Die nag is amper verby wanneer Petrus Jesus vir die derde keer ontken. Die lede van die Sanhedrin is nou klaar met hulle onwettige verhoor en gaan van mekaar af weg. Vrydagoggend kom hulle weer bymekaar, waarskynlik om die onwettige verhoor wat hulle in die nag gehou het, wettig te laat lyk. Jesus word voor hulle gebring.

Die hof sê weer: “As jy die Christus is, sê vir ons.” Jesus antwoord: “Al sê ek dit vir julle, sal julle dit glad nie glo nie. En al sou ek julle ’n vraag vra, sal julle nie antwoord nie.” Maar Jesus wys dapper vir hulle dat hy die een is wat in Daniël 7:13 voorspel is. Hy sê: “Van nou af sal die Seun van die mens aan die magtige regterhand van God sit.” – Lukas 22:67-69; Matteus 26:63.

Hulle hou aan vra: “Is jy dan die Seun van God?” Jesus antwoord: “Julle sê self dat ek is.” Dit lyk of hierdie antwoord die Jode se besluit regverdig om Jesus op grond van godslastering dood te maak. “Hoekom het ons nog getuienis nodig?” vra hulle (Lukas 22:70, 71; Markus 14:64). Hulle boei Jesus en neem hom na die Romeinse goewerneur Pontius Pilatus.

Judas Iskariot sien dalk hoe hulle Jesus na Pilatus toe neem. Wanneer Judas besef dat Jesus veroordeel is, voel hy spyt. Maar in plaas daarvan om vir God te wys dat hy regtig jammer is, gaan gee hy die 30 silwerstukke terug. Judas sê vir die hoofpriesters: “Ek het gesondig toe ek onskuldige bloed verraai het.” Maar hulle antwoord wys dat hulle nie omgee nie: “Wat het dit met ons te doen? Dit is jou probleem!” – Matteus 27:4.

Judas gooi die 30 silwerstukke in die tempel en maak dinge nog erger deur te probeer om homself dood te maak. Terwyl Judas probeer om homself te hang, breek die tak blykbaar waaraan hy die tou vasmaak. Sy liggaam val op die rotse en bars oop. – Handelinge 1:17, 18.

Dit is nog vroeg in die oggend wanneer Jesus na Pontius Pilatus se paleis geneem word. Die Jode wat hom daarnatoe neem, weier om in te gaan. Hulle dink dat dit hulle onrein sal maak as hulle in kontak kom met nie-Jode. Dit sal beteken dat hulle nie die maaltyd op 15 Nisan mag eet nie, die eerste dag van die Fees van die Ongesuurde Brode, wat as deel van die Pasga-tydperk beskou word.

Pilatus kom uit en vra hulle: “Waarvan beskuldig julle hierdie man?” Hulle antwoord: “As hierdie man nie ’n misdadiger was nie, sou ons hom nie aan u oorgelewer het nie.” Pilatus voel dalk onder druk, en daarom sê hy: “Vat hom dan en oordeel hom volgens julle wet.” Die Jode wys dat dit hulle plan is om Jesus dood te maak, hulle sê: “Ons het nie die reg om enigiemand dood te maak nie.” – Johannes 18:29-31.

As hulle Jesus gedurende die Pasgafees doodmaak, sal dit die mense sekerlik baie kwaad maak en sal hulle dalk in opstand kom. Maar as hulle die Romeine kan kry om Jesus dood te maak op grond van ’n aanklag teen die Romeinse regering, wat die Romeine die reg het om te doen, sal hierdie Jode nie voor die mense verantwoordelik gehou word nie.

Die godsdiensleiers sê nie vir Pilatus dat hulle Jesus vir godslastering veroordeel het nie. Nou beskuldig hulle hom van ’n klomp ander dinge wat nie waar is nie: “Ons het vasgestel dat hierdie man [1] ons nasie opstandig maak. [2] Hy verbied mense om belasting aan die keiser te betaal en [3] sê dat hy Christus, ’n koning, is.” – Lukas 23:2.

As ’n verteenwoordiger van Rome, het Pilatus rede om bekommerd te wees oor die aanklag dat Jesus sê dat hy ’n koning is. So Pilatus gaan weer by die paleis in, roep Jesus na hom toe en vra: “Is jy die Koning van die Jode?” Met ander woorde: ‘Het jy die wet van die regering verbreek deur te sê dat jy ’n koning is in opstand teen die keiser?’ Dalk om uit te vind wat Pilatus alreeds van hom gehoor het, sê Jesus: “Sê u dit uit uself, of het ander u van my vertel?” – Johannes 18:33, 34.

