Jesus het weer eens die vyeboom gebruik om die swak geestelike toestand van die nasie toe te lig. Toe hy vier dae voor sy dood van Betanië na Jerusalem gereis het, het hy ’n vyeboom gesien wat baie blare gehad het, maar nie ’n enkele vrug nie. Aangesien die vroeë vye saam met die blare verskyn—en soms selfs voor die blare—het die feit dat daar geen vrugte aan die boom was nie, getoon dat dit nutteloos was.—Markus 11:13, 14.b

Soos die onvrugbare vyeboom wat gesond gelyk het, het die Joodse nasie ’n bedrieglike uiterlike gehad. Maar hulle het nie godvrugtige vrugte voortgebring nie en uiteindelik Jehovah se eie Seun verwerp. Jesus het die onvrugbare vyeboom vervloek, en die volgende dag het die dissipels opgelet dat dit reeds verdroog het. Daardie verdroogde boom het gepas afgebeeld dat God binnekort die Jode as sy uitverkore volk sou verwerp.—Markus 11:20, 21.