“Ukuzalwa Ngokusha” Kudumile

“UKUZALWA NGOKUSHA KUDLANGILE.” Leso kwakuyisihloko senhlamvu yephephandaba eyayivela eLos Angeles esasikuyiPost yaseNew York kaMay 19, 1980. Lenhlamvu yaqhubeka yathi: “Abangaphezu kwengxenye yawo wonke amaMelika amadala baye bathola okuhlangenwe nakho okungokwenkolo yobuKristu yo‘kuzalwa ngokusha’ okuhlala njalo, kubika inhlangano kaGallup ehlola imibono yabantu. Isibalo . . . sibonisa ukuthi amaMelika amadala ayizigidi ezingama-84 aye enza ukuzinikela komuntu siqu kuJesu Kristu asakucabangela njengokufanelekile.” Esikhathini esithile ngaphambili lokhu kuhlola kwabika ukuthi cishe ingxenye yamaMelika angamaProtestani asanda kweva eshumini “ayethole ukuzalwa ngokusha.” Eyamasonto onke iParade kaJuly 6, 1980, yathi zonke izikhulu ezintathu eziphethe zaseUnited States ngalesosikhathi, uCarter, Reagan noAnderson, zithi zingamaKristu ‘azelwe ngokusha.’

Ngezinye izikhathi amaKristu ‘azelwe ngokusha’ abala impumelelo yawo emabhizinisini njengebangelwa ukuzalwa ngokusha. Esinye isikhulu esiphumelela kakhulu eNew York kubikwa ukuthi sathi: “Uzinikela ngokwakho eNkosini futhi iNkosi ikusize. Ngesinye isikhathi, lapho kwakumelwe ngithenge iBonwit Teller, ngangintula amadola ayizigidi ezimbili nengxenye futhi ngangingazi ukuthi ngingawathola kanjani. Kwakuyisimangaliso ngempela. Futhi into efanayo yenzeka lapho ngithenga iTiffany ngintula isigidi samadola.” Esihlokweni esithi “Abadlali Be-baseball Abazelwe Ngokusha Bayanda,” umbiko ovela eSan Francisco walandisa ngabadlali abaningi ngokwandayo be-baseball abathi bazelwe ngokusha futhi wacaphuna abadlali be-baseball abaningi abathi impumelelo bayithola ngenxa yokuzalwa ngokusha. Omunye walaba wathi: “Akuxoxwa nami kakhulu, ngakho-ke ngingakujabulela ukusebenzisa lelithuba ukuze nginikeze uJesu Kristu udumo. Ungowokuqala ekuphileni kwami.” Omunye waphawula ukuthi “kulula kakhulu ukudlala umdlalo we-baseball, nowokuphila, lapho uNkulunkulu ewumngane wakho.”

Khona-ke futhi, umbiko wokuphumelela ngokwezimali wesonto okuthiwa “The Electric Church” wathi: “Ukusakaza Inkolo Kuba Ibhizinisi Enkulu, AmaKristu Azelwe Ngokusha Akhokha Izindleko Eziningi Zemibukiso: Ukuphumelela KukaJerry Falwell. Inhloso: ‘Izinhliziyo Nezincwadi Ezingena Ephaketheni.’”—The Wall Street Journal.

Nokho, akubona bonke abantu benkolo kweLobukholwa abajatshuliswa yilokhu kuthambekela. Ngakho iTimes yaseNew York yaphawula ukuthi ‘abaseHabe babehlukene endimeni yobuvangeli nokuthi ithonya leqembu “Elizelwe Ngokusha” lalixoxa ngehlelo labo.’ Abanye bakhuluma kabi ngalokhu kuthambekela njengokumane kuwukuthatheka ngokomzwelo, futhi omunye uprofesa wekholiji labapristi wakhonona ngokuthi: “abafundi abaningi bamane nje abafundiseki” ngenxa yesimo soku“zalwa ngokusha.” Kwelinye ikholiji labapristi cishe ingxenye yabafundi yayithi izelwe ngokusha.

Ngokuvamile umbono uwukuthi ‘ukuzalwa ngokusha’ kuyefana nokuba umuntu “azinikele” ukukhonza uNkulunkulu noKristu, okuyindlela abavangeli abaqhamile abayibeka ngayo indaba. Lokhu kuphakamisa imibuzo ethile: UJesu wathi indlela eholela ekuphileni incane futhi inzima wathi futhi bambalwa abayoyifumana. (Mathewu 7:13, 14) Futhi ngokuphindaphindiwe waphawula ukuthi abalandeli bakhe babengeyona ingxenye yezwe. (Johane 15:19; 17:16) Lamazwi akhe angavumelana kanjani nokuzisholo kokuthi abantu abadala abangaphezu kwengxenye yomphakathi wase-U.S. baye ‘bazalwa ngokusha’? Akukhona lokho kuphela. Uma ingxenye yomphakathi wabantu abadala bezwe ingamaKristu ‘azelwe ngokusha,’ kungani kukhona ukungabi namthetho okungaka, ubugebengu obungaka, ukungakhokhwa kwentela okungaka, nokonakala kwezombangazwe okungaka nokuziphatha okubi ngokobulili okungaka, ukuthanda izinto ezibonakalayo okungaka, nesimo esidlangile sokuthi “yimina kuqala”? Ingabe iBhayibheli liyakuthembisa yini ukuphumelela ebhizinisini kulabo ‘abazelwe ngokusha’? Ingabe uNkulunkulu noKristu baba abangane babadlali be-baseball, babasize ukuba baphumelele emidlalweni yabo?

UJesu wathi kumbusi ongumJuda, umFarisi uNikodemu: “Ngiqinisile, ngiqinisile ngithi kuwe: Uma umuntu engazalwa ngamanzi nangoMoya, angengene embusweni kaNkulunkulu. Ungamangali ngokuba ngithé kuwe: Nimelwe ukuzalwa ngokusha.” (Johane 3:5, 7) Wayesho ukuthini uJesu ngalamazwi? Iyini injongo kaJehova uNkulunkulu yokuba abathile bazalwe ngokusha? Kungaziphi izinyathelo umuntu azalwa ngokusha ngazo, futhi ziyini izibopho zalabo abazelwe ngokusha? Ngaphambi kokuba lemibuzo iphendulwe ngokwanelisayo, kudingeka kutholwe amaqiniso athile ayisisekelo maqondana nezimiso zikaJehova nezinjongo zakhe eziphathelene nomhlaba nomuntu.

[Isithombe ekhasini 18]

UJesu wathi kuNikodemu: “Nimelwe ukuzalwa ngokusha”

[Isithombe ekhasini 19]

‘Bayingcosana abafumana indlela eya ekuphileni’

Injongo KaNkulunkulu Yokuba Abathile ‘Bazalwe Ngokusha’

“Ngiqinisile, ngiqinisile ngithi kini: Uma umuntu engazalwa ngamanzi nangoMoya, angengene embusweni kaNkulunkulu. Ungamangali ngokuba ngithé kuwe: Nimelwe ukuzalwa ngokusha.”—Johane 3:5, 7.