Pilatus beweer dat hy niks van Jesus weet nie, maar dat hy graag meer wil weet. Hy sê: “Ek is mos nie ’n Jood nie.” Hy sê verder: “Jou eie nasie en die hoofpriesters het jou aan my oorgelewer. Wat het jy gedoen?” – Johannes 18:35.

Jesus probeer nie om die vraag of hy ’n koning is te vermy nie. Hy antwoord op ’n manier wat goewerneur Pilatus sekerlik verbaas.

Jesus probeer dit nie vir Pilatus wegsteek dat hy ’n koning is nie. Maar Rome hoef nie bekommerd te wees oor sy Koninkryk nie. Jesus sê: “My Koninkryk is geen deel van hierdie wêreld nie. As my Koninkryk deel van hierdie wêreld was, sou my volgelinge geveg het sodat ek nie aan die Jode oorgelewer word nie. Maar my Koninkryk is nie van hier nie” (Johannes 18:36). Ja, Jesus het ’n Koninkryk, maar dit is nie van hierdie wêreld nie.

Maar Pilatus laat die saak nie daar nie. Hy vra: “Wel, is jy ’n koning?” Jesus se antwoord wys vir Pilatus dat hy reg is oor die feit dat hy ’n koning is. Hy sê: “U sê self dat ek ’n koning is. Hiervoor is ek gebore en hiervoor het ek in die wêreld ingekom, om van die waarheid te getuig. Elkeen wat aan die kant van die waarheid is, luister na my stem.” – Johannes 18:37.

Jesus het vroeër vir Tomas gesê: “Ek is die weg en die waarheid en die lewe.” Nou hoor Pilatus ook dat die rede hoekom Jesus aarde toe gestuur is, is om van “die waarheid” te getuig, die waarheid oor sy Koninkryk. Jesus is vasbeslote om getrou te bly aan hierdie waarheid selfs al moet hy sy lewe verloor. Pilatus vra: “Wat is waarheid?”, maar hy wag nie vir ’n antwoord nie. Hy voel dat hy genoeg gehoor het om te besluit wat met hierdie man moet gebeur. – Johannes 14:6; 18:38.

Pilatus gaan nou terug na die skare wat buite die paleis wag. Jesus staan blykbaar langs hom wanneer hy vir die hoofpriesters en dié wat saam met hulle is, sê: “Ek vind nie bewyse dat hierdie man enige misdaad gepleeg het nie.” Die skare is kwaad oor hierdie besluit en sê: “Hy steek die volk op deur die mense in die hele Judea te leer, van Galilea af en selfs tot hier.” – Lukas 23:4, 5.

Pilatus is sekerlik verbaas oor hoe onredelik die Jode is. Terwyl die hoofpriesters en ouermanne aanhou skree, vra Pilatus vir Jesus: “Hoor jy nie al die dinge waarvan hulle jou beskuldig nie?” (Matteus 27:13). Jesus antwoord hom nie. Dit verbaas Pilatus om te sien hoe kalm Jesus bly, al sê hulle al hierdie dinge wat nie waar is nie.

Die Jode het gesê dat Jesus “van Galilea af” begin het. Pilatus besef dat Jesus eintlik ’n Galileër is. Dit gee Pilatus ’n idee oor hoe hy dalk weg kan kom van die verantwoordelikheid om Jesus te oordeel. Herodes Antipas (die seun van Herodes die Grote) is die heerser van Galilea, en hy is in Jerusalem vir die Pasgaseisoen. So Pilatus stuur Jesus na Herodes. Dit is Herodes Antipas wat Johannes die Doper se kop laat afkap het. Later, toe Herodes hoor dat Jesus wonderwerke doen, was hy bekommerd dat Jesus dalk Johannes is wat uit die dood opgewek is. – Lukas 9:7-9.

Herodes is nou baie bly dat hy Jesus gaan sien. Dit is nie omdat hy Jesus wil help of wil uitvind of die beskuldigings teen hom waar is nie. Herodes is maar net nuuskierig en hy ‘hoop dat Jesus die een of ander teken sal doen’ (Lukas 23:8). Maar Jesus gee hom nie wat hy wil hê nie. Om die waarheid te sê, terwyl Herodes hom vrae vra, sê Jesus nie ’n woord nie. Herodes is teleurgesteld en hy en sy soldate “verneder” Jesus (Lukas 23:11). Hulle trek vir hom ’n mooi kleed aan en spot hom. Dan stuur Herodes Jesus terug na Pilatus. Herodes en Pilatus was vyande, maar nou word hulle goeie vriende.

