Jeremías
16 Ca huiño llohun Chau Jehová ñi dungun. Feipieneu: 2 “Tüfachi mapu mu quintulayaimi quiñe domo. Nielayaimi fotüm ca ñahue. 3 Tüfa tañi feipin Jehová ñi rupayal pu fotüm, pu ñahue ca pu püñeñ choyüngelu tüfachi mapu mu. Ca feipi chem ñi rupayal tañi ñuque engün ca tañi pu chau: 4 ‘Cutran mu layaingün, huelu inei no rume hueñancütulayayu ca rüngaltucungelayai rume. Funa reque feletuai mapu mu. Fütra cuchillo ca filla mu layaingün, cafei pu üñüm* ca pu culliñ iñmayayu tañi lachi cuerpo’.
5 Tüfa ñi feipin Chau Jehová:
‘Conpulayaimi chem ruca mu no rume cheu ñi imequen pu layeluulu.
Amulayaimi tiye mu tami ngümayal ca pentucumelayaimi’.
‘Iñche tañi pin mu tüfachi troquiñche niehuelai tañi tüngün.*
Iñche piuqueyehuelafiñ engün* ca cutranpiuqueyehuelafiñ’ pi Jehová.
6 ‘Com pu falinque che ca pu illamngelu layaingün tüfachi mapu mu.
Rüngaltucungelayai engün,
inei no rume hueñancütulayayu,
inei no rume catrülayai tañi cuerpo ca cupil-layai tañi lonco fei engün ñi duam mu.*
7 Cafei inei no rume elulayafi iyael pu layeluulu
tañi nehuentucungeal lan mu tañi pu che.
Cafei elungelayai engün ñi putual* copa pulcu tañi yafültucungeal
lan mu tañi chau cam tañi ñuque.
8 Cafei conlayaimi chem ruca mu no rume cheu ñi mülen fiesta.
Anücünuulayaimi quiñentrür pu che engün tami iyal ca putual’.
9 Tüfa ñi feipin Jehová, Ñidolcülelu pu hueichafe mu,* Israel ñi Chau Ngünechen: ‘Iñche tañi pin mu allcüngehuelayai ñi rumeñma ayüucülequen pu che ca tañi dunguquen ti novio ca ti novia. Tüfa rupayai tamün antü mu ca tamün adquiñ mu’.
10 Feipifilmi tüfachi pu che com tüfachi dungu, ramtungeaimi: ‘¿Chumngelu* Chau Jehová feipi taiñ huercülaeteu com tüfachi fütra cutrancahun? ¿Chem huelulcan ca culpan* coniyiñ taiñ caiñetuafiel taiñ Chau Ngünechen Jehová?’. 11 Eimi feipiafimi engün: ‘“Femngechi rupayaimün tamün pu chau ñi femün mu” pi Chau Jehová. “Fei engün elcünueneu, fentecünulaingün ñi poyeafiel caquelu dios, serfifingün ca pochongnagingün* tañi adquiñ mu. Huelu elcünueneu iñche ca allcütulaingün tañi ley. 12 Eimün doi huesaque dungu femimün tamün pu cuifiqueche mu. Caque quiñeque eimün inaqueimün chem ñi ayüqueel tamün trencül huesa piuque,* fei allcütumulan. 13 Feimu caque mapu meu huemünentuhuaiñ,* quiñe mapu ñi quimnofiel eimün ca tamün pu cuifiqueche. Tiye mu serfiafimün caquelu dios antü ca pun meu. Iñche füreneulayaiñ”’.
14 Chau Jehová feipi: ‘Püllelepai ta antü, fei feipingehuelayai: “¡Taiñ mongelechi Chau Jehová ñi üi mu, tati entufilu pu Israel che Egipto mapu mu!”. 15 Huelu mai, feipiaingün: “¡Taiñ mongelechi Chau Jehová ñi üi mu! ¡Entufi pu Israel che norte mapu püle ca com mapu cheu tañi yefiel, fei cüpaltufi fau!”. Cüpaltuafiñ engün tañi mapu mu, feiti mapu tañi elufiel tañi pu cuifiqueche’.
16 ‘Cüpange feipifalafiñ fentren challhuafe,
ca tüfa engün challhua reque nüaimünmeu’ pi Chau Jehová.
‘Fei hula cüpange feipifalafiñ fentren che nüquelu culliñ.
Tüfa engün nüaimünmeu com fütraque huincul, fillque huincul
ca cheu ñi trafolen fütraque cura.
17 Iñche penien com tañi femquen engün.*
Pepi ellcaulaingün* iñche tañi adquiñ mu,
ca tañi huelulcan engün pepi ellcalafingün iñche tañi adquiñ mu.
18 Iñche tañi mapu mu tucuingün fillque ünufal adentun* nienolu mongen, fei podüñmafingün.
Cafei apolfingün iñche ñi mapu tañi fillque ünufalchi dungu mu.
Feimu com castigayafiñ tañi culpan mu engün’”.*
19 Ahuem, Chau Jehová, eimi nehuentucuqueen ca tañi nehuen-ngechi mülehue reque feleimi.
Eimi meu lefmauquen cutrancahun antü mu.
Eimi mu cüpayai pu troquiñche mülelu com huall mapu mu
ca feipiaingün: “Taiñ pu cuifiqueche elungei ñi poyeafiel coilaque dios,
falinochi dungu ca ngünam dungu pepi quelluquenolu”.
20 ¿Quiñe huentru deumapeafui quisu tañi pu dios?
Tañi deumaelchi dios rüfngelai tati.
21 “Feimu iñche tañi pin mu quimaingün
tañi nehuen ca tañi pepiluhun,
fei quimaingün Jehová pingen tañi üi”.