TROKIÑ ÑI CHILLKATUNGEAL 10
Piwkeyefilmi ta Jewba, fautisawürpuafuymi
“Tüfa mew müley ta ko. ¿Kümepelayafuy may ñi fautisangeal ta iñche?” (HECHO 8:36).
37 ÜLKANTUN Poyeafiñ Jewba kom tañi piwke mu
¿CHEM KIMAIÑ?a
1, 2. Hecho 8:27-31, 35, 36, 38 ñi feypin, ¿chumngelu eluwi tañi fautisawal tati etiopia wentru?
¿AYÜPEYMI MAY tami fautisawal, femngechi Kristo ñi discipulo ngerpual? Fentren che eluwkey ñi fautisawal, fente tañi piwkeyefiel ta Chaw Ngünechen ka fente ñi mañumkülen kom tañi eluetew. Inaduamaiñ ñi rupan kiñe wentru küdawelkefilu kiñe longko ülmen domo Etiopia mapu mu.
2 Tati etiopia wentru kimürpulu müten chem ñi feypilen tati Wirin Chillka, eluwi ñi fautisawal (papeltunge Hecho 8:27-31, 35, 36, 38). Tüfachi wentru dew piwkeyefi ta Jewba, feymu amufuy Jerusalen waria mew ñi poyeafiel ta Ngünechen. Elkünuy tañi kuyfi feyentun, fey ñi kiñewal tati kiñen trokiñche poyekefilu ta Jewba. Fey, ¿chumngelu (chemu) fautisawi? Tüfachi wentru rume duamtukefuy Ngünechen tañi Dungu. Petu amulelu tañi carreta mu, papeltulefuy chem ñi feypilen ti lifru Isaías. Kimeltulelngelu chem ñi femün Jesus, kidu tañi duam mu, ti etiopia wentru pengeli ñi doy mañumkülen. Feymu, fente tañi piwkeyefiel ta Jewba eluwi ñi fautisawal ka inanieafiel ta Jesukristo (Mat. 28:19).
3. Kiñeke che, ¿chumngelu wiño witrawtuafuy fautisawal? (Inaduamnge ti wichulechi dungu “¿Chem mapu mew trürümngeafuy tañi piwke?”).
3 Tami piwkeyefiel ta Jewba nengümafeymu tami fautisawal. Welu kafey tami piwkeyefiel mu fillke dungu witrawtuafuymi tami fautisawal. Rume piwkeyefimi tami pu che ka tami pu weni poyekenofilu ta Jewba, fey rakiduamafuymi “fautisawli, püntünentuafenew engün” (Mat. 10:37). Kam rume piwkeyefimi chi fillke wimtun Chaw Ngünechen ñi üdekeel, fey küdawtuafuymi tami femwenoal (Sal. 97:10). Kam fentren tripantu konkeymi chi fillke fiesta mu ñi femkeel tati koylake religion, feymu küdawtuafuymi famentuafiel feychi fiesta (1 Kor. 10:20, 21). Feymu kümey tami ramtuwal: “¿Chem dungu doy piwkeyeniefiñ?”.
INEY TAMI DOY PIWKEYERPUAFIEL
4. ¿Chem doy falin-ngey tami femal, fey tami fautisawal?
4 Petu tami chillkatunon tati Biblia pu Dungukelu Iney Ngen Jewba engün, yampelafuymi tati Biblia. Ka piwkeyerpupelafimi ta Jesus. Fey wüla, kimürpufimi pu peñi ka pu lamngen trawünche mu, feymu rume ayükepelaymi kiñewküleal kidu engün mew. Piwkeyefilmi rume kom tüfachi dungu, eluwkülelaymi chi tami fautisawal. Welu tami fautisawal, doy falin-ngey tami rüf piwkeyeafiel ta Jewba. Femngechi femülmi, chem dungu no rume katrütulayaeymu tami küdawelafiel Jewba. Tüfa kelluaeymu tami fautisawal ka tami püntütripanoal Jewba mu.
5. ¿Chem ngüneduamaiñ tüfachi chillkatun mu?