 1, 2. (a) Yini okumelwe siyiqonde futhi siyiqaphele ngaphambi kokuba injongo kaNkulunkulu yokuba abathile ‘bazalwe ngokusha’ ichazwe ngokwanelisayo? (b) Ibuphi ubufakazi iZwi likaNkulunkulu elibunikezayo maqondana nokulunga kwakhe, nokho ukulunga kwakhe akumfuni ukuba enzeni?

NGAPHAMBI kokuba sichaze ngokwanelisayo injongo kaNkulunkulu yokuba abathile ‘bazalwe ngokusha,’ kudingeka siqonde futhi siqaphele okuthile ngezimfanelo eziyinhloko zikaJehova uNkulunkulu nezinjongo zakhe maqondana nomhlaba nomuntu.

² Ubufakazi beZwi likaNkulunkulu busishiya singenakuthandabuza ngokuthi enye yezimfanelo ezivelele zikaNkulunkulu iwukulunga. Futhi, ukulunga kuyisisekelo sesihlalo sakhe sobukhosi. (Duteronomi 32:4; IHubo 89:14) Nokho, ukuba kwakhe olungileyo, akumbopheleli ekubeni anikeze zonke izidalwa zakhe ezihlakaniphile umusa ngokulinganayo. Ngokwesibonelo, wadala abanye baba izidalwa zomoya, izingelosi, eziphakeme kakhulu kunabantu. Futhi akazivuzi zonke izidalwa zakhe ezithembekile zasemhlabeni ngendlela efanayo. Ngakho-ke uJesu wathi maqondana noJohane uMbhapathizi “omncane embusweni wezulu mkhulu kunaye.” (Mathewu 11:11) Lawa amaphuzu esenza kahle ukuwakhumbula lapho sicabangela lendaba ‘yokuzalwa ngokusha.’

Injongo KaNkulunkulu Ngomhlaba Nomuntu

 3. Yiliphi ithemba elijabulisayo elalibekwe phambi kuka-Adamu noEva ngemva kokudalwa kwabo?

³ Ukuze siqonde injongo kaNkulunkulu yokuba abantu abathile ‘bazalwe ngokusha,’ kudingeka siqonde izimo ezibangela uNkulunkulu anqume ukuba abanye ‘bazalwe ngokusha.’ Lapho siphindela emuva kubazali bethu bokuqala, sithola ukuthi uNkulunkulu wabanikeza lomyalo: “Zalani, nande, nigcwalise umhlaba, niwunqobe, nibuse . . . nezilwanyana ezinwabuzelayo emhlabeni.” (Genesise 1:28) UAdamu noEva babengabantwana abaphelele bakaNkulunkulu. Njengoba uNkulunkulu ababeka ensimini ethandekayo eyipaki, egcwele izinhlobonhlobo zezilwane ezinhle nezimbali nezithelo ezimnandi, ngempela isabelo sabo sasingesijabulisayo. Njengoba beqhubeka benqoba umhlaba futhi bewugcwalisa ngabantu abanjengabo, ekugcineni umhlaba wonke wawuyoba ipharadesi eligcwele abantu abaphelele, ngisho njengoba uAdamu noEva babephelele. Yeka ithemba elimangalisayo elalibekwe phambi kwabo!

 4, 5. (a) Kungani abazali bethu bokuqala bahluleka ukufeza injongo kaNkulunkulu yokubadala? (b) Ngakho-ke uJehova ulungiselele ukuba injongo yakhe maqondana nomhlaba nomuntu ifezwe ubani?

⁴ Nokho, abazali bethu bokuqala babentula ukwazisa wonke amalungiselelo kaNkulunkulu ngabo futhi baphula umthetho wakhe. Ngakho-ke uNkulunkulu wabakhipha emkhayeni wamadodana akhe futhi wabagwebela ukufa. Ngenxa yalokho, yonke inzalo yabo iye yazalwa iyizoni eziphansi kokufa. (Genesise 3:19; Roma 5:12) Abazali bethu bokuqala noma inzalo yabo ayikwazanga ukufeza umyalo kaNkulunkulu wokuqala emkhayeni wesintu. Ingabe lokhu kusho ukuthi izinjongo zikaNkulunkulu maqondana nomhlaba nomuntu azinakuphumelela? Lutho neze, ngoba iZwi likaNkulunkulu liyasiqinisekisa ngokuthi izinjongo zakhe azehluleki nanini.—Isaya 46:10, 11; 55:10, 11.

⁵ Khona-ke, injongo kaNkulunkulu yasekuqaleni maqondana nomhlaba nomuntu iyofezwa kanjani? NgeNzalo, njengoba uNkulunkulu abikezela ensimini yase-Edeni nanjengoba athembisa noAbrahama. LeyoNzalo umphostoli uPawulu ubonisa ukuthi ngokuyinhloko inguJesu Kristu.—Genesise 3:15; 22:17, 18; Galathiya 3:16, 29.

Indlela Injongo KaNkulunkulu Yasekuqaleni Eyogcwaliseka Ngayo

 6. UNkulunkulu walungiselela ukuba inzalo ka-Adamu ibuyiselwe emkhayeni kaNkulunkulu ngayiphi indlela?

⁶ UJesu Kristu wayengayibangela kanjani injongo kaNkulunkulu yasekuqaleni ukuba igcwaliseke? Okokuqala, ngokususa ukulahlwa okusemkhayeni wesintu okwabangelwa ukuhlubuka kuka-Adamu. UJesu wayekwazi ukwenza lokhu ngoba wazalwa njengomuntu ophelele; uJehova uNkulunkulu—hhayi umyeni kaMariya uJosefa—enguYise. Eqinisweni uJesu wakufeza lokhu kususwa kokulahlwa ngokufa esigxotsheni sokuhlushwa njengomhlatshelo. Eqinisweni, esinye sezizathu zakhe eziyinhloko zokuza emhlabeni kwakuwukunikezela ngokuphila kwakhe njengesihlengo. Ngakho-ke wavula indlela ngenzalo ka-Adamu ukuba ibuyiselwe emkhayeni owamukelwa uJehova.—Mathewu 20:28.

