Eŋɛnywiwema Luiki Tɔ

4 Le yi goduɔ, gbɔngbɔn kɔkɔɛ ɖɔ Yesu yí etrɔgbɔ so Ʒurdɛn tɔsasa lɔ tu. Eyi gbɔngbɔn lɔ kplɔɛ yi texwe vovovowo le zogbeji 2 na nɔ ŋkeke 40 yí Legba ti kpɔ le nɔ. Deɖu ŋɖe le ŋkeke ŋtɔ́wo mɛ o, eyi le vɔvɔnu nɔ ŋkeke lɔwoɔ, shive ci. 3 Eyi taɖo Legba nu ni mɔ: “Nɔ Mawu vi ènyi nyaoɔ, nu nɔ ekpe cɛ nɔ atrɔ kpɔnnɔ.” 4 Vɔ Yesu ɖo ŋci ni mɔ: “Woŋwlɛ do Mawu Nyɔ lɔ mɛ ɖɛ mɔ, ‘Denyi kpɔnnɔ ɖekɛ yí agbetɔ anɔ agbe nɔ o.’”

5 Legba kplɔɛ yi afi yiji ɖeka yí dasɛ fyɔɖuxu ciwo pleŋ yí le nyigban lɔ ji ni le hwenu kleŋ ɖe mɛ. 6 Legba nu ni mɔ: “Nasɔ acɛkpakpa cɛwo pleŋ koɖo gangangangan wowotɔ jo nɔ eo, ɖo enyɛ yí wosɔ wo jo nɔ yí nasɔ wo na mɛɖekpokpui ci yí droŋ. 7 Eyi taɖo nɔ èje klo ji yí sɛnŋ ɔ, wo pleŋ atrɔ aotɔ.” 8 Yesu ɖo ŋci ni mɔ: “Woŋwlɛ ɖɛ mɔ, ‘Yehowa* ao Mawu yí èɖo ado ŋdo nɔ yí yiɖekɛ kpaŋ èɖo asɛn.’”

9 Yi goduɔ, ékplɔɛ yi Ʒerusalɛmu yí sɔ ɖo gbedoxɔ lɔ tamɛ* yí nu ni mɔ: “Nɔ Mawu vi ènyi nyaoɔ, te aje nyigban, 10 ɖo woŋwlɛ ɖɛ mɔ, ‘Ádɔ yi dɔlawo yí woaglɔn ta nɔ eo.’ 11 ‘Woaxɔ eo do wowo lɔ̀wo mɛ nɔ ŋgbesɔ afɔ gban do ekpe ɖe nu o.’” 12 Yesu ɖo ŋci ni mɔ: “Woŋwlɛ ɖɛ mɔ, ‘Dèɖo ate Yehowa* ao Mawu kpɔ o.’” 13 Ci Legba ti kpɔ ɖegbɔɔ, éso le gbɔ keke je hwenu yí agbenyɔ ni.

14 Gbɔngbɔn kɔkɔɛ ɖɔ Yesu yí etrɔ yi Galile yí amɛwo nunuɔ enyɔnywiwo so nu le eju lɔ pleŋ mɛ. 15 Étɔ nu kplakpla amɛwo le Ʒuifuwo nukplaxuwo hɛnnɛ yí amɛwo pleŋ kanfuikɔ.

16 Éyi Nazarɛti, fini eshin le. Eyi shigbe lé ewɛni le Sabatigbe nɛɔ, éyi Ʒuifuwo nukplaxu yí so je te yí ahlɛn nu. 17 Wosɔ enyɔnuɖɛtɔ Ezai wemaŋwlaŋwla ni, yí evlu wemaŋwlaŋwla lɔ yí kpɔ fini woŋwlɛ do mɔ: 18 “Yehowa* gbɔngbɔn le ŋji, ɖo éshi ami nɔŋ nɔ madra eŋɛnywi nɔ wamɛnɔwo. Édɔŋ ɖaɖa nɔ manu nɔ mɛ ciwo yí le gakpa mɛ mɔ wokpɔ vovo yí ana ŋkuvitɔnnɔwo akpɔ nu yí ana vovo mɛ ciwo yí le vevi sekɔ, 19 keŋ adra xwecixwe Yehowa* awa xomɛvu nɔ amɛwo.” 20 Eyi eŋwla wema lɔ yí sɔ jo nɔ mɛɖeka ci yí wanɔ dɔ le Ʒuifuwo nukplaxu lɔ keŋ yí nɔ nyinɔnɔ. Mɛ ciwo pleŋ yí le Ʒuifuwo nukplaxu lɔ cu ŋkuviwo do ji. 21 Eyi enu nɔ wo mɔ: “Enuŋwlɛŋwlɛ cɛ ci ŋhlɛn yí míse yɛ jɔ do ji gbɛ.”

