Huechequeche: deu fautiza­hulmün, doi fülma­nieafimün ta Jehová

 1. Fentrenque pu hueche, ¿chem cümeque dungu femürpuingün?

FILL tripantu mu fautizauquei fentren huechequeche. ¿Eimi cai hueche? ¿Hue fautizahuimi? Femülmi, ti trahunche rume ayüucüleingün. Jehová ca rume ayüucülei (Prov. 27:11). Raquiduamnge com cümeque dungu tami femürpun. Quiñeque tripantu yenieimi chi tami papeltufiel ta Biblia, fei feyenturpuimi ti Biblia Chau Dios mu cüpai. Ca femngechi quimürpuimi ca piuqueyerpufimi ta Jehová. Fente tami poyefiel, hultucuimi tami mongen ca fautizahurpuimi. ¡Müna cüme dungu!

 2. ¿Chem peaiñ tüfachi troquiñ mu?

² Petu tami fautizaunon, rupapelaimi cüdaungechi dungu mu, fei cüdautuimi chi tami poyenieafiel ta Jehová. Rupalechi tripantu mu, ca rupayaimi huesaque dungu mu. Huecüfü chem dungu rume ta femai tami poyehuenoafiel ta Jehová ca tami püntütripayal ta quisu mu (Efes. 4:14). Eluulayaimi tami ngünencayaeteu. ¿Chem quelluaimu tami rumel feyentunieafiel ta Jehová? Biblia feipi amulnieaimi tami doi quimal quiñe quim füchache reque (Heb. 6:1). Tüfachi troquiñ mu peaiñ tüfa.

 3. Deu fautizahun mu quiñe cristiano, ¿chem mülei ñi femal?

³ Quiñe che hue fautizaulu mülei ñi inayafiel ti ngülam apostol Pablo ñi elufiel tati pu Éfeso che. Pablo ngülamtueyu engün ñi quimchengeal quiñe füchache reque (Efes. 4:13). Pablo feipieyu reque: “Amulepe tamün cüme hueniyenieafiel ta Jehová”. Quiñe che ñi hueniyehun Jehová engu tremafui chumngechi ñi tremcülen quiñe pichiche. Quiñe pichiche rume ayühuelquefi tañi chau, huelu com tañi mongen mu quiñe pichiche reque felelai. Rupalechi antü mu, elcünuquei chumquen ta quiñe pichiche (1 Cor. 13:11). Ca femngechi deu ñi fautizahun mu quiñe che, mülei ñi tremcüleal chumngechi ñi hueniyeniehun Jehová engu. Peaiñ quiñeque ngülam tami quelluaeteu.

 4. ¿Chem quelluaimu tami doi hueniyerpuafiel ta Jehová? ¿Chumngelu? (Filipenses 1:9).

⁴ Doi piuqueyenieafimi ta Jehová. Felei tami rume poyeniefiel ta Jehová, huelu feiti poyehun doi tremcüleafui. ¿Chumngechi? Apostol Pablo feipi chumngechi ñi femngeal (papeltunge Filipenses 1:9). Pablo ngillatufi ta Jehová ti pu Filipos che ñi “nieal doi fentren piuqueyehun”. Tüfa feipi taiñ poyeniefiel ta Jehová doi tremürpuafui. Pablo ca feipi taiñ poyeafiel ta Jehová fentren quimün mu ca doi adümuhun mu. Feimu doi quimfiliyiñ ta Jehová doi piuqueyeafiyiñ, fei doi ayüfiyiñ tañi chumngen ca ñi femquen. Fei ayülaiñ taiñ hueñancülafiel, doi mai taiñ ayühuelafiel. Quintuqueiñ Jehová ñi ayüqueel ca chumngechi femafuiñ.

5, 6. ¿Ca chem chumaiñ taiñ doi piuqueyeafiel ta Jehová?

⁵ Taiñ doi cüme hueniyeafiel ta Jehová, mülei taiñ doi cüme quimafiel tañi Fotüm. Fei cüme pengeli chumngen tañi Chau Jehová (Heb. 1:3). Tañi doi cüme quimngeal ta Jesús, mülei ñi papeltungeal tati meli evangelio. ¿Papeltuquefimi Biblia fill antü? Petu nienolmi femngechi huimtun, feula femafuimi. Papeltulmi ñi feipin ca ñi chumquefel ta Jesús, cüme inaduamfinge tañi chumngen. Jesús com pu che cüme llouquefui. Biblia feipi Jesús metañpüramquefui pichiqueche (Mar. 10:13-16). Jesús cüme duamelquefui tañi pu inanieteu, feimu eluucülefuingün ñi feipiafiel ta Jesús com piuque mu chem tañi raquiduamcülen engün (Mat. 16:22). Jesús femngechi chengefui ñi inayentuniefiel tañi Chau huenu mülelu. Jehová allcütuchefengei ca piuqueyechen-ngei, feimu llellipuafuiñ com piuque mu chem taiñ raquiduamcülen. Quimnieiñ taiñ juzgafemnoaeteu. Fei poyenieiñmu ca duamtunieiñmu ta iñchiñ (1 Ped. 5:7).