 7. Kungenxa yasiphi isisekelo ukuthi uJesu wavuswa kwabafileyo ewumoya?

⁷ Nokho, uMhlengi ofile wayengenakubazuzisa abantu. Ngakho-ke, uJehova uNkulunkulu wavusa uJesu Kristu ngosuku lwesithathu, ‘wamenza waphila emoyeni.’ (1 Petru 3:18) UJehova wenza lokhu ngokwesisekelo sokwakwenzeke eJordan lapho uJesu ebhapathizwa. Lapho, ngomoya wakhe ongcwele, uNkulunkulu wayezale uJesu njengeNdodana yakhe ezelwe ngomoya. UJohane uMbhapathizi akabonanga nje umoya kaNkulunkulu wehlela phezu kukaJesu ngesimo sejuba kodwa futhi wezwa izwi likaNkulunkulu lithi: “Lo uyiNdodana yami ethandekayo engithokozile ngayo.”—Mathewu 3:16, 17; Heberu 10:5-10.

 8. Ukwenezela ‘ekuzalweni ngokusha’ eJordani, uJesu futhi wagcotshelwa ini?

⁸ Ngakho-ke uJesu akabanga nje iNdodana kaNkulunkulu engokomoya, kodwa futhi uMesiya, uKristu noma oGcotshiweyo ukuba abe yinkosi yombuso kaNkulunkulu. Futhi, ngesikhathi esifanayo wagcotshwa ukuba abe umpristi omkhulu ngenxa yesintu esifayo, ukuze asuse ukugogeka kwesono. (Heberu 7:26) Futhi, amazwi kaIsaya 61:1, 2 manje asebenza kuye: “Umoya weNkosi uJehova uphezu kwami, ngokuba uJehova ungigcobile ukuba ngishumayele izindaba ezinhle kwabathotshisiweyo, ungithumele ukubopha abanhliziyo ezaphukileyo, nokumemezela ukukhululwa kwabathunjwa nokuvulelwa kweziboshwa itilongo.” UJesu wayezalwe ngomoya, ‘ezalwe ngokusha.’ NjengeNdodana kaNkulunkulu egcotshwe ngomoya waqhubeka ethembekile kwaze kwaba sekufeni, naphezu kwakho konke lokho uSathane uDeveli azama ukukwenza ukuze abangele uJesu aphule ubuqotho bakhe. Ngakho-ke uNkulunkulu wamvusa kwabafileyo.

 9. Ngenxa yokwethembeka kukaJesu kuze kube sekufeni uNkulunkulu wamhlomisa kanjani ngokuphelele futhi ngenxa yayiphi injongo?

⁹ “Ngalokho-ke uNkulunkulu wamphakamisa kakhulu, wamnika igama eliphezu kwamagama onke.” (Filipi 2:9-11) Iqiniso lokuthi uJesu wavuka kwabafileyo lafakazelwa ofakazi abangamakhulu. Ngokushesha nje ngemva kokubuyela kuYise ezulwini, watshela abafundi bakhe: “Ngiphiwe amandla onke ezulwini nasemhlabeni.” (Mathewu 28:18) Manje wayehlonyiswe ngokuphelele ngelungelo lokubuyisela isintu ngenxa yokufa kwakhe njengomhlatshelo, futhi nangamandla okwenza kanjalo, ngenxa yokuvuka kwakhe nokwenyukela esandleni sokunene sikaNkulunkulu ezulwini. (Luka 22:69) Ngakho-ke uJesu Kristu manje usesimweni sokubangela injongo kaNkulunkulu yokuqala maqondana nomhlaba nomuntu igcwaliseke. Ngakho-ke, kuyena, kugcwaliseka zonke iziprofetho zobuMesiya.—Bheka IHubo 72; Isaya 9:6, 7; 11:1-10.

Isizathu Sokuba Abanye ‘Bazalwe Ngokusha’

10, 11. (a) Ibuphi ubufakazi obungokomBhalo obubonisa ukuthi uJesu uyoba nabangane embusweni wakhe? (b) Bangaki abayohlanganyela kulelilungelo, futhi sazi kanjani ukuthi inani eliveziwe kumelwe lithathwe njengelingokoqobo?

¹⁰ Ingabe uJesu Kristu uyofeza zonke lezizinto ngokwakhe eyedwa? Cha. Ingabe uyobusa kanye nezingelosi kuhulumeni wakhe? Cha. Abayohlanganyela naye ekugcwaliseni lezoziprofetho zobuMesiya kuyoba abathile ababengabantu emhlabeni, njengoba naye ayeke waba njalo. Kodwa ngaphambi kokuba bahlanganyele kuhulumeni woMbuso kaKristu, nabo, njengaye, kumelwe ‘bazalwe ngokusha’ kuqala ngenkathi besesemhlabeni. Umoya kaJehova osebenza phezu kwabo ubazala njengamadodana angokomoya benethemba lokuphila okuphakade ezulwini. Njengabanjalo banobuhlobo obukhethekile nobuseduze noNkulunkulu, “umoya wobuntwana [aba]memeza ngaye [ba]thi: Aba, Baba!” (Roma 8:15) UJesu ngokuphindaphindiwe waveza lelithemba kubaphostoli bakhe. (Luka 22:28-30; Johane 14:2, 3) Ngokufanayo-ke, nabaphostoli baliphawula lelithemba.—Roma 8:17; 1 Korinte 15:52, 53; 1 Johane 3:2.

¹¹ Bangaki abayozuza lokhu kuma kwasezulwini? Ngokwayo yonke imibhalo ekhuluma ngalokhu labo ‘abayozalwa ngokusha’ bayoba mbalwa uma kuqhathaniswa. Yilokho kanye ebesingakulindela, njengoba lona umvuzo okhetheké kakhulu, isikhundla esiphakeme kakhulu. Ngakho-ke uJesu wathi maqondana nabo: “Ungesabi, mhlambi omncane; ngokuba kwathandeka kuYihlo ukuninika umbuso.” (Luka 12:32) Bayoba bangaki? Umphostoli uJohane uthi ubona amaIsrayeli angokomoya ayizi-144 000 ephawulwe emabunzini awo, futhi lezi-144 000 zimi eNtabeni yaseSiyoni neWundlu uJesu Kristu. Ukuthi kumelwe siqonde lelinani njengelingokoqobo kusobala emongweni wendaba ositshela futhi nange‘sixuku esikhulu, esingenakubalwamuntu.’—IsAmbulo 7:3, 4, 9; 14:1, 3; 20:4, 6.

Abantu Begama Lakhe

12, 13. Iyini injongo kaNkulunkulu yamanje ngalabangane bombuso besikhathi esizayo?

