Nạ Maakolhobian Ni Oḅọgh Aloor Anạ Ongọ AZihova?

1-2. Eeghe kụ edị oye kaḍighi kụ agbi oḍiiny amuụm?

ESI oogh asiạ epẹ omhạn, awe dị ropel li erubal moḍiiny ni muụm idiphọ Abugbaanhaạn AZihova. Ibadị abuẹn phọ utughemhị igey phọ “k’eghoroghọr” idiphọ aTimoti oḅẹl okuron asiạ phọ. (2 Tim. 3:14, 15) Abuniin momhanhạm ni kụ otuughạ, kụ abunhọn asiạ meghị ni kụ otuughạ aani igey phọ. Esi omaạm, oniin anhịr dị atuughạ Baibul phọ r’Abugbaanhaạn AZihova aḍiiny muụm mem dị mamhạn 97 asiạ!

² Eḍighi maạr dị rotughemhị ghan nyinhạ Baibul phọ obobọ odẹ r’onhiin anạ dị oḍighi Bugbaanhaạn kụ rookonhom nyinhạ, nạ mamhiigh ni raatughiạn ilọ oḍiiny amuụm ḍughụm? Aḍiphẹ phọ aḍimạ aḍiigbu ni! Tutụ nạ kaḍiiny muụm pọ nạ amoọgh ophụr oḅọgh aloor anạ ongọ aZihova. Emhuoghaạph phọ ephẹn phọ kekaạph iyaạr dị oḅọgh aloor ongọ aZihova remạ ghan. Kelhoghonhaạn nyinhạ ḍighaạgh kẹn omhiịn iyaạr phọ eḍighi ḅo kụ ephigh i/lo bọ otuạn okulhẹ owol anạ mem dị rokaạph ilọ ogbatạn edạ phọ epẹ phọ ḅilhẹ r’oḍiiny amuụm mem dị nạ maakolhobian ni.

OḄỌGH ALOOR ONGỌ AZIHOVA P’EEGHE?

 3. Ngọ reḍeenhaan awe siphẹ aBaibul phọ dị oḅọgh loor ongọ aZihova.

³ Siphẹ aBaibul phọ, oye dị aḅọgh loor angọ aZihova pọ oye dị asaḅạr okumuan eten dị egbatanhaạn. Eelhe phọ Izrạl iḍighi eelhe dị oḅọgh ongọ aZihova. Kuolọ abuniin siphẹ eelhe phọ uḅọgh ni loor ongọ aZihova eten dị egbatanhaạn. Esi omaạm, Eeron azua ghan ni eghoony dị odamaghị gol dị ogẹ mọ “moḅọgh ongọ aZihova.” Agol phọ odamaghị bọ siphẹ eghoony phọ odị iḍeenhaan ghan mọ mogbatạn nyodị okumuan esi dị egbatanhaạn—idiphọ ogbogh opinyọn rikiạ Izrạl. (Lev. 8:9) ANazaraịt phọ kẹn uḍighi we dị oḅọgh loor ongọ aZihova eten dị egbatanhaạn. Ekpo onhụ phọ “Nazaraịt,” usighẹ esi ekpo onhụ aHibru phọ nazirʹ, kụ remạ ghan mọ “Odị Ogbatạn,” obobọ “Odị Aḅọgh Loor Angọ.” ANazaraịt umhoọgh iilhogh dị egbatanhaạn dị ogeanhaạn bidị siphẹ Olhogh phọ AMozis dị bidị odạph ghan.—Num. 6:2-8.

 4. (a) Mem dị nạ aḅọgh loor anạ angọ aZihova eeghe kụ keḍighi iyaạr dị kemạn maạr epu siphẹ aghuḍum mọ anạ? (b) ‘Osooromhi aIoor omheeraam aḍuugh’ remạ ghan eeghe? (Miịn kẹn afoto phọ.)

