Eŋɛnywiwema Matie Tɔ

5 Ci Yesu kpɔ amɛahwa lɔɔ, éde eto ji. Eyi ci enɔ nyinɔnɔɔ, yi nukplaviwo va gbɔ. 2 Étɔ enu kplakpla wo mɔ

3 “Mɛ ciwo yí nya mɔ yewoʒan* Mawu kpɔnɔ jijɔ, ɖo wowotɔ yí nyi jeŋkwi mɛ Fyɔɖuxu lɔ.

4 “Mɛ ciwo yí le ŋshishi mɛ kpɔnɔ jijɔ, ɖo woafa akɔn nɔ wo.

5 “Mɛ ciwo yí fanɔ xomɛ* kpɔnɔ jijɔ, ɖo woaɖu cinɔ nɔ nyigban lɔ.

6 “Mɛ ciwo yí enujɔjɔɛwawa shive koɖo shikɔ ciciɛ kpɔnɔ jijɔ, ɖo Mawu ana xodu aɖɔ wo.*

7 “Mɛ ciwo yí kunɔ ŋshishi nɔ amɛ kpɔnɔ jijɔ, ɖo woaku ŋshishi nɔ wo.

8 “Mɛ ciwo yí eji mɛ kɔ nɔ kpɔnɔ jijɔ, ɖo woakpɔ Mawu.

9 “Mɛ ciwo yí wanɔ fafa* kpɔnɔ jijɔ, ɖo woayɔ wo mɔ Mawu viwo.

10 “Mɛ ciwo yí wocikɔ yumɛ nɔ do enujɔjɔɛwawa ŋci kpɔnɔ jijɔ, ɖo wowotɔ yí nyi jeŋkwi mɛ Fyɔɖuxu lɔ.

11 “Nɔ amɛwo zuzuɔ mí, cikɔ yumɛ nɔ mí yí gbekankɔ ŋsu yí nukɔ enyɔvwin hamɛhamɛwo so mí nu do enyɛ ŋciɔ, míkpɔ jijɔ. 12 Ahan yí woci yumɛ nɔ enyɔnuɖɛtɔ ciwo yí doŋkɔ nɔ mí nɛ. Eyi taɖo eji le jɔ mí yí míakpɔnɔ jijɔ sugbɔ, ɖo míwo fɛncu gangan le jeŋkwi mɛ.

13 “Míwo yí nyi eje nyigban tɔ. Vɔ nɔ eje bu vivivivi yitɔ ɖe, lé woawɛ yí agbesɛnŋ avivi nuɔ? Wodagbetɛnŋ azin nɔ ŋɖe o, sɔ woasɔ kɔŋgbe do xexenu yí amɛwo ato ji.

14 “Míwo yí nyi klɛnklɛn nɔ xexe lɔ. Jugan ɖe datɛnŋ awla nɔ éle eto ji o. 15 Nɔ wotɔ kaɖigban ɔ, wodesɔ donɔ kishi* gɔnmɛ o, vɔ wosɔ danɔ do kaɖigbanhɛnnu ji yí eklɛnnɔ nɔ mɛ ciwo pleŋ yí le axwe lɔ mɛ. 16 Nɛnɛkeɔ, míwɛ nɔ klɛnklɛn míwotɔ azenɔ le amɛwo ŋmɛ, nɔ woakpɔ míwo wana nywiwo keŋ akanfu míwo Da ci yí le jeŋkwi mɛ.

17 “Míŋgbebu mɔ ŋva yí aɖe Ese lɔ koɖo Enyɔnuɖɛtɔwo nyɔwo swi o. Ŋdeva yí aɖe wo swi o, vɔ ŋva yí awɛ nɔ woavamɛ. 18 Ŋnukɔ nɔ mí le nyɔnɔnwi mɛ mɔ, nɔ jeŋkwi koɖo nyigban atɛnŋ agu can ɔ, Ese lɔ nyɔkwi hwɛhwɛtɔ alo yi wemakwi kankin ɖe dagu keke ana nɔ hwenu yí ŋcɛwo pleŋ ajɔ do ji o. 19 Eyi taɖo mɛɖekpokpui ci yí danɔ le ese hwɛhwɛ cɛwo ɖeka kpaŋ ji yí gbekplanɔ mɛbuwo mɔ wo le wɛ ahan ɔ, daje ayi jeŋkwi mɛ Fyɔɖuxu lɔ mɛ o. Vɔ mɛɖekpokpui ci yí wanɔ do wo ji yí gbekplanɔ mɛbuwo mɔ wo le wɛ ahan yí aje ayi jeŋkwi mɛ Fyɔɖuxu lɔ mɛ. 20 Ðo ŋnukɔ nɔ mí mɔ, nɔ mídewa enujɔjɔɛ sɔwu esekplamɛtɔwo koɖo Farizitɔwoɔ, mídaɖo jeŋkwi mɛ Fyɔɖuxu lɔ mɛ o.