¹² Nokho, uJehova uNkulunkulu uwamisele umsebenzi lamakhosi nabapristi besikhathi esizayo ngenkathi besesenyameni njengabantu. Uyini-ke? Njengoba uJesu agcotshelwa ‘ukushumayela izindaba ezinhle kwabathotshisiweyo,’ ngakho-ke laba bagcotshelwe ukushumayela izindaba ezinhle zombuso kaNkulunkulu. (Isaya 61:1, 2; Luka 4:16-21; IzEnzo 8:4, 12) Ngakho-ke uJesu wanikeza abafundi bakhe bakuqala isiyalo sokuvalelisa sokuba ‘benze izizwe zonke abafundi, bababhapathize.’ (Mathewu 28:19, 20) Futhi ngaphambi nje kokuba uJesu anyukele ezulwini, watshela abaphostoli bakhe abathembekile ababeyi-11 ukuthi kwakumelwe ‘babe ofakazi bakhe kuze kube sekupheleni kwezwe.’—IzEnzo 1:8.

¹³ Enye yezinjongo eziyinhloko zikaNkulunkulu yokuba “izindaba ezinhle” zishunyayelwe ezizweni zonke ‘iwukuzithathela kuzo abantu begama lakhe.’ (IzEnzo 15:14, NW) Njengoba igama likaNkulunkulu linguJehova, laba baziwa njengofakazi bakaJehova. (Isaya 43:10-12) Akukhona ukuthi labalandeli abagcotshiwe bakaJesu Kristu bawukuphela kwabantu abashumayela “izindaba ezinhle” kwabathobileyo, ukuze benze abafundi futhi bafakazele uJehova. Kunalokho, njengoba nje nakuIsrayeli wasendulo imithetho kaJehova yayisebenza nakumfokazi ophakathi kwabo, imiyalo enikezwe uIsrayeli ongokomoya iyasebenza futhi kubangane babo, “isixuku esikhulu” se“zinye izimvu.”—Johane 10:16; IsAmbulo 7:9.

14. Siyini esinye isibopho esibekwa phezu kwabalandeli abagcotshiwe bakaJesu Kristu?

¹⁴ Esinye isibopho esibekwe phezu kwabalandeli bakaJesu Kristu siwukuba baveze isithelo somoya kaNkulunkulu, okungukuthi, “uthando, ukujabula, nokuthula, nokubekezela, nobubele, nobuvi, nokukholeka, nobumnene, nokuzithiba.” (Galathiya 5:22, 23) UJesu wathi abalandeli bakhe beqiniso babeyobonwa ngothando abalubonakalisa omunye komunye. (Johane 13:34, 35) Yingakho umphostoli uPawulu ebaluleka: “Nikhumule umuntu omdala ongowenkambo yokuqala owonakala ngezinkanuko zenkohliso, nenziwe-basha emoyeni wengqondo yenu, nembathe umuntu omusha owadalwa ngokukaNkulunkulu ekulungeni nasebungcweleni beqiniso.” Okubonisa ukuthi lesisibopho sibaluleke kangakanani kumaKristu amazwi aqhubekayo omphostoli: “Kodwa ngiyawutuba umzimba wami, ngiwenza isigqila, ukuba mina engishumayeza abanye ngingaliwa mina uqobo.” (Efesu 4:22-24; 1 Korinte 9:27) Kungokuzibonakalisa bethembekile kuze kube sekufeni kuphela lapho abagcotshiweyo bengathemba ukwamukela “umqhele wokuphila.”—IsAmbulo 2:10.

Injongo Yasekuqaleni KaNKulunkulu Ayikashintshi

15. (a) Iliphi iphutha abaningi abathi bangamaKristu abaye balenza maqondana nenjongo kaNkulunkulu? (b) Lokhu kuye kwaba ngenxa yokuqhanyiswa okunikezwe emibhalweni yamaKristu yesiGreki kwaliphi ithemba?

¹⁵ Abaningi abathi bangamaKristu benza iphutha ngokuthi abayinaki injongo yasekuqaleni kaJehova maqondana nomhlaba nomuntu. IZwi lakhe likwenza kube sobala ukuthi yayiyini nokuthi iyini, futhi uyasiqinisekisa ngokuthi akaguquki. (Genesise 1:28; Isaya 45:18; Malaki 3:6) Nokho, imibhalo yamaKristu yesiGreki iqhamisa injongo kaJehova eqhubekayo, eyamenyezelwa ngemva kokuwela kwesintu esonweni, yokukhetha inani lesintu elilinganiselwe, ngesisekelo somhlatshelo kaJesu ukuba libe ababusi neNdodana yakhe embusweni wasezulwini. (Genesise 3:15; 2 Thimothewu 4:7, 8, 18) Bonke laba ngempela okokuqala kuyodingeka ‘bazalwe ngokusha,’ njengoba noJesu Kristu ayenjalo. (Johane 3:3) Nokho, ilungiselelo likaNkulunkulu lensindiso ngesisekelo somhlatshelo kaKristu alipheleli kulabo abanethemba lasezulwini. Lokhu kusobala ngisho nasemiBhalweni YamaKristu YesiGreki.

Insindiso Eyodwa—Amathemba Amabili

16, 17. Imiphi imibhalo ebonisa ukuthi izinzuzo zomhlatshelo kaKristu azilinganiselwe kulabo abanethemba lasezulwini?

¹⁶ UJesu watshela abalandeli bakhe ukuba bathandaze: “Mawufike umbuso wakho; mayenziwe intando yakho emhlabeni njengasezulwini.” (Mathewu 6:9, 10) Ukuze intando kaNkulunkulu yenziwe emhlabeni njengasezulwini lokhu kusho ukuthi kumelwe kube khona abantu abalungileyo abaphila emhlabeni, okubikezelwe ngabo ukuthi: “UNkulunkulu abe nabo, azesule izinyembezi zonke emehlweni abo; ukufa akusayikuba-khona; nokudabuka, nokukhala, nobuhlungu akusayikuba-khona; ngokuba okokuqala kudlulile.” Lokhu akunakubhekisela ezulwini, ngoba akukaze lapho kube khona ukukhala, ubuhlungu, ukudabuka noma ukufa.—IsAmbulo 21:3, 4.

¹⁷ Okubonisa ukuthi kukhona amaqembu amabili esintu ayozuza emalungiselelweni omusa kaNkulunkulu ngamazwi kamphostoli uPawulu atholakala kumaRoma 8:19-21: “Ngokuba ukulangazela kokudaliweyo [elinye iqembu] kulindele ukwambulwa kwabantwana bakaNkulunkulu [elinye iqembu]. Ngokuba okudaliweyo kwabekwa phansi kobuze, kungengentando yakho kodwa ngaye owakubekayo, ethembeni lokuthi nakho okudaliweyo kuyakukhululwa ebugqilini bokubhubha, kube-ngukukhululeka kwenkazimulo yabantwana bakaNkulunkulu.” Ngakho-ke ekugcineni bonke abazuza ngenxa yokholo lwabo emhlatshelweni kaKristu bayojabulela ukuphila njengamadodana kaNkulunkulu—izi-144 000 ‘ezathengwa emhlabeni’ ukuba zibe sezulwini nezigidi eziningi zezinkulungwane eziyojabulela ukuphila okuphakade emhlabeni oyipharadesi.—IsAmbulo 7:4, 9; 14:3; Mathewu 25:31-34.