⁴ Mem dị nạ aḅọgh loor anạ angọ aZihova, pọ nạ masopha oḍighi onyọ amatuạn aZizọs Kraist ḅilhẹ r’osighẹ ogbi phọ Enhaạn idiphọ iyaạr dị emhạn maạr siphẹ aghuḍum mọ anạ. Oḅọgh aloor ongọ aZihova idiphọ onyọ aKristẹn eḅaramaạm eeghe? AZizọs aḅẹm mọ: “Oye Iọ rawạ odạph amị asooromi Ioor ameeraam ḍuugh.” (Mat. 16:24) Ikpo-onhụ aGrik phọ ogbạ bọ otenheghi mọ “asooromi Ioor ameeraam ḍuugh” kotue ni ogbạ kẹn mọ “aḅenhị loor odị mọ eeye.” Idiphọ ebenhẹ aZihova dị maḅọgh loor angọ, kewạ mọ kel raraạr dị egbạgh ogbi phọ odị. (2 Kọr. 5:14, 15) Araraạr phọ iphẹn phọ eḅaramaạm “eḍighinom iyaạr dị iphulupul phọ reḍighi ghan,” idiphọ ipesi. (Gal. 5:19-21; 1 Kọr. 6:18) Odạph iilhogh phọ Enhaạn keemọr ri esi anạ ḍughụm? Kee/mọr esi anạ eḍighi maạr dị nạ aphomhoghiạn aZihova aḅilhẹ akuphom owol mọ iilhogh phọ odị ilọ imạ anạ ni. (Ps. 119:97; Isa. 48:17, 18) Onyọ umor dị oghol mọ Nicholas aḅẹm mọ, “Nạ atue ni amiịn siigbu phọ aZihova idiphọ ikoli dị rekikima nyinhạ oḍighi atorobọ iyaạr dị eḅeraạn nyinhạ obobọ idiphọ oghoony dị aghoph nyinhạ esi idimini-ḅuagụ.”

 5. (a) Ika kụ edị nạ katue aḅọgh loor anạ angọ aZihova? (b) Eeghe kụ ogbaranhaạn dị odi esi oḅọgh aloor ongọ r’oḍiiny amuụm? (Miịn kẹn afoto phọ.)

⁵ Ika kụ edị nạ kaḅọgh bọ loor anạ angọ aZihova? Nạ kaaḅereghị kụ aguanhaan nyodị mọ nạ kakumu ogina odị aḅilhẹ asighẹ ogbi phọ odị aḍighi eḅẹl siphẹ aghuḍum mọ anạ. Iphẹn phọ remạ ghan mọ nạ raguanhaan ghan aZihova mọ nạ kakiọm ghisigh apomhoghiạn nyodị r’oomo ologhi, r’oomo uwaIoor, r’oomo iitughiạn, r’oomo inyaạm anạ. (Mạk 12:30) Nạ kaḅọgh loor anạ angọ aZihova esi dị ogina anạ bịn odi, kụ eḍighi iyaạr dị edi igbo aZihova r’anạ bịn. Ḍieriphọ aḍighaạgh phọ, oḍiiny amuụm eḍighi iyaạr dị koḍighi esi ogbo; reḅenhị ghan we phọ romiịn bọ nyinhạ mọ nạ maḅọgh loor anạ angọ aZihova. Ikunya oḅọgh aloor phọ anạ ongọ aZihova eḍighi iyaạr iigbia, esi iduọn phọ aḍiigbu anạ eḍighi omhunhenhi ipẹ nạ aguan bọ, kụ aZihova rawạ mọ tuụgh ni aḍighi.—Eccl. 5:4, 5.

UTỤ EEGHE KỤ NẠ KAḄỌGH BỌ LOOR ANGỌ AZIHOVA?

