Kiọm Ghisigh Adạph Ghan Zizọs Mem Dị Nạ Aḍiiny Muụm

1-2. Eeghe aḍisẹph kirokirọ kụ edị oye dị aḍiiny muụm ramoọgh ghan?

EḌIGHI ni iyaạr oḅaạl olhoghi oḍiiny amuụm ḅilhẹ r’oḍighom aani apakirị eghunotu phọ aZihova. Ekạr kụ eḍighi eekiạ eepoogh omhoọgh asiya dị ekpulhạn r’aZihova. Yira omeeraam ni ikpo onhụ okọ suọr phọ aDevid, eḅẹm bọ mọ: “Oḅaạl olhoghi odianhaan buphẹ nạ [aZihova] asaḅạr bọ, buphẹ nạ asighẹ bọ mọ oru orọl siphẹ otu eegu phọ anạ.”—Ps. 65:4.

² Ka/torobọ oye kụ edị aZihova rameera ghan mọ aḍuraan atuman nyodị. Idiphọ emhuoghaạph phọ epẹ omhạn itughemhị bọ iyira, awe dị moḍeenhaan mọ bidị rowạ ni omhoọgh asiya dị ekpạr r’odị kụ edị aZihova rasopha ghan oḍuraan otuman. (Jems. 4:8) Mem dị nạ aḅọgh loor anạ angọ aZihova kụ aḍiiny muụm, nạ rakparamhị ghan siya phọ anạ r’aZihova eten dị egbatanhaạn. Nạ katue ni akuphom owol mọ mem dị nạ aḍiiny muụm, mọ odị “kaakuanhaan ni nyinhạ ḍisẹph amuzeḍi.”—Mal. 3:10; Jer. 17:7, 8.

 3. AKristẹn dị moḅọgh loor ongọ oḅilhẹ oḍiiny muụm omoọgh eeghe okpanhạ oḍighi? (Ecclesiastes 5:4, 5)

³ Oḍiiny amuụm mọ eḍighi eḅẹl edạ. Mem dị nạ magbatạn edạ phọ epẹ phọ, nạ kawạ ni oḍighi oomo ipẹ nạ katue bọ orọl r’idị emhoọgh muḅọph roghunya phọ anạ ḅilhẹ r’oḅạr odị ghalhamọ r’amem dị nạ asoman odẹgh ophogh obobọ ikpuuroghọm. (Bạl Ecclesiastes 5:4, 5.) Idiphọ onyọ amatuạn aZizọs, nạ kakị ghisigh aḍighi ghan oomo ilọ nạ katue odạph ghan eḍeenhaan phọ r’iilhogh phọ odị. (Mat. 28:19, 20; 1 Pit. 2:21) Emhuoghaạph phọ ephẹn phọ kelhoghonhaạn nyinhạ ḍighaạgh oḍighi idiphọ phọ.

KIẠ GHISIGH ADẠPH GHAN ZIZỌS ETIGHERI IKPUUROGHỌM R’ODẸGH OPHOGH KIROKIRỌ

 4. Ika kụ edị abumatuạn aKraist orool “osuom arusu”? (Luk 9:23)

⁴ Kaa/tughiạn mọ nạ moḍiiny muụm pọ iiḅaghamhị nạ ka/moọgh mun. AZizọs akạr kụ aghaạph mọ abumatuạn phọ odị kotool li “osuom arusu phọ odị.” Kụ koḍighi iduọn phọ “ḍio ḍio ḍio.” (Bạl Luk 9:23.) AZizọs raḅẹm ghan siẹn phọ mọ abumatuạn phọ odị komiinhọm ghan oomo amem ḍughụm? Eeye. Odị raḅẹm ghan ghụn mọ oḅarạm isiphẹ aḍisẹph kirokirọ phọ bidị komoọgh bọ, bidị kosoman ni ipaanhaạn. Kụ iniin ipaanhaạn phọ ipẹ phọ kekạr kụ ekpạr agey.—2 Tim. 3:12.