18, 19. (a) Yini ebonisa ukuthi ukugcwaliseka kwenjongo kaNkulunkulu ngomhlaba nomuntu kuseduze? (b) Ibaphi abantu abakha umbuso kaNkulunkulu ne‘nzalo ka-Abrahama’? (c) Imuphi umbuzo okusamelwe ucatshangelwe?

¹⁸ Kulokhu okwandulelayo kusobala ukuthi injongo yasekuqaleni kaNkulunkulu ngomhlaba nesintu isazogcwaliseka. Futhi ukugcwaliseka kweziprofetho zeBhayibheli, ezinjengalezo ezitholakala kuMathewu isahluko 24, Marku isahluko 13, Luka isahluko 21, 2 Thimothewu 3:1-5 nesAmbulo 6:1-8, kubonisa ukuthi lesosikhathi siseduze! Ngenxa yokuhlubuka kukaSathane nokungalaleli kuka-Adamu noEva, uJehova ulungiselele iqembu elinelungelo umvuzo wasezulwini, ayolisebenzisela ukugcwalisa injongo yakhe yasekuqaleni. Yilaba kuphela ‘abazelwe ngokusha.’ Kanye neNkosi yabo noMbusi, uJesu Kristu, benza umbuso uJesu afundisa abalandeli bakhe ukuba bawuthandazele. Babumba ‘inzalo ka-Abrahama’ ukuze babusise ‘zonke izizwe zomhlaba.’—Genesise 22:18; Galathiya 3:29.

¹⁹ Siye sacabangela ukuthi kungani iNdodana kaNkulunkulu nabangani bayo bombuso kumelwe ‘bazalwe ngokusha,’ nokuthi liyini inani labo nezibopho zabo zamanje. Nokho, lombuzo usasele: Iyini-ke ingxenye kaNkulunkulu nengxenye yomuntu ‘ekuzalweni ngokusha’? Umuntu angabona kanjani ukuthi uJehova uNkulunkulu umkhethele ukuba ‘azalwe ngokusha’?

[Isithombe ekhasini 21]

Ekubhapathizweni kwakhe, uJesu waba ngogcotshelwe ukuba yinkosi yombuso kaNkulunkulu

[Isithombe ekhasini 24]

UJesu watshela abalandeli bakhe abathembekile ukuthi kwakufanele babe ‘ngofakazi bakhe kuze kube sekugcineni komhlaba’

“Ukuzalwa Ngokusha”—Ingxenye Yomuntu Nengxenye KaNkulunkulu

“Lowo ozelwe uNkulunkulu akenzi isono, ngokuba imbewu yakhe ihlala kuye; futhi akanakona, ngokuba uzelwe uNkulunkulu.”—1 Johane 3:9.

 1, 2. Yini esiye sayifunda (a) maqondana nomphumela wabasindisiwe? (b) maqondana nenjongo kaNkulunkulu yokuba abathile ‘bazalwe ngokusha’?

ESIHLOKWENI esandulelayo siye saphawula ukuthi izigidi eziningi zabathi bangamaKristu zithi ‘zizelwe ngokusha.’ Futhi, siye sabona ngokuvela emiBhalweni ukuthi nakuba kukhona insindiso eyodwa—esekelwe ekukholelweni emhlatshelweni wesihlengo kaKristu—kunemiphumela emibili eyehlukile okumelwe ijatshulelwe yilamaqembu asindisiwe, umphumela ongokwasezulwini nowasemhlabeni.

² Siye sabona futhi ukuthi uJesu Kristu wazalwa ngokusha ngemva kokubhapathizwa kwakhe eJordani. Khona-ke uJehova uNkulunkulu wabangela umoya ongcwele ukuba wehlele phezu kukaJesu ngesimo sejuba, ngalesosikhathi uNkulunkulu wayevuma uJesu njengeNdodana yakhe ezelwe ngomoya. Siye sabona futhi ukuthi injongo kaNkulunkulu yayiyini ngokwenza ukuba uJesu azalwe ngokusha, okungukuthi, ngemva kokufa nokuvuka kwakhe akhazinyuliswe, abe yiNkosi enamandla yombuso kaNkulunkulu. Siye safunda futhi ukuthi kuyintando kaNkulunkulu ukuba uJesu Kristu abe nabangani ababusa naye nokuthi laba nabo kumelwe ‘bazalwe ngokusha.’—Mathewu 3:13-17; Johane 1:12; 3:3; Heberu 10:5-10; IsAmbulo 20:6.

 3. Abangane boMbuso kaJesu bahluke kanjani kuye lapho kuziwa ‘ekuzalweni ngokusha’ kwabo?

³ Kuthiwani ngalabalandeli abagcotshiwe bakaJesu Kristu? Kunini lapho ‘bezalwa ngokusha’? Iziphi izinyathelo okumelwe bazithathe ngaphambi kokuba uJehova athathe isinyathelo ngenxa yabo, abazale njengamadodana angokomoya? Ngenxa yokuthi uNkulunkulu wayenguYise, uJesu wazalwa njengomuntu ophelele. Eminyakeni engamashumi amathathu kamuva uYise wamzala njengeNdodana engokomoya, wabangela ukuba ‘azalwe ngokusha.’ Kodwa yonke inzalo ka-Adamu izalwa iyizoni, ‘ingabafokazi nezitha ezingokoqobo zikaNkulunkulu ngenxa yokuthi izingqondo zayo zimbi.’ Njengenjalo ayikho esimweni sokuba uJehova asebenzelane nayo futhi ayizale njengamadodana akhe angokomoya.—IHu. 51:5; Kolose 1:21.

Ingxenye Yomuntu: Izinyathelo Eziyisithupha Eziyinhloko

 4, 5. (a) Ngaphambi kokuba uNkulunkulu acabangele ababezoba abafundi abayizindlalifa ezingokomoya izinyathelo ezingaki okumelwe laba bazithathe futhi lezi zifuneka kobani? (b) Siyini isinyathelo sokuqala?

⁴ Iziphi izinyathelo ezidingeka kwabayoba abafundi ngaphambi kokuba uJehova abacabangele ukuba babe amadodana angokomoya? Kukhona izinyathelo eziyisithupha eziqhamile okumelwe laba bazithathe. Kodwa makuphawulwe ukuthi uNkulunkulu ufuna lezi zinto ezifanayo kubo bonke abayoba amaKristu eqiniso futhi bazuze insindiso, kungakhathaliseki ukuthi umvuzo wabo wokugcina uyoba owasezulwini noma wasemhlabeni.

