Jesu rumel feyentukey

¿Müna küdawngey feyentuafiel (müngeltuafiel) tami chaw ka ñuke?... Kiñeke mu küdawngey llemay. Fey ¿chem kelluafeymu tami feyentuafiel? Jesu ñi inafalchi femün kelluaymu tati. Jesu, ¿iney engün am feyentufi (müngeltufi)? ¿Chem pimi kay?... Kidu feyentufi ta Jewba, ka tañi chaw ka ñuke. Fewla doy kimaiñ Jesu mu.

Petu küpanolu Mapu mew, Jesu mülekefuy wenu mapu mu tañi Chaw Jewba engu. Welu mülepalu Mapu mew, Jesu ka niefuy kiñe chaw ka kiñe ñuke, Jose ka Maria pingey tañi üy engu. Fey ¿chumngechi Maria ka Jose chawyefingu ta Jesu? ¿Küpa kimfuymi?...

Kom ti pu püñeñ tremkey ponwi (punuy) tañi ñüke mew. Feymu Jesu tañi choyüngeal (llegal) tati pu we püñeñ reke, Jewba femi kiñe afmatufalchi dungu. Fey aylla küyen rupalu, Jesu choyüngey (llegi) Mapu mu. Femngechi Maria ka tañi füta Jose chawyefingu ta Jesu Mapu mu.

Mari epu tripantu müten nielu Jesu, femi kiñe dungu pengelalu ñi tunte (chumten) piwkeyefiel tañi wenu Chaw Jewba. Tüfachi dungu rupay amulu kamapu tañi reñma (pu che) engün Jerusalen waria mew, poyemeafiel ta Jewba. Wiño amutulu engün ñi ruka mu, Jose ka Maria ngüneduamingu ñi mülenon ta Jesu. ¡Chew no rume pengelay! Feymu ¿chumi Jose ka Maria engu? ¿Chem rakiduamimi?...

Feymew müten (pür) wiñotuy engu ta Jerusalen ñi kintumeafiel ta Jesu. Küla antü wall püle kintufingu. ¡Rume (mütre) kutrantupiwkelefuyngu! Welu petufingu ngillatuwe ruka mew. ¿Chumngelu (chemu) Jesu mülepuy fey mu?... Feychi ruka mu doy fentren kimafuy Jewba ñi dungu. Kidu rume (mütre) piwkeyefi tañi wenu Chaw, feymew ayüy ñi femal Jewba ñi ayükeel. Ka doy tremlu Jesu, amuley ñi feyentuniefiel (müngeltuniefiel) ta Jewba. Rumel feyentukefuy (molkechi müngeltukebuy), küdawngele kam kutrankawün-ngele rume. Welu Jesu ¿ka feyentukefi ta Jose ka Maria?... Femi tati, Biblia feypi tüfa.

¿Chem kimeltueymu Jesu ñi inafalchi femün?... Rumel müley tami feyentuafiel (müngeltuafiel) tami chaw ka ñuke, küdawngele rume. Eymi ¿ka femafuymi?...