“Sinqume Ngazwi-linye”

1, 2. (a) Yimiphi imibuzo ebalulekile indikimba ebusayo yekhulu lokuqala yebandla lobuKristu ebhekene nayo? (b) Yiluphi usizo laba bazalwane abalutholayo ukuze bafinyelele esinqumweni esifanele?

ISIMO sishubile. Abaphostoli namadoda amadala abahlangene kuleli gumbi eliseJerusalema babhekene, banomuzwa wokuthi sebefike emvuthwandaba. Indaba yokusoka isiphakamise imibuzo ebalulekile. Ingabe amaKristu angaphansi koMthetho KaMose? Ingabe kufanele kube nomehluko phakathi kwamaKristu angamaJuda nangawabeZizwe?

² La madoda aholayo asebuhlole bonke ubufakazi. Anobufakazi beZwi likaNkulunkulu lesiprofetho nobufakazi obuqand’ ikhanda babantu abathile obubonisa isibusiso sikaJehova. Sebekhulume bageqa amagula ngale ndaba. Ubufakazi obuningi ababutholile ngayo bunamandla kakhulu. Ngokusobala, baqondiswa umoya kaJehova. Ingabe la madoda azosilalela lesi siqondiso?

 3. Singazuza kanjani ngokuhlola ukulandisa kwezEnzo isahluko 15?

³ Kuzodingeka babe nokholo nesibindi sangempela ukuze bamukele isiqondiso somoya kule ndaba. Bazifaka engozini yokuzondwa nakakhulu abaholi benkolo abangamaJuda. Babhekene nanokuphikiswa amadoda angaphakathi ebandleni azimisele ukubuyisela abantu bakaNkulunkulu eMthethweni KaMose. Izokwenzenjani indikimba ebusayo? Ake sibone. Njengoba siqhubeka, sizobona indlela la madoda ayibekela ngayo isibonelo iNdikimba Ebusayo yoFakazi BakaJehova namuhla. Yisibonelo okudingeka sisilingise nathi njengoba sibhekene nokwenza izinqumo nezinselele ekuphileni kwethu njengamaKristu.

4, 5. Yikuphi ukukhanyiselwa kweZwi likaNkulunkulu lesiprofetho uJakobe akusebenzisa?

⁴ Umfundi uJakobe, umfowabo kaJesu ngamzali munye, wakhuluma.a Kubonakala sengathi wayengusihlalo walo mhlangano. Amazwi akhe acacisa isinqumo sendikimba iyonke. UJakobe wathi emadodeni ayehlangene: “USimeyoni useyilandise ngokuphelele indlela manje uNkulunkulu asenaka ngayo izizwe ukuze athathe kuzo isizwe segama lakhe. Amazwi abaProfethi ayavumelana nalokhu.”—IzE. 15:14, 15.

⁵ Kungenzeka ukuthi inkulumo kaSimeyoni, noma uSimoni Petru, nobufakazi obanikezwa uPawulu noBarnaba bakhumbuza uJakobe imiBhalo efanelekayo eyalukhanyisa kahle udaba olwalusezithebeni. (Joh. 14:26) Ngemva kokuba ethe “amazwi abaProfethi ayavumelana nalokhu,” uJakobe wacaphuna amazwi ka-Amose 9:11, 12. Le ncwadi yayiyingxenye yemiBhalo YesiHebheru evame ukubizwa ngokuthi “abaProfethi.” (Math. 22:40; IzE. 15:16-18) Uzoqaphela ukuthi amazwi acashunwa uJakobe athé ukwehluka kulawo asencwadini ka-Amose namuhla. Kungenzeka ukuthi uJakobe wayewacaphuna kuyi-Septuagint, inguqulo yesiGreki yemiBhalo YesiHebheru.

 6. ImiBhalo yayikhanyisa kanjani le ndaba?

⁶ Ngomprofethi u-Amose, uJehova wabikezela ukuthi kuzofika isikhathi ayovusa ngaso “idokodo likaDavide,” uhlu lozalo lwasebukhosini olwaluzoholela eMbusweni KaMesiya. (Hez. 21:26, 27) Ingabe uJehova wayeyophinde asebenzelane namaJuda emvelo ngokukhethekile njengesizwe? Cha. Lesi siprofetho sinezela ukuthi ‘abantu bazo zonke izizwe’ babeyohlanganiswa babe “abantu ababizwa ngegama [likaNkulunkulu].” Khumbula, uPetru wayesanda kufakaza ukuthi uNkulunkulu “akenzanga mahluko nhlobo phakathi kwethu [maKristu angamaJuda] nabo [amakholwa angawabeZizwe], kodwa wahlanza izinhliziyo zabo ngokholo.” (IzE. 15:9) Ngamanye amazwi, kuyintando kaNkulunkulu ukuba amaJuda nabeZizwe bangeniswe eMbusweni njengezindlalifa. (Roma 8:17; Efe. 2:17-19) Akukho lapho iziprofetho eziphefumulelwe zisikisela khona ukuthi amakholwa angawabeZizwe kumelwe asokwe enyameni kuqala noma abe ngamaproselithe.