⁵ Okokuqala, abantu abanjalo kumelwe bangenise ulwazi oluqondile ngoJehova uNkulunkulu uMdali wabo noMniki-Kuphila, nangeNdodana yakhe, uJesu Kristu, uMsindisi wabo noMhlengi. (IHu. 36:9; 100:3; Mathewu 20:28; Roma 10:13-15) Emthandazweni kaJesu kuNkulunkulu ngobusuku bakhe bokugcina emhlabeni njengomuntu, wagcizelela ukubaluleka kwalesisinyathelo, ethi: “Ukuphila okuphakade yilokhu ukuba bazi wena-Nkulunkulu wedwa oqinisileyo, nomthumileyo, uJesu Kristu.”—Johane 17:3.

 6. Siyini isinyathelo sesibili okumelwe laba basithathe?

⁶ Nokho, ulwazi ngokwalo alwanele. Umuntu kumelwe abonise ukholo, njengoba sifunda: “Ngokuba uNkulunkulu walithanda izwe kangaka, waze wanikela ngeNdodana yakhe ezelwe yodwa ukuba yilowo nalowo okholwa yiyo angabhubhi kodwa abenokuphila okuphakade.” Yebo njengoba umphostoli uPawulu ekubeka ngokucacile, “ngaphandle kokukholwa akwenzeki ukumthokozisa [uNkulunkulu].” Lolukholo lubheka izithembiso zikaNkulunkulu njengezingokoqobo, njengokungathi sezigcwalisekile. Lusho okungaphezulu nje kwenkolelo, ngoba siyakhunjuzwa umfundi uJakobe ukuthi ngisho namademoni ayakholwa futhi athuthumele, nokuthi “nokukholwa ngaphandle kwemisebenzi kufile.”—Johane 3:16; Heberu 11:1, 6; Jakobe 2:19, 26.

 7. Uyini umsebenzi wokuqala odingekayo njengobufakazi bokuba komuntu nokholo?

⁷ Umsebenzi wokuqala odingekayo njengobufakazi bokholo lomuntu uwukuphenduka. Yebo, umuntu kumelwe ukuba aphenduke enkambweni yakhe embi futhi ayeke ukwenza isono ngamabomu. Lapho uJesu eqala ukushumayela wathi: “Phendukani, ngokuba umbuso wezulu ususondele.” (Mathewu 4:17) Ngomuntu ukuze aphenduke enkambweni yakhe embi kumelwe ayiyeke. Kumelwe azisole ngokujulile, adabuke ngayo. Eqinisweni kuyisibopho ngabo bonke abayozuza ukuphila emhlabeni oyipharadesi ukuba nabo benze lokhu, ngoba “ababi bonke uyakubabhubhisa.”—IHu. 145:20.

 8. Ukuphenduka ezonweni zomuntu kumelwe kulandelwe isiphi isinyathelo?

⁸ Nokho, ukuyeka nje ukwenza izono akwanele. Umuntu kumelwe athathe isinyathelo sokuguquka. Okungukuthi, kumelwe aguquke futhi enze intuthuko kolunye uhlangothi. Kumelwe alalele iseluleko uPetru asinikeza amaJuda osukwini lwakhe: “Ngalokhu phendukani, niguquke ukuba kuhlangulwe izono zenu.” Yebo, ‘yenzani imisebenzi efanele ukuphenduka.’ (IzEnzo 3:19; 26:20) Ukuthi lesisinyathelo siyadingeka ngisho nakubo bonke abathemba ukujabulela ukuphila okuphakade emhlabeni kusobala emazwini atholakala kuzAga 2:20, 21.

 9. (a) Yiziphi izinyathelo ezimbili eziqhubekayo ezidingekayo kulaba, eqinisweni, ezidingeka kubo bonke abazoba abalandeli bakaJesu Kristu? (b) Ukubhapathizwa kukaJesu kwakuyisibonakaliso sani?

⁹ Khona-ke, njengoba uJesu azinikezela ngokwakhe eJordani ukwenza intando kaYise, ngakho-ke isinyathelo esilandelayo esidingeka kubo bonke abafisela ukuba abalandeli bakaJesu Kristu, kungakhathaliseki ukuthi ithemba labo liyini, siwukuzinikezela ngokwabo kuNkulunkulu. Namuhla, lokhu kuhlanganisa ukuzinikezela kuJehova uNkulunkulu, ngemva kwalokho balandele ezinyathelweni zeNdodana yakhe, uJesu.a (Luka 9:23) Futhi, njengesinyathelo sesithupha kumelwe babonakalise ukuzinikezela futhi benze isivumo sasobala sakho ngokubhapathizwa njengoba uJesu enza.—Mathewu 28:19; qhathanisa nezEnzo 2:41.

Ingxenye Ebaluleke Kakhulu KaJehova UNkulunkulu

10. Iqiniso lokuthi kudingeka ingxenye engaphezu kweyomuntu ukuze umuntu ‘azalwe ngokusha’ lingabonwa kumuphi umfanekiso?

¹⁰ Ukuzuza ulwazi ngoJehova uNkulunkulu noJesu Kristu, ukubonisa ukholo, ukuphenduka, ukuguquka, ukuzinikezela nokubhapathizwa—ingabe ngokuzenzakalelayo lezinyathelo ziphumela ekubeni umuntu ‘azalwe ngokusha’? Akunjalo neze! ‘Awunakuzalwa ngokusha’ ngokomoya ngokwemizamo yakho njengoba wawungenakuzalwa kwasekuqaleni ngemizamo yakho siqu. Njengoba ukuzalwa okungokwenyama kudinga ukufezwa kwendima ethile ngabazali abangabantu, ngakho-ke lokhu kuzalwa ngokomoya, lokhu ‘kuzalwa ngokusha,’ kudinga ukufezwa kwendima ethile nguMzali waphezulu, uJehova uNkulunkulu, nenhlangano yakhe engokwasezulwini, noma “umfazi.” (Isaya 54:1, 5) Ukuphela kwento umuntu othatha izinyathelo ezingenhla angayenza ukuzibeka ohlwini ‘lokuzalwa ngokusha,’ uma lokho kuyintando kaNkulunkulu.