Wanneer Jesus teruggaan na Pilatus, roep hy die hoofpriesters, die Joodse leiers en die mense en sê: “Ek het hom voor julle verhoor, maar ek kon geen bewyse vind van die aanklagte wat julle teen hierdie man inbring nie. Herodes kon ook nie enige bewyse vind nie, want hy het hom na ons toe teruggestuur, en hy het niks gedoen wat die dood verdien nie. Ek sal hom dus straf en vrylaat.” – Lukas 23:14-16.

Pilatus wil Jesus baie graag vrylaat, want hy besef dat die priesters Jesus net oorhandig het omdat hulle jaloers is. Terwyl Pilatus probeer om Jesus vry te laat, kry hy nog ’n rede om dit te doen. Terwyl hy op sy regterstoel sit, stuur sy vrou vir hom die volgende boodskap: “Jy moet niks met daardie regverdige man te doen hê nie, want ek het vandag in ’n droom [blykbaar ’n droom van God af] baie gely as gevolg van hom.” – Matteus 27:19.

Hoe kan Pilatus hierdie onskuldige man vrylaat soos hy behoort te doen?

Pilatus sê vir die mense wat Jesus dood wil hê: “Ek kon geen bewyse vind van die aanklagte wat julle teen hierdie man inbring nie. Herodes kon ook nie enige bewyse vind nie” (Lukas 23:14, 15). Nou probeer Pilatus ’n ander manier kry om Jesus vry te laat. Hy sê vir die mense: “Julle het . . . ’n gewoonte dat ek op die Pasga vir julle ’n man moet vrylaat. Wil julle dan hê dat ek die Koning van die Jode vir julle moet vrylaat?” – Johannes 18:39.

Pilatus weet van ’n man wat in die tronk is met die naam Barabbas, wat bekend is as ’n dief, ’n opstoker en ’n moordenaar. En daarom vra Pilatus: “Watter een wil julle hê moet ek vir julle vrylaat: Barabbas of Jesus die sogenaamde Christus?” Omdat die mense deur die hoofpriesters beïnvloed is, vra hulle dat Barabbas vrygelaat moet word en nie Jesus nie. Pilatus vra weer: “Wie van die twee wil julle hê moet ek vir julle vrylaat?” Hulle skree: “Barabbas”! – Matteus 27:17, 21.

Ontsteld vra Pilatus: “Wat moet ek dan met Jesus die sogenaamde Christus doen?” Die mense skree: “Hang hom aan die paal!” (Matteus 27:22). Hulle wil hê dat ’n onskuldige man doodgemaak moet word. Pilatus smeek hulle: “Hoekom? Wat het hierdie man gedoen wat sleg is? Ek het niks in hom gevind wat die dood verdien nie. Ek sal hom dus straf en vrylaat.” – Lukas 23:22.

Al het Pilatus oor en oor probeer om Jesus vry te laat, skree die skare almal saam: “Hang hom aan die paal!” (Matteus 27:23). Die godsdiensleiers het die skare so opgewerk dat hulle nou bloed soek! En dit is nie die bloed van ’n misdadiger, ’n moordenaar nie. Dit is die bloed van ’n onskuldige man wat vyf dae gelede in Jerusalem as Koning verwelkom is. As Jesus se dissipels daar is, bly hulle stil en probeer hulle nie aandag trek nie.

Pilatus sien dat hy niks bereik nie. Die mense gaan te kere, so hy vat ’n bietjie water en was sy hande voor die skare. Hy sê vir hulle: “Ek is nie verantwoordelik vir hierdie man se bloed nie. Dit is julle saak.” Maar selfs dit keer hulle nie. Hulle sê eerder: “Ons en ons kinders sal verantwoordelikheid neem vir sy bloed.” – Matteus 27:24, 25.

Al weet die goewerneur wat die regte ding is om te doen, wil hy die skare eerder tevrede stel. So Pilatus doen wat hulle wil hê deur Barabbas vry te laat. Hy het Jesus se klere laat uittrek en hom met ’n gésel laat slaan.