5 Jesus werküeiñmu taiñ piwkeyeafiel ta Jewba kom taiñ piwke mew, kom taiñ rakiduam mew, ka kom taiñ kimün mew ka kom taiñ newen mew (Mar. 12:30). ¿Chumngechi fente piwkeyeafuymi ka yamnieafuymi ta Jewba? Müley tami rakiduamal tami rume piwkeyenieetew Jewba, fey tüfa kelluaeymu tami ka piwkeyenieafiel ta Jewba (1 Juan 4:19). Tüfachi chillkatun mu, ngüneduamaiñ chem müley tami femal tami doy piwkeyeafiel ta Jewba, fey tami fautisawal?
6. Romanu 1:20 ñi feypin, ¿chumngechi doy küme kimürpuafuymi ta Jewba?
6 Inaduamafimi Jewba tañi dewmael, fey tami doy küme kimürpuafiel (papeltunge Romanu 1:20; Apok. 4:11). Rakiduamnge chumngechi ñi felen tati anümka ka tati pu kulliñ, fey ngüneduamafuymi tunten kimün ñi nien Jewba. Ka femngechi inaduamafuymi chumngechi taiñ fente küme dewmangen iñchiñ (Sal. 139:14). Ka rakiduamnge tunte ñi newen-ngen Jewba tañi dewmael ti Antü ka fentren wangülen (Is. 40:26).b Küme ngüneduamfilmi kom ñi dewmael Chaw Ngünechen, doy yamnieafimi. Falin-ngey kimal fente ñi adümuwün-ngen ta Jewba, welu taiñ rüf piwkeyeafiel ka küme weniyeafiel, ka kiñe dungu müley taiñ femal.
7. Tami rüf piwkeyeafiel ta Jewba, ¿chem müley tami kimtukunieal?
7 Duamfali tami kimtukunieal Jewba tami rüf piwkeyenieetew ta eymi, feymu piwkeyerpuafimi. “Taiñ Fütra Chaw Ngünechen dewmakelu itrokom mülelu duampeafenew iñche” piafuymi chi. Welu longkontukunge Jewba ñi “alü kamapulenon kake kiñeke iñchiñ mew” (Hecho 17:26-28). Jewba ‘ngüneduamkefi kom pu piwke’, fey “kintufilmi, eluway tami peafiel” (1 Crón. 28:9). Jewba feypieymu: “Küpaleyu iñche mew”. Feymu eymi chillkatukeymi Biblia (Jer. 31:3). Doy kimürpulmi chem ñi chumün Jewba eymi mu, doy piwkeyerpuafimi.
8. ¿Chumngechi mañumtuafuymi ta Jewba tami fente tami piwkeyenieetew?
8 Llellipufiel mu iñchiñ ta Jewba, pengelkefiyiñ taiñ mañumkülen fente taiñ piwkeyenieetew. Feymu feypiafimi ta Jewba fillke dungu tami rupameken ka tami rakiduamkülen ka mañumtuafimi fillke dungu femel eymi mu, femngechi tami piwkeyefiel ta Jewba doy newenküleay. Ngüneduamülmi chumngechi tami wiñoldunguetew Jewba tami llellipuel, doy küme weniyeafimi (Sal. 116:1). Rüf maneluwküleaymi Jewba ñi küme kimnieel tami chem rupameken. Welu tami rüf fülmawal Chaw Ngünechen mu, müley tami kimal chem ñi ayükeel ka chem ñi ayükenoel. Kafey müley tami kimal chem ayükey Jewba tami femal. Tami kimal kom tüfachi dungu, müley tami chillkatual tati Biblia.
Tami rüf fülmawal Chaw Ngünechen mu, müley tami chillkatual ti Biblia, femngechi kimaymi chem ayükey Jewba tami femal. (Inaduamnge parrafo 9).c
9. ¿Chumngechi pengelafuymi tami falintufiel tati Biblia?
9 Falinturpuafimi tati Biblia. Tati Biblia müten feypikeeiñmu ti rüf dungu Jewba mu ka chem ayükey taiñ femal. ¿Chumngechi pengelafuymi tami falintufiel tati Biblia? Fill antü papeltuafimi, pepikawaymi tami kimeltumekengen mew ka inayaymi tami kimürpuel (Sal. 119:97, 99; Juan 17:17). Feymu ramtuwafuymi: “¿Papeltukepen may Biblia fill antü chumngechi ñi adkünuel?”.
10. ¿Chem falinke dungu müley tati Biblia mew müten?