 5. Eeghe aḍisẹph kirokirọ kụ edị aZizọs aguanhaan buphẹ ophinyọn bọ rikiạ?

⁵ Eeni nạ masoman ni isophoghom ḍighaạgh abuọ eghunotu phọ anạ, obobọ eeni nạ maphinyọn ni rikiạ orue osighẹ araraạr Omhạr phọ oḍighi eḅẹl siphẹ aghuḍum mọ anạ. (Mat. 6:33) Eḍighi idiphọ, pọ nạ katue ni akuphom owol mọ aZihova alọgh ni elhegh oomo phọ araraạr phọ nạ raḍighinhaan bọ nyodị. (Hib. 6:10) Eeni, ikpo onhụ phọ aZizọs meru ni inẹ siphẹ aghuḍum mọ anạ, odị aḅẹm mọ: “Oye o/lo dị mawilẹ otu odị, m’abumor, m’abumarani, m’onhiin, m’odẹ, m’anmụny, m’arere odị loor emụ amị r’ooḅi oghaạph phọ, dị ko/nmoom siẹn aḅirini phọ ophọn oogh arukuron opuemiom ruutu, r’abumor, r’abumarani, r’aburunhiin, r’anmụny, r’arere, ḅilẹ r’igbiphoghọm, kụ olọ aḅirini phọ opọ ratu bọ odị kamoọgh ni ghuḍum k’agee-pọ.” (Mạk 10:29, 30) Aḍisẹph kirokirọ phọ nạ mamhoọgh bọ kụ ibụgh epu rikiạ phọ nạ maphinyọn bọ.—Ps. 37:4.

 6. Uḍighi ika kụ kewạ bọ dị nạ kakiọm ghisigh abian ‘ruuphuạ’ iphulhupul mem dị nạ maḍiiny muụm?

⁶ Kewạ ni mọ oghị ghisigh eenhan ghan ‘ruuphuạ’ iphulhupul phọ mem dị yira moḍiiny muụm. (1 Jọn 2:16) Loor esi dị nạ k”omhunhughan. Eeni amem, nạ atue ni aloghoma aani ipẹ otelhedom mọ Pọl alhoghoma bọ. Odị agẹ mọ: “IiIogh phọ Enaạn eḅeraạn ni iitughiạn phọ amị, Kụ mị aḅiIẹ ramiịn ghan onọn ologh dị ragir siphẹ aIoor phọ amị, ologh dị amooghọm iikpaIaghiạn r’opọ aḅeraạn bọ ologhi phọ amị. Uphaḍị ni imị bịn aseenaan ologh ikarạph phọ regir bọ Ioor phọ amị.” (Rom. 7:22, 23) Eeni amem nạ atue ni aḅonyonhu azuan loor ikuph phọ nạ ralọgh ghan bọ okpạr opu ikarạph inyuughiom. Toroboiperolbọ, ogbirima ghan ipẹ nạ aguanhaan bọ aZihova mem mọ nạ aḅọgh bọ loor anạ angọ nyodị ketue ni engọ nyinhạ inyaạm eenhan odẹgh ophogh. Okạr oghaạph mem dị nạ asoman odẹgh ophogh, oghunya oḅọgh aloor phọ anạ ongọ aZihova katue ni alhoghonhaạn nyinhạ ḍighaạgh okaran odẹgh ophogh phọ. Ika?

 7. Ika kụ edị oḅọgh aloor anạ ongọ aZihova ketue elhoghonhaạn nyinhạ ḍighaạgh orọl adọl dị ekpẹ oḍuom olhoghi?

⁷ Mem dị nạ aḅọgh loor angọ aZihova, pọ nạ mapharanhaạn loor anạ. Iduọn phọ pọ remạ ghan mọ nạ masopha oghel aruuphuạ r’asiigbu dị aZihova i/ḅeraạn. (Mat. 16:24) Esi iduọn phọ, mem dị nạ asoman odẹgh ophogh nạ ka/moọgh iikia ilọ iyaạr dị ewạ dị nạ kaḍighi, loor esi dị nạ masopha epẹ omhạn oḅạr aZihova. Nạ kakịom ni ghisigh apamhanhạm osopha phọ anạ oḍighi ghan idị keḅeraạn aZihova. Nạ kakịgh Job. Ghalhamọ r’iduọn odị asoman bọ ni ogbagarạ odẹgh ophogh kirokirọ, bịn odị aghunya mọ: “Mị kapamanhạm ni ḍimeerạ phọ amhị!”—Job 27:5.

