“Phumani kulo, bantu bami,” kwaxwayisa iBhayibheli kudala. Baphume kuphi? “[E]Babiloni Elikhulu, unina wezifebe nowamanyala omhlaba.” (IsAm. 17:5; 18:4) Kungani kumelwe baphume eBabiloni? “Ngokuba izono zalo zifinyelele ezulwini, noNkulunkulu wakhumbula ukungalungi kwalo.” (IsAm. 18:5) Ungubani lonina wezifebe abantu okufanele bazihlukanise naye?

UC. T. Russell nabangane bakhe baqaphela futhi ukuthi lesifebe esinyanyekayo sasingelona iSonto lobuKatolika kuphela. Ngakho, nakuba INqabayokulinda (yesiNgisi) ka-November 1879 yathi iBabiloni Elikhulu ‘LIYISIMISO sobuPapa,’ lesihloko sanezela: “Kumelwe sikuveze ukuthi libhekisela (hhayi kumalungu ngamanye, kodwa ezimisweni zesonto) nakwamanye amasonto azimbandakanye nemiBuso yomhlaba. Wonke amasonto athi ayintombi emsulwa eyendiselwe kuKristu, kodwa empeleni ebe ezimbandakanye nezwe (isilo) futhi esekelwa yilo kumelwe siwalahle njengalawo ngolimi olungokombhalo ayisonto eliyisifebe.”