Jeremías
13 Chau Jehová feipieneu tüfachi dungu: “Ngillameaimi quiñe lino trarihue ca trarintucuafimi cintura püle, huelu tuculayafimi co meu”. 2 Feimu chumngechi feipi Chau Jehová, ngillafiñ ti trarihue ca trarintucufiñ tañi cintura mu. 3 Fei ca quiñe rupa llohun Chau Jehová ñi dungun. Feipieneu: 4 “Nüfinge tami ngillaelchi trarihue tami tucunieel, amunge Éufrates leufü ca tiye mu ellcacünuafimi* cheu ñi trafolen ti fütra cura”. 5 Feimu amun ca ellcacünufiñ inaltu Éufrates leufü mu, chumngechi huercüeneu Chau Jehová.
6 Huelu rupalu fentren antü Chau Jehová feipieneu: “Huitrapürange, amunge Éufrates leufü mu ca yemetunge ti trarihue tami ellcacünufiel tiye mu, chumngechi huercüeyu”. 7 Feimu amun Éufrates leufü mu, rünganentufiñ ti trarihue ca entufiñ cheu tañi ellcacünufiel. Ngüneduamün ti trarihue ñi huesañmahun, fei cümehuelai.
8 Fei hula llohun Chau Jehová ñi dungun. Feipieneu: 9 “Tüfa ñi feipin Chau Jehová: ‘Ca femngechi apümcayafiñ Judá ca Jerusalén ñi mallma piuquengen. 10 Tüfachi huesaque che pilai ñi inayal tañi feipin, trencül piuquengeingün,* inaqueingün chem ñi ayüqueel quisu tañi piuque, püramyefingün caquelu dios, serfifingün ca pochongnagingün* tañi adquiñ mu. Feimu tüfachi trarihue reque feletuaingün, cümehuelayai engün’. 11 ‘Chumngechi ti trarihue nüucülei quiñe huentru ñi cintura mu, ca femngechi iñche tañi pin mu com pu Israel che ca com pu Judá che nüucülefui ta iñche mu’ pi Jehová. ‘Femngechi femün iñche tañi pu chengerpual engün, tañi cüme quimngeal iñche, tañi saquingeal ca tañi ayüfalngeal. Huelu inalaingün tañi feipin’.
12 Ca feipiafimi engün tüfachi huercün dungu: ‘Tüfa ñi feipin Jehová, Israel ñi Chau Ngünechen: “Com ti fütraque metahue apolngequei pulcu mu”’. Tüfa engün feipiaimu: ‘Felei tati, com ti fütraque metahue apolngequei pulcu meu, ¿quimnolu troquimuiñ?’. 13 Fei hula feipiafimi engün: ‘Tüfa tañi feipin Chau Jehová: “Quiñe fütra metahue reque apolcünuafiñ pulcu meu com pu che mülelu tüfachi mapu mu, pu lonco ülmen anülelu David ñi ülmen huancu mu, pu sacerdote, tañi pu huerquen ca com pu Jerusalén che. Fei ngollicahuai engün. 14 Iñche tañi pin mu hueluquentu troncühuai engün, pu chau ca tañi pu yall”* pi Chau Jehová. “Huesa duamcülelayan ca hueñancülelayan rume. Cutranpiuqueyelayafiñ engün. Chem no rume catrütulayaeneu tañi apümcayafiel engün”’.
15 Allcütumün ca cüme ngüneduamaimün.
Chau Jehová dungui, feimu mallma piuquengelayaimün.
16 Püramyeafimün tamün Chau Ngünechen Jehová
petu ñi dumiñnagnon quisu tañi pin mu
ca petu tamün mutrurtucuunon huincul püle pun meu.
Eimün üngümaimün* pelon,
huelu fütra dumiñ cüpalai.
Femcünuafi ñi curülechi tromüngetual ti pelon.
17 Huelu pinolmün tamün allcütual,
ellcalen ngümayan tamün mallma piuquengen mu.
Rumeñma ngümayan ca tañi nge apoai cülleñu mu,*
cañpüle yengetulu cai Chau Jehová ñi pu che.
18 Feipiafimi ti lonco ülmen ca tañi ñuque: ‘Tamu ayüfal corona trananagai tamu lonco mu,
feimu anünagaimu illamfal huancu mu’.
19 Sur mülechi fillque huaria cerralei,* ngelai inei no rume tañi nülayafiel.
Com pu Judá che cañpüle yengei, com pu che cañpüle yengei.
20 Püraquintunge ca adquintufinge pu cüpalelu norte püle.
¿Cheu mülei tami elungeelchi quechan ufisa, tami cümeque ufisa?
21 Eimi rumel cüme hueniyefimi caquelu che,
huelu ¿chem piafuimi castigaelmu engün?
Chumngechi cutrancauquei quiñe domo choyüalu ñi püñeñ, ¿ca femngechi cutrancaupelayaimi mai?
22 Ca feipilmi tami piuque mu ‘¿Chumngelu* rupan tüfachi dungu mu?’,
quimtucuaimi, fente tami huelulcan mu müntuñmangeimi* tami pollera
ca rume cutrantui tami rüncoi namun.
23 ¿Cacünutuafui mai tañi trahua quiñe Cus che?*
Cam quiñe fütra auca ñarqui,* ¿cacünutuafui mai tañi tropan trülque?*
Femngefule, eimün cüme femafuimün,
huelu pepicaucüleimün tamün huesa femal.
24 Feimu chumngechi ti cürüf cüpalu huellin mapu mu* pachügcafi ti pinu,* ca femngechi iñche huall püle yehuaiñ.
25 Medicünufiñ ti troquiñ eimingealu, tüfa elungeaimi” pi Chau Jehová.
“Eimi ngoimanentuen* ca maneluhuimi coilaque dungu mu.
26 Feimu huitrañpüramafiñ tami pollera, ange mu puhuai.
Fei pengeaimi tami triltrangcülen,
27 tami ñihualuhun, tami rume huesa illutun
ca tami pod cudumuhun.*
Huincul ca lelfün mu,
pefiñ tami femquen ünufal dungu.
¡Aungeimi, Jerusalén!
¿Tunteñmayai* tami podcülen?”.