“Hulle sal nog in die grysheid bly floreer”

BAIE mense in Mediterreense lande plant dadelpalms in hulle tuin. Hierdie bome is bekend vir hulle prag en heerlike vrugte. Wat meer is, hulle floreer ver oor ’n honderd jaar lank.

Koning Salomo van eertydse Israel het in digterlike taal die gestalte van ’n beeldskone Sulammitiese meisie met dié van ’n palmboom vergelyk (Hooglied 7:7). Die boek Plants of the Bible sê: “Die Hebreeuse woord vir die dadelpalm is ‘tàmâr’. . . . Dit het vir die Jode ’n simbool van grasie en elegansie geword, en hulle het dit dikwels as ’n vrouenaam gebruik.” Salomo se beeldskone halfsuster is byvoorbeeld Tamar genoem (2 Samuel 13:1). Party ouers gee vandag nog hierdie naam aan hulle dogters.

Pragtige vroue is nie die enigstes wat met ’n palmboom vergelyk word nie. Die psalmis het gesing: “Die regverdige sal bloei soos ’n palmboom; soos ’n seder op die Libanon sal hy groot word. Dié wat in die huis van Jehovah geplant is, in die voorhowe van ons God, hulle sal bloei. Hulle sal nog in die grysheid bly floreer, vet en vars sal hulle bly.”—Psalm 92:12-14.

Dié wat God getrou gedurende hulle oudag dien, het figuurlik gesproke baie in gemeen met die elegante palmboom. “Grysheid is ’n pragtige kroon wanneer dit op die weg van regverdigheid gevind word”, sê die Bybel (Spreuke 16:31). Hoewel hulle fisiese krag dalk wegkwyn namate die jare vorder, kan bejaardes hulle geestelike krag behou deur hulle te voed deur ’n gereelde studie van God se Woord, die Bybel (Psalm 1:1-3; Jeremia 17:7, 8). Danksy hulle innemende woorde en goeie voorbeeld is getroue bejaardes ’n groot bron van aanmoediging vir ander en hou hulle aan om jaar ná jaar vrug te dra (Titus 2:2-5; Hebreërs 13:15, 16). Soos die dadelpalm, kan bejaardes op hulle oudag floreer.