Ikilasi Le-130 Lithweswa Iziqu ZaseGileyadi
Usuku Lwenjabulo Nesasasa
LAPHO ikilasi le-130 le-Watchtower Bible School of Gilead lithweswa iziqu kwaba nenjabulo enkulu futhi abafundi babheka phambili ekuphileni kwabo okusha ezabelweni zabo. NgoMgqibelo, ngo-March 12, 2011, kwafika abantu abangaphezu kuka-8 500 bezobungaza abafundi njengoba babezothweswa iziqu. Kwakukhona nemindeni yabafundi nabangane. Ababekhona babenesasasa elikhulu—hhayi nje ngenxa yosuku olumnandi, kodwa futhi babejabulela izithunywa zevangeli eziqeqeshwe kahle ezase zizothunyelwa emazweni amaningi omhlaba ziyofundisa abantu amaqiniso eBhayibheli.
‘Bayajabula Bonke Abahlala Belindele’ UJehova
La mazwi athinta inhliziyo, acashunwe ku-Isaya 30:18, ayeyisihloko senkulumo eyanikezwa uGeoffrey Jackson, ilungu leNdikimba Ebusayo YoFakazi BakaJehova nosihlalo wesimiso. Ekhuluma ngezwi elifudumele abuye afake namancoko, wahalalisela abafundi ngokuthi bakwazile ukuphothula imfundo enzima yaseGileyadi futhi wabatshela ukuthi kumelwe banconywe ngomsebenzi abawenzile. Yiziphi izinto ezingokoqobo abafundi abazobhekana nazo esikhathini esizayo? Wakhulumela amaphuzu amathathu akhuthazayo aku-Isaya 30:18-21.
Okokuqala, uMfoweth’ uJackson wathi, “Ningalindela ukuba uJehova ezwe imithandazo yenu.” Wakhuluma ngesiqinisekiso esisevesini 19 esithi: “Nakanjani [uNkulunkulu] uyokubonisa umusa lapho nje kuzwakala ukukhala kwakho.” UMfoweth’ uJackson wabonisa ukuthi ngolimi lwesiHebheru sokuqala, uNkulunkulu wayekhuluma ngokulalela imithandazo yabantu ngabanye, hhayi iqembu. “Njengobaba, uJehova akawubuzi lo mbuzo, ‘Kungani ungaqinile njengalowaya muntu?’ Kunalokho, ulalelisisa ngamunye wethu futhi uyasiphendula.”
Okwesibili, isikhulumi savuma ukuthi singazilindela izinkinga. “UJehova akathembisi ukuthi ukuphila kuyoba lula, kodwa uyosisiza.” Njengoba ivesi 20 libonisa, uNkulunkulu wabikezela ukuthi lapho ama-Israyeli evinjezelwa ezinye izizwe, usizi nokucindezeleka kwakuyoba yinto yansuku zonke kuhle kwesinkwa namanzi. Nokho, uJehova wayeyohlala ekulungele ukuwophula. Abafundi baseGileyadi nabo bazobhekana nezinkinga nezinselele, okungenzeka akuzona lezo abazilindele! UMfoweth’ uJackson wanezela, “Kodwa ningalindela ukuthi uJehova uyonisiza nikwazi ukubhekana nazo zonke izinselele.”
Okwesithathu, uMfoweth’ uJackson wakhumbuza abafundi ukuthi njengoba amavesi 20 no-21 ebonisa, “bangalindela isiqondiso—ngakho kufanele basifune!” Wabe esethi umKristu ngamunye namuhla kufanele alalelisise lapho uJehova ekhuluma ngeBhayibheli nangezincwadi ezisekelwe eBhayibhelini. Isikhulumi sakhuthaza abafundi ngokufudumele ukuba baqhubeke befunda iBhayibheli nsuku zonke, benze elikushoyo ngoba lokho kuyobasiza.
“Ingebhe NgoJehova Mayibe Phezu Kwakho”
U-Anthony Morris weNdikimba Ebusayo wanikeza incazelo engokomBhalo yamazwi athi “ingebhe ngoJehova.” (2 IziKronike 19:7) La mazwi awabhekiseli ekwesabeni okukhwantabalisayo, kodwa asho isifiso esinamandla sokwenza okulungile, inhlonipho ejulile neqotho engase yenze umuntu athuthumele. UMfoweth’ uMorris wanxusa abafundi: “Hambani nalolo hlobo lokwesaba ezabelweni zenu njengezithunywa zevangeli.” Abafundi bangayibonisa kanjani inhlonipho enjalo ngoJehova? Isikhulumi sagxila ezindleleni ezimbili ezisebenzayo.