 8. Ika kụ edị ogbirima ghan ilọ iiḅereghị oḅọgh aloor ongọ phọ anạ ketue elhoghonhaạn nyinhạ ḍighaạgh oghel odẹgh ophogh?

⁸ Nạ katue ni amoọgh inyaạm okpạr opu atorobọ odẹgh ophogh, mem dị nạ agbirima ilọ oguanhaan oḅọgh aloor phọ anạ ongọ aZihova. Esi omaạm, nạ kamiigh ni oghaạph araghaạph iḍọ ophoghomiom olom obobọ anhịr onhọn oye ḍughụm? Eeye! Loor esi dị nạ masopha epẹ omhạn mọ nạ ka/ḍighi edọ iyaạr dị erọl idiphọ. Eḍighi maạr dị nạ u/meera dị ikarạph iitughiạn phọ ipẹ phọ kesi sinhị, pọ ke/si esi dị kewạ mọ kparaghạ oruphuron osighẹ. Bịn nạ katue ni “aḍuạ” esi “eten abukarạph phọ.”—Prov. 4:14, 15.

 9. Ika kụ edị ogbirima ghan ilọ iiḅereghị oḅọgh aloor ongọ phọ anạ ketue elhoghonhaạn nyinhạ ḍighaạgh osighẹ iiḍighi Omhạr phọ oḍighi eḅẹl?

⁹ Kokaạph ika eḍighi maạr dị ongọ nyinhạ oḍighi dị ka/meera mọ gbor ghan aghị ituughạ? Nạ ka/kị ookia ilọ oḍighi. Loor esi dị epẹ omhạn, nạ masopha mọ nạ ka/tue aḍighi oḍighi dị kakikima nyinhạ oghị ghan ituughạ. Esi iduọn phọ, nyinhạ ke/phụ osighẹ odọ oḍighi phọ opọ phọ kụ okparaghạ owạ eten osighẹ aZihova oḍighi eḅẹl. Ootughiạn ghan ikuph phọ aZizọs alhọgh bọ oḍighi idị keḅeraạn Odẹ phọ odị, kelhoghonhaạn ni nyinhạ ḍighaạgh oogboronhom oghel atorọ iyaạr dị Enhaạn phọ nạ maḅọgh bọ loor anạ angọ aghel.—Mat. 4:10; Jọn 8:29.

10. Ika kụ edị aZihova kalhoghonhaạn nyinhạ ḍighaạgh oghị aghisigh “odạph” ghan aZizọs mem dị nạ aḍiiny muụm?

¹⁰ Odẹgh ophogh r’igbiphoghọm ringọ ghan iyira eepoogh oḍeenhaan mọ yira onyạ ni oghiọm aghisigh “odạph” ghan aZizọs. Kụ nạ katue ni akuphom owol mọ aZihova kalhoghonhaạn ni nyinhạ ḍighaạgh oghị aghisigh odạph ghạn aZizọs. ABaibul phọ aḅẹm mọ: “Enaạn reḍighi ghan ni ilọ dị aguanaan, kụ odị ka/meera mọ odẹgh ophogh dị ipel inyina iteẹny inyina. Mem lọ odẹgh ophogh iteẹny inyina, odị kingọ ni inyina inyaạm okparạm ḅilẹ r’ilọ oḍighi kụ okpetenaan.”—1 Kọr. 10:13.