 6. Eeghe kụ renyu ghan oye oḅọgh aloor ongọ aZihova?

⁶ Ekpanhạ ephigh phọ nạ atụ bọ aḅọgh loor angọ aZihova pọ aloor ephomhoghiạn phọ nạ amhoọgh bọ aghị esi aZihova. Ephomhoghiạn phọ anạ ephẹn phọ i/kpasị esi inyuughiom anạ bịn. Kuolọ ekpasị kẹn esi “olegheri iyaạr r’onaghạn aḍughụm mọ” nạ mamhoọgh bọ otuughạ ilọ aZihova r’ogbi phọ odị kụ mekọm bọ idị ephomhoghiạn phọ anạ esi odị mebụgh. (Kọl. 1:9) Ituughạ aBaibul phọ anạ meḍighi idị nạ makuphom owol mọ (1) aZihova odi ni, (2) m’aBaibul phọ aḍighi Ekpo Onhụ Enhaạn, ḅilhẹ (3) mọ odị asighẹ oḍighom mọ odị kụ ramunenhiom ogbi phọ odị.

 7. Eeghe kụ edị emhoghi mọ oghị ghisigh oḍighi ghan kụ ogbi oḅọgh aloor ongọ Enhaạn?

⁷ Buphẹ moḅọgh bọ loor ongọ aZihova olhegheri ikpanhạ igey aBaibul phọ kụ oghị ghisigh ozọ ghan idị emhoọgh muḅọph r’asiigbu phọ Enhaạn. Bidị roḍighi ghan ipẹ bidị kotue bọ ogbeelhom omheeraam mọ abidị oḅenhị abunhọn. (Mat. 28:19, 20) Ephomhoghiạn phọ abidị esi aZihova mekạr kụ epoph, kụ k’ekpom bidị okạr rowạ okpasị oomo emooph abidị aZihova. Ko/tue okaạph aani iduọn phọ ilọ anạ ḍughụm? Oye dị amhoọgh odọ ephomhoghiạn phọ ephẹn phọ, ka/tuạn oḍighi idị olhoghi opọ ratughemhị bọ nyodị obobọ odẹ r’onhiin odị kaḅaạl kụ aḅọgh loor odị angọ aZihova aḅilhẹ aḍiiny muụm; kụ kẹn ka/tuạn mọ arighirị odị roḍighi bịn kụ aḍighi aani.

 8. Ika kụ edị eegharạ osereghiạn ghan rilhoghonhaạn ghan iyira ḍighaạgh oḅọgh aloor ayira ongọ aZihova? (Psalm 116:12-14)

⁸ Mem dị nạ aatughiạn oomo imạ phọ aZihova maḍighinhaan bọ nyinhạ, nạ kasereghiạn ni nyodị bịn enyu nyinhạ oḅọgh aloor anạ ongọ aZihova. (Bạl Psalm 116:12-14.) ABaibul phọ aḅẹm mọ aZihova kụ Ongoọm “oomo phọ igey inmo phọ yira omoọgh bọ.” (Jems. 1:17) Inmo dị epeleghiom esi oomo phọ idị pọ ekiạ Oọny phọ odị, Zizọs. Gbiom olhoghi anạ ilọ iikiạ inmo phọ ipẹ phọ! Ekiạ etagharạn phọ kụ ighughuron bọ eten dị yira kotue omoọgh siya dị ekpạr r’aZihova. Ḅilhẹ kẹn, odị mangọ nyinhạ eepoogh orọl k’agee-pọ. (1 Jọn 4:9, 10, 19) Oḅọgh aloor anạ ongọ aZihova kụ eniin emạ eten dị nạ katue aḍeenhaan mọ nạ asereghiạn ni eḍeenhaan ephomhoghiạn phọ odị epelheghiom bọ, ḅilhẹ r’ipheriphọ aḍisẹph phọ aZihova mangọ bọ nyinhạ. (Deut. 16:17; 2 Kọr. 5:15) Okaạph ni ilọ odọ osereghiạn phọ ophọn phọ siphẹ aḍinyạ phọ Kelhọm Ghuḍum K’agee-pọ! emhuoghaạph phọ 46 ekpịgh phọ 4, eḅarạm bọ vidio iraạr-ikalhạ phọ Oḅọgh Ghan Inmo Anạ Ongọ Enhaạn.