⁶ Jesús rume cutranpiuqueyequefui pu che. Ti apostol Mateo feipi: “Fei Jesús pefilu tati pu che, cutranpiuqueyefi quisulelu engün am quiñe quechan ufisa reque nienolu tañi camañnieaeteu” (Mat. 9:36). ¿Jehová cai? ¿Chumngechi pequefi pu che? Jesús feipi: ‘Ca femngechi, eimün tamün Chau, mülelu ta huenu, ayülelai tañi ñamal quiñe no rume ta tüfachi pichiche reque felelu ñi feyentun meu’ (Mat. 18:14). ¡Müna ayühun-ngei Jehová taiñ fente poyenieteu! Doi quimfiliyiñ ta Jesús, doi piuqueyeafiyiñ ta Jehová.

 7. Hueniyefilmi pu quimünque cristiano, ¿chumngechi quelluaimu?

⁷ ¿Ca chem quelluaimu tami doi piuqueyeafiel ta Jehová? Hueniyeafimi pu quimünque cristiano. Inaduamfinge tüfachi pu peñi ca lamngen ayüuquiyauqueingün. Feipicünufingün ta Jehová com tañi mongen mu tañi serfiafiel, feimu ayüucüleingün. Ramtufinge engün chem cümeque dungu tañi rupan mu engün petu tañi serfiniefiel mu ta Jehová. Amulele tami tremcülen, mülei tami dullial chumcünual tami mongen. Feimu feipifinge tüfachi pu peñi ca lamngen tami ngülamtuaeteu. Biblia feipi: “Mülen mu fentren ngülamtufe cüme tripaquei ti dungu” (Prov. 11:14).

 8. Quiñeque mu müte maneluunolmi ñi feipin ta Biblia, ¿chem chumafuimi?

⁸ Cüme inaduamfinge chem dungu mu tami feyentulen. Taiñ feipipeel parrafo epu mu, ti Huecüfü ayülai tami cüme hueniyeafiel ta Jehová. Ayülei tami maneluuhuenoal ta Biblia mu. Raquiduamnge: colegio mu quimeltungequei evolucion dungu. Doi pichicalu eimi, ramtuuquelafuimi chi ti evolucion ñi rüf dungungen cam ñi rüf dungungenon. Huelu feula tati quimeltuchefe quimeltuqueimu ti evolucion ñi maneluhun-ngen. Tami quimeltuchefe, ¿quiñeque mu eluuquei ñi inaduamal ñi mülen ta Ngünechen? Turpu femquepeafui. Proverbios 18:17 huli quiñe cüme ngülam: “Hune feipilu tañi dungu quiñe juicio meu rüfngelu troquifali ñi feipin aculu hula cangelu che ñi ramtucayaeteu”. Femngechi, ngelai tami feyentufemal chem dungu tami quimeltungequeel ta colegio mu. Doi mai mülei tami cüme inaduamal chem pin ta Biblia. Papeltuafimi com papel ca lifru ñi nentuel taiñ troquiñche, ca nütramcayafuimi pu peñi ca lamngen cuifi feyentuquefulu evolucion mu. Ramtufinge chumngelu feula maneluucüleingün ñi mülen ta Ngünechen ca ñi piuqueyechequen. Femülmi, doi cüme inaduamaimi ñi mülen ta Ngünechen.

 9. Melissa ñi rupan mu, ¿chem quimeltueimu?

⁹ Quiñe lamngen, Melissa pingelu, rume quellueyu ñi papeltuafiel taiñ papel ca taiñ lifru.b Fei feipi: “Pu estudiante colegio mu feipingequei ñi rüfngen ti evolucion. Feimu hune iñche llicalefun ñi doi inaduamafiel ti evolucion. ‘Femli, maneluuhuelayafun Dios mu’ pin. Huelu fei quimürpun Jehová ayüquei taiñ cüme inaduamafiel chem dungu mu taiñ feyentuleal, feimu eluhun ñi papeltual. Chillcatufiñ ti lifru ¿Existe un Creador que se interese por nosotros? ca ti epu folleto ¿Es la vida obra de un Creador? ca El origen de la vida. Cinco cuestiones dignas de análisis. Tüfa tañi duamniefel. ‘¿Chumngelu am pürüm femlafiñ?’ pin”.

10, 11. ¿Chem quelluafeimu tami yenieal quiñe lifngechi mongen? (1 Tesalonicenses 4:3, 4).