IDỊ NẠ KATUE AKIỌM GHISIGH ADẠPH GHAN ZIZỌS

11. Eghẹn kụ eniin ekpanhạ eten dị yira kotue okiọm ghisigh odạph ghan Zizọs? (Miịn kẹn afoto phọ.)

¹¹ AZizọs amhoọgh oophugh agey, kụ odị aḍuraan atuman aZihova esi iiḅereghị. (Luk 6:12) Okạr oghaạph, eniin ekpanhạ eten dị nạ katue akiọm ghisigh adạph ghan Zizọs mem dị nạ aḍiiny muụm pọ oghiọm aghisigh oḍighi ghan araraạr dị keḍur nyinhạ etumeriom aZihova. ABaibul phọ aḅẹm mọ: “Torobọ ipẹ ketọI bọ, ophạm ni okananaạm itooghị phọ ipẹ yira odạph bọ kụ oteẹny nyiidiphọ.” (Fil. 3:16) Mem emhạn mem, nạ kanaghạn ghan ni reḍeenhaan abumor r’abumaranhi dị mosopha obughẹ arukumuan phọ bidị rongọ bọ aZihova. Eeni bidị moghị aani School for Kingdom Evangelizers obobọ okị ekpisi dị ewaạm mọ ebụgh. Lọ nạ katue ni, pọ ḍighi ni ilọ nạ katue ophighi aani asiigbu phọ ipẹ phọ. R’ikpukpụ, awe phọ aZihova rowạ ghan ni reten obughẹ arukumuan phọ abidị. (Iiḍ. 16:9) Kokaạph ika eḍighi maạr dị nạ ka/tue aḍighi aani ipẹ phọ nyidiphọ? Kaa/tughiạn mọ nạ asoorom apu buphẹ kotue bọ. Iyaạr dị emhạn maạr siẹn eghiil aKristẹn phọ pọ okparạm oghiọm aghisigh bịn. (Mat. 10:22) Ka/pogh asooromhi ipẹ nạ katue bọ aḍighi angọ aZihova odaphạn inyaạm mọ r’adọl phọ anạ. Epẹ phọ ekpanhạ eten dị nạ katue akiọm ghisigh adạph Zizọs mem dị nạ maḍiiny muụm.—Ps. 26:1.

12-13. Eeghe kụ edị nạ kaḍighi eḍighi maạr dị oophugh phọ anạ raḍim? (1 Korịnt 9:16, 17) (Miịn igbe phọ “Kiọm Ni Ghisigh Eghiil Phọ.”)

¹² Kokaạph ika eḍighi maạr dị esi ekpo amem, nạ alhoghoma mọ nạ raaḅereghị ghan iniin phọ iiḅereghị phọ obobọ amoọgh eniin eten arukumuan? Kokaạph ika kẹn eḍighi maạr dị nạ ra/kelhọm ghan mun ibạl aBaibul phọ anạ idiphọ amem dị eten? Eḍighi maạr dị iphẹn phọ emite mem dị nạ maḍiiny muụm eten, pọ ka/kureri mọ nạ o/mhoọgh mun uwaloor phọ aZihova. Nạ o/mhunhughan, kụ mem emhạn mem ipẹ yira rologhoma ghan bọ renmia ghan ni. Eḍighi maạr dị oophugh phọ anạ amhiigh oḍim, pọ tuutughiạn eḍeenhaan otelhedom mọ Pọl. Ii, ghalhamọ r’iduọn odị akparaghạ bọ otuughaạny aZizọs, odị alhegheri ni mọ eeni amem odị ka/moọgh ghan eephuạ oḍighi ipẹ ewạ bọ. (Bạl 1 Korịnt 9:16, 17.) Odị aḅẹm mọ: “Eḅilẹ ghụn ikpaariọm imị, idị eḍighi bọ Enaạn kụ iḅọgh oḍighi phọ ophọn elọgh ḍighaạgh amị.” Iduọn phọ pọ, aPọl asopha oghiọm aghisigh omhunhenhi arukumuan phọ odị etigheri ipẹ odị alhoghoma bọ mem mọ amuphẹ phọ.