7, 8. (a) UJakobe wasikisela ukuthini? (b) Kufanele siwaqonde kanjani amazwi kaJakobe?

⁷ Eshukunyiswe yilobo bufakazi obungokomBhalo nobufakazi obunamandla ayebuzwile, uJakobe wasikisela lokhu: “Ngakho isinqumo sami siwukuthi singabakhathazi labo abavela ezizweni abaphendukela kuNkulunkulu, kodwa sibabhalele ngenjongo yokuba badede ezintweni ezingcoliswe izithixo, ekuziphatheni kabi ngokocansi, ezintweni eziklinyiwe nasegazini. Ngoba kusukela ezikhathini zasendulo, bekulokhu kunabantu abashumayela ngoMose idolobha nedolobha, befunda ngokuzwakalayo izincwadi zakhe emasinagogeni ngawo wonke amasabatha.”—IzE. 15:19-21.

⁸ Lapho uJakobe ethi “ngakho isinqumo sami siwukuthi,” ingabe wayephoqelela igunya lakhe—mhlawumbe njengosihlalo womhlangano—kwabanye abazalwane futhi ezinqumela yena lokho okwakufanele kwenziwe? Lutho neze! Inkulumo yesiGreki ehunyushwe ngokuthi “isinqumo sami siwukuthi” ingaphinde isho ukuthi “ngibona sengathi” noma “ngicabanga ukuthi.” Kunokuba abe nguzwi-lakhe phezu kwayo yonke indikimba, uJakobe wayesikisela ukuba bacabangele inkambo esekelwe ebufakazini ababuzwile nakulokho okushiwo imiBhalo ngale ndaba.

 9. Ukusikisela kukaJakobe kwaba naziphi izinzuzo?

⁹ Ingabe ukusikisela kukaJakobe kwakukuhle? Kuyacaca, ngoba abaphostoli namadoda amadala bakwamukela kamuva. Kwaba naziphi izinzuzo? Lokho okwakusikiselwe kwakungeke ‘kuwakhathaze’ amaKristu angawabeZizwe ngokuwaphoqa ukuba alandele izimfuneko zoMthetho KaMose. (IzE. 15:19) Ngakolunye uhlangothi, lesi sinqumo sasiyobonisa inhlonipho ngonembeza bamaKristu angamaJuda, okwase kuyiminyaka ezwa ‘kufundwa ngokuzwakalayo izincwadi zakhe emasinagogeni ngawo wonke amasabatha.’b (IzE. 15:21) Inkambo eyayisikiselwe yayizosiqinisa nakanjani isibopho phakathi kwamaKristu angamaJuda nangawabeZizwe. Ngaphezu kwakho konke, yayizojabulisa uJehova uNkulunkulu ngoba yayihambisana nenjongo yakhe. Yeka indlela enhle yokuxazulula inkinga eyayisongela ubunye nenhlalakahle yalo lonke ibandla labantu bakaNkulunkulu! Futhi yeka isibonelo esihle kakhulu esibekelwa ibandla lobuKristu namuhla!

10. INdikimba Ebusayo yanamuhla isilingisa kanjani isibonelo sabafowabo bekhulu lokuqala?

¹⁰ Njengoba kuphawuliwe esahlukweni esandulele, njengozakwabo bekhulu lokuqala, iNdikimba Ebusayo yoFakazi BakaJehova namuhla ibheka kuJehova, uMbusi Wendawo Yonke nakuJesu Kristu, iNhloko yebandla, ukuze ithole isiqondiso kuzo zonke izinto.c (1 Kor. 11:3) Ikwenza kanjani lokhu? U-Albert D. Schroeder, owakhonza njengelungu leNdikimba Ebusayo kusukela ngo-1974 kwaze kwaba yilapho eqeda inkambo yakhe yasemhlabeni ngoMashi 2006, wachaza: “INdikimba Ebusayo ihlangana ngoLwesithathu, ivule umhlangano ngomthandazo icele isiqondiso somoya kaJehova. Kwenziwa umzamo wangempela wokubheka ukuthi zonke izindaba okukhulunywa ngazo nazo zonke izinqumo ezenziwayo zivumelana neZwi likaNkulunkulu iBhayibheli.” Ngokufanayo, uMilton G. Henschel, ilungu leNdikimba Ebusayo elingumakad’ ebona elaqeda inkambo yalo yasemhlabeni ngoMashi 2003, wabuza abafundi ababezothweswa iziqu bekilasi le-101 le-Watchtower Bible School of Gilead umbuzo osemqoka. Wathi: “Ingabe ikhona enye inhlangano emhlabeni eNdikimba yayo Ebusayo ihlola iZwi likaNkulunkulu, iBhayibheli, ngaphambi kokuba yenze izinqumo ezibalulekile?” Impendulo isobala.