NẠ MAAKOLHOBIAN NI OḄỌGH ALOOR ONGỌ R’OḌIINY AMUỤM?

 9. Uḍighi ika kụ i/wạ bọ dị oye kaatughiạn mọ rokpaariọm ni nyodị oḅọgh aloor ongọ aZihova?

⁹ Nạ atue ni aḅẹm mọ mị koo/kolhobian oḅọgh aloor ongọ r’oḍiiny amuụm. Eeni eḅilhẹ ni ewạ dị nạ kanmeeghi raraạr siphẹ adọl aghuḍum mọ anạ orue odaphạn asiigbu phọ aZihova, obobọ eeni emoghi mem orue okparamhị omheeraam mọ anạ. (Kọl. 2:6, 7) Aḍiphoph oomo awe re/ḍighi ghan iniin, oomo iḍoọgh kụ ro/ḅọgh ghan loor kongọ oḅilhẹ oḍiiny muụm eniin phọ amem mọ. Kparaghạ omhiịn ariisi dị ewạ ooḅenhion, kụ alhọgh ikuph oḍighi ipẹ nạ katue bọ, kuolọ ka/sighẹ loor anạ atomaạm bunhọn.—Gal. 6:4, 5.

10. Eeghe kụ edị nạ kaḍighi eḍighi maạr dị nạ aatughiạn mọ ke/teẹny mem dị nạ kaḅọgh loor angọ aḅilhẹ aḍiiny muụm? (Miịn kẹn igbe phọ “Ilọ Abuphẹ Ookonhom Bọ Siẹn Igey Phọ.”)

¹⁰ Ghalhamọ nạ koo/kolhobian ni oḅọgh aloor ongọ aZihova nyiidiphọ, pọ seere ni ipẹ phọ olhoghi anạ idiphọ aḍiigbu dị nạ raporogh oteẹny. Lọm aZihova olhoghonhaạn aḍighaạgh orue onmeeghi araraạr dị emhoghi siphẹ adọl aghuḍum mọ anạ. (Fil. 2:13; 3:16) Nạ katue ni akuphom owol mọ odị kanaghạn ni iiḅereghị phọ anạ aḅilhẹ angọ nyinhạ olhoghonhaạn aḍighaạgh.—1 Jọn 5:14.

IYAẠR PHỌ ABUNIIN OTỤ BỌ ROKIILHAAN

11. Ika kụ edị aZihova kalhoghonhaạn nyinhạ ḍighaạgh ophamhanhạm aḍimheerạ phọ anạ esi odị?

¹¹ Abuniin dị monyaaghiạn ni oḅọgh aloor ongọ oḍiiny amuụm oḅilhẹ ni bịn rokiilhaan. Bidị rootughiạn ghan mọ, ‘koporogh bidị eḍighi maạr dị bidị oḍiiny muụm kụ oḍighi igbogh ikarạph.’ Eḍighi maạr dị nạ amhoọgh odọ oghiilhaan phọ opọ phọ, pọ nạ katue ni akuphom owol mọ aZihova kangọ ni nyinhạ torobọ iyaạr dị nạ amhoghi ‘obọ nạ arue arọl dọl phọ aḍiphẹ ekpeanaạn bọ Omoọgh-we phọ, aḍighinom ghan ipẹ eḅeraạn bọ nyodị amadạn.’ (Kọl. 1:10) Odị katue kẹn ni angọ nyinhạ inyaạm oḍighi ipẹ enhighẹ bọ. Odị malhoghonhaạn ni ibadị ḍighaạgh oḍighi ipẹ enhighẹ bọ. (1 Kọr. 10:13) Epẹ kụ iyaạr phọ awe dị roporogh ghan siẹn ookpomhoghạn phọ u/kạr bọ u/bụgh. AZihova ranyaamhị ghan ni we phọ odị oghị aghisigh ophạm aḍimheerạ phọ abidị.

