Jeremías

52 Sedequías 21 tripantu niefui lonco ülmen-ngerpulu, fei 11 tripantu ngüneniei Jerusalén mu. Tañi ñuque Hamutal pingei, Jeremías ñi ñahue, Libná mu tuhui. 2 Sedequías huesa femquefui Chau Jehová tañi adquiñ mu, chumngechi femi Jehoiaquim. 3 Chau Jehová rume illculefui* ca famentufi engün,* feimu rupai tüfachi dungu Judá ca Jerusalén huaria mu. Fei Sedequías caiñetufi Babilonia ñi lonco ülmen. 4 Sedequías yeniefui 9 tripantu ñi ngünenieel. Feichi mu ti 10 antü conchi 10 cüyen mu, Nabucodonosor,* tüfa Babilonia ñi lonco ülmen, caiñetupafi Jerusalén com tañi pu hueichafe engün.* Anümingün ñi tolto ruca* tañi hueichayafiel ca deumaingün quiñe malal reque ñi hualloñmayafiel* ti huaria. 5 Hualloñmangei ti huaria puulu hula 11 tripantu ñi ngünenieel ti lonco ülmen Sedequías.

6 Ti 9 antü conchi 4 cüyen mu mülei quiñe fütra filla huaria mu, ca ngehuelai iyael ñi elungeal pu che feichi mapu mu. 7 Af meu, pu Caldea che petu hualloñmafilu ti huaria, pu caiñe trafolfi quiñe troquiñ ti fütra cura malal mu* ca com pu hueichafe lefmahui engün pun mu. Tripaingün puerta püle mülelu rangi 2 fütra cura malal mu, inaltu ti lonco ülmen ñi ayüfalchi lof. Amuingün ti rüpü püle puulu Arabá mapu mu. 8 Huelu pu Caldea hueichafe inantucufingün ti lonco ülmen Sedequías ca dintucufingün Jericó ñi laf mapu püle* huellin mapu mu.* Com ti lonco ülmen ñi pu hueichafe huall püle amuingün. 9 Fei nüngei ti lonco ülmen ca yengei ta Riblá mu, Hamat mapu meu. Babilonia ñi lonco ülmen ñi adquiñ mu yengei ca condenangei. 10 Babilonia ñi lonco ülmen langümfi Sedequías ñi pu fotüm quisu tañi adquiñ mu. Cafei langümfi com Judá ñi pu principe mülelu Riblá mu. 11 Fei hula Babilonia ñi lonco ülmen traumalfi ta Sedequías, traricünufi cobre cadena mu, yetufi ta Babilonia ca presuntucufi puulu hula tañi layal.

12 Nabucodonosor,* Babilonia ñi lonco ülmen, yeniefui 19 tripantu tañi ngünenieel, feichi mu ti 10 antü conchi 5 cüyen mu, conpui Jerusalén mu ti loncolechi soltau, Nebuzaradán pingelu, tüfa quelluquefui Babilonia ñi lonco ülmen. 13 Lüpümfi Chau Jehová ñi ruca, ti lonco ülmen ñi ruca ca com ti ruca mülelu Jerusalén mu, cafei lüpümfi com tati fütraque ruca. 14 Com pu Caldea hueichafe compañniefilu ti loncolechi soltau, teifücafingün ti fütra cura malal hualloñmalelu Jerusalén.

15 Nebuzaradán, tüfa ti loncolechi soltau, camapu yetufi quiñe troquiñ pu doi pofre che ca tati pu che mülehuelu huaria mu. Cafei yetufi pu quelluntucufilu Babilonia ñi lonco ülmen ca pu caquelu artesano adümuucülelu. 16 Huelu ti loncolechi soltau Nebuzaradán tiye mu elcünufi quiñeque che doi pofrelelu mapu mu, fei ñi cuidayal anümca ofad ca ñi femal fanechi cüdau.