10 Tati Biblia mew müten wirikonküley ñi nütramkael tati pu che pefilu Jesus tañi femün. Kafey tati Biblia müten kimeltukeeiñmu ñi femün Jesus iñchiñ mew. Kimürpulmi Jesus ñi feypin ka tañi femün, doy eluwafuymi tami weniyeafiel.
11. ¿Chem kelluaeymu tami piwkeyeafiel ta Jewba?
11 Piwkeyerpuafimi ta Jesus, femngechi tami doy piwkeyeafiel ta Jewba. ¿Chumngelu chi kay? Jesus rume küme inayentukefi ñi chumngen tañi Chaw (Juan 14:9). Feymu doy küme kimürpufilmi ta Jesus, doy küme kimürpuafimi ta Jewba, fey doy piwkeyeafimi. Rakiduamnge fente ñi kutranpiwkeyefiel Jesus tati pu che illamkangelu, pu pofre, pu kutran ka pu kuñifallkülelu. Ka rakiduamnge fente ñi kümelkaletun tami mongen tami inaniefiel Jesus tañi ngülam (Mat. 5:1-11; 7:24-27).
12. Kimtukunielmi Jesus tañi femün, ¿chem eluwafuymi tami femal?
12 Tami doy piwkeyerpuafiel ta Jesus, ka rakiduamafuymi Jesus ñi wülün tañi mongen, femngechi ñi wiñoduamtungeal tami culpan (Mat. 20:28). Femngechi kimtukunielmi Jesus ñi lapan eymi tami duam mu, eluwafuymi tami küme rakiduamtual ka llellipuafuymi ta Jewba ñi rulpakünual tami culpan (Hecho 3:19, 20; 1 Juan 1:9). Doy piwkeyefilmi ta Jewba ka Jesus, doy fülkonaymi Jewba tañi pu che mu.
13. ¿Chem elueymu Jewba?
13 Piwkeyerpuafimi Jewba tañi pu che. Tami pu che ka tami pu kuyfike weni kimlayafuy chi chumngelu ayünieymi tami küdawelafiel ta Jewba. Feymu kayñetungeafuymi chi. Welu Jewba eluaeymu pu peñi ka pu lamngen trawünche mu, fey engün tami familia reke feleay. Fülkonkülelmi pu peñi ka lamngen mu, kidu engün rume piwkeyeaeymu ka yafültukuaeymu (Mar. 10:29, 30; Eb. 10:24, 25). Rupale chi antü, tami pu che kafey eluwafuyngün chi ñi poyeafiel ta Jewba ka inayafiel tañi ngülam (1 Ped. 2:12).
14. Ñi feypin 1 Juan 5:3, ¿kümepey may inangeal Jewba tañi ngülam? ¿Chem pimi?
14 Piwkeyerpuafimi ka inayafimi Jewba tañi ngülam. Petu tami kimnofiel ta Jewba, kidutu ngünewkefuymi tami chem chumal, welu fewla kimnieymi doy kümey inayal Jewba tañi ngülam (Sal. 1:1-3; papeltunge 1 Juan 5:3). Rakiduamnge Biblia ñi ngülamtukefiel tati pu kurewen, pu chaw ka pu pichikeche (Efes. 5:22–6:4). Feymu inafilu eymi Jewba tañi ngülam, doy ayüwkülepelaymi ka doy küme yewkülepelaymi tami pu che engün. Kafey inafilu eymi Biblia ñi ngülam, kümeke weni nierpuymi, fey doy küme chengepelaymi chi (Prov. 13:20; 1 Kor. 15:33).
15. Kimnolmi chumngechi inayal Biblia ñi ngülam, ¿chumafuymi?
15 Kiñeke mu, kimlayafuymi chumngechi inayal Biblia ñi ngülam tami mongen mew. Feymu Jewba elueymu fentren wirin papel ka lifru tami doy küme adümafiel tati Biblia, femngechi kimürpuafuymi chem ñi kümen ka chem ñi kümenon (Eb. 5:13, 14). Chillkatufilmi tüfachi papel ka lifru, peafuymi fillke ngülam tami inayafiel tami mongen mu, fey ayürpuafuymi konal Jewba tañi trokiñche mu.
