Wat het Kornelius gehelp om hom te laat doop? Ons lees dat “hy en almal in sy huis . . . God aanbid” het. En Kornelius het voortdurend smeekgebede tot God gedoen (Hand. 10:2). Toe Petrus die goeie nuus aan Kornelius bekend gemaak het, het hy en sy gesin Christus aanvaar en hulle onmiddellik laat doop (Hand. 10:​47, 48). Kornelius was beslis bereid om enige nodige veranderinge te maak sodat hy Jehovah saam met sy gesin kon aanbid (Jos. 24:15; Hand. 10:​24, 33). Kornelius kon toegelaat het dat sy posisie keer dat hy ’n Christen word. Maar hy het nie toegelaat dat dit gebeur nie. Sal jy groot veranderinge in jou lewe moet maak om jou te laat doop? Indien wel, sal Jehovah jou Helper wees. Hy sal jou vasbeslotenheid seën om hom in ooreenstemming met Bybelbeginsels te dien. w25.03 5 ¶12-13

As jy negatiewe stories hoor oor die organisasie of oor die broers wat die leiding neem, moet jy onthou hoe God se vyande Jesus en die eerste-eeuse dissipels behandel het. Vandag word Jehovah se volk vervolg, en daar word leuens oor hulle vertel presies soos die Bybel voorspel het (Matt. 5:​11, 12). Valse stories sal ons nie mislei as ons besef wie die bron daarvan is en onmiddellik iets doen om onsself daarteen te beskerm nie. Hoe kan ons onsself daarteen beskerm? Verwerp valse stories. Die apostel Paulus het duidelike instruksies gegee oor wat ons moet doen as ons valse stories hoor. Hy het vir Timoteus gesê om ‘sekere persone te beveel om nie aandag te skenk aan valse stories nie’ en om ‘valse stories te verwerp’ (1 Tim. 1:​3, 4). Ons verwerp valse stories omdat ons besef wie die bron van die inligting is. Ons bly by die “gesonde woorde” van waarheid. – 2 Tim. 1:13. w24.04 11 ¶16; 13 ¶17

Bly verenig met dié wat lojaal is aan Jehovah. God wil hê dat ons verenig moet wees in ons aanbidding. Ons sal verenig bly solank ons aan die waarheid vashou. Enige iemand wat van die waarheid afdwaal, veroorsaak verdeeldheid in die gemeente, en daarom waarsku God ons om ‘hulle te vermy’. Anders kan ons self van die waarheid afdwaal (Rom. 16:17). Wanneer ons die waarheid herken en styf daaraan vashou, sal ons geestelik veilig en gesond bly (Ef. 4:​15, 16). Ons sal nie mislei word deur Satan se valse leringe en propaganda nie, en ons sal veilig in Jehovah se sorg bly gedurende die groot verdrukking. Hou aan om styf vas te hou aan wat waar is, “en die God van vrede sal met [ons] wees”. – Fil. 4:​8, 9. w24.07 13 ¶16-17