Jewba kellukeeiñmu, feymu llükalayaiñ

 1. Rupan mu iñchiñ wedake dungu, ¿chem kelluafeiñmu? (Salmo 118:⁠5-7).

KIÑEKE mu rupalmi wedake dungu mu, ¿kidulelu trokiwkepeymi may? “Nielan iney rume tañi kelluaetew”, ¿pikeymi chi? Femngechi dungu rakiduamkülelmi, eymi müten no. Fentren che poyekefilu ta Jewba ka femngechi rakiduamürpuyngün kiñeke mu (1 Rey. 19:⁠14). Rupan mu weda dungu, longkontukuaiñ taiñ feypikünuetew Jewba: “Chumkawnorume kidukünulayaeyu ka elkünulayaeyu rume”. Feymu maneluwün mu, feypiafuiñ: “Ngünechen kellukeenew ta iñche, feymew llükalayan” (Eb. 13:⁠5, 6). Pablo wirintukulelfi tüfachi dungu tati pu cristiano mülelu Judea 61 tripantu mu. Ñi feypiel ta Pablo trüri tañi feypiel kiñe salmista kuyfi. Biblia feypi: “Kutrankawün mu iñche, llellipufiñ ta Jewba. Fey Jewba llowdunguenew ka yeenew chew ñi mülenon kuñiwün dungu. Jewba müley iñche mew, feymew llükalayan. ¿Chem chumaenew am ta che? Jewba müley iñche mu tañi kelluaetew, fey pean chumngechi ñi wewngen tañi pu kayñe” (Salmo 118:⁠5-7).

 2. 1) ¿Chem ngüneduamaiñ tüfachi trokiñ mu? 2) ¿Chumngechi kelluaeiñmu?

² Ti salmista reke, Pablo pey fentren rupa ñi kelluetew Jewba, feymu rüf maneluwkülefuy tañi ka kellungeal. Petu ñi wirintukunofiel ti carta tati pu ebrew, Pablo kuñiwün dungu mu rupay. Amuy kamapu farcu mu, fey fütra kürüftuku mawün mülerkey lafken mu (Hecho 27:⁠4, 15, 20). Feychi mu ka fentren rupa Jewba kellufi ta Pablo fillke dungu mu. Peafiyiñ chumngechi kellueyew. Ñi kelluafiel ta Pablo, Jewba adniefi Jesus ka pu kümeke püllü, kiñeke che autoridadkülelu ka kiñeke cristiano. Ngüneduamafiel tüfachi dungu kelluaeiñmu taiñ doy maneluwküleal taiñ kelluaetew Jewba weda dungu mu rupaliyiñ ta iñchiñ.

 3. 1) ¿Chem dungu mew rupay ta Pablo? 2) ¿Chem ramtuwmekefuy chi?

³ Pablo duamniefuy tañi kellungeal. 56 tripantu peno Pablo wingüdentungey ti ngillatuwe ruka mu, pu che ayüfuy ñi langümaetew. Kiñe antü rupalu, yengey tati Sanedrin mu, tañi pu kayñe ayüfuy tañi allfülkayaetew müten (Hecho 21:⁠30-32; 22:⁠30; 23:⁠6-10). Feymu Pablo ramtuwkefuy chi: “¿Tuntepu mu am afay tañi weda rupameken?”.

 4. Jewba, ¿chumngechi adniefi ta Jesus ñi kelluafiel ta Pablo?

⁴ ¿Chumngechi kellungey ta Pablo? Feychi pun presungelu ta Pablo, pewfaluwi ta Jesus ka feypieyew: “Yafüluwnge, Pablo. Chumngechi nütramyeen ta iñche faw Jerusalen mew, ka femngechi feley tami femal ta Roma waria mew” (Hecho 23:⁠11). Rume yafüluwpelay Pablo allkütulu tüfa. Jesus sakifi ta Pablo tañi küme amuldungun Jerusalen waria mu. Ka feypifi ñi küme puwal ta Roma mew, fey ñi ka wüldungupual üye mu. Feymu rume küme duamkülepelafuy ta Pablo, kiñe pichi wentru reke ñi afkadinieetew tañi chaw.