12. Eeghe kụ kilhoghonhaạn iyira ḍighaạgh oghel igbogh ikarạph?

¹² Oomo ayira rosoman ghan ni odẹgh ophogh oḍighi idị i/nighẹ loor e/munughan. (Jems. 1:14) Kuolọ, nạ kụ kasopha ipẹ nạ kaḍighi bọ mem dị nạ asoman odẹgh ophogh—osopha phọ olọ anạ. Nạ kụ kasopha ipẹ nạ katọl bọ dọl aghuḍum mọ anạ. Abuniin awe otue ni oogbakiạn iphẹn phọ. Kuolọ nạ katue ni atuughạ okpor ogbolhẹ ikarạph inyuughiom anạ. Kụ ghalhamọ nạ usoman ni odẹgh ophogh, nạ katue ni asopha oghel ipẹ i/nighẹ bọ. Iiḅereghị eḍighi eniin iyaạr dị ketue kẹn elhoghonhaạn nyinhạ ḍighaạgh okpạr opu odẹgh ophogh. Pamanhạm ituughạ aBaibul dị emhoon. Aghị ghan ituughạ. Ḅenhị aani ghan bunhọn ilọ omheeraam mọ anạ. Ogbor ghan oḍighi araraạr phọ iphẹn phọ kenyaamhị ni nyinhạ oghị aghisigh ophamhanhạm aḍimheerạ phọ anạ esi aZihova. Kụ ka/bulha mọ aZihova odi ni olhoghonhaạn anạ ḍighaạgh.—Gal. 5:16.

13. Eeghe emạ eḍeenhaan kụ edị aJosef aphighi?

¹³ Kedughanhaan nyinhạ ophamhanhạm oghunya phọ anạ eḍighi iyaạr dị nạ asopha k’epẹ omhạn iyaạr dị nạ kaḍighi mem dị nạ asoman odẹgh ophogh. ABaibul phọ akaạph ni ilọ ibadị awe dị oḍighi iduọn phọ, ghalhamọ r’iduọn bidị oḍighi bọ ni we dị u/munughan. Esi omaạm, anhịr aPotiphar akpaariọm ghan ni Josef ḍio etum ḍio orolhạn odị esi. Kuolọ aJosef alhegheri ni iyaạr dị ekpẹ oḍighi. ABaibul phọ aḅẹm mọ “odị o/mheera.” Kụ odị aḅẹm mọ: “Keḍighi bọ ika kụ mị apioghọm sipioghọm dị elheeny iduọn, aḍighi ikarạph risigh Enhaạn?” (Gen. 39:8-10) Dị eegholhaan ni, aJosef alhegheri ni iyaạr dị ewạ mọ odị aḍighi kụ egbi bọ oteẹny amem mọ odị asoman bọ odẹgh ophogh phọ. Ipẹ phọ iḍighi idị edughanhaan nyodị okpạr opu odẹgh ophogh phọ.

14. Ika kụ edị yira kotue otuughạ oghel ikarạph?

¹⁴ Ika kụ edị nạ katue atuughaạny Josef kụ akpạr aani apu odẹgh ophogh? Nạ katue ni asopha nyiidiphọ idị nạ kaḍighi mem dị nạ asoman odẹgh ophogh. Tuughạ oogboronhom ghan oghel araraạr dị aZihova aghel, kụ akparaghạ omhiịn mọ nạ o/seere olhoghi anạ pạ phọ. (Ps. 97:10; 119:165) Nạ aḍighi iduọn phọ pọ nạ ka/meel aḍighanhaan odẹgh ophogh. Loor esi dị nạ masopha k’epẹ omhạn ipẹ nạ kamegheron bọ.