21 “Míse mɔ wonu nɔ míwo tɔgbiwo vayi mɔ: ‘Ŋgbewu amɛ o; vɔ nɔ mɛɖe wu amɛɔ, woakplɔɛ yi kojoɖoxu.’ 22 Gan enyɛɔ, ŋnukɔ nɔ mí mɔ, woakplɔ mɛɖekpokpui ci yí kpɔtɔ wawa dɔmɛzi do nɔviɛ yi kojoɖoxu. Mɛ ci yí azu nɔviɛ asɔ gbaliɔ, woakplɔɛ yi Kojoɖoxu Gangantɔ; eyi nɔ mɛɖe zu amɛ mɔ, ‘Sukunɔɔ,’ éje nɔ Gehena* zo mɛ yiyi.

23 “Eyi taɖo, nɔ èhɛn ŋci èjikɔ ana Mawu va avɔnsakpe lɔ gbɔ yí le nɔtɔxu èɖo ŋwi mɔ ye nɔviye le dɔmɛzi ji do ye nuɔ, 24 tashi ao nunana lɔ do nɔ le avɔnsakpe lɔ ŋkɔ yí ayi wa fafa koɖo nɔvio lɔ keŋ atrɔgbɔ avana ŋci èjikɔ ana Mawu hɔntɔn.

25 “Dra eo koɖo mɛ ci yí sanma eo gblamɛ do kaba nɔ míle emɔ ji yikɔ, keŋ nɔ mɛ ci yí sanma eo lɔ ŋgbesɔ eo do alɔ̀ mɛ nɔ kojoɖotɔ, nɔ kojoɖotɔ asɔ eo jo nɔ gakpajikpɔtɔ yí yɛasɔ eo do gakpa mɛ o. 26 Ŋnukɔ nɔ eo le nyɔnɔnwi mɛ mɔ, nɔ dècu ho lɔwo pleŋ keke je gajunho hwɛhwɛtɔ* jiɔ, dàto le gakpa lɔ mɛ o.

27 “Míse wonu mɔ: ‘Ŋgbewa hashi o.’ 28 Vɔ enyɛɔ, ŋnukɔ nɔ mí mɔ, mɛ ci yí glogloɔ nyɔnu ɖe kpɔ keke edruiɔ, éwa hashi koɖi xoxo le yi ji mɛ. 29 Eyi taɖo nɔ ao ɖushi mɛ ŋkuvi dɔnkɔ eo do nuvɔn mɛɔ, ɖi swi yí asɔ dɔŋkpe ɖaɖa azɔge. Ðo enyɔ nɔ eo mɔ nàbu ao lankpu ŋcinu ɖeka sɔwu mɔ woasɔ eoŋtɔ lɔ pleŋ dɔŋkpe ɖaɖa Gehena* mɛ. 30 Ahanke nɔ ao ɖushi lɔ̀ dɔnkɔ eo do nuvɔn mɛɔ, swi si yí asɔ dɔŋkpe ɖaɖa azɔge. Ðo enyɔ nɔ eo mɔ nàbu ao lankpu ŋcinu ɖeka sɔwu mɔ woasɔ eoŋtɔ lɔ pleŋ dɔŋkpe ɖaɖa Gehena* mɛ.