¹⁰ Famentuafimi ti huesaque illutun. Quiñe hueche tremcülelu duamürpuquefi ti cudumuhun dungu. Ca quiñeque mu, ngüchaltucungequeingün ñi conal ti podngechi cudumuhun mu. Eimi hueche, Huecüfü ayüniei tami ngünenieaeteu huesaque illutun mu. ¿Chem quelluafeimu tami yenieal quiñe lifngechi mongen? (Papeltunge 1 Tesalonicenses 4:3, 4, TNM). Feipiafimi Jehová chem tami raquiduamcülen ca ngillatuafimi tami eluaeteu nehuen (Mat. 6:13). Jehová juzgafemlayaimu, doi mai ayüniei tami quelluaeteu (Sal. 103:13, 14). Biblia ca quelluafeimu. Melissa, rupachi parrafo mu taiñ nütramcapeel, fei contuquefeyu podngechi raquiduam. Fei feipi: “Biblia acordalelqueneu Jehová ñi ngen-ngen iñche tañi mongen mu. Fei iñche ayülen tañi fülmanieafiel. Fill antü ñi papeltufiel mu ta Biblia, femngechi ñi huesaque raquiduam ngünenielaeneu” (Sal. 119:9).

¹¹ Quisu chaftulayafimi huesaque dungu tami rupamequen, nütramcayafimi tami pu chau. Cüdautuafuimi chi cam yehueafuimi tami feipiafiel, huelu rume falin-ngei tami femal. Melissa feipi: “Ngillatufiñ Jehová tañi eluaeteu nehuen, feimu feipifiñ tañi chau chem dungu mu ñi rupamequen. Femlu iñche, rume tüngduamnagün. Feimu raquiduamün ñi ayühuelfiel ta Jehová”.

12. ¿Chem quelluaimu tami cüme dullial chem tami femal?

¹² Eluunge tami adnieaeteu Biblia ñi ngülam. Rupalechi tripantu mu, quisu dulliaimi chumngechi mongen tami yenieal. Huelu tami huechengen mu, petu com quimnielafimi chumngen ta mongen. ¿Chem quelluaimu tami rumel hueniyenieafiel ta Jehová? (Prov. 22:3). Quiñe lamngen Kari pingelu ayülefui ñi cüme dullial ñi femal. Fei quimürpui pu quimünque cristiano mu com dungu duamnielai ñi feipingeal chem chumal tañi mongen mu. Kari feipi: “Feula re inaquelafiñ müten Biblia ñi huercün dungu, doi mai inaduamquen chem ñi raquiduamquen ta Jehová”. Papeltulmi quiñe troquiñ Biblia, ramtuunge: “¿Chem raquiduamquei Jehová? ¿Chem ngülam nentuafun tüfa mu? Inafili tüfachi ngülam, ¿chumngechi cümelcayaeneu?” (Sal. 19:7; Is. 48:17, 18). Papeltufilmi ta Biblia ca raquiduamülmi tañi quimeltun mu, cüme dulliaimi tami femal. Femngechi ayühuelafimi ta Jehová ca doi cüme adümürpuafimi Jehová tañi raquiduam. Feimu com dungu mu duamlayaimi tami feipingeal chem tami chumal, femngechi quimün-ngerpuquei ta pu cristiano.

13. Cümeque hueni nielmi, ¿chumngechi quelluafeimu? (Proverbios 13:20).

¹³ Hueniyefinge poyequefilu ta Jehová. Dullilmi cümeque hueni quelluaimu tami doi fülmanierpuafiel ta Jehová (papeltunge Proverbios 13:20). Raquiduamnge ñi rupan quiñe lamngen Sara pingelu. Tüfachi lamngen müte ayüucülequelafui tañi serfiafiel ta Jehová. ¿Chem quellueyu? Sara feipi: “Doi huelulcaucülelu tañi raquiduam, pen cümeque hueni. Iñche ca cangelu üllcha lamngen trür papeltuquefuyu Ti Huerquen. Cangelu hueni ca quellueneu tañi huiñoldungual trahun mu. Tañi pu hueni quellueneu tañi doi falintuafiel ñi papeltual ca ñi llellipuleal. Ñochiquechi doi cüme hueniyerpufiñ ta Jehová, femngechi ayüucületun”.