Ná hierdie wrede mishandeling, neem die soldate Jesus na die goewerneur se paleis. Die hele afdeling kom bymekaar en mishandel hom verder. Hulle vleg ’n kroon wat van dorings gemaak is en sit dit op sy kop. Die soldate sit ook ’n riet in Jesus se regterhand en hang ’n helderrooi mantel om hom soos wat deur koninklikes gedra word. Hulle spot hom en sê: “Goeiedag, Koning van die Jode!” (Matteus 27:28, 29). Hulle hou ook aan om hom te slaan en in sy gesig te spoeg. Dan vat hulle die stewige riet wat in sy hand is en begin hom op sy kop daarmee slaan, dit veroorsaak dat die dorings van sy vernederende “kroon” al hoe dieper in sy kopvel gaan.

Pilatus is so beïndruk met hoe sterk Jesus bly en die feit dat hy sy waardigheid behou deur alles wat hy deurmaak, dat hy weer probeer om die verantwoordelikheid van Jesus se dood van hom af te kry deur te sê: “Kyk! Ek bring hom buitentoe vir julle sodat julle kan weet dat ek niks vind waaraan hy skuldig is nie.” Dink Pilatus dalk dat die skare vir Jesus jammer sal voel as hulle sien hoe Jesus nou lyk nadat hy mishandel is? Terwyl Jesus voor die gevoellose skare staan, roep Pilatus uit: “Kyk! Hier is die man!” – Johannes 19:4, 5. 

Al is Jesus erg geslaan en gewond, behou hy sy selfrespek en bly hy kalm. Pilatus moes dit ook raakgesien het, want aan sy woorde kan ’n mens hoor dat hy nie net jammer vir Jesus voel nie, maar hom ook respekteer.

Al is Jesus gespot en wreed mishandel en al probeer Pilatus om hom vry te laat, weier die hoofpriesters en dié wat saam met hulle is om dit te doen. Hulle wil Jesus dood hê en niks sal in hulle pad staan nie. Hulle hou aan skree: “Hang hom aan die paal! Hang hom aan die paal!” Pilatus sê: “Vat julle hom en hang hom aan die paal, want ek vind niks waaraan hy skuldig is nie.” – Johannes 19:6.

Die Jode kon nie vir Pilatus oortuig dat Jesus vir ’n politieke rede doodgemaak moet word nie, maar wat van ’n godsdienstige rede? Hulle beskuldig Jesus weer van godslastering, dieselfde beskuldiging wat hulle by sy verhoor voor die Sanhedrin gemaak het. Hulle sê: “Ons het ’n wet, en volgens hierdie wet moet hy sterf omdat hy homself God se seun gemaak het” (Johannes 19:7). Pilatus het nog nie hierdie beskuldiging gehoor nie.

Pilatus gaan terug in sy paleis en probeer om hierdie man vry te laat wat wreed mishandel is en oor wie sy eie vrou ’n droom gehad het (Matteus 27:19). Maar wat van hierdie nuwe beskuldiging wat die Jode maak – dat die gevangene “God se seun” is? Pilatus weet dat Jesus van Galilea is (Lukas 23:5-7). Maar hy vra Jesus nog steeds: “Waar kom jy vandaan?” (Johannes 19:9). Wonder Pilatus dalk of Jesus voorheen in die hemel gewoon het en of hy ’n god was?

Pilatus het by Jesus self gehoor dat hy ’n koning is, maar dat sy Koninkryk geen deel van hierdie wêreld is nie. Jesus hoef niks verder hieroor te sê nie, en daarom bly hy stil. Pilatus word kwaad omdat Jesus hom nie antwoord nie en sê vir hom: “Weier jy om met my te praat? Weet jy nie dat ek die gesag het om jou vry te laat en die gesag het om jou te laat doodmaak nie?” – Johannes 19:10.

Jesus sê eenvoudig: “U sou hoegenaamd geen gesag oor my hê as dit nie van bo aan u gegee was nie. Daarom het die man wat my aan u oorgelewer het, groter sonde” (Johannes 19:11). Jesus het waarskynlik nie net een persoon in gedagte nie. Hy bedoel eerder dat Kajafas en dié wat saam met hom is en Judas Iskariot groter skuld as Pilatus het.

Pilatus is beïndruk met Jesus se woorde en dat hy so kalm is, en hy is ook bang dat Jesus dalk ’n god is, en daarom probeer hy weer om hom vry te laat. Maar die Jode noem iets anders wat Pilatus bang maak. Hulle dreig hom: “As u hierdie man vrylaat, is u nie ’n vriend van die keiser nie. Elkeen wat homself ’n koning maak, praat teen die keiser.” – Johannes 19:12.