Okokuqala, uMfoweth’ uMorris wanxusa abafundi ukuba basebenzise iseluleko esikuJakobe 1:19: ‘Shesha ukuzwa, wephuze ukukhuluma.’ Wabatshela ukuthi bafundé okuningi esikoleni ezinyangeni ezinhlanu, kodwa kufanele baqaphele bangafiki ezabelweni zabo baqhoshe ngalokho abakufundile. Wathi: “Kudingeka nilalele kuqala. Lalelani abasebandleni lenu elisha nalabo abaholayo emazweni enizokwabelwa kuwo; kulaleleni abanitshela khona ngezwe nangamasiko. Ningesabi ukuthi, ‘Angazi.’ Nakhu eniyobona ngakho ukuthi imfundo inisizile: Lapho niqhubeka nifunda, yilapho niyoqaphela khona ukuthi kuncane kangakanani ngempela enikwaziyo.”
Okwesibili, uMfoweth’ uMorris wafunda izAga 27:21 ezithi: “Imbiza yokucwenga ingeyesiliva, nesithando somlilo singesegolide; nomuntu ngamunye uvivinywa ngokokudunyiswa kwakhe.” Wathi njengoba igolide nesiliva kudinga ukucwengwa, noma ukuhlanzwa, nathi singase sicwengwe ngokudunyiswa, noma ngokunconywa. Kanjani? Ukudunyiswa kungase kube uvivinyo. Kungase kuholele ekuqhosheni nasekuweni ngokomoya, noma kungase kusishukumisele ukuba siqaphele ukuthi sikweleta uJehova bese sizimisela nakakhulu ukufinyelela izindinganiso zakhe. Yingakho-ke uMfoweth’ uMorris akhuthaza abafundi ukuba babe nesimo sengqondo esifanele lapho bedunyiswa, noma benconywa—kufanele bakubheke njengethuba lokubonisa ukuthi ‘banengebhe efanele ngoJehova.’
“Kwaziseni Ukuthunywa Kwenu”
UGuy Pierce weNdikimba Ebusayo wanikeza inkulumo eyisihluthulelo esimisweni. Wabeka inkulumo enesihloko esingenhla futhi wachaza ukuthi igama elithi “isithunywa sevangeli” lisho “umuntu othunyiwe.” Wathi akumangazi ukuthi ziningi izinhlobo zezithunywa ezithunywa ngezinjongo ezinhlobonhlobo. Eziningi zigxila ekuphulukiseni nasekufuneni izisombululo zezombusazwe ezinkingeni zezwe. Wathi: “Nina nihlukile.” Kanjani?
Ekutadisheni kwabo iBhayibheli, abafundi bafunda okuningi ngokuphulukisa. Ngesikhathi uJesu evusa intombazanyana ethile, abazali bayo “bagajwa yinjabulo enkulu.” (Marku 5:42) Nalapho kuphulukiswa izimpumputhe ngokuyisimangaliso, zajabula kakhulu. Esinye isizathu salezo zimangaliso sasiwukubonisa thina namuhla lokho uKristu ayokufeza ezweni elisha elizayo. “Isixuku esikhulu” sabalungile esiyosinda lapho kuphela lesi simiso sezinto esibi siyophulukiswa zonke izifo. (IsAmbulo 7:9, 14) Abantu ababathandayo abayovuswa nabo bayoba yimiqemane. Cabanga ngaleyo njabulo!
Nokho, uMfoweth’ uPierce waphawula ukuthi ukuphulukiswa ezifweni ngeke kube ukuphulukisa okubaluleke kunakho konke. Abantu abagulayo abaphulukiswa uJesu babuye bagula. Ngisho nezimpumputhe azivula amehlo zagcina zifile, okungukuthi zabuye zaba yizimpumputhe ethuneni. Abantu abafile ayebavusile baphinde bafa. Ukuphulukisa okungokomoya yikhona okubaluleke kunakho konke uJesu akwenza. Izithunywa zevangeli eziqeqeshwe eGileyadi nazo zinomsebenzi wokuphulukisa ngokomoya. Zisiza abantu ukuba babuyisane noBaba wethu wasezulwini ukuze baphile ngokomoya. Ngabantu abaphulukiswe ngokomoya kuphela abayothola ukuphila okuphakade. UMfoweth’ uPierce wathi: “Yilokho kuphulukisa okungokomoya okudumisa uNkulunkulu. Yikhona futhi okuyokwenza kuthiwe niyaphumelela enkonzweni yenu.”