11. Uma kuyintando kaNkulunkulu, isiphi isinyathelo asithatha kulabo abaye benza ingxenye yabo?

¹¹ Ngenxa yokungapheleli kwesintu esikuzuze ngefa, uNkulunkulu ngokwakhe manje uthatha isinyathelo ngenxa yalabo bantu ajabulela ukubabizela embusweni wasezulwini. Kungakho sifunda ukuthi: “Sesilungisisiwe ngokukholwa.” Ukukholelwa kukuphi? Ukukholelwa emhlatshelweni kaKristu, ngoba kulotshiwe: “Sesilungisisiwe ngegazi lakhe.” (Roma 5:1, 9) Phawula ukuthi akuyena umuntu ngokwakhe kodwa uNkulunkulu olungisisa umuntu ngokomthetho. Lokhu kumnikeza ukuma okwehlukile kulokho kwe“ndalo,” isintu ngokuvamile okumelwe silindele “ukwambulwa kwabantwana [abangokomoya] bakaNkulunkulu” ngaphambi kokuba ‘bakhululwe ebugqilini bokubhubha, kube-ngukukhululeka kwenkazimulo yabantwana [basemhlabeni] bakaNkulunkulu.’ (Roma 8:19-22) Kanjalo-ke labo uNkulunkulu abalungisisayo banelungelo lokuphila okuphelele abakunikwayo. Ngenxa yalokhu, uJehova uNkulunkulu manje angathatha isinyathelo esiqondile phezu kwabo ngomoya wakhe.—Roma 8:33.

12. ‘Ukuzalwa ngokusha’ kwahambisana nasiphi isenzo endabeni kaJesu nabafundi bakhe bokuqala, futhi kungani sayekwa?

¹² Labo uNkulunkulu abalungisisayo manje ubazala njengabantwana bakhe abangokomoya. Kanjani? Ngomoya wakhe ongcwele, noma amandla ayisiphekupheku, awabangela ukuba asebenze ngenxa yabo, okuphumela ekubeni ‘bazalwe ngokusha.’ Endabeni kaJesu nakuleyo yabafundi bakhe ababebuthene ngosuku lwePentekoste, uNkulunkulu wabonisa ukubazala kwakhe njengamadodana angokomoya ngesenzo esingavamile. Nokho, lapho izincwadi ezifakazela ubuKristu beqiniso sezimiswe ngokuqinile, kwakungasadingeki izibonakaliso ezinjalo, futhi lezo ‘zapheliswa.’—Mathewu 3:16; IzEnzo 2:3; 10:44-48; 1 Korinte 13:8-10.

13. “Amanzi” no“moya” kubhekisela kuphi? (Johane 3:5)

¹³ Lelilungiselelo lokuzalwa ngokusha ngokomoya liyilokho uJesu ayebhekisele kukho lapho ethi kumbusi uNikodemu owayengumJuda: “Ngiqinisile, ngiqinisile ngithi kuwe, Uma umuntu engazalwa ngamanzi nangoMoya angengene embusweni kaNkulunkulu. Lokhu okuzelwe yinyama kuyinyama; nalokho okuzelwe ngoMoya kungumoya. Ungamangali ngokuba ngithe kuwe: Nimelwe ukuzalwa ngokusha.” (Johane 3:1, 5-7) Amazwi okubhekiselwe kuwo lapha ngokungangabazeki abhekisele emanzini angokoqobo okubhapathizwa. Kuthiwani-ke ngomoya? Kubhekiselwe emoyeni ongcwele uJehova awusebenzisa phezu komuntu.

14. “Ukubizwa” noku“khethwa” kuquketheni, futhi lamaKristu agcotshwa futhi athunyelwe yiphi injongo?

¹⁴ ImiBhalo ikhuluma ngalabo ‘abazalwa ngokusha’ ‘njengababiziwe.’ Lokhu kubizwa kubo kuyisimemo esivela kuNkulunkulu ngokwakhe sokuba babe abahlanganyeli noJesu Kristu. Labo abasabela esimemweni ‘bayakhethwa.’ (IsAmbulo 17:14) Baba yingxenye yebandla ‘elikhethiwe’ elikuthunywa kwalo kuwuku‘shumayela ubukhosi’ bukaJehova uNkulunkulu. (1 Petru 2:9) LamaKristu ‘azelwe ngokusha’ agcotshwe ngomoya kaNkulunkulu ongcwele ukuba ashumayele njengoba noJesu ayenjalo. Ngakho-ke siyafunda: “Kepha osiqinisayo kanye nani kuKristu, nowasigcobayo, uNkulunkulu.”—Isaya 61:1, 2; Luka 4:16-21; 2 Korinte 1:21.

15. Umoya ubunikeza kanjani ubufakazi ‘ekuzalweni ngokusha’ komuntu, futhi lolokholo luqiniswa ngani?

¹⁵ Maqondana nalaba ‘abakhethiweyo’, umphostoli uPawulu wafakaza: “Yena lowoMoya ufakaza kanye nomoya wethu ukuthi singabantwana bakaNkulunkulu.” (Roma 8:16) Umoya ongcwele kaNkulunkulu ukwenza kanjani lokhu? Ngokufaka kulamaKristu ithemba lasezulwini. “Ngokwesihawu sakhe [uNkulunkulu] esikhulu sokuba sibe-nethemba eliphilileyo ngokuvuka kukaJesu Kristu kwabafileyo, sibe-nefa elingapheliyo, nelingenasisihla, nelingabuniyo, eniligcinelwe ezulwini.” (1 Pet. 2:3, 4) Njengoba lawa egcina ubuhlobo obuhle noYise wawo wasezulwini, yena, uyawaqinisa ngokukholwa kokuthi ngempela angamaKristu ‘azelwe ngokusha.’

Umuntu Angaqiniseka Kanjani?

16. ‘Inceku ethembekileyo neqondayo’ iye yabeka ukugcizelela ethembeni lasemhlabeni kusukela nini, futhi lokhu kuholela kusiphi isiphetho?

¹⁶ Labo abahlanganyela ekushumayeleni izindaba ezinhle zombuso ezikhathini zanamuhla bayaqiniseka ngokuthi uJehova uNkulunkulu uhola izinceku zakhe ezizinikezele ngeNhlangano yakhe ebonakalayo ezelwe ngomoya, ‘inceku ethembekileyo neqondayo.’ (Mathewu 24:45-47) Ngaphansi kokuqondisa kwayo ithemba lasezulwini lavezwa, laqhanyiswa futhi lagcizelelwa kwaze kwaba cishe ngonyaka ka-1935. Njengoba ‘ukukhanya kwanda’ ukuze kwambule ngokucacile “isixuku esikhulu” sesAmbulo 7:9, ukugcizelela kwaqala ukubekwa ethembeni lasemhlabeni. (IHubo 97:11) Ngakho-ke, kungokunengqondo ukuphetha ngokuthi ngalesosikhathi inani eligcwele lezi-144 000 kwakusondele ukuba ligcwaliswe. Yebo, noma yibaphi abantu ababonakala bengathembekile babeyodinga ukuthathelwa isikhundla ngabanye. Kodwa ngokuqondakalayo, laba babeyoba abambalwa uma kuqhathaniswa. Futhi laba babeyothathelwa obani izikhundla? Kubonakala kunengqondo futhi ukuphetha ngokuthi kunokwenzeka kakhulu lelithemba lasezulwini laliyokwedluliselwa kwabathile abaye babekezela ngobuqotho, abaye banamathela ekuzinikezeleni kwabo iminyaka eminingi, kunokuba linikezwe abantu abasanda kuzinikezela abangakavivinywa. (Qhathanisa noLuka 22:28-30.) Nokho, ngokwemibiko esinayo kubonakala ukuthi ngisho namaKristu asanda kubhapathizwa aye azicabangela ‘njengazelwe ngokusha.’