Die goewerneur bring Jesus nog een keer uit en terwyl hy op die regterstoel sit, sê hy vir die mense: “Kyk! Julle koning!” Maar die Jode het geen genade nie. Hulle skree: “Vat hom weg! Vat hom weg! Hang hom aan die paal!” Pilatus probeer Jesus verdedig en sê: “Moet ek julle koning laat doodmaak?” Die Jode ly al lank onder die Romeinse regering, maar die hoofpriesters sê nog steeds: “Ons het geen ander koning as die keiser nie.” – Johannes 19:14, 15.

Pilatus is bang vir die Jode, en daarom gee hy op en gee hy Jesus oor om doodgemaak te word. Die soldate haal die helderrooi mantel van Jesus af en trek sy bo-klere aan. Terwyl Jesus weggelei word, moet hy sy eie folterpaal dra.

Dit is nou Vrydag 14 Nisan en dit is al amper middag. Jesus is al van vroeg Donderdagoggend wakker en het die een pynlike ondervinding ná die ander gehad. Teen hierdie tyd is Jesus baie swak en hy dra die paal totdat hy nie meer kan nie. So die soldate dwing iemand wat verbyloop, Simon van Sirene in Afrika, om die paal na die plek te dra waar Jesus gehang gaan word. ’n Groot groep mense volg hom. Party slaan hulleself en huil omdat hulle baie hartseer is oor wat gebeur.

Jesus sê vir die vrouens wat huil: “Dogters van Jerusalem, hou op om oor my te huil. Huil eerder oor julleself en oor julle kinders, want daar kom dae wanneer mense sal sê: ‘Gelukkig is die onvrugbare vrouens en die moederskote wat nie geboorte gegee het nie en die borste wat nie gevoed het nie!’ Dan sal hulle vir die berge begin sê: ‘Val op ons!’ en vir die heuwels: ‘Bedek ons!’ As hulle hierdie dinge doen wanneer die boom groen is, wat sal gebeur wanneer dit uitgedroog is?” – Lukas 23:28-31.

Jesus praat van die Joodse nasie. Dit is soos ’n boom wat besig is om dood te gaan, maar wat nog ’n bietjie lewe in hom het, want Jesus is nog saam met hulle asook ’n hele paar Jode wat geloof in hom het. Wanneer Jesus sterf en sy dissipels nie meer deel is van die Joodse godsdiens nie, sal die nasie Israel soos ’n uitgedroogde boom word. Hulle sal baie huil wanneer God die Romeinse leërmagte gebruik om die nasie te vernietig!

Jesus word na ’n plek gelei wat nie ver van die stad af is nie, waar hy en twee misdadigers doodgemaak gaan word. Die plek word Golgota, of Skedelplek, genoem en dit kan van “’n afstand af” gesien word. – Markus 15:40.

Die drie manne wat veroordeel is, se klere word uitgetrek. Dan word wyn wat met bedwelmende mirre en bitter gal gemeng is, vir hulle gegee. Blykbaar het vroue van Jerusalem hierdie mengsel voorberei, en die Romeine keer nie dat hierdie mengsel wat pyn verlig, gegee word aan dié wat doodgemaak gaan word nie. Maar wanneer Jesus dit proe, weier hy om dit te drink. Hoekom? Omdat hy gedurende hierdie groot toets helder wil dink; hy wil weet wat rondom hom aangaan en getrou bly tot die dood toe.

Jesus word op die paal uitgestrek (Markus 15:25). Die soldate slaan spykers in sy hande en voete. Die spykers gaan deur sy vlees en ligamente en veroorsaak verskriklike pyn. Terwyl die paal opgelig word, word die pyn al hoe erger, want die gewig van Jesus se liggaam skeur sy wonde. Tog skel Jesus nie die soldate uit nie. Hy bid: “Vader, vergewe hulle, want hulle weet nie wat hulle doen nie.” – Lukas 23:34.

Die Romeine sit gewoonlik ’n bord op die paal wat sê waarvoor die misdadiger doodgemaak word. Hierdie keer het Pilatus op die bord laat skryf: “Jesus die Nasarener, die Koning van die Jode.” Dit is in Hebreeus, Latyns en Grieks geskryf sodat die meeste mense dit kan lees. Dit wys hoe ongelukkig Pilatus met die Jode is wat aangedring het dat Jesus doodgemaak word. Die hoofpriesters is baie ontevrede hieroor en sê: “Moenie ‘Die Koning van die Jode’ skryf nie. Skryf eerder wat hy gesê het: ‘Ek is Koning van die Jode.’” Maar omdat Pilatus nie weer deur hulle gebruik wil word nie, sê hy: “Wat ek geskryf het, het ek geskryf.” – Johannes 19:19-22.

