“Die lied van die see”—’n Manuskrip wat ’n gaping oorbrug

OP 22 Mei 2007 is ’n fragment van ’n Hebreeuse boekrol wat uit die sewende of agtste eeu G.J. dateer, in die Israel-museum in Jerusalem uitgestal. Dit is ’n manuskrip van Eksodus 13:19–16:1. Dit sluit in wat bekend staan as “Die lied van die see”—die oorwinningslied wat die Israeliete ná hulle wonderdadige verlossing by die Rooi See gesing het. Waarom is die onthulling van hierdie boekrolfragment so betekenisvol?

Die antwoord hou verband met die tyd waaruit die manuskrip dateer. Die Dooie See-rolle is tussen die derde eeu v.G.J. en die eerste eeu G.J. geskryf. Voordat hulle sowat 60 jaar gelede ontdek is, was die oudste Hebreeuse manuskrip die Aleppo-kodeks, wat uit 930 G.J. dateer. Met die uitsondering van ’n paar fragmente was daar nog geen ander Hebreeuse manuskripte gevind wat uit die tussenperiode van etlike honderde jare dateer nie.

“‘Die lied van die see’-manuskrip”, sê James S. Snyder, die direkteur van die Israel-museum, “oorbrug die gaping in die geskiedenis tussen die Dooie See-rolle . . . en die Aleppo-kodeks.” Volgens hom is hierdie manuskrip tesame met ander ou Bybelse tekste “’n unieke voorbeeld van tekstuele kontinuïteit”.

Daar word gemeen dat hierdie boekrolfragment een van die talle manuskripte is wat aan die einde van die 19de eeu in ’n sinagoge in Kaïro, Egipte, ontdek is. Maar ’n privaat versamelaar van Hebreeuse manuskripte was nie bewus van die belangrikheid daarvan totdat hy in die laat 1970’s ’n deskundige geraadpleeg het nie. Die fragment is toe volgens die koolstofdateringsmetode gedateer en daarna in ’n argief bewaar totdat dit in die Israel-museum uitgestal is.

Adolfo Roitman, die hoof van die Heiligdom van die Boek, Israel-museum, en kurator van die Dooie See-rolle, sê oor die belangrikheid van die boekrolfragment: “‘Die lied van die see’-manuskrip toon met watter ontsettende getrouheid die Masoretiese weergawe van die Bybel oor die eeue oorgedra is. Dit is ongelooflik in watter mate die kenmerkende versleer van ‘Die lied van die see’ vandag dieselfde is as in die 7de-8ste eeu.”

Die Bybel is die geïnspireerde Woord van God, en Jehovah is hoofsaaklik verantwoordelik vir die bewaring daarvan. Daarbenewens is die Skrif noukeurig deur kopiïste oorgeskryf. Die Bybelteks wat ons vandag gebruik, is dus onteenseglik betroubaar.

[Foto-erkenning op bladsy 32]

Courtesy of Israel Museum, Jerusalem