11. Isinqumo sendikimba ebusayo sadluliselwa kanjani emabandleni?

¹¹ Indikimba ebusayo eJerusalema yayisivumelene ngazwi-linye endabeni yokusoka. Nokho, ukuze abazalwane emabandleni benze ngobunye, leso sinqumo kwakudingeka sidluliselwe kubo ngendlela ecacile, eyakhayo nezobakhuthaza. Kwakungenziwa kanjani lokhu kangcono? Ukulandisa kuyachaza: “Abaphostoli namadoda amadala kanye nalo lonke ibandla, banquma ukuthumela amadoda akhethiwe phakathi kwabo ukuba aye e-Antiyokiya, kanye noPawulu noBarnaba; bathuma uJuda owayebizwa ngokuthi uBarsaba noSila, ababengamadoda aholayo phakathi kwabazalwane.” Ngaphezu kwalokho, kwabhalwa incwadi yayisiphathiswa la madoda ukuze ifundwe kuwo wonke amabandla e-Antiyokiya, eSiriya naseKhilikhiya.—IzE. 15:22-26.

12, 13. Yibuphi ubuhle obafezwa ngokuthumela (a) uJuda noSila? (b) incwadi evela endikimbeni ebusayo?

¹² UJuda noSila, ‘njengamadoda aholayo phakathi kwabazalwane,’ babekufanelekela ngokugcwele ukumelela indikimba ebusayo. Ukuthunyelwa kwamadoda amane kwakuzokwenza kucace ukuthi umyalezo ayewulethile wawungeyona nje impendulo yombuzo ababewubuzile kodwa wawuyisiqondiso esiqondile sendikimba ebusayo. Ukuba khona kwalawa ‘madoda akhethiwe’ kwakuzokwakha isibopho esiqinile phakathi kwamaKristu angamaJuda eJerusalema namaKristu angaweZizwe ensimini. Yeka ilungiselelo elihlakaniphile nelothando! Akungabazeki ukuthi lakhuthaza ubunye nokuzwana kubantu bakaNkulunkulu.

¹³ Le ncwadi yanikeza isiqondiso esicacile kumaKristu angawabeZizwe, hhayi nje ngokuphathelene nokusoka kuphela kodwa nangalokho okumelwe akwenze ukuze athole umusa nesibusiso sikaJehova. Ingxenye eyinhloko yayo yayithi: “Ngosizo lomoya ongcwele sikubone kukuhle ukunganezeli omunye umthwalo osindayo kini, ngaphandle kwalezi zinto ezidingekile: ukuba niqhubeke nideda ezintweni ezihlatshelwe izithixo, egazini, ezintweni eziklinyiwe nasekuziphatheni kabi ngokocansi. Uma niqhubeka nideda kulezi zinto niyochuma. Mpilonhle!”—IzE. 15:28, 29.

14. Kwenzeka kanjani ukuba abantu bakaJehova basebenze ngobunye kuleli zwe lanamuhla elinezici ezihlukanisayo?

¹⁴ Namuhla, oFakazi BakaJehova abangaphezu kwezigidi ezingu-8 emabandleni angaphezu kuka-100 000 emhlabeni wonke bayavumelana ngezinkolelo futhi basebenza ngobunye. Kwenzeka kanjani lokhu, ikakhulu njengoba zivame kangaka namuhla izinxushunxushu nemibono ehlukanisayo kuleli zwe? Ngokuyinhloko, ubunye bubangelwa isiqondiso esicacile nesingagunci uJesu Kristu, iNhloko yebandla, asinikeza ‘ngenceku ethembekile neqondayo,’ okuyiNdikimba Ebusayo. (Math. 24:45-47) Ubunye bubangelwa nayindlela abazalwane emhlabeni wonke ababambisana ngayo ngokuzithandela nesiqondiso seNdikimba Ebusayo.

15, 16. Waba yini umphumela wenkinga yokusoka futhi yini eyabangela lokho?