Ezinye Izinkulumo Ezintathu Ezivelele Zosuku
“Ingabe Lolu Suku Luzoba Luhle?” URobert Rains oyilungu leKomiti Yegatsha yase-United States waphendula lo mbuzo ofike ngesikhathi. Wakhuthaza abafundi ukuba baqikelele ukuthi benza usuku ngalunye esabelweni sabo njengezithunywa zevangeli lube usuku oluhle ngokusisebenzisa ngokuhlakanipha isikhathi sabo, ngokubheka eZwini likaNkulunkulu lapho bebhekene nezinkinga nangokuncika kuJehova ngomthandazo.
“Ingabe Uyokwenza Umyalo Omdala Ube Musha?” Umfundisi waseGileyadi, uMark Noumair, wabuza lo mbuzo enkulumweni yakhe. Wakhuluma ngeyoku-1 Johane 2:7, 8, lapho umphostoli uJohane ekhuluma khona ‘ngomyalo omdala’ owabuye waba “umyalo omusha.” Yomibili yayibhekisela emyalweni ofanayo—wokuba abalandeli bakaKristu bathandane ngokungenabugovu, ngomoya wokuzidela. (Johane 13:34, 35) Lo myalo wawumdala ngomqondo wokuthi uKristu wayewunike abafundi emashumini eminyaka eminingi ngaphambili. Nokho, wawumusha nangomqondo wokuthi amaKristu ayebhekene nezinselele ezintsha futhi ayedinga ukubonisana uthando ngezindlela ezintsha nangokugcwele. Izithunywa zevangeli nazo zibhekene nohlobo olusha lwezimo futhi kudingeka zifunde ukubonisa uthando ngezindlela ezintsha. Siyini isihluthulelo sokwenza lokho?
UMfoweth’ uNoumair wazinxusa: “Ningalokothi nibe yilokho enikuzondayo.” Waxwayisa ngokuthi uma sibona ukuziphatha esikuzondayo, kodwa siziphathe ngendlela efanayo, siba yilokho esikuzondayo, okusho ukuzigwaza ngowethu. Ngakolunye uhlangothi, uma sisabela ezinseleleni ngokuthola izindlela ezintsha zokubonisa uthando, sibonakalisa “ukukhanya kweqiniso,” sixoshe ubumnyama obungokomoya.
“Thwala Umthwalo.” Omunye umfundisi waseGileyadi, uMichael Burnett, wabeka inkulumo ewusizo enalesi sihloko. Walandisa ngabantu base-Afrika abathwala imithwalo esindayo ngekhanda. Basebenzisa inkatha ebasiza ukuba umthwalo ungabalimazi amakhanda futhi uhlale kahle, okwenza bakwazi ukuzihambela ngaphandle kwenkinga. Izithunywa zevangeli eziqeqeshwe eGileyadi zizothwala imithwalo esindayo ezabelweni zazo zakwamanye amazwe, kodwa zinikezwe inkatha: ulwazi olunzulu olusekelwe eBhayibhelini. Lapho zisebenzisa ezikufundile, ziyokwazi ukuyithwala kahle nangempumelelo imithwalo yazo.
Okuhlangenwe Nakho Nezingxoxo
Ukuqeqeshwa kwabafundi esikoleni saseGileyadi kuhlanganisa nokusebenza namabandla endawo oFakazi BakaJehova enkonzweni. UWilliam Samuelson, ongamele uMnyango Wezikole Ezingokwasezulwini, wabukeza okunye kokuhlangenwe nakho kwabafundi enkulumweni yakhe eyayinesihloko esithi, “Ungasivumeli Isandla Sakho Siphumule.” (UmShumayeli 11:6) Abafundi benza imiboniso ejabulisayo engokoqobo yalokho okwenzeka, bebonisa ukuthi babekhuthele kanjani enkonzweni njengoba babeshumayela izindaba ezinhle ezindizeni, ezindaweni zokudla nasemagalaji kaphethiloli. Babefakaza endlini ngendlu, ngokwethukela nangokubhala izincwadi. Ngokuqinisekile, abazange bazivumele izandla zabo ziphumule futhi imiphumela yaba mihle kakhulu.