 5. Jewba, ¿chumngechi adniefi kiñe küme püllü ñi kelluafiel ta Pablo? (Inaduamnge ti adentun wenulelu).

⁵ ¿Ka chem dungu mew rupay ta Pablo? Epu tripantu rupalu, Pablo amuy kiñe farcu mu ta Italia, fey fütra kürüftuku mawüni, feymu kom pu amulelu ti farcu mu layalu trokiwingün. Welu Pablo feypifi engün: “Trafia pun pewfaluwenew kiñe werken püllü, [...] fey feypienew: ‘Llükalekilnge, Pablo, pewfaluwmealu am ta eymi tati Roma tuwchi emperador mew, eymi tami duam Ngünechen ta montulafi lan mew kom tati mülelu eymi engün ti farcu mew’”. Feymu Pablo llükalelafuy. Jewba tañi duam mu, kiñe küme püllü feypimefi ta Pablo ñi puwal ta Roma mu. Femngechi Pablo wiño feypingey tañi feypikünuetew ta Jesus. Rupalechi antü mu, Pablo rüf puwi ta Roma chumngechi tañi feypikünuetew ta Jewba (Hecho 27:⁠20-25; 28:⁠16).

 6. 1) ¿Chem feypikünueiñmu Jesus? 2) ¿Chumngelu duamnieiñ taiñ yafültukungeal?

⁶ ¿Iñchiñ kay? ¿Chumngechi kellungekeiñ? Jesus ta kelluaeiñmu chumngechi ñi kellufiel ta Pablo. Jesus feypikünufi kom tañi pu inanieetew: “Iñche rumel mülean ta eymün mew” (Mat. 28:⁠20). Ñi feypiel ta Jesus yafültukukeeiñmu famülke mu. ¿Chemu am? Famülke mu iñchiñ rupakeiñ fentren wedake dungu mu, feymu ka yafültukukeeiñmu Jesus tañi feypin. Layeluwliyiñ, fentren tripantu weñangkülerpuafuiñ. Kiñeke peñi ka lamngen kutrankawkeyngün tañi füchalen mu. Ka kiñeke peñi ka lamngen kontueyew depresion pingechi kutran, feymu rume sufrikeyngün. Welu chem dungu mu rume rupaliyiñ, kimnieiñ Jesus ñi rumel mülen iñchiñ mu, feymu yafüluwküleiñ (Mat. 11:⁠28-30).

 7. Ñi feypin Apokalipsi 14:⁠6, ¿iney engün adniefi Jewba taiñ kelluaetew?

⁷ Biblia feypiley Jewba ta kellukeeiñmu tañi pu kümeke püllü mu (Eb. 1:⁠14). Pu kümeke püllü kellukeeiñmu taiñ amuldunguafiel Chaw Dios tañi kümeke dungu “itrokom trokiñke mapu, ka tripanche, dungun ka trokiñche” (papeltunge Apokalipsi 14:⁠6; Mat. 24:⁠13, 14).

 8. Jewba tañi adkünuel mu, ¿chumngechi kiñe comandante kellufi ta Pablo?

⁸ ¿Chumngechi kellungey ta Pablo? 56 tripantu mu, Jesus feypifi ta Pablo ñi puwal ta Roma. Welu kiñeke judio Jerusalen mülelu ayüfuy ñi langümafiel ta Pablo. Ti comandante Klawdio Lisias pingelu allküy chem ñi pepikanieel tati pu judio, feymu eluwi ñi kelluafiel ta Pablo. Feymu werküfi kiñeke weychafe ñi cuidayafiel ta Pablo, femngechi Pablo yengey ta Sesarea mu fütra kamapulelu Jerusalen mu. Sesarea waria mu, ti gobernador Felik pingelu werküy ñi ingkañpengeal ta Pablo “Erode tañi ülmen ruka mew”. Feymu pu judio wedalkalayafuyngün ta Pablo feychi mu (Hecho 23:⁠12-35).

 9. Ti gobernador Festo, ¿chumngechi kellufi ta Pablo?

⁹ Epu tripantu rupay, fey 58 tripantu mu Pablo petu presuley Sesarea mu. Fey Felik elkünutuy ñi gobernadorküleal, fey gobernadorngetuy Festo. Pu judio feypifingün ta Festo ñi yengeal ta Pablo Jerusalen waria mu. Welu Festo kimniefuy chi pu judio ayüniey ñi langümafiel ta Pablo rüpü mu, feymu pilay tañi yengeal (Hecho 24:⁠27–25:⁠5).

10. Pablo feypilu ñi küpa amun ta Roma, ¿chumi Festo?

¹⁰ Rupachi antü mu, Pablo juiciantukungey Sesarea mu. Festo ayüy “ñi kümelkawküleal ti pu judio engün”. Feymu ramtufi ta Pablo: “¿Küpa amuymi am ta Jerusalen, üyew tañi inaramtumeal iñche eymi tami dungu?”. Pablo kimniefuy tañi langümngeafel ta Jerusalen mu ka kimniefuy ñi amual ta Roma mu ñi amuldungulepual. Feymu Pablo feypifi ta Festo: “Iñche duamtun tati emperador tañi inaramtulaetew ñi femelchi dungu”. Feymew Festo ta feypieyew: “Eymi am dew feypilu tati emperador tami inaramtuaetew, tati emperador mew ta amuaymi”. Ñi dulliel ta Festo, montulfi ta Pablo tañi pu kayñe mu (Hecho 25:⁠6-12).