Die woedende priesters herhaal die valse getuienis wat hulle vroeër in die verhoor by die Sanhedrin gegee het. Dit is nie verbasend dat dié wat verbyloop hom lelik spot en sê: “Ha! Jy wat die tempel sou afbreek en dit in drie dae sou opbou, red jouself deur van die folterpaal af te kom.” Die hoofpriesters en die skrifgeleerdes spot hom ook en sê vir mekaar: “Laat die Christus, die Koning van Israel, nou van die folterpaal afkom, sodat ons kan sien en glo” (Markus 15:29-32). Selfs die misdadigers wat aan sy linkerkant en regterkant hang, beledig hom, alhoewel hy die enigste een is wat regtig onskuldig is.

Die vier Romeinse soldate spot ook vir Jesus. Hulle het dalk suur wyn gedrink en nou spot hulle hom deur van die wyn voor Jesus te hou, wat natuurlik nie sy hand kan uitsteek om dit te vat nie. Die Romeine tart hom uit deur na die bord bokant sy kop te wys en te sê: “As jy die Koning van die Jode is, red jouself” (Lukas 23:36, 37). Dink net daaraan! Die man wat bewys het dat hy die weg, die waarheid en die lewe is, is nou die een wat mishandel en gespot word, alhoewel hy dit nie verdien nie. Tog verduur hy dit alles, sonder om die Jode wat kyk, die Romeinse soldate wat hom spot of die twee misdadigers wat langs hom aan die paal hang, uit te skel.

Die vier soldate het Jesus se bo-klere gevat en dit in vier dele verdeel. Hulle werp die lot om te kyk wie watter dele kry. Maar Jesus se onderkleed is van baie goeie kwaliteit, “dit het nie ’n naat . . . nie, omdat dit van bo tot onder aaneen geweef” is. Die soldate sê: “Moet dit nie skeur nie. Kom ons werp die lot om te besluit wie dit sal kry.” So vervul hulle die Skrifgedeelte wat sê: “Hulle het my klere onder mekaar verdeel, en hulle het die lot gewerp oor my klere.” – Johannes 19:23, 24; Psalm 22:18.

Later besef een van die misdadigers dat Jesus regtig ’n koning is. Hy praat streng met die ander misdadiger en sê: “Het jy geen vrees vir God nie? Jy het dan nou dieselfde oordeel ontvang! Dit is reg dat ons gestraf word, want ons kry ons verdiende loon, maar hierdie man het niks slegs gedoen nie.” Dan smeek hy Jesus: “Dink aan my wanneer u in u Koninkryk kom.” – Lukas 23:40-42.

Jesus sê: “Ek verseker jou vandag: Jy sal saam met my in die Paradys wees” (Lukas 23:43). Hierdie belofte is anders as die een wat Jesus aan sy apostels gemaak het; hy het vir hulle gesê dat hulle saam met hom op trone in die Koninkryk sal sit (Matteus 19:28; Lukas 22:29, 30). Maar hierdie Joodse misdadiger het dalk van ’n aardse paradys gehoor wat Jehovah oorspronklik vir Adam en Eva en hulle nageslag as ’n woonplek gegee het. Nou kan hierdie misdadiger met hierdie hoop doodgaan.

Dit is nou “die sesde uur”, of middag. Ewe skielik word “die hele land donker . . . , tot die negende uur”, drie uur die middag (Markus 15:33). Hierdie duisternis is nie deur ’n sonsverduistering veroorsaak nie. ’n Sonsverduistering gebeur gewoonlik wanneer dit nuwe maan is, maar dit is nou die Pasgaseisoen, wanneer dit volmaan is. En ’n sonsverduistering hou net vir ’n paar minute aan, maar hierdie duisternis hou baie langer aan. So God het hierdie duisternis veroorsaak!

Dink net aan watter uitwerking dit moet hê op die persone wat Jesus spot. Gedurende hierdie duisternis gaan vier vrouens na die folterpaal. Dit is Jesus se ma, Salome, Maria Magdalena en Maria die ma van Jakobus die Mindere.

