ስለ መሲሑ የተነገሩት ትንቢቶች ኢየሱስ መሲሕ እንደሆነ ያረጋግጣሉ?

አዎ፣ ያረጋግጣሉ። ኢየሱስ ምድር ላይ በኖረበት ወቅት “የዓለም አዳኝ” ስለሚሆነው “መሪ የሆነው መሲሕ” የተነገሩ በርካታ ትንቢቶች እንዲፈጸሙ አድርጓል። (ዳንኤል 9:25፤ 1 ዮሐንስ 4:14) ኢየሱስ፣ ከሞተ በኋላም እንኳ ስለ መሲሑ የተነገሩ ትንቢቶች እንዲፈጸሙ ማድረጉን ቀጥሎ ነበር።—መዝሙር 110:1፤ የሐዋርያት ሥራ 2:34-36

• “መሲሕ” የሚለው ቃል ምን ትርጉም አለው?

• ስለ መሲሑ የተነገሩ ትንቢቶች በተለያዩ ሰዎች ላይ ሊፈጸሙ ይችላሉ?

• ወደፊት የሚመጣ መሲሕ ሊኖር ይችላል?

• በመጽሐፍ ቅዱስ ውስጥ ስለ መሲሑ የሚናገሩ ምን ያህል ትንቢቶች ይገኛሉ?

• በኢየሱስ ላይ ፍጻሜያቸውን ያገኙ ስለ መሲሑ የሚናገሩ አንዳንድ ትንቢቶች

ማሺያክ (መሲሕ) የሚለው የዕብራይስጥ ቃል እንዲሁም ክሪስቶስ (ክርስቶስ) የሚለው የግሪክኛ ቃል ተመሳሳይ ፍቺ ያላቸው ሲሆን ሁለቱም “የተቀባ” የሚል ትርጉም አላቸው። በመሆኑም “ኢየሱስ ክርስቶስ” ማለት “የተቀባው ኢየሱስ” አሊያም “መሲሑ ኢየሱስ” ማለት ነው።

በጥንት ዘመን አንድ ሰው ለአንድ ልዩ ሥልጣን ሲሾም ብዙውን ጊዜ በራሱ ላይ ዘይት በማፍሰስ ይቀባ ነበር። (ዘሌዋውያን 8:12፤ 1 ሳሙኤል 16:13) ኢየሱስን መሲሕ አድርጎ በመሾም ከፍተኛ ሥልጣን የሰጠው አምላክ ነው። (የሐዋርያት ሥራ 2:36) ሆኖም አምላክ ኢየሱስን የቀባው በዘይት ሳይሆን በመንፈስ ቅዱስ ነው።—ማቴዎስ 3:16

አይችሉም። የጣት አሻራ አንድን ግለሰብ ብቻ ለይቶ እንደሚያሳውቅ ሁሉ በመጽሐፍ ቅዱስ ውስጥ የተነገሩት ትንቢቶችም ፍጻሜያቸውን የሚያገኙት በአንድ መሲሕ ወይም ክርስቶስ ላይ ብቻ ነው። ያም ቢሆን መጽሐፍ ቅዱስ የሚከተለውን ማስጠንቀቂያ ይዟል፦ “ሐሰተኛ ክርስቶሶችና ሐሰተኛ ነቢያት ይነሳሉ፤ ቢቻላቸው የተመረጡትን እንኳ እስኪያስቱ ድረስ ታላላቅ ምልክቶችና አስደናቂ ነገሮች ያደርጋሉ።”—ማቴዎስ 24:24

በፍጹም። መጽሐፍ ቅዱስ መሲሑ የእስራኤል ንጉሥ የነበረው የዳዊት ዘር እንደሚሆን አስቀድሞ ተናግሯል። (መዝሙር 89:3, 4) ይሁንና የዳዊትን የዘር ሐረግ የያዙ ጥንታዊ የአይሁዳውያን መዝገቦች በአሁኑ ጊዜ አይገኙም፤ ምናልባትም እነዚህ መዝገቦች የጠፉት ሮማውያን በ70 ዓ.ም. ኢየሩሳሌምን ድል ባደረጉበት ወቅት ሊሆን ይችላል።a ከዚያ ጊዜ አንስቶ፣ ማንም ሰው የዳዊት ንጉሣዊ ቤተሰብ አባል መሆኑን በማስረጃ ማረጋገጥ አልቻለም። በኢየሱስ ዘመን ግን እነዚህ መዝገቦች ስለነበሩ ጠላቶቹ እንኳ ኢየሱስ የዳዊት ዘር ስለመሆኑ ጥያቄ አላነሱም።—ማቴዎስ 22:41-46

ስለ መሲሑ የሚገልጹ ምን ያህል ትንቢቶች እንደሚገኙ በትክክል መናገር አይቻልም። ስለ መሲሑ የሚናገሩ መሆናቸው በእርግጠኝነት የሚታወቁ ትንቢቶች እንኳ የሚቆጠሩበት መንገድ የተለያየ ነው። ለምሳሌ በኢሳይያስ 53:2-7 ላይ ስለ መሲሑ የሚናገሩ በርካታ ትንቢታዊ መግለጫዎችን እናገኛለን። አንዳንዶች ሙሉውን ሐሳብ እንደ አንድ ትንቢት ይቆጥሩታል፤ ሌሎች ደግሞ እያንዳንዱ መግለጫ እንደ አንድ ትንቢት መቆጠር እንዳለበት ያስባሉ።