PWONY ME 14

Wek Lok ma Pigi Tego Ocung ka Maleng

Jo Ibru 8:1

GIN ME ATIMA: Kony jo ma tye ka winyo lokki me lubo pwony-nyi, dok inyut ka maleng kit ma lok ma pigi tego kubbe kwede ki wi pwony-nyi ki gin ma imito cobone.

KIT ME TIMONE:

Bed ki gin ma imito cobone. Niang kong ka pwony-nyi tye me miyo ngec, moko gin moni, nyo cuko cwiny lwak, ci mi i yo ma lubbe ki gin ma imito cobone. Nen ni lokki ducu ma pigi tego konyi me cobo tyen lok me pwony-nyi.

Penye kekeni ni: ‘Lapeny ango ma dano guromo penya kwede? Ka dong gunongo lagamme, lapeny ango ma dok gitwero penyone?’ I ngeye, can lokki kore ki kore wek jo ma tye ka winyone gulubi, guniang, dok guye.
Nwo wi lok me pwony-nyi. Bed ka lok i kom wi lok me pwony-nyi ka iwoto ki miyone kun inwoyo nyig lok ma pigi tego me wi pwony-nyi.
Wek lok ma pigi tego ocung ka maleng dok obed yot me niang iye. Yer lok ma pigi tego ma kubbe ki wi pwony-nyi dok ma itwero pwonyone maber i wang cawa ma kimini. Wek lok ma pigi tego gubed nok, kun iwacogi ka maleng. Ling kong manok ma peya ikobo i mukene. Wek dano gulubi maber ka itye ka kobo i lok mukene ma pire tek.

Itwero tito lok ma pigi tego i acakki me pwony-nyi wek okony lwak me lubone nyo itwero nwoyone i agikki me pwony-nyi wek wigi opo iye.