17. Hlobo luni lwemizwelo olwabangela abathile ukuba bacabange ngokuphambene ngokuthi uNkulunkulu uye wabanikeza ithemba lasezulwini?

¹⁷ Noma obani abazinikezele ezikhathini zamuva nje futhi babhapathizwa nabazicabangela ukuthi ‘bazelwe ngokusha’ kungaba benza kahle uma becabangela ngokungathi sína imibuzo elandelayo: Yiziphi izizathu onazo zokuba nomuzwa wokuthi uJehova uNkulunkulu uye wafaka lelithemba kuwe? Ingabe kungaba ngenxa yokuthi uqhutshwa ukuthatheka okungokomzwelo okubangelwa inkolelo edukile owawunayo ngenkathi useBabiloni Elikhulu yokuthi izulu ikhaya labo bonke abantu abalungileyo? Noma ingabe uzizwa ngalendlela ngenxa yokuthi wawuphazamiseke kakhulu ngaphakathi ukuthi ekuqaleni walwa nalomqondo kodwa wakwehlula kancane kancane? Ingabe wakunqoba ngoba wena wawufuna ukuba kube ngaleyondlela, mhlawumbe ngisho ungaqondi? Ukulwa okunjalo khona ngokwakho akukufakazeli ukuthi ‘wazalwa ngokusha.’

18. Kungani ukwazisa ngokujulile izinto ezingokomoya khona ngokwakho kungenakufakazela ukuthi umuntu ‘uzelwe ngokusha’?

¹⁸ Noma ingabe unomuzwa wokuthi uye wakhethwa uNkulunkulu ukuba ngomunye wabagcotshiwe wabayizi-144 000 ngenxa yokwazisa kwakho ojulile izinto ezingokomoya, ngenxa yokuthanda ngokujulile amaqiniso angokomoya? Khona-ke phawula ukuthi abaningi abangasho neze ukuthi ‘bazelwe ngokusha’ ‘bangabantu abangokomoya’ ngokomqondo ophelele wezwi. (1 Korinte 2:14, 15) Futhi akukho kungabaza ngamandla angokomoya alawomadoda nabesifazane bokholo abahlelwe kumaHeberu isahluko 11. Akukho noyedwa walaba ‘owayezelwe ngokusha.’ Bonke babheka phambili ‘ovukweni olungcono [lokuphila ngaphansi kombuso kaNkulunkulu]’ khona lapha emhlabeni.—Heberu 11:35.

19. (a) Kungani intshiseko enkulu ingafakazeli ngokuyinhloko ukuthi uNkulunkulu uye wanikeza umuntu ithemba elingokwasezulwini? (b) Isiphi isehlakalo esibonakala sibonisa ukuthi ukusho kwabathile ukuthi banethemba lasezulwini kungase kube ngenxa yokuntula intobeko?

¹⁹ Noma ingabe uzizwa ngalendlela ngenxa yokubonakalisa kwakho intshiseko eyengeziwe kunamanye amaKristu okanye nawo? Kodwa lokho kukodwa kungebe yisici esinqumayo, ngoba umphostoli uPawulu ngokuphindaphindiwe wakuthola kuswelekile ukuyala amaKristu agcotshiwe maqondana nokuba athathe izibopho zawo ezingokomoya ngokungathi sína. (1 Korinte 11:20-22; Galathiya 4:9-11) Noma ingabe ukusho kwakho ukuthi ugcotshiwe kungenxa yokuntula intobeko? Kukhona abathile muva nje abathi bagcotshiwe, kodwa esikhundleni sokwakha ubunye ebandleni baye baba nomuzwa wokuthi kumelwe babe nawabo siqu amaqembu esifundo seBhayibheli. Ngokuphambene, amaKristu avuthiwe ‘azelwe ngokusha’ asondelene eduze nebandla lakubo ngisho nakuba lakhiwe ikakhulu ‘ezinye izimvu.’ (Johane 10:16) Nokho, ‘ukuzalwa ngokusha’ komuntu kuyindaba yomuntu siqu phakathi kukaNkulunkulu nomKristu ngamunye. Akukho muntu okumelwe ahlulele omunye ngalendaba.—Roma 14:10.

20. Ngenxa yalokho okwandulelayo, iziphi iziphetho esifinyelela kuzo ‘ngokuzalwa ngokusha’?

²⁰ Kukho konke lokhu okwandulelayo siphetha ngokuthini? Ngokuthi uJehova uNkulunkulu ulungile, uhlakaniphile futhi unothando. Unelungelo lokwabela izidalwa zakhe ezihlakaniphile izindima zazo ezifanelekile—ezinye ukuba zikhonze injongo yakhe ezulwini, ezinye ukuba zikwenze khona lapha emhlabeni. Akunjengokungathi uhulumeni wasezulwini ungokuthile okumelwe kuzuzwe ngokuzikhethela komuntu siqu nomzamo, noma okokuhahelwa ngobugovu. Kungokuphakeme kangangokuba asikho isidalwa esingumuntu esingakugabadela. Ngempela kungumusa ongafanelekanga omangalisayo uJehova uNkulunkulu awunikeza izidalwa zakhe ezimbalwa, ekuthuthukiseni izinjongo zakhe ezihlakaniphile ezilungile nezibonisa uthando, kodwa hhayi ngenxa yokufaneleka okukhethekile kwazo. ‘Ukuzalwa ngokusha’ ngokwalaba kuphela. (Roma 3:23, 24; 11:33-36) Futhi, ukuphila okuphakade emhlabeni oyipharadesi kuwumgomo oyilungelo elingenakuchazwa lelo abantu abathambekele kokulungileyo abangase balilwele. (IsAmbulo 21:1, 3, 4) Konke lokhu kuwumusa ongafanelekanga. Akukho muntu okufanele abe ogabadela kangangokuba athi kuJehova ‘Bewenzani?’—Daniyeli 4:35.

[Umbhalo waphansi]

[Isithombe ekhasini 28]

Njengoba ukuzalwa okungokwenyama kudinga ukufezwa kwendima ethile ngabazali abangabantu, ngakho-ke lokhu ‘kuzalwa ngokusha’ kudinga ukufezwa kwendima ethile nguBaba no“mfazi” wakhe ongokwasezulwini

[Isithombe ekhasini 30]

IBabiloni Elikhulu liye lafundisa abaningi ukuba bacabange ukuthi bonke abantu abalungileyo baya ezulwini