¿Chem quimeltuquei Biblia tati pu püllü meu?

Jehová ayülei taiñ quimafiel pu cümeque püllü mülelu huenu meu. Biblia meu feipingei engün “Ngünechen tañi pu fotüm”, feimu quiñe familia reque feleingün (Job 38:7). Biblia, ¿chem quimeltui tati pu püllü meu? ¿Chumquei pu püllü? ¿Com pu püllü coneltuleingün Jehová tañi familia meu?

1. ¿Inei engün am ti pu püllü?

Jehová petu ñi deumanofiel ta Mapu deumafi pu püllü. Jehová reque, mongeleingün huenu meu ca pepi pequelafiyiñ (Hebreos 1:14). Rume fentren püllü mülei, ca quisuque engün nieingün tañi chumngen engün (Apocalipsis 5:11). Pu cümeque püllü püramyequefingün ta Jehová ca inaniequeingün tañi feipin (Salmo 103:20). Cuifi meu, Jehová huercüfi quiñeque püllü ñi quimelelafiel falinque dungu tañi troquiñche ca montulafiel engün. Fantepu meu, pu püllü quelluquefingün pu cristiano ñi quintuafiel tati pu che ayünielu ñi fülconal Ngünechen meu.

2. ¿Inei am ta Satanás ca tañi pu huesaque püllü?

Quiñeque püllü eluhuingün ñi inahuenoafiel Jehová ñi feipin. Tati hunen püllü ñi püntühun Jehová meu ‘Huecüfü ca Satanás pingei’ quisu “ngünencamequefi com mapu müleyechi pu che” (Apocalipsis 12:9). Satanás ayüfui ñi ngünenierpual, feimu ngüchaltucufi tati hunen curehuen ñi ca caiñetuafiel ta Jehová. Fei hula Huecüfü ca ngüchaltucufi quiñeque püllü tañi inanieaeteu, tüfa engün “huesaque püllü” feipingequei. Feimu Jehová ütrüfnacümpafi Mapu meu. Cüpalechi antü meu apümcangeai engün (papeltuaimi Apocalipsis 12:9, 12).

3. Satanás ca pu huesaque püllü, ¿chumngechi ngünencayafeiñmu?

Satanás ca pu huesaque püllü fillque dungu femqueingün ñi ngünencayafiel tati pu che. Quiñeque mu pu che ngüneduamlayafui rume ñi fülmauquen pu huesaque püllü meu. Fei ¿chem dungu nüucülei pu huesaque püllü meu? Quiñeque che pemequefi pelontuchequelu, dauquelu, machi cam calcu. Ca mülei che feyentuquelu tati horoscopo meu. Caquelu che quintuqueingün lahuen nüucülelu pu huesaque püllü meu. Ca mülei che fillque dungu femquelu ñi nütramcayafiel pu la.a Huelu Jehová feipieiñmu taiñ penoafiel pu che feipiquelu ñi pepi nütramcafiel pu lalu ca pu pelontuchequelu (Levítico 19:31). Feimu Jehová ngülamtuqueiñmu taiñ huesalcanoaeteu Satanás ca tañi huesaque püllü.

DOI QUIMAIMI

4. Cümeque püllü quelluquefi tati pu che ñi quimafiel ta Jehová

Pu cümeque püllü amuldunguquelafingün tati pu che iñchiñ reque. Huelu mai adniequeiñmu taiñ peal tati pu che ayülelu ñi fülconal Jehová meu. Papeltuaiñ Apocalipsis 14:6, 7, ca ngüneduamaiñ tüfachi epu ramtun:

• Amuldungun meu, ¿chumngelu duamnieiñ taiñ adnieaeteu Jehová tañi pu püllü?

• ¿Chumngechi duamelqueimu pu cümeque püllü ñi femqueel? ¿Ca chumngelu femngechi duamcüleimi?

5. Famentufinge chem rume nüucülelu pu huesaque püllü meu

Satanás ca tañi huesaque püllü caiñetuquefi ta Jehová ca iñchiñ cafei. Papeltuaiñ Lucas 9:38-42, ca ngüneduamaiñ tüfachi ramtun:

• Pu huesaque püllü, ¿chumquefingün tati pu che?