¹⁵ Ukulandisa kwezEnzo kusitshela ukuthi lapho abazalwane ababethunyiwe bevela eJerusalema befika e-Antiyokiya, ‘baqoqela ndawonye lonke iqembu, balinikeza le ncwadi.’ Basabela kanjani abazalwane kuleso siqondiso sendikimba ebusayo? ‘Ngemva kokuyifunda [incwadi], bajabula ngaleso sikhuthazo.’ (IzE. 15:30, 31) Ngaphezu kwalokho, uJuda noSila “bakhuthaza abazalwane ngezinkulumo eziningi, babaqinisa.” Ngalowo mqondo, la madoda amabili ‘ayengabaprofethi,’ njengoba nje uPawulu noBarnaba nabanye babebizwa ngokuthi abaprofethi—igama elibhekisela kulabo ababememezela intando kaNkulunkulu noma bayenze yaziwe.—IzE. 13:1; 15:32; Eks. 7:1, 2.

¹⁶ Kuyacaca ukuthi isibusiso sikaJehova sasiphezu kwalo lonke leli lungiselelo futhi saletha isixazululo esijabulisayo. Yini eyabangela ukuba kube nomphumela omuhle? Ngokungangabazeki kwakuyisiqondiso sendikimba ebusayo esicacile nesasifike ngesikhathi, esasisekelwe eZwini likaNkulunkulu nasekuqondiseni komoya ongcwele. Ngaphezu kwalokho, kwakuyindlela yothando neqondile isinqumo esadluliselwa ngayo emabandleni.

17. Ababonisi besigodi osukwini lwethu básibekelwa kanjani isibonelo kwezinye zezici zokuhambela kwabo?

¹⁷ Ilandela leso sibonelo, iNdikimba Ebusayo yoFakazi BakaJehova namuhla inikeza isiqondiso esifike ngesikhathi kubazalwane emhlabeni wonke. Lapho izinqumo sezenziwe, zidluliselwa emabandleni ngendlela ecacile neqondile. Enye indlela iwukuhanjelwa ababonisi besigodi. Laba bazalwane abazidelayo bahambela amabandla ahlukahlukene, banikeze isiqondiso esicacile nesikhuthazo esifudumele. NjengoPawulu noBarnaba, bachitha isikhathi esiningi enkonzweni “befundisa futhi bememezela izindaba ezinhle zezwi likaJehova, kanye nabanye abaningi.” (IzE. 15:35) NjengoJuda noSila, bakhuthaza “abazalwane ngezinkulumo eziningi,” babaqinise.

18. Abantu bakaNkulunkulu bangaqiniseka kanjani ukuthi bayaqhubeka bethola isibusiso sikaJehova?

¹⁸ Kuthiwani ngamabandla? Yini eyosiza amabandla emhlabeni wonke ukuba aqhubeke ejabulela ukuthula nobunye ezweni lanamuhla elinezici ezihlukanisayo? Khumbula ukuthi kwakungumfundi uJakobe kamuva owabhala: “Ukuhlakanipha kwaphezulu okokuqala kumsulwa, kunokuthula, kuyacabangela, kuyashesha ukulalela . . . Ngaphezu kwalokho, isithelo sokulunga sihlwanyelwa ngaphansi kwezimo ezinokuthula ukuze kuzuze labo abenza ukuthula.” (Jak. 3:17, 18) Asazi ukuthi uJakobe wayebhala la mazwi ecabanga ngomhlangano owawuseJerusalema yini noma cha. Kodwa ngemva kokucabangela izenzakalo ezisesahlukweni 15 sencwadi yezEnzo, asingabazi ukuthi isibusiso sikaJehova siba khona kuphela uma kunobunye nokubambisana.

19, 20. (a) Kwabonakala kanjani ukuthi ukuthula nobunye kwakukhona ebandleni lase-Antiyokiya? (b) Yini manje uPawulu noBarnaba abase bekwazi ukuyenza?

¹⁹ Manje kwase kusobala ukuthi sekunokuthula nobunye ebandleni lase-Antiyokiya. Kunokuba baphikisane nabazalwane ababevela eJerusalema, abazalwane base-Antiyokiya bakwazisa ukuhanjelwa uJuda noSila. Umbhalo uthi: “Ngemva kokuchitha isikhathi esithile lapho, abazalwane babahambisa ngokuthula babuyela kulabo ababebathumile,” okungukuthi eJerusalema.d (IzE. 15:33) Singaqiniseka ukuthi abazalwane eJerusalema nabo bajabula lapho bezwa la madoda amabili exoxa ngohambo lwawo. Ngenxa yomusa kaJehova ongafanelwe, umgomo wabo bawufeza ngenjabulo!

²⁰ UPawulu noBarnaba, abasala e-Antiyokiya, manje base bengagxila ekuholeni emsebenzini wokushumayela, njengoba kwenza ababonisi besigodi namuhla lapho behambela amabandla abawanakekelayo. (IzE. 13:2, 3) Yeka isibusiso abayiso kubantu bakaJehova! Nokho, uJehova waqhubeka ebasebenzisa futhi ebabusisa kanjani laba bashumayeli ababili abashisekayo? Sizobona esahlukweni esilandelayo.