QUIMELTUN 13
Tati coilaque religion illamcaquefi ta Chau Ngünechen
Chau Ngünechen piuqueyechefengei. Huelu, fentren religion feipiquelu rume ñi inaquefiel ta Chau Ngünechen, femmequeingün huesaque dungu ¿chumngelu?a Coilaque religion-ngelu cai. Tüfa engün illamcaquefingün ta Ngünechen, ¿chumngechi am? ¿Chum duamelquefingün? Fei taiñ Huenu Chau, ¿chumafi pu coilaque religion?
1. Pu coilaque religion ñi quimeltuqueel meu illamcaquefi ta Ngünechen
Pu coilaque religion “elcünufingün Chau Ngünechen ñi rüf dungu, fei feyentuingün ti coilaque dungu” (Romanos 1:25). Fentren coilaque religion quimeltuquelaingün Chau Ngünechen tañi üi, huelu Biblia feipi fente falin-ngei üituafiel tañi üi meu (Romanos 10:13, 14). Quiñeque loncolechi religioso feipiquei taiñ rupaquen huesaque dungu meu Ngünechen tañi duam meu. Huelu tüfachi dungu coila dungungei. Huesaque dungu rupaquelaiñ Ngünechen tañi duam meu (papeltuaimi Santiago 1:13). Femngechi coilaque feipin meu, fentren che püntütripai Ngünechen meu.
2. Pu coilaque religion ñi femqueel illamcaquefi ta Ngünechen
Pu coilaque religion inayentuquelafi ta Chau Dios, feimu re huesalcachequei müten. Biblia feipi pu coilaque religion tañi culpan “puhui reque ta huenu” (Apocalipsis 18:5). Pu coilaque religion fentreñma ñi coneltulen politica dungu meu, aucan, hueichan meu, ca quisu engün tañi duam meu fentren che langümngei. Fentren loncolechi religioso pediquefingün plata tati pu che ñi yenieal ülmen mongen. Tañi femün meu pengelqueingün tañi rüf quimquenofiel ta Ngünechen, feimu quimfali tañi rüf püramyequenofiel ta Ngünechen (papeltuaimi 1 Juan 4:8).
3. Chau Dios, ¿chum duamcülequei pu coilaque religion ñi femün meu?
Ngüneduamfiel mu eimi com tati huesaque dungu ñi femqueel pu coilaque religion, huesa duamelpelaeimu. Fei, ¿doi huesa duamcülenoafulu am Chau Ngünechen? Jehová rume piuqueyechequei, feimu rume lladcütuniefi pu loncolechi religioso huesalcaquefilu pu che. Chau Dios feipicünui pichiñma mu ñi apümcayafiel pu coilaque religion, ‘fei turpu ta pengehuelayai’ (Apocalipsis 18:8, 21).
DOI QUIMAIMI
Doi quimaiñ chem raquiduamquei Jehová pu coilaque religion meu. Doi inaduamafiyiñ ñi chumqueel pu coilaque religion, ca quimtucuaiñ chumngelu fente falin-ngei quimafiel ta Ngünechen, huesa femlu rume pu coilaque religion.
4. Jehová ayüquelafi tati coilaque religion
Fentren che feipiquei: “Chem religion conliyiñ rume, com quelluafeiñmu taiñ fülmanieafiel ta Ngünechen”. Huelu, ¿rüfngepei mai tüfa? Papeltuaiñ Mateo 7:13, 14, ca ngüneduamaiñ tüfachi ramtun:
Tüfachi troquiñ Biblia ñi feipin mu, ¿chem rüpü meu conafuiñ taiñ rumel mongen nieal?
Peaiñ ti VIDEO, ca ngüneduamaiñ tüfachi ramtun.
¿Quimeltupei Biblia Chau Ngünechen ñi cüme troquiniefiel com pu religion?