¹³ Iniin phọ kẹn, ka/meera ipẹ nạ alhoghoma bọ kụ esopha osopha engọ nyinhạ. Sopha oḍighi oghiọm aghisigh ipẹ ekpeanhaạn bọ etigheri ipẹ nạ alhoghoma bọ. Eḍighi maạr dị nạ aghiọm ni ghisigh aḍighi ghan ipẹ ekpeanhaạn bọ, pọ esighẹ rekị olhoghoma phọ anạ kanmia ni agey. Torobọ ipẹ ketọI bọ, ophamhanhạm egey edeọm ituughạ aBaibul, iiḅereghị, ḅilhẹ r’oghị ghan ituughạ r’epẹ erugh phọ kelhoghonhaạn nyinhạ ḍighaạgh odạph aZizọs mem dị nạ maḍiiny muụm. Nạ aghiọm ghisigh aḍighi ghan iphẹn phọ kekparamhị kẹn bumor r’abumaranhi phọ.—1 Tẹs. 5:11.

“IMITEOM LOOR PHỌ ANYINA EḄILIGHA EPHOGH”

14. Eeghe kụ edị nạ kagbor ghan aaḅeghiọn, kụ eeghe kụ iḍighi? (2 Korịnt 13:5)

¹⁴ Kelọgh kẹn ni ḍighaạgh eḍighi maạr dị nạ agbor ghan aaḅeghiọn loor phọ anạ mem dị nạ aḍiiny muụm. (Bạl 2 Korịnt 13:5.) Mem emhạn mem, ḅilhigha ghan dọl aghuḍum mọ r’aroozọ phọ anạ aphogh mughumọ nạ raaḅereghị ghan ni ḍio ḍio ḍio, rabạl ghan ni kaḅilhẹ atuughạ Baibul phọ, kagbor aghị ituughạ r’epẹ erugh phọ. Kparaghạ owạ areten oḍighi idị nạ kakuamhị akelhọm kirokirọ apakirị iiseeny phọ iphẹn phọ. Esi omaạm, nạ atue ni apuruan loor sipuru phọ iphẹn: ‘Mị katue ni agbạ aagholhomhi ikpanhạ itughemhị aBaibul aḅenhị bunhọn ḍughụm? Araraạr edi ni dị mị katue aḍighi pidị mị akuamhị akelhọm rukumuan epẹ erugh phọ ḍughụm? Mị rakol ghan ni okạr iyaạr phọ mị rawạ bọ siphẹ iiḅereghị phọ amhị, kụ iiḅereghị phọ amhị eḍeenhaan ni mọ mị abeḍenhọm ni aZihova? Mị ragbor ghan ni kaghị ituughạ? Ika kụ idị mị kakuamhị aler ghan rurụ aḅilhẹ apanyanhaạn ghan sipuru otu ituughạ?’

15-16. Eḍeenhaan onyọ umor phọ etughemhị nyinhạ eeghe ilọ oghel odẹgh ophogh?

¹⁵ Enighẹ kẹn ni olhegheri ariisi dị oye phọ adugh. Onyọ umor dị oghol mọ Robert aghaạph ni idị emitenhaan nyodị dị eegholhomhi iphẹn phọ. Odị aḅẹm mọ: “Mem dị mị amhạn 20 asiạ, mị umhoọgh ni oḍighi dị oosophion ghan siḍio kụ oghị. Ḍiniin aḍio, onyanhị olọ otu oḍighi ayoor amhạgh ni ogina amhị oghị k’odị. Odị aḅẹm mọ, onhọn oye ka/tọl aani kụ mọ ‘yoor kokelhọm agey.’ Eḅẹl amem mọ mị ungọ nyodị ewalawalạ egbaạm, kuolọ ekureriom mọ mị uḅenhị nyodị mọ eeye, kụ mị aghaạph iyaạr phọ eḍighi bọ.” Ii, aRobert aghel li odẹgh ophogh phọ, kụ rosẹph ni nyodị esi ipẹ phọ. Kuolọ mem mọ odị aatughiạn bọ aḅula omhạn ilọ ipẹ emite bọ, odị amhiịn mọ odị mutue ni amhegheron eten dị enhighẹ epu siphẹ. ARobert aḅẹm mọ: “Eten phọ mị aghel bọ ḍimhạgh phọ i/gbagarạ agey ḅilhẹ kẹn mị u/nuụn ukel idiphọ aJosef aghel bọ anhịr phọ aPotiphar. (Gen. 39:7-9) Ogbạ agey, iḍigh ni iikia esi amhị iduọn ikparanhaạn bọ imhị oḅẹm mọ eeye mị ra/tu. Iphẹn emite bọ ilhoghonhaạn imhị ḍighaạgh omhiịn mọ ewạ dị mị kakparamhị siya phọ amhị r’aZihova.”