15. Ika kụ edị oye katue aḍeenhaan mọ odị ‘asighẹ oomo ologhi odị kụ rawaạm’ aZihova? (Hibru 11:6)

¹⁵ Eeni nạ malhegheri ni mọ iphẹn kụ igey phọ ḅilhẹ mọ nạ rawạ ni okumu aZihova r’oomo ekpom anạ, kuolọ nạ ko/mhiịn mọ nạ maakolhobian ni oḅọgh aloor ongọ oḅilhẹ oḍiiny amuụm. Nạ katue ni aḍighi ipẹ Uw-emhạ phọ aDevid aḍighi bọ. Nạ katue ni alọm aZihova mọ: “Uuḅeghiọn imhị, Sey Enhaạn, kụ alhegheri olhoghi amhị. Pogh olhoghi amhị, aḅilhẹ awaaghị iitughiạn amhị. Waaghị aphogh mughumọ ikarạph edi ni esi amhị, kụ amhaạr uuḅakị imhị epẹ eten k’agee-pọ phọ.” (Ps. 139:23, 24) AZihova rasẹph ghan ni buphẹ “osighẹ bọ oomo ologhi phọ abidị kụ rowaạm” nyodị. Ikuph phọ nạ ralọgh bọ oteẹny aḍiigbu oḅọgh aloor ongọ oḅilhẹ oḍiiny amuụm reḍeenhaan ghan nyodị mọ ipẹ kụ idị nạ atuụgh ni raḍighi.—Bạl Hibru 11:6.

KIỌM GHISIGH AḌURAAN GHAN ATUMAN AZIHOVA

16-17. Eghẹn eten kụ edị aZihova raḍur ghan buphẹ ookonhom bọ siẹn igey phọ? (Jọn 6:44)

¹⁶ AZizọs aḅẹm mọ aZihova kụ raḍur ghan bumatuạn phọ odị. (Bạl Jọn 6:44.) Gbiom olhoghi anạ idị ipẹ phọ remạ ghan ḅilhẹ r’idị egbolhomaam nyinhạ. AZihova amiịn iyaạr dị enhighẹ esi atorobọ oye dị odị asighẹ alhoghomạ. Odị amiịn bidị idiphọ awe dị odị “asaḅạr,” obobọ “ogbatanhaạn.” (Deut. 7:6.) Ipẹ kụ idị aZihova amhiịn aani nyinhạ.

¹⁷ Kuolọ eeni, nạ onyọ iḍoọgh dị rookonhom siẹn igey phọ. Kụ nạ atue ni aloghoma mọ nạ rakumu ghan aZihova loor iduọn odẹ r’onhiin anạ oḍighi bọ Bugbaanhaạn, mọ aZihova r’aloor kụ nyinhạ o/ḍur olhoghomạ. Kuolọ toroboiperolbọ, aBaibul phọ aḅẹm mọ: “Iḍuraan etuman Enaạn. Odị kaḍuraan aani ni ituman inyina.” (Jems. 4:8; 1 Chron. 28:9) Mem dị nạ agbatạn eḅẹl edạ oḍuraan otuman aZihova, odị raḍuraan ghan kẹn katuman nyinhạ. AZihova nyinhạ o/mhiịn idiphọ apakirị egu awe bịn. Odị raḍur ghan torobọ onyọ ayira—ghalhamọ rookonhom ni nyinhạ siẹn igey phọ. Mem dị oye phọ agbatạn eḅẹl edạ oḍuraan otuman aZihova, Odị ramegheron ghan eten phọ epẹ aJems 4:8, eghaạph bọ.—Poghom 2 Tesalonikạ 2:13.

18. Yira kooḅeghiọn eeghe emhuoghaạph phọ etum bọ siẹn? (Psalm 40:8)

¹⁸ Mem dị nạ aḅọgh loor anạ angọ aZihova kụ aḍiiny muụm, nạ ratuughaạny ghan Zizọs, aḅọgh bọ loor odị eten dị u/kpaariọm angọ Odẹ phọ odị, oḍighi atorobọ iyaạr dị odị rawạ. (Bạl Psalm 40:8; Hib. 10:7) Siphẹ emhuoghaạph phọ etum bọ siẹn, yira kokaạph ilọ araraạr dị kelhoghonhaạn nyinhạ ḍighaạgh oghị aghisigh okumu ghan aZihova mem dị nạ maḍiiny muụm.