17 Pu Caldea che trafocafingün ti cobre orcon* mülelu Chau Jehová ñi ruca mu, pu carrito ca Lafquen pingechi cobre lafatorio mülelu Chau Jehová ñi ruca mu. Fei yefingün com ti cobre Babilonia mu. 18 Cafei yefingün balde, pala, tijera,* tazon, copa ca com ti cobre chemcün* pünengelu Chau Dios ñi ruca mu.* 19 Ti loncolechi soltau yefi pu lafatorio, braserillo, tazon, balde, candelabro,* copa ca pu tazon re oro ca platangelu. 20 Rume fentren cobre nierquei ti 2 orcon, ti Lafquen pingechi lafatorio, ti 12 cobre toro mülelu miñche ti lafatorio ca pu carrito deumalu ti lonco ülmen Salomón ñi müleal Chau Jehová ñi ruca mu, feimu pepi fanetungequelafui feiti cobre.

21 Ca mülefui fütraque orcon. Quisuque orcon 8 metro* alüpürai, duamniengefui quiñe llasu mediquelu 5 metro* tañi medingeal tunte rupan* quisuque orcon, trololcülefui ca 4 changüll cuhu* alürumei ti cobre. 22 Huechuñ püle mülefui quiñe chemcün metahue reque felelu, cobrengei ca 2 metro* alüpürai. Huall püle ti chemcün mu mülei malla ca granada fün cobrengelu. Ca femngechi trüri cangelu orcon ca tañi granada. 23 Huall püle ti chemcün mu pengefui 96 granada, huelu huall püle mülefui 100 granada ti malla mu.

24 Ti loncolechi soltau ca yefi tati loncolechi sacerdote Seraya, cafei Sofonías, tüfachi sacerdote quelluquefui ti loncolechi sacerdote. Cafei yefi ti 3 huentru cuidaquelu puerta. 25 Huaria mu entufi ca yefi quiñe falin huentru cüdauquelu ti ülmen ruca mu, tüfa ca loncolefui pu soltau. Ca yefi 7 huentru ngülamtuquefilu ti lonco ülmen, tüfa engün müleingün huaria mu. Ca yefi ti loncolechi soltau ñi secretario dulliquefulu pu che mapu mu. Ca yefi 60 pofre huentru mapu mu, tüfa engün petu mülefuingün huaria mu. 26 Ti loncolechi soltau Nebuzaradán yefi engün Riblá meu, cheu ñi mülen Babilonia ñi lonco ülmen. 27 Babilonia ñi lonco ülmen langümfi engün Riblá mu, Hamat mapu mu. Femngechi entungei pu Judá che tañi mapu mu, fei camapu yengetui.

28 Nabucodonosor* yenielu 7 tripantu tañi ngünenieel, cañpüle yetufi 3 mil 23 Judá che.

29 Nabucodonosor* yenielu 18 tripantu tañi ngünenieel entungei Jerusalén mu 832 che tañi yengetual.

30 Nabucodonosor* yeniefui 23 tripantu tañi ngünenieel. Feichi mu ti loncolechi soltau Nebuzaradán cañpüle yetufi 745 Judá che.

Com pu che cañpüle yengelu fei ta 4 mil 600 che.

31 Fei hula, rupai 37 tripantu ñi yengetun ti lonco ülmen Joaquín, Judá mu tuulu. Feichi tripantu mu Evil-Merodac lonco ülmen-ngerpui Babilonia mu. Cafei ti 25 antü conchi 12 cüyen mu, tüfachi lonco ülmen carcel mu entufi ca lifrenentufi ti lonco ülmen Joaquín, Judá mu tuulu. 32 Fürenefi ca doi saquifi ta Joaquín com caquelu lonco ülmen mu mülelu Babilonia. 33 Joaquín entui ti tacun ñi tucufel pu presu ca tunte puulu ñi mongen iquefui ti lonco ülmen ñi mesa meu. 34 Babilonia ñi lonco ülmen huercüi ñi elungeal iyael ta Joaquín fill antü tunte puulu ñi mongen, puulu hula ti antü tañi layal.