14. Julien, ¿chumngechi pei cümeque hueni?

¹⁴ ¿Chem femafuimi tami peal cümeque hueni? Quiñe loncolelu Julien pingelu feipi: “Iñche huechengelu, amuldungun mu pen cümeque hueni. Fei engün rume ayüquefui ñi amuldungual engün. Pefilu iñche ñi femün engün, quimürpun ti amuldungun ñi rume ayühuelquefiel ta che. Femngechi ayürpun ñi cüdahuelafiel ta Jehová fill antü. Iñche quintuyahulquefun huechequeche müten tañi hueniyeafiel. Huelu quimürpun pu putremcülechi che tañi hueniyeafiel, fei engün doi quelluquefeneu. Feimu conün Betel mu, üyeu ca pen cümeque hueni. Fei engün quimeltueneu ñi cüme dullial chumngechi ñi cüme rupaleal. Femngechi doi cüme hueniyerpufiñ ta Jehová”.

15. Pablo ¿chem ngülam elufi ta Timoteo? (2 Timoteo 2:20-22).

¹⁵ Trahunche mu ca müleafui chi huesaque compañ, fei engün huesalcayafeimu. Fei, ¿chem mülefui tami femal? Pablo ngülamtufi ta Timoteo ñi püntüleal ti huesaque compañ mu. Pablo quimniefui trahunche mu quiñeque che ñi cüme hueniyenofiel ta Jehová (papeltunge 2 Timoteo 2:20-22). Rupayafui tripantu taiñ cüme hueniyerpuafiel ta Jehová, feimu cuñiutucuhuaiñ taiñ cüme hueniyenieafiel. Eluulayaiñ inei no rume taiñ püntünentuaeteu ta Jehová mu (Sal. 26:4).

16. ¿Chem cümeque dungu feipicünuafuimi tami dirpuafiel?

¹⁶ Feipicünunge chem cümeque dungu tami dirpuafiel. Raquiduamnge chumafuimi tami quimün cristianongerpual (Efes. 3:16, TNM). Quiñe ejemplo, eluunge tami cüme papeltuafiel ta Biblia fill antü (Sal. 1:2, 3). Ca dungu tami femal, eluunge tami ngillatuafiel ta Jehová doi fentrenque rupa ca com piuque mu femaimi. Duamnieimi chi tami doi cüme dullial chem dungu mu tami cüme rupaleal, ca tunten tiempo tami femal (Efes. 5:15, 16). Eluhulmi tami cüme quim cristianongerpual, Jehová peai ca rume ayühuelafimi. 

17. Eluhulmi tami quellucheal, ¿chem cümelcan llohuaimi?

¹⁷ Eluhulmi tami quelluafiel pu che, doi cüme cristianongerpuaimi ca ayüucüleaimi tami mongen mu. Jesús feipi: “Doi cümei ta hulal ta llohun meu” (Hech. 20:35). Elcünulmi tiempo tami quellucheal, fei rume cümelcayaimu. ¿Chumafuimi? Quelluafuimi füchaqueche ca cutrancülelu trahunche mu. Ngillacalmeafuimi tañi duamnieel engün ca adcünulelafuimi ñi electronico chemcün. Eimi hueche deu fautizaucülelmi, ca eluhuafuimi tami siervo ministerialngerpual. Femngechi doi cüme quelluafimi ta pu peñi ca pu lamngen (Filip. 2:4). Trahunche mu mülenolu ca quelluafuimi. Amuldungulelafuimi tati cümeque dungu (Mat. 9:36, 37). Cafei precursorngeafuimi, cüdahuafuimi Betel ruca mu, ca coneltuafuimi deumarucan mu.

18. Eluhulmi tami cüdahuelafiel fill antü ta Jehová, ¿chumngechi cümelcayaimu?

¹⁸ Fill antü cüdahuelfilmi ta Jehová, doi fülmanierpuafuimi. Quiñe precursorngerpulmi, amuafuimi tati Escuela ñi Pepicangeam pu Amuldunguquelu Ngünechen ñi Gobierno. Ca mangelngeafuimi Betel mu ca tami deumarucayal. Quiñe precursora, Kaitlyn pingei, feipi: “Fautizaulu iñche, amuldunguquen quimünque lamngen iñchiñ. Tüfa rume quellueneu doi ñi fülmanieafiel ta Jehová. Fei engün rume cüme adümniefuingün ta Biblia ca rume cüme quimeltuchequefuingün. ‘Iñche ca femngechi chengean’ pin”.

19. Amulele tami doi cüme cristianongerpual, ¿chem cümelcan llohuaimi?

¹⁹ Amulele tami doi cüme cristianongerpual, fentren cümelcan llohuaimi. Ngünamcalayaimi tami mongen tami dirpuafiel falin-ngenochi dungu (1 Juan 2:17, TNM). Cüme dullilu am eimi tami femal, huesa tripalayaimi. Doi mai, rüf ayüucüleaimi (Prov. 16:3). Cafei huechequeche ca putremcülechi che inayentuaimu trahunche mu (1 Tim. 4:12). Doi ñi falin-ngen, ayühuelafimi ta Jehová ca hueniyeafimi (Prov. 23:15, 16).