31 “Wonu hɛnnɛ mɔ: ‘Nɔ mɛɖe gbe ashiɛɔ, le na nyɔnugbegbewema yi.’ 32 Gan enyɛɔ, ŋnukɔ nɔ mí mɔ, mɛɖekpokpui ci yí gbe ashiɛ yí denyi hashi* ewaɔ, ésɔ nyɔnu lɔ do hashiwawa tetekpɔ mɛ yí mɛɖekpokpui ci yí ɖe nyɔnu ci wogbe lɔ wa hashi.

33 “Mígbese mɔ wonu nɔ míwo tɔgbiwo vayi mɔ: ‘Dèɖo ata nu nɔ ŋɖe yí agbe mawɛ o. Èɖo awa do egbe ciwo èɖo nɔ Yehowa* ji.’ 34 Gan enyɛɔ, ŋnukɔ nɔ mí mɔ: Míŋgbeta nu cococo o. Míŋgbeta jeŋkwi o, ɖo Mawu fyɔʒinkpin enyi; 35 míŋgbeta nyigban hɛnnɛ o, ɖo ényi afɔɖoxu nɔ Mawu; míŋgbeta Ʒerusalɛmu can o, ɖo Efyɔ gangantɔ lɔ jugan enyi. 36 Ŋgbesɔ eta aotɔ asɔ ta enu o, ɖo dàsun ji atrɔ eɖakwi kuɖeka yí anyi eɣi alo yubɔ o. 37 Mína nɔ ‘Ɛɛ’ míwotɔ anyi ɛɛ, yí ‘Oo,’ anyi oo. Ðo ci yí awu hunnɔɔ, enuvwinwatɔ lɔ gbɔ eso.

38 “Míse wonu mɔ: ‘Nɔ mɛɖe tɔn ŋkuvi nɔ amɛɔ, woɖo atɔn ŋkuvi ni. Nɔ mɛɖe ŋɛ aɖu nɔ amɛɔ, woɖo aŋɛ aɖu ni.’ 39 Gan enyɛɔ, ŋnukɔ nɔ mí mɔ: Míŋgbewa vu koɖo amɛvwin o. Vɔ nɔ mɛɖe xo ɖushi mɛ tekpemɛ nɔ eoɔ, trɔ xlɔtɔ ni nɔ axo. 40 Eyi nɔ mɛɖe ji mɔ yeakplɔ eo yi kojoɖoxu yí axɔ ao wu gɔnmɛtɔ le eo shiɔ, sɔ ao wu jitɔ can sɔ ni. 41 Nɔ mɛ ci yí ɖo acɛ ʒin eo ji mɔ eɔ le wa edɔ yí azɔn kpeci* ɖeka koɖo yeɔ, zɔn kpeci amɛve koɖi. 42 Nà enu mɛ ci yí biɔkɔ eo yí nɔ mɛɖe ji mɔ yeado* ho le eo shiɔ, ŋgbegbe o.

43 “Míse wonu mɔ: ‘Èɖo alɔn ao kpena yí agbe ŋwa nɔ ao ketɔnɔ.’ 44 Gan enyɛɔ, ŋnukɔ nɔ mí mɔ: Míkpɔtɔ alɔnnɔ míwo ketɔnɔwo yí adonɔ gbe ɖaɖa do ta nɔ mɛ ciwo yí cikɔ yumɛ nɔ mí, 45 nɔ míadasɛ mɔ mínyi míwo Da ci yí le jeŋkwi mɛ viwo. Ðo éna yí ewe klɛnnɔ nɔ amɛvwinwo koɖo amɛnywiwo yí gbena eshi janɔ nɔ amɛjɔjɔɛwo koɖo amɛmajɔmajɔwo. 46 Ðo nɔ mɛ ciwo yí lɔnnɔ mí ɖekɛwo yí mílɔnnɔ ɖe, fɛncu ci míaxɔɔ? Alo tagajɔtɔwo can dewanɔ ahan ba? 47 Eyi nɔ enyi míwo nɔviwo ɖekɛ yí mídonɔ gbe nɔ ɖe, enu gangan ci míwawa yɛɔ? Jukɔn bu mɛ tɔwo can dewanɔ ahan ba? 48 Eyi taɖo míɖo anyi amɛmaɖonuvɔnwo* shigbe lé míwo Da ci yí le jeŋkwi mɛ deɖo nuvɔn nɛ.