Die apostel Johannes is saam met Jesus se ma “by sy folterpaal”. Maria is baie hartseer omdat sy sien dat die seun aan wie sy geboorte gegee het en grootgemaak het, in verskriklike pyn is terwyl hy aan die paal hang. Dit voel asof “’n lang swaard deur [haar] gesteek” word (Johannes 19:25; Lukas 2:35). Alhoewel Jesus in baie pyn is, dink hy aan sy ma. Al is dit vir hom baie moeilik, draai hy sy kop na Johannes se kant en sê hy vir sy ma: “Kyk, u seun!” Dan draai hy sy kop na Maria se kant en sê hy vir Johannes: “Kyk, jou ma!” – Johannes 19:26, 27.

Jesus gee vir die apostel vir wie hy baie lief is, die verantwoordelikheid om na sy ma te kyk, wat nou blykbaar ’n weduwee is. Jesus weet dat sy halfbroers, Maria se ander seuns, nog nie geloof in hom het nie. So hy maak seker dat daar na sy ma se fisiese en geestelike behoeftes gekyk sal word. Wat ’n uitstekende voorbeeld!

Teen die einde van die duisternis, sê Jesus: “Ek is dors.” So laat hy dit wat in die Skrif staan, waar word (Johannes 19:28; Psalm 22:15). Jesus voel dat sy Vader hom nie meer beskerm nie sodat sy Seun se integriteit tot die uiterste getoets kan word. Christus roep uit: “Eli, Eli, lama sabagtani?”, moontlik Aramees in ’n Galilese dialek. Dit beteken: “My God, my God, waarom het u my verlaat?” Party wat naby staan, verstaan hom verkeerd en sê: “Kyk! Hy roep Elia.” Een van hulle hardloop en vat ’n spons vol suur wyn en sit dit aan die punt van ’n riet en gee dit vir Jesus om te drink. Maar ander sê: “Wag! Kom ons kyk of Elia hom kom afhaal.” – Markus 15:34-36.

Jesus roep uit: “Dit is afgehandel!” (Johannes 19:30). Ja, hy het alles gedoen waarvoor sy Vader hom aarde toe gestuur het om te doen. Uiteindelik sê Jesus: “Vader, in u hande gee ek my gees oor” (Lukas 23:46). Jesus gee sy lewenskrag aan Jehovah met die vertroue dat hy hom weer sal opwek. Met volle vertroue in God, buig Christus sy kop en sterf.

Toe is daar ’n verskriklike aardbewing en die rotse skeur. Dit is so kragtig dat grafte buite Jerusalem oopskeur en lyke daaruit kom. Mense wat verbyloop en die dooie liggame sien, gaan “in die heilige stad in” en vertel vir ander wat hulle gesien het. – Matteus 12:11; 27:51-53.

Wanneer Jesus sterf, skeur die lang, swaar gordyn wat die Heilige van die Allerheiligste skei, van bo tot onder in twee. Die buitengewone gebeurtenis wys dat God baie kwaad is vir die mense wat sy Seun doodgemaak het. En dit wys dat dit nou moontlik is om in die Allerheiligste, die hemel self, in te gaan. – Hebreërs 9:2, 3; 10:19, 20.

Die mense word baie bang. Die militêre offisier wat in beheer is van die teregstelling, sê: “Hierdie man was beslis God se Seun” (Markus 15:39). Hy was dalk daar by Jesus se verhoor voor Pilatus toe die saak bespreek was of hy God se seun is. Nou is hy oortuig dat Jesus regverdig is en dat hy die Seun van God is.

Ander, oorweldig deur hierdie buitengewone gebeure, gaan na hulle huise en slaan “op hulle bors” omdat hulle baie hartseer is en skaam voel oor wat hulle gedoen het (Lukas 23:48). Onder dié wat van ver af kyk, is baie vrouens wat dissipels van Jesus is en wat soms saam met hom gereis het. Hulle is ook diep geraak deur hierdie belangrike gebeure.

Dit is nou al laat middag op Vrydag 14 Nisan. Teen sononder sal die Sabbat van 15 Nisan begin. Jesus is alreeds dood, maar die twee misdadigers langs hom lewe nog. Volgens die Wet mag ’n dooie liggaam “nie die hele nag aan die paal bly hang nie”, maar dit moet “daardie selfde dag” begrawe word. – Deuteronomium 21:22, 23.