Ilungu lezisebenzi zasesikoleni saseGileyadi, uKenneth Stovall, waxoxa namadoda amathathu angomakadebona emsebenzini wezithunywa zevangeli—uBarry Hill owakhonza e-Ecuador naseDominican Republic, u-Eddie Mobley owakhonza eCôte d’Ivoire noTab Honsberger owakhonza eSenegal, eBenin naseHaiti. Bebonke benza inkulumo enesihloko esithi “Vivinya UJehova Uvune Izibusiso” yaba mnandi kakhulu. (Malaki 3:10) Ngokwesibonelo, uMfoweth’ uHill walandisa indlela yena nomkakhe ababhekana ngayo nenselele yokujwayela isimo sezulu sase-Ecuador esishintshashintsha njalo—lapho nje usathi kuyashisa futhi kunezintuli kuyajika kushise liyidlive. Uthi kwaphela iminyaka emibili nengxenye bekha amanzi okugeza ngamabhakede. Kodwa abazange bakucabange ukuhamba; babekholelwa ukuthi isabelo sabo siyisibusiso esivela kuJehova. Wathi: “Sasiwukuphila kwethu.”
Lapho isimiso siphela, omunye umfundi wafunda incwadi ethinta inhliziyo eyayibhalwe ikilasi elalisanda kuthola iziqu libonga ngokusuka enhliziyweni imfundo eliyithole esikoleni. Ingxenye ethile yencwadi yayithi: “Ukholo lwethu luye lwaqina kakhulu, kodwa futhi siyazi ukuthi umsebenzi awukapheli.” Bonke abafundi bathola iziqu zabo, futhi babelwa emazweni ahlukahlukene. UMfoweth’ uJackson waphetha isimiso ngokuqinisekisa abafundi ukuthi bangalulindela usizo lukaJehova ekuphileni kwabo okusha, ikakhulukazi lapho bebhekana nezinselele. Bonke ababekhona bahamba bejabule futhi belindele okuhle kodwa. Akungabazeki ukuthi uJehova uzozisebenzisa lezi zithunywa zevangeli ukufeza izinto ezinkulu.
[Ishadi/Ibalazwe ekhasini 31]
IMINININGWANE YEKILASI
9 amazwe amelelwe
34,0 isilinganiso seminyaka yobudala
18,6 isilinganiso seminyaka bebhapathiziwe
13,1 isilinganiso seminyaka besenkonzweni yesikhathi esigcwele
[Ibalazwe]
(Ukuze ubone ukuthi indaba ihlelwe kanjani, bheka encwadini)
Ikilasi labelwa emazweni aboniswe ngezansi
AMAZWE IZITHUNYWA ZEVANGELI EZABELWA KUWO
ARGENTINA
ARMENIA
BURKINA FASO
BURUNDI
CONGO (KINSHASA)
CZECH REPUBLIC
HAITI
HONG KONG
INDONESIA
KENYA
LITHUANIA
MALAYSIA
MOZAMBIQUE
NEPAL
PAPUA NEW GUINEA
ROMANIA
SENEGAL
TANZANIA
UGANDA
ZIMBABWE
[Isithombe ekhasini 31]
Ikilasi Le-130 Lithweswa Iziqu E-Watchtower Bible School of Gilead
Imigqa ibalwa kusukela phambili kuya emuva, futhi amagama ahlelwe ukusuka kwesobunxele kuya kwesokudla emgqeni ngamunye.
(1) Molina, Z.; Bassolino, S.; Alatsis, C.; Arroyo, A.; Niño, L.; Merkling, S.; Clark, M.
(2) Little, C.; Tibaudo, S.; Jakobsson, S.; Moreno, J.; Rodriguez, A.; Lee, K.; Cárdenas, H.; Aguilar, L.
(3) Clairbush, A.; Polley, A.; Caldwell, S.; Adame, J.; Hildebrandt, S.; Shoemaker, I.; Grohman, N.; Galvez, G.
(4) Clark, J.; Bassolino, A.; Packham, K.; Adame, J.; Knaus, M.; Niño, M.; Moreno, R.; Galvez, J.
(5) Rodriguez, D.; Geynes, M.; Molina, J.; Aguilar, A.; Alatsis, I.; Manno, A.; Grohman, R.; Packham, J.
(6) Geynes, S.; Cárdenas, M.; Arroyo, C.; Manno, C.; Merkling, J.; Lee, H.; Clairbush, X.; Jakobsson, P.
(7) Little, J.; Hildebrandt, B.; Shoemaker, M.; Knaus, K.; Caldwell, J.; Tibaudo, F.; Polley, C.