11. Pablo, ¿chem dungu ñi feypiel Isaías rakiduami chi?

¹¹ Petu esperalelu ñi yengeal ta Italia, Pablo rakiduampelay ñi chem pifiel Isaías Jewba tañi pu kayñe: “¡Adkünumün chem rume tamün chumal, welu küme tripalayay! ¡Chem pilmün rume, weda tripayay! Chaw Dios llemay müley iñchiñ mu” (Is. 8:⁠10). Pablo kimniefuy ñi rüf kelluaetew ta Jewba, feymu doy yafüluwpelay tañi chaftual chem wedake dungu ñi küpalen.

12. 1) Julio, ¿chumfi ta Pablo? 2) Kümelkangelu ta Pablo, ¿chem ngüneduami chi?

¹² Pablo presu yengey ta Italia, fey chalintukungey kiñe capitan mu Julio pingelu. Julio autoridad niefuy, feymu dulliafuy ñi kümelkayafiel kam ñi wedalkayafiel ta Pablo. ¿Chumi kay Julio? Rumerpulu engün kiñe waria mu, ‘Julio rume küme fürenefi ta Pablo, fey elufi ñi witran-ngemeal ñi pu weni mew ka ñi poyengeal’. Rupalechi antü mu wiño amulerpulu engün ti farcu mu, teyfükangey, feymu pu soltau ayüfuy ñi langümafiel kom pu presu tañi lefmawnoal. Welu Julio “küpa montulniefilu am ta Pablo”, katrütufi pu soltau tañi femnoal. Pablo ngüneduampelay Jewba ñi adniefiel ta Julio ñi kelluaetew ka ingkañpeaetew (Hecho 27:⁠1-3, 42-44).

13. Jewba, ¿chumngechi adnieafuy pu autoridadkülelu?

¹³ ¿Iñchiñ kay? ¿Chumngechi kellungekeiñ? Kiñeke mu Jewba tañi newen mu adniekefi pu autoridadkülelu ñi femal chem tañi ayükeel. Fütra kuyfi, Salomon feypi: “Ti longko ülmen ñi piwke kiñe wütrunko reke feley Jewba tañi kuwü mew. Fey adniekefi chumngechi ñi ayükeel” (Prov. 21:⁠1). ¿Chem kimeltukeeiñmu tüfachi dungu? Tati pu che wütrul amulafuy ti ko chew rume tañi ayünieel. Ka femngechi kiñeke mu Jewba tañi newen mu adniefi tati pu che ñi femal chem rume tañi ayünieel, feymu kiñe wütrunko reke feleyngün Jewba tañi kuwü mew. Jewba femün mu tüfa, pu autoridadkülelu eluwkey ñi kümelkayafiel Chaw Dios tañi pu che (ka ngüneduamafuymi Esdras 7:⁠21, 25, 26).

14. Ñi feypin Hecho 12:⁠5, ¿chem llellipuafuiñ ta Jewba?

¹⁴ ¿Chumafuiñ kay? Kiñeke mu pu autoridadkülelu müley ñi dullial falinke dungu. Tañi feypin mu engün elungeafuiñ taiñ küme poyenieafiel ta Jewba kam katrütungeafuiñ taiñ femal. Feymu femngechi dungu rupale, llellipuafuiñ ta Jewba tañi küme dullial engün (Neh. 1:⁠11; 1 Tim. 2:⁠1, 2). Kafey pu wünenke cristiano reke, llellipukefiyiñ ta Jewba ñi kelluafiel pu peñi ka pu lamngen presulelu (papeltunge Hecho 12:⁠5; Eb. 13:⁠3). Ka llellipuafuiñ ta Jewba ñi adnieafiel pu guardialelu chew ñi presulen pu peñi ka pu lamngen, femngechi pu guardia kümelkayafuyngün taiñ pu peñi ka pu lamngen chumngechi Julio kümelkafi ta Pablo.

15, 16. Jewba, ¿chumngechi adniefi Luka ka Aristarku ñi kelluafiel ta Pablo?