Vrydag word ook die Voorbereidingsdag genoem omdat mense kos voorberei en enige werk klaarmaak wat nie tot ná die Sabbat kan wag nie. Teen sononder sal ’n dubbele, of “’n groot”, Sabbat begin (Johannes 19:31). Die rede hiervoor is omdat 15 Nisan die eerste dag is van die sewe dae lange Fees van die Ongesuurde Brode, en die eerste dag is altyd ’n Sabbat (Levitikus 23:5, 6). Hierdie keer val die eerste dag op die weeklikse Sabbat, die sewende dag, en daarom is dit ’n dubbele Sabbat.

Die Jode wil hê dat Jesus en die twee misdadigers langs hom vinniger dood moet gaan, en daarom vra hulle Pilatus om Jesus en die twee misdadigers se bene te laat breek. Hulle sal dan nie hulle bene kan gebruik om hulleself op te lig om asem te kan haal nie. Die soldate kom en breek die bene van die twee misdadigers. Maar dit lyk asof Jesus alreeds dood is, en daarom breek hulle nie sy bene nie. Dit vervul Psalm 34:20: “Hy bewaar al sy bene, en nie een van hulle is gebreek nie.”

Om seker te maak dat Jesus regtig dood is, steek ’n soldaat ’n spies in sy sy. Die spies deurboor die gedeelte waar sy hart is, en ‘onmiddellik kom bloed en water uit’ (Johannes 19:34). Dit vervul nog ’n teks: “Hulle sal kyk na die een wat hulle met ’n spies deurboor het.” – Sagaria 12:10.

Josef van die stad van Arimatea, “’n ryk man” en ’n gerespekteerde lid van die Sanhedrin, is ook by die teregstelling (Matteus 27:57). Hy word beskryf as “’n goeie en regverdige man”, wat “vir die Koninkryk van God [wag]”. Om die waarheid te sê, as “’n dissipel van Jesus, maar net in die geheim, want hy was bang vir die Jode”, het hy nie saamgestem met die hof se besluit om Jesus dood te maak nie (Lukas 23:50; Markus 15:43; Johannes 19:38). Josef skraap sy moed bymekaar en vra Pilatus vir Jesus se liggaam. Pilatus laat roep die militêre offisier wat in beheer is, wat bevestig dat Jesus dood is. Daarna sê Pilatus dat Josef Jesus se liggaam kan vat.

Josef koop skoon, fyn linne en haal Jesus se liggaam van die paal af. Hy berei die liggaam voor om begrawe te word deur dit in die linne toe te draai. Nikodemus, “wat die eerste keer in die nag na [Jesus] toe gekom het,” help met die voorbereiding (Johannes 19:39). Hy bring ’n mengsel van duur mirre en aalwyn saam, wat omtrent ’n honderd Romeinse pond (33 kilogram) weeg. Jesus se liggaam word in linnedoeke saam met hierdie speserye toegedraai, volgens die begrafnisgebruike van die Jode.

Josef het ’n graf wat uit rots uitgekap is, en hy lê Jesus se liggaam daar neer. Dan word ’n groot klip voor die ingang van die graf gerol. Dit word vinnig gedoen voordat die Sabbat begin. Maria Magdalena en Maria die ma van Jakobus die Mindere het dalk gehelp met die voorbereiding van Jesus se liggaam. Hulle gaan nou vinnig huis toe “om speserye en lekkerruik-olies voor te berei” om Jesus se liggaam ná die Sabbat verder te behandel. – Lukas 23:56.

Die volgende dag, die Sabbat, gaan die hoofpriesters en Fariseërs na Pilatus en sê: “Ons onthou wat daardie bedrieër gesê het toe hy nog gelewe het: ‘Ná drie dae sal ek opgewek word.’ Beveel dan dat die graf tot die derde dag toe bewaak moet word, sodat sy dissipels nie dalk kom en hom steel en vir die volk sê: ‘Hy is uit die dood opgewek!’ nie. Anders sal hierdie laaste bedrog erger wees as die eerste.” Pilatus sê vir hulle: “Julle kan ’n wag kry. Pas dit so goed op as wat julle kan.” – Matteus 27:63-65.

Vroeg die Sondagoggend bring Maria Magdalena, Maria die ma van Jakobus en ander vroue speserye na die graf om Jesus se liggaam te behandel. Hulle vra vir mekaar: “Wie sal vir ons die klip voor die ingang van die graf wegrol?” (Markus 16:3). Maar daar was ’n aardbewing. En God se engele het die klip weggerol, die wagte is weg en dit lyk asof die graf leeg is!