu.”—2 Korinte 5:20.

18. (a) Kusukela ngo-1935, obani abaye basabela kulokho kunxusa kokubuyisana noNkulunkulu njengoba kwamenyezelwa yinsali “engamanxusa kaKristu”? (b) Obani abaye bahlanganyela namadoda ekushumayeleni izindaba zombuso, futhi lokhu kwaboniswa kanjani kumaHubo 68:11?

¹⁸ Kusukela ekupheleni kwempi yezwe yokuqala ngo-1918, futhi ngokuphawulekayo kusukela ngonyaka okhumbulekayo ka-1935, isixuku esikhulu sabantu bazo zonke izizwe sasabela kulokho kunxusa okwelulwa yinsali egcotshiwe yezindlalifa zombuso. Labo abasabelayo baye bathatha izinyathelo ezichazwe ngokomBhalo ukuze babuyisane noNkulunkulu noYise weNkosi yethu uJesu Kristu futhi manje basekuthuleni naye. Ngokwazisa laba basebenza njengabangane bensali “engamanxusa kaKristu,” futhi bangabhekwa njengezithunywa ‘ezimelela uKristu’ ekudluliseni isicelo sokubuyisana noNkulunkulu kwabanye abanjengezimvu. Ngendlela yobudoda, enesibindi, laba futhi, kokubili abesifazane nabesilisa, bayaqhubeka beshumayela ‘lezindaba ezinhle zombuso kuwo wonke umhlaba owakhiwe kube ubufakazi.’ (Mathewu 24:14; IsAmbulo 7:9-17) Kunjengoba kwabikezela amaHubo 68:11: “INkosi iphumisa izwi; abesifazane ababika indaba ejabulisayo bayisixuku esikhulu.”

[Umbhalo waphansi]

Ungayiphendula lemibuzo?

□ Ukwethula kukaPilatu uJesu esixukwini njenge“ndoda” kwakusikiselani ngoJesu?

□ Ukubonakala kukaJesu kulesikhathi kwakwehluke kanjani kokwangaphambili kulelosonto elifanayo?

□ Hlobo luni lwesibonelo uJesu alubekela bonke abalandeli bakhe ngokuziphatha kwakhe ngalolosuku lokugcina lokuphila kwakhe emhlabeni?

□ Wawubhekiselwe kubani umyalo wobuphostoli othi “nibe-ngamadoda”?

□ Abesifazane abangamaKristu bangasebenza kanjani njengamadoda?

[Isithombe ekhasini 20]

“Bhekani Lendoda!”

Yini eyayisikiselwa ukwethula kukaPilatu uJesu?

[Isithombe ekhasini 22]

Abesifazane bangaba kanjani “njengamadoda”