ምዕራፍ 48

ጓደኞችህን በጥበብ ምረጥ

በወረቀት የሚታተመው

ጥሩ ጓደኞች በደስታችን ጊዜ አብረውን ይደሰታሉ፤ ችግር ሲያጋጥመን ደግሞ እንድንበረታ ይረዱናል። ይሁንና መጽሐፍ ቅዱስ ከአንዳንድ ሰዎች ጋር ጓደኝነት መመሥረት ጉዳት ሊኖረው እንደሚችል ያስጠነቅቃል። ታዲያ ጥሩ ጓደኞችን መምረጥ የምትችለው እንዴት ነው? እስቲ የሚከተሉትን ጥያቄዎች ተመልከት።

1. የምትመርጣቸው ጓደኞች በአንተ ላይ ምን ተጽዕኖ ያሳድራሉ?

ሁላችንም ብንሆን አብረውን ጊዜ የሚያሳልፉ ሰዎችን የመምሰል ዝንባሌ አለን። ይህ ጥቅምም ጉዳትም ሊኖረው ይችላል፤ አብረን ጊዜ የምናሳልፈው በአካልም ሆነ በማኅበራዊ ሚዲያ አማካኝነት መሆኑ በዚህ ረገድ ለውጥ አያመጣም። መጽሐፍ ቅዱስ እንደሚለው “ከጥበበኞች ጋር የሚሄድ ጥበበኛ ይሆናል፤ ከሞኞች [ይሖዋን ከማይወዱ ሰዎች] ጋር የሚገጥም ግን ጉዳት ይደርስበታል።” (ምሳሌ 13:20) ይሖዋን የሚወዱና የሚያመልኩ ጓደኞች ከይሖዋ ጋር ተቀራርበህ እንድትኖርና ጥሩ ውሳኔ እንድታደርግ ይረዱሃል። ይሖዋን የማይወዱ ጓደኞች ግን ከእሱ እንድትርቅ ሊያደርጉህ ይችላሉ። በእርግጥም መጽሐፍ ቅዱስ ጓደኞቻችንን በጥበብ እንድንመርጥ የሚያበረታታን መሆኑ አያስገርምም! አምላክን ከሚወዱ ሰዎች ጋር ጓደኝነት መመሥረታችን እኛንም ሆነ እነሱን ይጠቅማል። ‘እርስ በርስ ለመበረታታት እንዲሁም ለመተናነጽ’ ያስችለናል።—1 ተሰሎንቄ 5:11

2. ይሖዋ የምትመርጣቸውን ጓደኞች ሲያይ ምን ይሰማዋል?

ይሖዋ ጓደኞቹን የሚመርጠው በጥበብ ነው። “የጠበቀ ወዳጅነት” የሚመሠርተው “ከቅኖች ጋር” ነው። (ምሳሌ 3:32) ይሖዋ እሱን ከማይወዱ ሰዎች ጋር ጓደኝነት ስንመሠርት ምን ይሰማዋል? በጣም እንደሚያዝን የታወቀ ነው! (ያዕቆብ 4:4⁠ን አንብብ።) በሌላ በኩል ግን ከመጥፎ ጓደኞች የምንርቅ እንዲሁም ወደ ይሖዋና እሱን ወደሚወዱ ሰዎች የምንቀርብ ከሆነ ይሖዋ ይደሰታል፤ በተጨማሪም ከእኛ ጋር ወዳጅነት ይመሠርታል።—መዝሙር 15:1-4

ጠለቅ ያለ ጥናት

ጥሩ ጓደኞችን መምረጥህ በጣም አስፈላጊ የሆነው ለምን እንደሆነና በሕይወትህ ላይ በጎ ተጽዕኖ የሚያሳድሩ ጓደኞችን ማግኘት የምትችለው እንዴት እንደሆነ እንመለከታለን።

3. ከመጥፎ ጓደኞች ራቅ

መጥፎ ጓደኞች የሚባሉት አምላክንና የእሱን መሥፈርቶች የማይወዱ ሰዎች ናቸው። ቪዲዮውን ተመልከቱ፤ ከዚያም በሚከተለው ጥያቄ ላይ ተወያዩ፦

ቪዲዮ፦ ከመጥፎ ጓደኛ ራቁ (6:17)

ሳይታወቀን ከመጥፎ ጓደኞች ጋር ልንገጥም የምንችለው እንዴት ነው?

አንደኛ ቆሮንቶስ 15:33⁠ን አንብቡ፤ ከዚያም በሚከተሉት ጥያቄዎች ላይ ተወያዩ፦

መጥፎ ጓደኛ የሚባለው ምን ዓይነት ሰው ነው? ለምን?

መዝሙር 119:63⁠ን አንብቡ፤ ከዚያም በሚከተለው ጥያቄ ላይ ተወያዩ፦

ጓደኛ ስትመርጥ መመዘኛህ ሊሆን የሚገባው ምንድን ነው?

በርካታ ፍሬዎች የያዘ ሳህን። አንዱ የተበላሸ ፍሬ ዝንቦችን እየሰበሰበና ሌሎቹን ፍሬዎች እያበላሸ ነው — አንድ የተበላሸ ፍሬ ሌሎቹን ፍሬዎች ሁሉ ሊያበላሽ ይችላል። አንድ መጥፎ ጓደኛስ በአንተ ላይ ተጽዕኖ ሊያሳድር የሚችለው እንዴት ነው?

4. ከእኛ በጣም የተለዩ ሰዎች ጥሩ ጓደኛ ሊሆኑን ይችላሉ

መጽሐፍ ቅዱስ በጥንቷ እስራኤል ስለኖሩ ዳዊትና ዮናታን የተባሉ ሰዎች ይናገራል። ሁለቱ ሰዎች ዕድሜያቸውም ሆነ አስተዳደጋቸው ፈጽሞ የተለያየ ነው፤ ሆኖም በጣም የጠበቀ ወዳጅነት መመሥረት ችለዋል። አንደኛ ሳሙኤል 18:1⁠ን አንብቡ፤ ከዚያም በሚከተለው ጥያቄ ላይ ተወያዩ፦