5. Pu coilaque religion inayentuquelafi Ngünechen ñi piuqueyechequen
Pu coilaque religion tañi coneltulen mu hueichan cam aucan mu, illamcaquefingün ta Ngünechen. Tami doi quimal chumngechi pu coilaque religion conqueingün hueichan meu, peaiñ ti VIDEO. Fei hula ngüneduamaiñ tüfachi epu ramtun.
Tati Segunda Guerra Mundial mu, ¿chumingün fentren religion?
¿Chem raquiduamqueimi pu coilaque religion tañi femün meu?
Papeltuaiñ Juan 13:34, 35 ca 17:16, fei ngüneduamaiñ tüfachi epu ramtun:
Fentren religion conquei hueichan cam aucan mu, fei ¿chum duamquei Jehová?
Pu coilaque religion inayentuquelafi Ngünechen ñi piuqueyechequen. Eimi cai, ¿chumngelu feipiafuimi ñi rüfngen tüfa?
Coilaque religion inayentuquelafi Chau Dios ñi piuquecheyequen.
6. Chau Dios ayüniei ñi montulafiel pu che ti coilaque religion meu
Papeltuaiñ Apocalipsis 18:4,b ca ngüneduamaiñ tüfachi ramtun:
Chau Dios ayüniei ñi montulafiel com feichi che ñi ngünencanieteu pu coilaque religion, ¿chum duamelqueimu tüfa?
7. Amulepe tami quimniefiel ta Ngünechen
Pu coilaque religion ñi femqueel, ¿catrütupeafeiñmu mai taiñ fülmanieafiel ta Ngünechen mu? Raquiduamnge tüfachi dungu meu: quiñe fotüm eluhui ñi inahuenoal tañi chau ñi feipieteu, fei tripatui tañi ruca meu ca coni huesaque dungu mu. ¿Culpantucungepeafui mai ti chau tañi fotüm ñi huesa femün meu?
¿Chumngelu culpatulayafuiñ ta Chau Dios pu coilaque religion ñi huesaque femün meu? Ca, ¿chumngelu fentecünulayaiñ taiñ quimniefiel ta Ngünechen?
QUIÑEQUE CHE FEIPIAFEIMU: “Tati religion re huesalcachequei, feimu ayüquelan doi quimafiel ta Ngünechen”.
¿Ca femngechi raquiduamquepeimi mai?
Huesaque dungu femle rume pu coilaque religion, ¿chumngelu amuleai tami quimnieafiel ta Ngünechen?
TAMI QUIMEL
Pu coilaque religion tañi quimeltun ca huesa femün meu illamcaquefingün ta Ngünechen. Feimu Jehová apümcayafi engün.
¿Chem piafuimi?
¿Chem raquiduamqueimi pu coilaque religion ñi femün ca quimeltun meu?
Jehová, ¿chem raquiduamquei tati coilaque religion meu?
Chau Ngünechen, ¿chem chumafi pu coilaque religion cüpalechi antü meu?
CA PEAFUIMI
Quimfinge chumngechi pu coilaque religion ayühulquelafi ta Ngünechen.
“¿Com pu religion fültucuqueiñmu Ngünechen mu?” (Troquiñ internet mu)
Quiñentrür taiñ pu peñi ca pu lamngen iñchiñ poyeafiyiñ ta Jehová, ¿chumngelu?
“¿Duamfali ñi coneltuleal quiñe religion mu ta che?” (Troquiñ internet mu)
Quiñe sacerdote epurume raquiduamcülefui tañi feyentun mu, huelu eluhui ñi quimal ti rüf dungu Chau Dios mu.
“Quiñe sacerdote elcünui tañi Iglesia” (¡Tami quimafel! febrero, 2015)
Quimfinge cüla coilaque dungu ñi quimeltungequeel Ngünechen meu ca chuchi am tati rüf dungu.
“Quiñeque coila püntünentuqueiñmu Chau Dios” (Ti Huerquen 1 noviembre, 2013)
a Chemu.
b Biblia meu, trürümfalngei pu coilaque religion quiñe domo mu, Fütra Babilonia feipingequelu. Fei, ¿chumngelu femngechi feipingequei? Pefinge ti doi quimafiel ti dungu 1.