16. Jewba, ¿chumngechi adkünufi tañi trokiñche?
16 Piwkeyerpuafimi Jewba tañi trokiñche ka kelluntukuafimi. Jewba elkünufi tañi pu che fillke trawünche mu, ka longkokünufi ta Jesus kom tüfachi pu trawünche mu (Efes. 1:22; 5:23). Jesus elkünufi pichiken wentru ñi adnieafiel ti küdaw ñi femkeel wall Mapu püle. Jesus üytukulelfi “kim manelfal kona” tüfachi trokiñ wentru, “esclavo fiel y prudente” feypingetuy wingkadungun mu. Tüfa engün eluwkey tami kelluaetew, femngechi tami weniyeafiel ta Chaw Ngünechen ka tami püntütripanoal kidu mu (Mat. 24:45, TNM; 24:46, 47). Tüfachi trokiñ wentru duamtueymu, feymu adkünuy ñi dullingeal manelfal wentru ñi longkoleal ti trawünche, fey tüfa engün küme adnieaeymu ka kuñiwtukuaeymu (Is. 32:1, 2; Eb. 13:17; 1 Ped. 5:2, 3). Pu longkolelu rume küdawkey eymi tami duam mu, fey yafültukukeeymu ka kellukeeymu tami doy fülkonal Jewba mew. Doyelchi may pu longkolelu kellukeeymu tami kimeltulelafiel tati pu che Jewba ñi dungu (Efes. 4:11-13).
17. Ñi feypilen Romanu 10:10, 13, 14, ¿chumngelu kimeltuchekeiñ Jewba tañi dungu?
17 Kimeltulelafimi ta kakelu che ñi piwkeyerpuafiel ta Jewba. Jesus feypifi tañi pu inanieetew ñi kimeltucheal Jewba tañi dungu (Mat. 28:19, 20). Iñchiñ inaniekefiyiñ Jesus tañi werkün dungu, feymu eluwküleiñ taiñ kimeltucheal. Welu doyelchi may kimeltuchekeiñ fente taiñ piwkeyefiel ta Jewba. Rakiduamkeiñ Pedro ka Juan reke, kidu engu feypi: “Iñchiw ta ngelay tayu ellkakünual tüfachi dungu tayu peel ka tayu allküel” (Hecho 4:20). Rume ayüwün-ngey kelluafiel pu che ñi piwkeyerpuafiel ta Jewba. Kuyfi mu, Felipe rume ayüwkülepelay kimeltulelfilu tati rüf dungu feychi etiopia wentru, fey fautisawürkey. Feymu inayentuafimi Felipe ñi femün ka eluwnge tami amuldungucheal, femngechi pengelaymi tami küpa konkülen Jewba tañi trokiñche mu (papeltunge Romanu 10:10, 13, 14). Fente taiñ ngüneduampeel tüfachi chillkatun mu, ramtuwmekepelaymi: “¿Kümepelayafuy may ñi fautisangeal ta iñche?” (Hecho 8:36).
18. ¿Chem ngüneduamaiñ küpalechi chillkatun mew?
18 Tati fautisawün, fey tati doy falin dungu ñi dulliafiel kiñe che. Feymu eluwülmi tami fautisawal, müley tami küme ngüneduamal fente ñi falin-ngen tüfachi dungu. Küpalechi chillkatun mu ngüneduamaiñ küla ramtun: ¿Chem müley tami kimal ti fautisawün dungu mu? Petu tami fautisawnon, ¿chem müley tami femal? Ka dew fautisawülmi, ¿chumaymi?
2 ÜLKANTUN “Jewba pingey tami üy”
a Kiñeke che piwkeyefilu ta Jewba rakiduamkey ñi pepikawkülenon tañi fautisawal ka konal Jewba tañi trokiñche mu. Femngechi rakiduamülmi, tüfachi chillkatun mew peaymi chem müley tami femal, fey tami fautisawal.
b Tami ngüneduamafiel kakelu dungu ñi dewmael Jewba, inaduamafuymi fillke video tripalu JW Library® mu, amunge ta MULTIMEDIA > LA BIBLIA > LA CREACIÓN, fey dullinge ñi pengelal mapudungun mu. Kafey inaduamafuymi ti papel ¿Es la vida obra de un Creador? ka ti papel El origen de la vida. Cinco cuestiones dignas de análisis.
c ¿CHEM PENGELI TI ADENTUN? Kiñe lamngen ngillayawi, fey elufi kiñe pichi papel wirilelu ta kiñe üllcha domo fendepelu.