Elke Christen moet sy Bybelopgeleide gewete gebruik waar dit kom by iemand wat uit die gemeente verwyder is. Party voel miskien gemaklik daarmee om die persoon te groet of by die vergadering te verwelkom. Maar ons sal nie ’n lang gesprek met die individu hê of met hom assosieer nie. Party wonder dalk: ‘Sê die Bybel nie dat ’n Christen wat so ’n persoon groet, ’n deel aan sy goddelose werke het nie?’ (2 Joh. 9-11). Die konteks van hierdie vers wys dat hierdie riglyn na afvalliges en ander verwys wat verkeerde gedrag aktief bevorder (Op. 2:20). Daarom sal die ouermanne nie reël om ’n persoon te besoek as hy afvallige leringe of ander verkeerde gedrag aktief bevorder nie. Daar is natuurlik hoop dat hy tot sy sinne sal kom. Maar totdat dit gebeur, sal ons nie so ’n persoon groet of hom nooi om ’n gemeentelike vergadering by te woon nie. w24.08 30-31 ¶14-15

Nadat Jesus ’n skare kos gegee het, het hy sy apostels met ’n boot laat terugkeer na Kapernaum, en hy het weggegaan na die berg toe en op hierdie manier die skare se pogings om hom koning te maak, vermy (Joh. 6:​16-20). Terwyl die apostels geseil het, was daar ’n storm met ’n baie sterk wind, wat groot golwe veroorsaak het. Toe het Jesus na hulle toe gekom en op die water geloop. En hy het die apostel Petrus genooi om ook op die water te loop (Matt. 14:​22-31). Die oomblik toe Jesus in die boot klim, het die wind gaan lê. Die dissipels was verbaas en het gesê: “U is werklik God se Seun” (Matt. 14:33). Maar hulle het nie die verband gesien tussen hierdie wonderwerk en wat vroeër met die skare gebeur het nie. Let op wat Markus oor dieselfde gebeurtenis geskryf het: “[Die apostels] was stomgeslaan, want hulle het nie begryp wat die wonderwerk met die brode beteken het nie” (Mark. 6:​50-52). Die dissipels het nie verstaan dat Jehovah Jesus die krag gegee het om baie meer te doen as om brood te voorsien nie. w24.12 5 ¶7

Ons kan wys dat ons Jehovah se liefde waardeer deur hierdie Gedenkmaalseisoen te gebruik om vir Jehovah te wys hoe dankbaar ons is vir die losprys. Ons beplan nie net om die Gedenkmaal self by te woon nie, maar ons kan ander ook nooi om dit by te woon. Verduidelik vir dié wat jy nooi, wat by die Gedenkmaal sal gebeur. Dit sal goed wees om vir hulle die video’s Waarom het Jesus gesterf? en Herdenk Jesus se dood op jw.org te wys. Ouermanne moet seker maak dat hulle onbedrywiges nooi. Dink net aan die vreugde wat daar in die hemel en op die aarde is as party van Jehovah se verlore skape beweeg word om na sy kudde terug te keer! (Luk. 15:​4-7). En by die Gedenkmaal wil ons nie net mekaar groet nie, maar ons wil ’n punt daarvan maak om veral dié te groet wat nuut is of wat lanklaas daar was. Ons wil hulle welkom laat voel! – Rom. 12:13. w25.01 29 ¶15