Iñchiñ ayünielaiñ pu huesaque püllü taiñ ngünenieaeteu. Papeltuaiñ Deuteronomio 18:10-12, ca ngüneduamaiñ tüfachi epu ramtun:

• Pu huesaque püllü, ¿chumngechi ngünencayafeiñmu ca ngünenieafeiñmu? Tami lof meu, ¿chem dungu nüucülelu pu huesaque püllü meu femngequei?

• Chau Ngünechen ngülamtuqueiñmu taiñ connoal fillque dungu mu nüucülelu pu huesaque püllü meu, ¿cümepei mai ta tüfa? ¿Chem piafuimi?

Peaiñ ti VIDEO, ca ngüneduamaiñ tüfachi epu ramtun.

VIDEO: Newentuwmün tamün ngünenkanoaetew ta Weküfü (5:02)

• Ti amuleto ñi yenieel Palesa ñi püñeñ, ¿cuñihun-ngepefui mai? ¿Chumngelu femngechi piafuimi?

• ¿Chumi Palesa ñi huesalcahuenoaeteu pu huesaque püllü?

Pu rüfngechi cristiano famentuquefingün chem dungu rume nüucülelu pu huesaque püllü meu. Papeltuaiñ Hechos 19:19 ca 1 Corintios 10:21, fei ngüneduamaiñ tüfachi ramtun:

• ¿Chumngelu fente falin-ngei taiñ apümcayafiel chem dungu rume nüucülelu pu huesaque püllü meu?

6. Eimi huehuafuimi ta Satanás ca tañi huesaque püllü

Satanás loncolei pu huesaque püllü meu. Huelu Miguel loncolei pu cümeque püllü meu, tüfa cangelu üi ñi tuculelngeel ta Jesús Biblia meu. Fei ¿tunten nehuen niei Miguel? Papeltuaiñ Apocalipsis 12:7-9, ca ngüneduamaiñ tüfachi epu ramtun:

• ¿Inei am ta doi nehuen niei: Miguel ca tañi pu püllü, cam Satanás ca tañi huesaque püllü?

• Jesús tañi pu inaniequeteu, ¿mülepei mai ñi llicanieafiel ta Satanás ca ñi huesaque püllü? ¿Chem piafuimi?

Eimi huehuafuimi ta Satanás ca tañi huesaque püllü. Papeltuaiñ Santiago 4:7, ca ngüneduamaiñ tüfachi ramtun:

• ¿Chumafuimi tami huesalcanoaeteu Satanás ca tañi huesaque püllü?

TAMI QUIMEL

Satanás ca tañi huesaque püllü caiñetuquefi ta Jehová ca fillque dungu meu eluucüleingün tañi ngünencayafiel tati pu che. Huelu ca quimürpuiñ pu cümeque püllü eluucüleingün taiñ quelluaeteu fillque dungu meu.

¿Chem piafuimi?

• ¿Chumngechi pu cümeque püllü quelluquefi tati pu che ñi fülconal Jehová meu?

• ¿Inei am ta Satanás ca pu huesaque püllü?

• ¿Chumngelu fente cümei tami quiñepülecünuafiel chem dungu rume nüucülelu pu huesaque püllü meu?

CA PEAFUIMI

Jesús, Miguel ca pingequei. Fau quimürpunge chumngelu feipiqueiñ tüfa.

“¿Inei am tati loncolechi püllü Miguel pingelu?” (Troquiñ internet mu)

Quimürpunge chumngelu feipiafuiñ ñi rüf mülen ta Satanás.

“¿Rüfngepei mai ta Huecüfü?” (Troquiñ internet mu)

Ngüneduamnge chumngechi quiñe domo püntütripai pu huesaque püllü meu.

“Quimürpui chem tañi chumal ñi mongen meu” (Ti Huerquen 1 julio, 1993)

Quimürpunge chumngechi Huecüfü ngünencaquefi tati pu che calcu dungu mu.

“Tati Biblia, ¿chem feipipei mai fillque calcu dungu meu?” (¿Chumafuimi tami rumel mongen nieal?, troquiñ 5)