22 Wo pleŋ nunuɔ enyɔnywiwo so nu yí enyɔvivi ciwo yí tokɔ le aglan mɛ ni kpaca wo yí wobiɔbiɔ se mɔ: “De Ʒozɛfu vi yí enyi ba?” 23 Eyi dɔ enu nɔ wo mɔ: “Dandandan ɔ, míanu enyɔ cɛwo so ŋnu mɔ, ‘Doto, da edɔ̀ nɔ eoɖeki. Ŋciwo èwa le Kapɛrnawumu yí mìseɔ, wa wo le ao ju mɛ lɛ hɛnnɛ.’” 24 Eyi taɖo enu mɔ: “Ŋnukɔ nɔ mí le nyɔnɔnwi mɛ mɔ, wodexɔnɔ enyɔnuɖɛtɔ le yiŋtɔ ju mɛ o. 25 Vɔ manu nyɔnɔnwi nɔ mí mɔ: Kposhuwo sugbɔ le Izraɛli le Eli gamɛ hwenu eshi mi jaja na nɔ exwe amɛtɔn koɖo wleci amadɛn yí eju gangan ɖeka to le eju lɔ pleŋ mɛ. 26 Gan wodedɔ Eli ɖaɖa nyɔnu ŋtɔ́wo ɖe gbɔ o. Kposhu ɖeka ci yí le Sarɛpta le Sidɔn nyigban ji ɖekɛ gbɔ yí wodɔɛ ɖaɖa. 27 Ahanke kponɔwo sugbɔ le Izraɛli le enyɔnuɖɛtɔ Elize hwenu nɛ. Gan wodeda edɔ̀ nɔ eɖe le wo mɛ o. Nama Siritɔ lɔ ɖekɛ woda edɔ̀ nɔ.” 28 Eyi mɛ ciwo pleŋ yí se enyɔ cɛwo le Ʒuifuwo nukplaxu lɔ do dɔmɛzi sugbɔ. 29 Woso je te yí duin hɛn yi jugan lɔ godu yí kplɔɛ yi eto ci ji wowo ju lɔ le tamɛ keŋ acucui so nɔ nɔ ajuin. 30 Vɔ Yesu to dodomɛ nɔ wo yí so yi.

31 Éyi Kapɛrnawumu ci yí nyi Galile jugan ɖeka mɛ yí kplakpla nu amɛwo le Sabatigbe 32 yí lé ekplakpla nu amɛ do kpaca wo, ɖo éxokɔ nuxu shigbe mɛ ci yí xɔ ŋsɛn so Mawu gbɔ nɛ. 33 Ŋsu ɖeka ci gbɔngbɔn makɔmakɔ ɖeka dokɔ aya nɔ le enukplaxu lɔ. Édo axwa sɛnsinɖe mɔ: 34 “Opui! Yesu Nazarɛtitɔ, enyɔ ci yí le gblamɛ nɔ mìwo koɖo eoɔ? Èva yí agu mì yɔa? Ŋnya mɛ ci ènyi nywiɖe, Amɛkɔkɔɛ Mawu tɔ ènyi.” 35 Vɔ Yesu wa adan do gbɔngbɔnvɔn lɔ mɔ: “Bɔ nu yí ato le mɛ.” Ci esɔ ŋsu lɔ xu nyigban do dodomɛ nɔ wo ɖegbɔɔ, éto le mɛ yí dewa enuvevi ɖe koɖi o. 36 Ekpaca amɛ lɔwo pleŋ yí wotɔ nunu le wowoɖeɖewo mɛ mɔ: “Enyɔ ci yí nyi cɛɔ? Ðo acɛ koɖo ŋsɛn le shi yí eɖekɔ gbe nɔ gbɔngbɔn makɔmakɔwo yí wotokɔ le amɛwo mɛ!” 37 Eyi yi nyɔ gban kpedo fishiafi le eju lɔ pleŋ mɛ.

38 Ci eso le Ʒuifuwo nukplaxu lɔɔ, éyi Simɔ xwe mɛ. Vuvɔfu wakɔ Simɔ ashiɛnɔ sɛnŋsɛnŋɖe yí wonu nɔ Yesu mɔ yi le kpedo nu. 39 Yesu vayi nɔ te le nyɔnu lɔ gbɔ yí ɖe gbe nɔ vuvɔfu lɔ yí vuvɔfu lɔ mi ni yí eso zeɖeka yí xɔ wo mɛdru.

40 Vɔ fiɛfi ci ewe yi xɔɔ, mɛ ciwo pleŋ yí ɖo dɔ̀nɔ hamɛhamɛwo kplɔ wo vɛ nɔ Yesu yí esɔ alɔ̀ da do wo ji ɖekaɖeka yí da edɔ̀ nɔ wo. 41 Gbɔngbɔnvɔnwo to le amɛ sugbɔ mɛ hɛnnɛ yí gbɔngbɔnvɔn lɔwo dodoɔ axwa mɔ: “Eo yí nyi Mawu Vi lɔ.” Vɔ Yesu wanɔ adan do gbɔngbɔnvɔn lɔwo, detanɔshi wo yí woxonɔ nuxu o, ɖo wonya mɔ eyi nyi Kristo lɔ.

42 Ci eŋ keɔ, éto yí yi fini mɛɖe dele o. Amɛahwa lɔ tɔ jiji kpɔ yí va fini ele yí wodelɔn mɔ yɛ le so le yewo gbɔ o. 43 Vɔ énu nɔ wo mɔ: “Ŋɖo adra Mawu Fyɔɖuxu ŋɛnywi lɔ le eju buwo mɛ hɛnnɛ, ɖo eyi taɖo wodɔŋ ɖaɖa.” 44 Eyi dɔ eyi Ʒuifuwo nukplaxuwo le Ʒude yí nunuɔ Mawu nyɔ.