Miwo Yí Nyi “Ŋɖɛnyatɔ Amɛtɔn” Lɔwoɔ? Mawu Yí Sɔ Bɛtɛlɛxɛmu “Wlecivi” Dasɛ Emɔ Nɔ Woa?

To akpo nɔ kɔnu ciwo wowanɔ le Nɔɛli xwe hwenuɔ, Bibla dezan enyɔgbe “ŋɖɛnyatɔ amɛtɔn” alo “efyɔ amɛtɔn” yí sɔ xo nuxu so emɔ ci mɛ cɛwo zɔn keŋ vayi kpɔ Yesu le yi jiji godu nu o. (Matie 2:1) Vɔ, Eŋɛnywiwema ŋwlɛtɔ Matie zan Grɛki nyɔgbe ci yí nyi ma’goi yí sɔ dre mɛ ciwo yí va yɔ Yesu kpɔ. Ele shigbe mɔ enyɔgbe lɔ yinɔ nɔ mɛ ciwo yí jeshi wlecivimɛfankankan koɖo gbɔngbɔnvɔnwo nuwanawo ɖɛ kitokito nɛ.a Bibla sugbɔ yɔ wo mɔ “wlecivimɛfankantɔwo” alo “maʒiwatɔwo.”b

• Nɛni yí “ŋsu ŋɖɛnyatɔ” lɔwo nyiɔ?

• Efyɔwo yí “ŋsu ŋɖɛnyatɔ” lɔwo nyia?

• Lé woyɔnɔ “ŋsu ŋɖɛnyatɔ” lɔwoɔ?

• Hwenu yí “ŋsu ŋɖɛnyatɔ” lɔwo vaji Yesu kpɔɔ?

• Mawu yí sɔ Bɛtɛlɛxɛmu “wlecivi” dasɛ emɔ nɔ woa?

Nɛni yí “ŋsu ŋɖɛnyatɔ” lɔwo nyiɔ?

Bibla denui o, vɔ amɛwo ɖo susu vovovowo so nɛni ci wonyi nu. Sɔgbe koɖo Encyclopedia Britannicaɔ, “Amɛ sugbɔ le Asie nu mɔ 12 yí maʒiwatɔ lɔwo nyi. Vɔ amɛ sugbɔ le Europe koɖo Amerique mɔ wonyi amɛtɔn, ɖo taŋfuin Bibla nu mɔ wona enu amɛtɔn ciwo yí nyi ‘shika, lifin koɖo amihwɛnte’ ɖevi lɔ (Matie 2:11).”

Efyɔwo yí “ŋsu ŋɖɛnyatɔ” lɔwo nyia?

Ekɔnu ciwo wowanɔ le Nɔɛli xwe hwenuwo yí danasɛ mɛ cɛwo mɔ wonyi efyɔwo, fiɖekpokpui dele Bibla mɛ yí yɔ wo ahan o. Encyclopedia Britannica nu mɔ le exwe sanŋdi ɖewo mɛ le Yesu jiji goduɔ, mɛɖewo vasɔ ŋɖewo tanɔ Yesu jiji xolɔlɔ. Eyi wovatɔ wlecivimɛfankantɔ lɔwo yɔyɔ mɔ efyɔwo.

Lé woyɔnɔ “ŋsu ŋɖɛnyatɔ” lɔwoɔ?

Bibla deyɔ ŋkɔ nɔ wlecivimɛfankantɔ lɔwo o. The International Standard Bible Encyclopedia, nu mɔ “druviwo koɖo enyɔkpakpawo tekpɔ yí na ŋkɔ wo mɔ Gaspar, Melchior, koɖo Balthasar.”

Hwenu yí “ŋsu ŋɖɛnyatɔ” lɔwo vaji Yesu kpɔɔ?

Ci woji Yesuɔ, wleci nɛniɖe godu gbɔxwe wlecivimɛfankantɔ lɔwo vayi ji kpɔ. Mínya ahan ɖo Efyɔ Erodi ci yí ji mɔ yeawu Yesu ɖe gbe nɔ sɔjawo mɔ wo le wu ŋsuvihwɛ ciwo yí ɖo exwe ve alo ciwo yí deɖo ahan o. Ékan exwe lɔ sɔ koɖo enyɔ ci ese le wlecivimɛfankantɔ lɔwo gbɔ.​—Matie 2:16.