¹⁶ Eeni nạ kamooghọm ni suọ esi oḅilhigha ghan aloor phọ anạ ophogh idiphọ aRobert aḍighi bọ. Ghalhamọ nạ umhoọgh ni ekol oghel odẹgh ophogh phọ, puruan ni loor anạ mọ, ‘Mị unhuụn ni aḅẹm mọ eeye?’ Eḍighi maạr dị nạ amhiịn riisi oḍighi okuamhị, pọ ka/ḅonyonhu azuan. Olhoghi anạ aḅaạl mọ nạ malhọgh elhegh ḍidugh phọ anạ aḍiẹn phọ. Kol ḍidugh phọ anạ aaḅereghị, kụ agbariọn radạ okparamhị osopha phọ anạ orọl r’asiigbu phọ aZihova esererẹ bọ.—Ps. 139:23, 24.

17. Ika kụ edị eḍeenhaan phọ aRobert egbolhomaam ḍien phọ aZihova?

¹⁷ Enhọn iyaạr edi ni dị yira kotue oḅilhẹ otuughạ esi ipẹ emitenhaan bọ Robert. Odị aḅẹm mọ: “Mị roghel ḍimhạgh phọ odị, kụ onyanhị phọ aḅẹm mọ, ‘Nạ akpạr ri apu!’ Kụ mị apuru nyodị iyaạr phọ odị atụ bọ aḅạ ikpo onhụ phọ ipẹ phọ. Kụ odị uḅenhị imhị mọ oyaghirị odị dị aḍighi ghan onyọ Ogbaanhaạn, aḅenhị nyodị mọ oomo iḍoọgh Abugbaanhaạn AZihova odi ghan dọl ughelhe kụ roogboronhom ghan ni omheel oḍighanhaan oḍighi idị i/nighẹ mem dị eepoogh phọ emite. Kụ odị aḅenhị oyaghirị phọ odị mọ odị kudẹgh imhị apogh. Olhoghi amhị aḅaạl agey olhegheri mọ mị maghuenhi ḍien aZihova.”

18. Eeghe kụ edị nạ masopha oḍighi mem dị nạ aḍiiny muụm? (Miịn igbe phọ “Asikoọl Arumhuoghaạph Dị Nạ Kakelhọm.”)

¹⁸ Mem dị nạ aḅọgh loor anạ angọ aZihova kụ aḍiiny muụm, nạ raḍeenhaan ghan mọ nạ rawạ ni oḅaalhamhị aḍien phọ odị etigheri dọl dị nạ asoman. Kụ nạ katue ni akuphom owol mọ aZihova alegheri ni iiḅaghamhị phọ ḅilhẹ rodẹgh ophogh phọ nạ rakaran bọ. Odị kasẹph ni ikuph phọ nạ ralọgh bọ orọl adọl dị ekpẹ oḍuom olhoghi. Kụ nạ katue ni akuphom owol mọ odị kangọ ni nyinhạ inyaạm oḍighi iduọn phọ dị eego esi uwaloor iigbia phọ odị. (Luk 11:11-13) R’olhoghonhaạn aḍighaạgh aZihova, nạ katue ni akị ghisigh adạph ghan Zizọs mem dị nạ aḍiiny muụm.