DIE CHRISTELIKE LEWENSWYSE

Iets nuuts op die Lewe en Bediening-vergadering

Vanaf Januarie 2018 gaan studienotas, prente en video’s van die aanlyn studie-uitgawe van die New World Translation of the Holy Scriptures (nwtsty-E) ook tydens die Lewe en Bediening-vergadering bespreek word, selfs al is die studie-uitgawe nog nie in Afrikaans beskikbaar nie. Hierdie inligting sal beslis help om jou voorbereiding vir die vergaderinge baie interessant en leersaam te maak. En dit kan jou verhouding met ons liefdevolle Vader, Jehovah, nog sterker maak!

STUDIENOTAS

Die studienotas help ons om Bybelverse beter te verstaan deur inligting oor die kultuur, omgewing en taal te voorsien.

Matteus 12:20

Smeulende vlaspit: Die lamp wat in die meeste huise gebruik is, was ’n kleipotjie met olyfolie daarin. ’n Vlaspit het die olie opgetrek sodat die vlam kon brand. Die Griekse woorde “smeulende vlaspit” kan verwys na ’n lamppit wat nog gloei en waar daar nog rook uitkom al is die vlam dood of besig om dood te gaan. Die profesie in Jesaja 42:3 het voorspel dat Jesus jammer sou voel vir mense; hy sou nooit die laaste vonkie van hoop in nederige en onderdrukte mense uitdoof nie.

Matteus 26:13

Voorwaar: Dit kom van die Griekse a·menʹ, wat ’n transliterasie is van die Hebreeuse ʼa·menʹ, en dit beteken “beslis” of “laat dit so wees”. Jesus het hierdie woord gereeld gebruik voordat hy iets gesê, belowe of voorspel het. Hy het dit gebruik om te beklemtoon dat sy woorde heeltemal waar en betroubaar is. As ’n mens na heilige geskrifte kyk, lyk dit asof Jesus die enigste een was wat “voorwaar”, of amen, op hierdie manier gebruik het. Wanneer Jesus hierdie woord herhaal het (a·menʹ a·menʹ), soos in die Evangelieverslag van Johannes, is dit vertaal as “voorwaar, voorwaar”.—Joh 1:51.

MEDIA

Foto’s, prente, animasie- en stilvideo’s help ons om sekere dinge in die Bybel beter te verstaan.

Betfage, die Olyfberg en Jerusalem

Hierdie kort video volg ’n pad na Jerusalem uit die ooste vanaf die hedendaagse dorpie et-Tur, wat dalk Betfage in Bybeltye was, tot by een van die hoër punte van die Olyfberg. Betanië lê oos van Betfage op die oostelike steilte van die Olyfberg. Wanneer Jesus en sy dissipels in Jerusalem was, het hulle gewoonlik in Betanië oorgeslaap. Dit staan vandag bekend as el-ʽAzariyeh (El ʽEizariya), ’n Arabiese naam wat “die plek van Lasarus” beteken. Wanneer Jesus daar was, het hy sonder twyfel by Marta, Maria en Lasarus oorgeslaap (Mt 21:17; Mr 11:11; Lu 21:37; Joh 11:1). Jesus het moontlik dieselfde roete gevolg wat ons op hierdie video sien wanneer hy van hulle huis na Jerusalem gegaan het. Toe Jesus op 9 Nisan 33 HJ op ’n jong donkie oor die Olyfberg na Jerusalem gery het, het hy heel moontlik die pad vanaf Betfage na Jerusalem gebruik.

Pad vanaf Betanië na Betfage
Betfage
Olyfberg
Kidronvallei
Tempelberg

Spyker in ’n hakskeenbeen

Hierdie foto wys ’n replika van ’n ysterspyker van 11,5 cm wat deur ’n mens se hakskeenbeen geslaan is. Die oorspronklike hakskeenbeen is in 1968 tydens uitgrawings in Noord-Jerusalem gevind, en dit kom uit die tyd van die Romeine. Dit bewys dat spykers heel moontlik gebruik is wanneer mense in die ou tyd aan ’n houtpaal gehang is. Toe die Romeinse soldate Jesus Christus aan die paal gehang het, het hulle dalk dieselfde soort spykers gebruik. Hierdie hakskeenbeen is in ’n klipkissie, wat ’n ossuarium genoem word, gevind. Wanneer die dooie persoon heeltemal ontbind het, is die droë bene in so ’n klipkissie gebêre. Dit wys dat iemand wat aan ’n paal gesterf het, wel begrawe kon word.—Mt 27:35.