Denyi ezan ci mɛ woji Yesu le yí wlecivimɛfankantɔ lɔwo vaji kpɔ o. Bibla nu mɔ: “Ci yí wo ɖo axwe lɔ mɛ ɔ, wo kpɔ ɖevi lɔ koɖo enɔ̀lɔ Mari.” (Matie 2:11) Ecɛ dasɛ mɔ hwenɔnuɔ, xomu lɔ gbɔva axwe mɛ yí Yesu degbenyi vifin ci yí le elanwo nuɖugban mɛ o.​—Luiki 2:16.

Mawu yí sɔ Bɛtɛlɛxɛmu “wlecivi” dasɛ emɔ nɔ “ŋsu ŋɖɛnyatɔ lɔwoa”?

Mɛɖewo buini mɔ Mawu yí sɔ wlecivi ci yí amɛwo yɔnɔ mɔ Bɛtɛlɛxɛmu wlecivi ɖaɖa nɔ adasɛ emɔ nɔ wlecivimɛfankantɔ lɔwo yí woayi Yesu gbɔ. Mìakpɔ enu ci yí taɖo datɛnŋ anyi ahan o.

• Enu ci yí le shigbe mɔ wlecivi nɛ kplɔ wlecivimɛfankantɔ lɔwo yí Ʒerusalɛmu doŋkɔ. Bibla nu mɔ: “Wlecivimɛfankantɔwo so wezexu yí va Ʒerusalɛmu yí va biɔ se mɔ: ‘Fini yí Ʒuifuwo fyɔ ci woji lɔ leɔ? Ðo le wezexu ageɔ, míkpɔ yi wlecivi, eyi mìva keŋ ado bubu yi nu.’”​—Matie 2:1, 2, NWT.

• Efyɔ Erodi yí ɖo wlecivimɛfankantɔ lɔwo ɖaɖa Bɛtɛlɛxemu do ŋkɔ, denyi “wlecivi” lɔ yɔ o. Ci Erodi se yí woxo nuxu so “Ʒuifuwo Fyɔ” ɖeka nuɔ, éjijiɛ fini woɖo aji Kristo lɔ le. (Matie 2:3-6) Ci ese mɔ Bɛtɛlɛxemu yɔɔ, enu nɔ wlecivimɛfankantɔ lɔwɔ mɔ wo le yí nɔ, yí aji vifin lɔ kpɔ yí ava do eŋɛ nɔ ye.

  Eyi wlecivimɛfankantɔ lɔwo kpe Bɛtɛlɛxemu. Bibla nu mɔ: “Hwecinu yí wose efyɔ nuxuxoxo lɔwo ɖegbɔ ɔ, wo soyì, eyi wlecivi ci yí wo kpɔ le wezexu lɔ ɔ, é le zɔnli zɔnkɔ le ŋkɔ nɔ wo keke yí va cìte do eta mɛ nɔ axwe ci mɛ yí wo ji ɖevi lɔ le.”​—Matie 2:9.

• Ci “Wlecivi” lɔ toɔ, ŋɖewo tɔ jɔjɔ ciwo sɔ Yesu gbe do afɔ kumɛ yí nyi eku nɔ ɖevihwɛ manyaɖewo. Hwecinu wlecivimɛfankantɔ lɔwo le Bɛtɛlɛxemuɔ, Mawu kanxle wo mɔ woŋgbe trɔyi Erodi gbɔ o.​—Matie 2:12.

Lé Erodi wa nu doɔ? Bibla nu mɔ: “Hwecinu yí Erodi kpɔ mɔ wlecivimɛfankantɔ lɔwo trɔ ye to mɛɔ, édo dɔmɛzi sugbɔ. Eyi ena gbeta mɔ wole wu ŋsuvi ciwo pleŋ yí ɖo exwe amɛve alo hwedo le exwe amɛve mɛ; le Bɛtɛlɛxemu koɖo eju ciwo pleŋ yí trɔdi mɛ. Énui ahan, ɖo ése gaxoxo ci mɛ woji ɖevi lɔ le wlecivimɛfankantɔ lɔwo gbɔ.” (Matie 2:16, NWT) Mawu datɛnŋ adɔ amɛwo mɔ wo le nuvɔn cɛ o.​—Job 34:10.