¹⁵ ¿Chumngechi kellungey ta Pablo? Pablo amulu ta Roma, fentren peñi ka lamngen kellueyew Jewba tañi adkünuel mu. Peafiyiñ kiñeke rupan dungu.

¹⁶ Aristarku ka Luka, Pablo ñi weni ngefuy, eluwingu ñi compañafiel Roma mu.⁠b Jesus feypikünufi ta Pablo müten ñi küme puwal ta Roma. Aristarku ka Luka feypingelayngu chi, welu amuyngu müten ñi compañafiel ta Pablo kuñiwün-ngefulu rume. Rüpütulelu wüla Pablo engün, Aristarku ka Luka feypingey ñi küme puwal ta Roma. Pablo mañumtupelafi ta Jewba ñi adniefiel ta Aristarku ka Luka tañi rume küme kelluaetew (Hecho 27:⁠1, 2, 20-25).

17. Jewba, ¿chumngechi adkünufi kiñeke cristiano ñi kelluafiel ta Pablo?

¹⁷ Amulerpulu ta Roma, Pablo fentren rupa kellueyew tañi pu peñi ka lamngen. Rumerpulu engün ta Sidon waria mew, Pablo elungey “ñi witran-ngemeal ñi pu weni mew ka ñi poyengeal”. Ka rumerpulu engün Puteoli waria mu, kiñeke cristiano mangeleyew ñi ‘mülenagal kidu engün mew kiñe semana’. Feychi mu, Pablo ka tañi pu compañ poyetueyew pu cristiano, fey Pablo nütramkalelfi kümeke dungu tañi yafültukuafiel engün (ka ngüneduamafuymi Hecho 15:⁠2, 3). Fey wüla Pablo ka tañi pu compañ amulerpuy farcu mu ñi puwal ta Roma (Hecho 27:⁠3; 28:⁠13, 14).

18. ¿Chumngelu Pablo mañumtufi ta Jewba ka doy yafüluwtuy?

¹⁸ Pablo feypifuy pu cristiano mülelu ta Roma: “Fentren tripantu tañi ayükefel iñche tamün pewmeafiel” pifi (Rom. 15:⁠23). Feymu fewla puwlu ta Roma, rakiduampelay feychi dungu tañi feypiel. Welu Pablo rakiduamlafuy rume ñi presulen puwal ta Roma. Feymu pefilu ñi llowmekeetew fentren peñi ka lamngen, rume ayüwmapelay. “Pablo pefilu ti pu feyentulechi che, mañumtufi ta Ngünechen ka doy yafüluwtuy” (Hecho 28:⁠15). Pablo ngüneduamürpuy Jewba ñi adkünufiel pu peñi ka pu lamngen tañi kelluaetew, feymu mañumtufi ta Jewba.

19. Ñi feypin 1 Pedro 4:⁠10, ¿chumngechi adkünuafeiñmu Jewba taiñ kelluafiel pu duamnielu?

¹⁹ ¿Chumafuiñ kay? Taiñ trawünche mu, weda rupamekepelay kiñeke taiñ pu peñi, kiñeke taiñ pu lamngen. Kiñeke kutranküleyngün chi, layeluwingün chi. Ngüneduamliyiñ ñi duamnieel kellu kiñe peñi kam kiñe lamngen, llellipuafuiñ ta Jewba taiñ kelluaetew. Femngechi taiñ feypin ka taiñ femün mu, kelluafuiñ tati pu duamnielu (papeltunge 1 Pedro 4:⁠10).⁠c Kellufiliyiñ engün, rüf maneluwürpuay Jewba tañi feypikünuetew: “Chumkawnorume kidukünulayaeyu ka elkünulayaeyu rume”. Femliyiñ, rüf ayüwküleaiñ llemay.

20. ¿Chumngelu feypiafuiñ: “Ngünechen kellukeenew ta iñche”?

²⁰ Pablo reke iñchiñ ka rupakeiñ fentren wedake dungu mu, welu kimnieiñ Jewba ñi mülen ta iñchiñ mu, feymu yafüluwkeiñ. Jewba adniefi ta Jesus ka pu kümeke püllü taiñ kelluaetew. Kafey ñi femürpual tañi ayükeel, Jewba adniefi pu autoridadkülelu taiñ kelluaetew. Kafey tañi newen mu, Jewba adniefi pu peñi ka pu lamngen taiñ kelluaetew. Kom iñchiñ, küme kimniepelaiñ tüfa. Feymu Pablo reke, maneluwün mu feypiafuiñ: “Ngünechen kellukeenew ta iñche, feymew llükalayan. ¿Chem chumaenew anta che?” (Eb. 13:⁠6).